1. Ang Dios nga Kapangulohan

1.1. Adunay tulo ka managlahi nga personahe sa Dios nga Kapangulohan. Ang Dios, nga Mahangturong Amahan; Iyang Anak, si Jesukristo; ug ang Espiritu Santo. Ang Amahan ug Anak adunay mahikap, nahimaya nga lawas nga unod ug bukog, ug ang Espiritu Santo usa ka personahe sa espiritu (tan-awa sa DP 130:22–23). Usa ra ang ilang katuyoan ug hingpit silang nagkahiusa sa pagpahinabo sa plano sa kaluwasan sa Langitnong Amahan.

May kalabutan nga mga pakisayran: Genesis 1:26–27; Lucas 24:36–39; Joseph Smith—Kasaysayan 1:15–20

Dios nga Amahan

1.2. Ang Dios nga Amahan mao ang Labing Gamhanang Binuhat nga atong gisimba. Siya ang Amahan sa atong mga espiritu (tan-awa sa Mga Hebreohanon 12:9). Siya hingpit, aduna sa tanang gahum, ug nahibalo sa tanang butang. Makiangayon Siya, manggiloy-on, ug mabination. Hingpit nga gihigugma sa Dios ang matag usa sa Iyang mga anak,ug ang tanan managsama ra ngadto Kaniya (tan-awa sa 2 Nephi 26:33). Ang Iyang buhat ug himaya mao ang pagpahinabo sa pagka-imortal ug kinabuhing dayon sa tawo.

May kalabutan nga mga pakisayran: Juan 17:3; Mosiah 4:9; Moises 1:39

Jesukristo

1.3. Si Jesukristo mao ang Unang Natawo sa Amahan diha sa espiritu ug ang Bugtong Anak sa Amahan diha sa unod. Ubos sa pagmando sa Amahan, gilalang ni Jesukristo ang mga langit ug yuta. Siya si Jehova sa Daang Tugon ug ang Mesiyas sa Bag-ong Tugon.

1.4. Si Jesukristo mibuhat sa kabubut-on sa Amahan sa tanang butang. Siya nagpakabuhi nga walay sala ug miula sa mga sala sa tanang mga tawo (tan-awa sa 3 Nephi 11:10–11). Ang iyang kinabuhi mao ang hingpit nga ehemplo kon unsaon sa pagpakabuhi (tan-awa 3 Nephi 12:48). Siya ang unang anak sa Langitnong Amahan nga nabanhaw. Sa atong panahon, sama sa karaang mga panahon, Siya ang mibarug nga pangulo sa Iyang Simbahan. Moanhi Siya pag-usab uban sa gahum ug himaya ug maghari dinhi sa yuta atol sa Milenyum (tan-awa sa DP 29:10–11). Siya ang mohukom sa tanang katawhan.

1.5. Tungod kay si Jesukristo ang atong Manluluwas ug atong Tigpataliwala sa Amahan, ang tanang pag-ampo, mga panalangin, ug mga ordinansa sa priesthood kinahanglang himoon pinaagi sa Iyang ngalan (tan-awa sa 3 Nephi 18:15, 20–21).

May kalabutan nga mga pakisayran: Isaias 53:3–5; Lucas 24:36–39; 1 Mga Taga-Corinto 15:20–22; Pinadayag 20:12; Alma 7:11–13; Alma 34:9–10; Helaman 5:12; Moroni 7:45, 47–48; DP 1:30; DP 6:36; DP 18:10–11; DP 19:16–19; DP 76:22–24

May kalabutan nga hisgutanan: Ang Pag-ula ni Jesukristo

Ang Espiritu Santo

1.6. Ang Espiritu Santo mao ang ikatulo nga sakop sa Dios nga Kapangulohan. Usa siya ka personahe nga espiritu ug walay lawas nga unod ug bukog. Sa makadaghan Siya ang gipasabut nga mao ang Espiritu, ang Balaang Espiritu, ang Espiritu sa Dios, ang Espiritu sa Ginoo, o ang Maghuhupay.

1.7. Ang Espiritu Santo nagsaksi sa Amahan ug sa Anak, nagpadayag sa kamatuoran sa tanang mga butang, ug nagbalaan niadtong maghinulsol ug magpabunyag. Pinaagi sa gahum sa Espiritu Santo, makadawat kita og espirituhanong mga gasa, mga panalangin o abilidad nga ihatag sa Ginoo para sa atong kaayuhan ug pagtabang nga makaserbisyo kita ug makapanalangin sa uban.

Mga kalabutan nga mga pakisayran: Juan 3:5; 1 Mga Taga-Corinto 2:5, 9–11; 2 Nephi 32:3; 2 Nephi 32:8–9; Mosiah 3:19; Mosiah 18:8–10; 3 Nephi 27:20; Moroni 7:45, 47–48; Moroni 10:4–5; DP 8:2–3; DP 130:22–23

May kalabutan nga mga hisgutanan: Pag-angkon og Espirituhanong Kahibalo; Mga Ordinansa ug mga Pakigsaad