Pasiuna sa Doctrinal Mastery

Diha sa Basahon ni Mormon, gitudloan ni propeta Helaman ang iyang mga anak, “Kini diha sa lig-on nga sukaranan sa atong Manunubos, kinsa mao si Kristo, ang Anak sa Dios, nga kamo kinahanglan gayud motukod sa inyong tukuranan” (Helaman 5:12). Ang pagtukod og pundasyon diha kang Jesukristo—nga naglakip sa pagkasabut, pagtuo, ug pagpakabuhi subay sa Iyang doktrina—mopalawom sa atong pagkakabig ug pasalig isip Iyang mga disipulo, manalipud kanato batok sa mga impluwensya sa kaaway, ug matabangan kita sa pagpanalangin sa kinabuhi sa uban.

Usa sa mga paagi sa pagtuman niini mao ang dungan nga sumpay-sumpay nga pagtuon sa mga kasulatan diha sa klase. Laing paagi nga atong matukod ang pundasyon diha ni Jesukristo ug sa Iyang doktrina mao ang usa ka paningkamot nga gitawag og Doctrinal Mastery.

Ang Doctrinal Mastery magtutok sa duha ka sangputanan:

1. Ang pagkat-on ug paggamit sa balaang mga baruganan alang sa pag-angkon og espirituhanong kahibalo

   Ang Langitnong Amahan mipadayag sa mga baruganan alang sa pag-angkon og espirituhanong kahibalo. Kini nga mga baruganan naglakip sa paglihok pinaagi sa hugot nga pagtuo, pagsuta sa mga konsepto ug mga pangutana inubanan sa mahangturong panglantaw, ug sa dugang nga pagtinguha og panabut pinaagi sa balaanong gitudlo nga mga tinubdan. Mapalambo nato ang doctrinal mastery samtang kita mogamit niini nga mga baruganan sa sulod ug gawas sa klase ug mangita og mga tubag sa doctrinal ug historical nga mga pangutana sa paagi nga madapit ang Espiritu Santo sa pagpalig-on sa atong hugot nga pagtuo kang Jesukristo ug sa Iyang doktrina.

2. Ang pagbansay sa doktrina sa ebanghelyo ni Jesukristo ug sa mga tudling sa kasulatan diin ang doktrina gitudlo

   Kini nga sangputanan sa Doctrinal Mastery makab-ot pinaagi sa:

   1. Pagpalambo og mas dakong panabut sa matag usa sa mosunod nga siyam ka mga hisgutanan sa doktrina:

      • Ang Dios nga Kapangulohan

      • Ang plano sa kaluwasan

      • Ang Pag-ula ni Jesukristo

      • Ang Pagpahiuli

      • Mga propeta ug pagpadayag

      • Ang priesthood ug ang mga yawe sa priesthood

      • Mga ordinansa ug mga pakigsaad

      • Kaminyoon ug pamilya

      • Mga Sugo

   2. Ang pagsabut sa importanting mga pahayag sa doktrina nga natino sa “Pag-angkon og Espirituhanong Kahibalo” nga seksyon niiini nga dokumento ug sa matag usa sa siyam ka mga doktrinal nga hisgutanan.

   3. Pagkahibalo kon sa unsang paagi gitudlo ang mga importanting pamahayag sa doktrina diha sa mga doctrinal mastery passage ug sa pagkahinumdum ug pagpangita niana nga mga tudling.

   4. Ipasabut ang matag importanting pamahayag sa doktrina sa tin-aw nga paagi, gamit ang nag-uban nga mga doctrinal mastery passage.

   5. Ang paggamit sa doktrina sa ebanghelyo ni Jesukristo sa atong inadlaw-adlaw nga mga pagpili ug sa atong mga tubag sa doctrinal, sosyal, ug historikal nga mga isyu ug pangutana.