7. Mga Ordinansa ug mga Pakigsaad

Mga Ordinansa

7.1. Ang ordinansa usa ka sagradong buhat nga himoon pinaagi sa awtoridad sa priesthood. Ang kada ordinansa gidesinyo sa Dios aron sa pagtudlo og esprituhanong mga kamatuoran nga kasagaran pinaagi sa simbolo.

7.2. Ang ubang mga ordinansa importante sa kahimayaan ug gitawag og makaluwas nga mga ordinansa. Pinaagi lamang sa pagdawat sa makaluwas nga mga ordinansa ug pagtuman sa kaubanang mga pakigsaad kita makaangkon sa tanang panalangin nga anaa pinaagi sa Pag-ula ni Jesukristo. Kon wala kining makaluwas nga mga ordinansa dili kita mahimong sama sa atong Langitnong Amahan o makabalik og puyo sa Iyang presensya sa kahangturan (tan-awa sa DP 84:20–22). Ang makaluwas nga mga ordinansa himoon ubos sa direksyon niadtong naghupot sa mga yawe.

7.3. Ang unang makaluwas nga ordinansa sa ebanghleyo mao ang bunyag pinaagi sa pag-unlod sa tubig nga buhaton sa tawo nga dunay awtoridad. Ang bunyag gikinahanglan sa usa ka tawo aron mahimong miyembro sa Simbahan ni Jesukristo ug sa pagsulod sa celestial nga gingharian (tan-awa sa Juan 3:5).

7.4. Human mabunyagi ang usa ka tawo, usa o daghang mga tighupot sa Melchizedek Priesthood mokumpirma kaniya nga miyembro sa Simbahan ug motugyan diha kaniya sa gasa sa Espiritu Santo (tan-awa sa 3 Nephi 27:20). Ang gasa sa Espiritu Santo lahi sa impluwensya sa Espiritu Santo. Sa dili pa ang bunyag, ang tawo mahimong mobati sa impluwensya sa Espiritu Santo ug makadawat og pagpamatuod sa kamatuoran. Human makadawat sa gasa sa Espiritu Santo, ang tawo nga makatuman sa iyang mga pakigsaad adunay katungod sa padayon nga pakig-uban sa Espiritu Santo.

7.5. Ang ubang makaluwas nga mga ordinansa naglakip sa pag-orden ngadto sa Melchizedek Priesthood (alang sa mga lalaki), ug endowment diha sa temple, ug sealing sa kaminyoon. Sa templo, kining makaluwas nga mga ordinansa mapahigayon gihapon pinaagi sa paghimo niini alang sa mga patay. Ang pagbuhat niini nga mga ordinansa alang sa mga patay mahimong epektibo lamang kon ang namatay nga mga tawo modawat niini didto sa kalibutan sa espiritu ug motahud sa may kalabutan nga mga pakigsaad.

7.6. Ang ubang mga ordinansa, sama sa pag-ambit sa sakrament alang sa pagbag-o sa atong mga pakigsaad sa bunyag, pangalagad sa masakiton ug sa paghatag og ngalan ug panalangin sa mga bata, importante usab sa atong espirituhanong kalamboan.

May kalabutan nga mga pakisayran: Malaquias 4:5–6; Mateo 16:15–19; 1 Pedro 4:6; DP 131:1–4

May kalabutan nga mga hisgutanan: Ang Dios nga Kapangulohan: Ang Espiritu Santo; Ang Plano sa Kaluwasan: Kinabuhi human sa Kamatayon; Ang Pag-ula ni Jesukristo; Priesthood ug mga Yawe sa Priesthood

Mga Pakigsaad

7.7. Ang pakigsaad mao ang usa ka sagradong kasabutan tali sa Dios ug sa tawo. Ang Dios mohatag og mga kondisyon alang sa pakigsaad, ug kita mouyon sa pagbuhat unsay Iyang gisugo nato nga buhaton; dayon ang Dios mosaad kanato og piho nga mga panalangin sa atong pagkamasulundon (tan-awa sa Exodo 19:5–6; DP 82:10). Kon dili kita motuman sa atong mga pakigsaad, nan dili nato madawat ang gisaad nga mga panalangin.

7.8. Ang tanang makaluwas nga ordinansa sa priesthood giubanan og mga pakigsaad. Sama pananglit, kita makigsaad sa Ginoo pinaagi sa bunyag (tan-awa sa Mosiah 18:8–10). Ang mga kalalakin-an nga modawat sa Melchizedek Priesthood mosulod ngadto sa panumpa ug pakigsaad sa priesthood. Mabag-o nato ang mga pakigsaad nga atong gihimo pinaagi sa pag-ambit sa sakrament.

7.9. Maghimo kita og dugang nga mga pakigsaad kon kita modawat sa makaluwas nga mga ordinansa sa endowment ug sealing sa kaminyoon sulod sa templo. Mangandam kita aron makaapil sa mga ordinansa ug mohimo og mga pakigsaad sulod sa templo pinaagi sa pagsunod sa mga sumbanan sa katakus nga gitakda sa Ginoo (tan-awa sa Mga Salmo 24:3–4). Importante kaayo nga takus kita nga mosulod sa templo tungod kay ang templo sa literal mao ang balay sa Ginoo. Kini ang pinakabalaan sa bisan asang dapit dinhi sa kalibutan alang sa pagsimba.