8. Kaminyoon ug Pamilya

mga tawo gawas sa templo

8.1. Ang kaminyoon tali sa usa ka lalaki ug sa usa ka babaye gi-orden sa Dios ug ang pamilya mahinungdanon sa Iyang plano sa kaluwasan ug sa atong kalipay (tan-awa sa Genesis 2:24; DP 49:15–17). Pinaagi lamang sa pagsulod ug sa matinud-anong pagtuman sa pakigsaad sa celestial nga kaminyoon ang usa ka lalaki ug usa ka babaye makatuman sa ilang balaan, mahangturon nga potensyal (tan-awa sa 1 Mga Taga-Corinto 11:11; DP 131:1–4).

8.2. Gisugo sa Dios ang Iyang mga anak sa pagsanay ug pagpuno sa yuta (tan-awa sa Genesis 1:28). Ang sagrado nga mga gahum sa paglalang gamiton lamang tali sa lalaki ug babaye kinsa legal nga naminyo isip bana ug asawa (tan-awa sa Genesis 39:9; Alma 39:9). Ang bana ug asawa adunay ligdong nga kapangakohan sa paghigugma ug pag-amuma sa usag usa ug sa ilang mga anak. Ang mga ginikanan moamuma sa ilang mga anak pinaagi sa gugma ug pagkamatarung ug mohatag kanila sa ilang pisikal ug esprituhanong mga panginahanglan.

8.3. Ang kalipay diha sa kinabuhi sa pamilya mas makab-ot kon gipasikad diha sa mga pagtulun-an ni Ginoong Jesukristo. Pinaagi sa balaan nga plano, ang mga amahan mangulo sa ilang mga pamilya diha sa gugma ug sa pagkamatarung ug mosangkap sa mga kinahanglanon sa kinabuhi. Ang nag-unang kapangakohan sa mga inahan mao ang pag-atiman sa ilang mga anak. Niining sagrado nga mga responsibilidad, ang mga amahan ug mga inahan adunay katungdanan sa pagtabang sa usag usa ingon nga magkauban.

8.4. Ang balaan nga plano sa kalipay makahimo sa mga relasyon sa pamilya nga magpadayon lapas sa kamatayon. Ang kalibutan gilalang ug ang ebanghelyo gipadayag aron ang mga pamilya matukod, mabugkos, ug mahimaya sa kahangturan. Pinaagi sa pagserbisyo sa family history ug sa templo, atong mahimo nga ang mga ordinansa ug mga pakigsaad sa ebanghelyo madawat usab sa atong mga katigulangan (tan-awa sa Malaquias 4:5–6).

(Gikuha gikan sa “Ang Pamilya: Usa ka Pamahayag ngadto sa Kalibutan,” Liahona, Nob. 2010, 129.)

May kalabutan nga mga pakisayran: Moises 1:39; Genesis 1:26–27; Exodo 20:3–17; Mateo 16:15–19; Juan 17:3; 1 Corinto 6:19–20; 2 Nephi 2:22–25; Mosiah 2:41; Alma 41:10; DP 84:20–22

May kalabutan nga mga hisgutanan: Ang Plano sa Kaluwasan; Mga Sugo