3. Ang Pag-ula ni Jesukristo

3.1. Si Jesukristo giorden nang daan didto sa premortal nga konseho nga mahimo natong Manluluwas ug Manunubos. Mianhi Siya sa yuta ug andam nga miantus ug namatay aron sa pagtubos sa tanang katawhan gikan sa negatibong mga epekto sa Pagkapukan ug aron mabayaran ang silot sa atong mga sala. Ang kadaugan ni Jesukristo batok sa espiritwal ug pisikal nga kamatayon pinaagi sa Iyang pag-antus, kamatayon, ug Pagkabanhaw gitawag og Pag-ula. Nakapahimulos kita sa Iyang sakripisyo ug nagpakita sa walay sukod nga bili sa matag usa nga anak sa Langitnong Amahan (tan-awa sa DP 18:10–11).

3.2. Pinaagi lamang ni Jesukristo kita maluwas tungod kay Siya lamang ang makahimo og walay katapusan ug mahangturong Pag-ula para sa tanang katawhan (tan-awa sa Alma 34:9–10). Siya lamang ang dunay gahum sa pagbuntog sa pisikal nga kamatayon. Gikan sa Iyang mortal nga inahan, si Maria, Siya nakapanunod sa abilidad nga mamatay. Gikan sa Dios, nga Iyang imortal nga Amahan, Iyang napanunod ang gahum nga mabuhi sa hangtud o sa paghalad sa iyang kinabuhi ug sa pagbawi og usab niini. Siya lamang ang makatubos kanato gikan sa atong mga sala. Tungod kay nagpakabuhi Siya nga hingpit sa walay sala nga kinabuhi, gawasnon Siya gikan sa mga gipangayo sa kaangayan ug mahimong mobayad sa utang alang niadtong maghinulsol.

3.3. Ang Pag-ula ni Jesukristo naglakip sa Iyang Pag-antus alang sa mga sala sa katawhan didto sa Tanaman sa Getsemani, sa pagpaagas sa Iyang dugo, sa Iyang pag-antus ug kamatayon diha sa krus, ug sa Iyang tinuoray nga Pagkabanhaw. Siya ang una nga nabanhaw. Mibangon Siya gikan sa lubnganan uban sa nahimaya, imortal nga lawas nga unod ug bukog (tan-awa sa Lucas 24:36–39). Tungod sa Iyang Pag-ula ang tanang katawhan mabanhaw uban sa hingpit, imortal nga lawas ug madala og balik ngadto sa presensya sa Dios aron mahukman. Ang maulaon nga sakripisyo ni Jesukristo naghatag sa bugtong paagi aron kita malimpyuhan ug mapasaylo sa atong mga sala aron kita makabalik og puyo sa presensya sa Dios sa kahangturan (tan-awa sa Isaias 1:18; DP 19:16–19).

3.4. Isip kabahin sa Iyang Pag-ula, si Jesuskristo wala lamang mag-antus sa atong mga sala, apan gidawat usab sa Iyang Kaugalingon ang mga kasakit, mga tintasyon, mga balatian ug mga sakit sa tanang katawhan (tan-awa sa Isaias 53:3–5; Alma 7:11–13). Nakasabut Siya sa atong pag-antus tungod kay nakasinati Siya niini. Kon kita moduol Kaniya uban sa pagtuo, ang Manluluwas molig-on kanato nga mapas-an ang atong mga palas-anon ug matuman ang mga tahas nga dili nato mahimo nga kita ra (tan-awa sa Mateo 11:28–30; Ether 12:27).

3.5. Ang pagbayad ni Jesukristo sa silot sa atong mga sala, wala magpasabut nga giwagtang Niya ang personal natong responsibilidad. Aron madawat ang Iyang sakripisyo, malimpyuhan sa atong mga sala, ug mapanunod ang kinabuhing dayon, kinahanglan gayud nga gamiton nato ang atong hugot nga pagtuo Kaniya, maghinulsol, magpabunyag, modawat sa Espiritu Santo, ug matinud-anong molahutay hangtud sa katapusan sa atong kinabuhi.

May kalabutan nga mga pakisayran: Juan 3:5; 1 Mga Taga-Corinto 15:20–22; Mosiah 3:19; 3 Nephi 11:10–11; 3 Nephi 27:20; DP 76:22–24

May kalabutan nga mga hisgutanan: Ang Dios nga Kapangulohan: Jesukristo; Ang Plano sa Kaluwasan: Ang Pagkapukan; Mga Ordinansa ug mga Pakigsaad

Hugot nga Pagtuo diha kang Jesukristo

3.6. Ang unang baruganan sa ebanghelyo mao ang hugot nga pagtuo diha ni Ginoong Jesukristo. Ang atong hugot nga pagtuo magdala lamang og kaluwasan kon kini nagsentro kang Jesukristo (tan-awa sa Helaman 5:12).

3.7. Ang pagbaton og pagtuo kang Jesukristo naglakip sa pagbaton og lig-ong pagtuo nga Siya ang Bugtong Anak sa Dios ug Manluluwas sa kalibutan. Atong giila nga ang bugtong paagi nga kita makapuyo og balik kauban sa atong Langitnong Amahan mao ang pagsalig sa walay katapusang Pag-ula sa Iyang Anak ug sa pagsalig kang Jesukristo ug pagsunod sa Iyang mga pagtulun-an. Mas labaw kay sa uyon-uyon ra nga pagtuo, ang tinuod nga pagtuo kang Jesukristo moresulta sa paglihok ug ipahayag kini pinaagi sa matang sa atong pagpakabuhi (tan-awa sa Santiago 2:17–18). Molambo ang atong pagtuo kon kita mag-ampo, magtuon sa mga kasulatan, ug magsunod sa mga sugo sa Dios.

May kalabutan nga mga pakisayran: Mga Proverbio 3:5–6; Ether 12:6; DP 6:36

May kalabutan nga hisgutanan: Pag-angkon og Espirituhanong Kahibalo

Paghinulsol

3.8. Ang hugot nga pagtuo kang Jesukristo ug ang atong gugma para Kaniya ug sa Langitnong Amahan moresulta sa paghinulsol. Ang paghinulsol usa ka bahin sa plano sa Langitnong Amahan alang sa tanan Niyang mga anak kinsa maoy manubag sa ilang mga pagpili. Kini nga gasa gihimong posible pinaagi sa Pag-ula ni Jesukristo. Ang paghinulsol mao ang kausaban sa hunahuna ug sa kasingkasing. Naglakip kini sa pagpalayo gikan sa sala ug pagbalhin sa atong mga hunahuna, buhat, ug mga tinguha ngadto sa Dios ug pagpahiuyon sa atong kabubut-on ngadto sa Iyaha (tan-awa sa Mosiah 3:19).

3.9. Ang paghinulsol naglakip sa pag-ila sa atong mga sala, pagbasol, diosnon nga kasubo, sa nahimo nga sala; pagkumpisal ngadto sa Langitnong Amahan ug, kon gikinahanglan, ngadto sa uban; pagbiya sa mga sala; pagpaningkamot sa pagpahiuli, kutob sa mahimo, sa tanan nga nadaot tungod sa sala; ug pagpuyo og kinabuhi nga nagmasulundon sa mga sugo sa Dios (tan-awa sa DP 58:42–43). Misaad ang Ginoo nga pasayloon kita sa atong mga sala diha sa bunyag, ug atong mabag-o kana nga pakigsaad sa matag higayon nga moambit kita sa sakrament uban sa katuyoan nga mohinumdom sa Manluluwas ug motuman sa Iyang mga sugo.

3.10. Pinaagi sa sinsero nga paghinulsol ug sa grasya nga gitanyag pinaagi sa Pag-ula ni Jesukristo, makadawat kita og kapasayloan sa Dios ug mobati og kalinaw. Bation nato ang impluwensya sa Espiritu sa hilabihan gayud, ug mas maandam kita nga makapuyo sa kahangturan uban sa atong Langitnong Amahan sa Langit ug sa Iyang Anak.

May kalabutan nga mga pakisayran: Isaias 1:18; Juan 14:15; 3 Nephi 27:20; DP 19:16–19

May kalabutan nga hisgutanan: Mga Ordinansa ug mga Pakigsaad