Lesson 174: Para sa Lakas ng mga Kabataan

Gabay na Para sa Lakas ng mga Kabataan

“Ang Katotohanan ay Magpapalaya sa Inyo”

Mahal at pinagkakatiwalaan ng Ama sa Langit ang bagong henerasyon. Naglaan Siya ng patnubay sa pamamagitan ng propeta upang matulungan ang mga kabataan ngayon na magkaroon ng pananampalataya kay Jesucristo at manatili sa landas ng tipan. Ang lesson na ito ay makatutulong sa mga estudyante na umasa kay Jesucristo kapag gumagawa ng mga desisyon sa pamamagitan ng paggamit ng “Para sa Lakas ng mga Kabataan: Isang Gabay sa Paggawa ng mga Pagpili.”

Mga Posibleng Aktibidad sa Pag-aaral

Ang unang dalawang bahagi ng lesson na ito ay naglalayong tulungan ang mga estudyante na malaman pa ang tungkol sa Para sa Lakas ng mga Kabataan: Isang Gabay sa Paggawa ng mga Pagpili (2022) upang lalo silang magtiwala kay Jesucristo. Ang huling bahagi ay may aktibidad sa pag-aaral na nakatuon sa bahagi sa booklet na may pamagat na “Ang Katotohanan ay Magpapalaya sa Inyo” sa pahina 30–33. Ang mga ideya sa pag-aaral ng mga karagdagang paksa mula sa gabay na aklat ay tatalakayin sa iba pang manwal ng titser ng seminary. Magpasiya kung aling mga bahagi mula sa lesson na ito at aling mga paksa mula sa Para sa Lakas ng mga Kabataan ang pinakamakatutugon sa mga pangangailangan ng iyong mga estudyante.

Si Jesucristo ang lakas ng mga kabataan

Maaari mong isulat sa pisara ang salitang lakas at sabihin sa mga estudyante na ibahagi kung sino o ano ang naiisip nila kapag nakikita nila ang salitang ito. Magpakita ng larawan ni Jesucristo, at talakayin ang mga sumusunod na tanong.

• Bakit mabuting halimbawa ng lakas si Jesucristo? Paano Siya nagpakita ng lakas sa lahat ng aspeto ng Kanyang buhay?

• Ano ang ilang sitwasyon na kinakaharap ng mga tinedyer na kung saan ay makatutulong sa kanila ang lakas ng Tagapagligtas?

Basahin ang “Mensahe mula sa Unang Panguluhan” sa pahina 2 sa Para sa Lakas ng mga Kabataan, at alamin kung paano kayo makatatanggap ng lakas.

• Ano sa palagay ninyo ang ibig sabihin ng si Jesucristo ang “lakas ng mga kabataan”?

• Paano kayo nakatanggap ng tulong at lakas mula sa Kanya?

Paggawa ng mga inspiradong pagpili

Sabihin sa mga estudyante na gawin ang sumusunod na aktibidad sa kanilang study journal.

Ilista ang ilan sa mahahalagang pagpili o desisyon na maaaring kailangan mong pagpasiyahan sa susunod na 10 taon. Alamin kung alin sa mga pagpiling ito ang magkakaroon ng pinakamalaking epekto sa buong buhay mo.

Maaaring bigyang-diin ng mga estudyante ang mga desisyon na sa palagay nila ay magkakaroon ng pinakamalaking epekto sa kanilang buhay sa pamamagitan ng pagsalungguhit sa mga ito. Para sa susunod na tanong, maaari silang tumugon nang tahimik sa pamamagitan ng pagdodrowing sa kanilang journal ng mukhang nakangiti, mukhang walang ekspresyon, o mukhang nakasimangot upang ipakita kung gaano kalaki ang kanilang kumpiyansa sa paggawa ng bawat desisyon.

• Gaano kalaki ang iyong kumpiyansa sa paggawa ng mga pagpiling ito?

• Anong resources ang ibinigay ng Ama sa Langit upang matulungan kang gumawa ng mga inspiradong pagpili?

Maaaring ibahagi ng mga estudyante kung paano nakatulong sa kanila ang Para sa Lakas ng mga Kabataan na gumawa ng mga inspiradong pagpili.

Basahin ang bahaging “Gumawa ng mga Inspiradong Pagpili” sa pahina 4–5 sa Para sa Lakas ng mga Kabataan, at alamin kung ano ang makatutulong sa inyo sa mga pagpili ninyo ngayon at sa hinaharap.

Maaari mong pagpartner-partnerin ang mga estudyante upang pag-aralan ang bahaging ito. Ipaaral sa isang estudyante sa bawat magkapartner ang unang tatlong talata at ipaaral sa isa pa ang huling tatlong talata. Sabihin sa kanila na markahan ang mga makabuluhang salita at parirala at ibahagi sa kanilang kapartner ang natutuhan nila.

Kapag natapos na ang mga estudyante sa talakayan nang magkakapartner, maaari kang magsimula ng talakayan sa klase sa pamamagitan ng pagtatanong ng mga sumusunod.

• Ano ang natutuhan ninyo na maaaring makatulong sa inyo na gumawa ng mga inspiradong pagpili?

• Paano nakaaapekto ang natutuhan ninyo sa inyong nadarama tungkol sa Ama sa Langit at kay Jesucristo?

Hikayatin ang mga estudyante na palaging gamitin ang mga turo at alituntunin sa Para sa Lakas ng mga Kabataan habang gumagawa sila ng mga desisyon at nagsisikap na sundin ang Tagapagligtas. Patingnan sa kanila ang graphic sa katapusan ng bahaging “Gumawa ng mga Inspiradong Pagpili” sa pahina 5, o ipakita ang sumusunod na impormasyon upang matulungan silang makita kung paano inorganisa ang Para sa Lakas ng mga Kabataan.

Bawat paksa sa Para sa Lakas ng mga Kabataan ay may tatlong bahagi:

1. Mga walang-hanggang katotohanan, o doktrina ng ipinanumbalik na ebanghelyo ni Jesucristo

2. Mga paanyaya na kumilos ayon sa mga katotohanang iyon

3. Ipinangakong mga pagpapala na ibinibigay ng Panginoon sa mga taong namumuhay ayon sa Kanyang mga turo

Sabihin sa mga estudyante na pagnilayan ang anumang kasalukuyang tanong o hamon kung saan maaaring kailanganin nila ng tulong, lalo na kapag pinagninilayan nila ang mahahalagang pagpiling gagawin nila sa mga susunod na taon. Bigyan sila ng oras na pag-aralan ang Para sa Lakas ng mga Kabataan, hanapin ang mga walang-hanggang katotohanan, paanyaya, at ipinangakong pagpapala na makatutulong sa kanilang mga partikular na alalahanin. Hikayatin ang mga estudyante na magsulat ng mga ideya at impresyon habang nag-aaral sila. Kapag tapos na sila, anyayahan ang ilan na ibahagi ang natuklasan nila, ngunit ipaalala sa kanila na huwag magbahagi ng anumang bagay na masyadong personal. Maaaring makatulong ang mga sumusunod na tanong.

• Ano ang natuklasan o nakatulong sa inyo habang nag-aaral kayo?

• Paano makatutulong sa inyo ang huwaran ng pag-aaral ng walang-hanggang katotohanan, pagkilos ayon sa mga inspiradong paanyaya, at pag-alaala sa mga ipinangakong pagpapala na makatatanggap ng lakas mula kay Jesucristo na gumawa ng mga inspiradong pagpili?

“Ang katotohanan ay magpapalaya sa inyo”

Ang bahaging ito ng lesson ay nakatuon sa bahaging “Ang Katotohanan ay Magpapalaya sa Inyo” sa pahina 30–33 sa Para sa Lakas ng mga Kabataan. Maaari mo itong ituro kasama ang iba pang bahagi o ito lang.

Isulat sa pisara ang mga pakinabang at mga kapinsalaan. Maaari kang magpakita ng smartphone, laptop, o iba pang device na may access sa internet at social media. Sabihin sa mga estudyante na ilarawan ang mga pakinabang at kapinsalaan ng paggamit ng internet at social media kapag nagsasaliksik ng kaalaman. Sabihin sa kanila na ilista sa pisara ang mapagkakatiwalaang sources na alam nila at ibahagi kung bakit mahalagang gamitin ang sources na ito kapag nagsasaliksik ng katotohanan.

Basahin ang Juan 8:31–32, at alamin kung ano ang itinuro ni Jesus tungkol sa katotohanan.

• Ano ang natutuhan ninyo?

• Paano tayo tinutulungan ng katotohanan na maging malaya?

  Maaari mong ilagay ang mga estudyante sa maliliit na grupo. Magpamahagi ng isang pirasong papel sa bawat grupo. Anyayahan sila na mag-isip ng isang makatotohanang sitwasyon tungkol sa mga tinedyer na nauugnay sa mga paksa sa bahaging “Ang Katotohanan ay Magpapalaya sa Inyo” sa pahina 30–33. Halimbawa, maaaring ilarawan ng sitwasyon ang isang taong hindi nakikita ang kahalagahan ng pag-aaral ng katotohanan, isang taong nahihirapang mamuhay nang may integridad, o isang taong natatakot na talakayin sa iba ang kanilang pananampalataya. Matapos isulat ng mga grupo ang kanilang sitwasyon, sabihin sa kanila na makipagpalitan ng papel sa ibang grupo.

  Sabihin sa mga estudyante na basahin ang talata 1–4 ng bahaging “Ang Katotohanan ay Magpapalaya sa Inyo” sa pahina 31 at tukuyin ang isang alituntunin. Maaari nilang matukoy ang alituntuning tulad ng sumusunod: Ang pagkatuto at pamumuhay ayon sa mga walang-hanggang katotohanan ay tumutulong sa atin na maging higit na katulad ng Ama sa Langit at magkaroon ng kapayapaan at kaligayahan sa buhay na ito.

• Paano makatutulong sa atin ang pagkatuto at pamumuhay ayon sa mga walang-hanggang katotohanan upang maging higit na katulad tayo ng Ama sa Langit? Paano kayo matutulungan ni Jesucristo sa prosesong ito?

• Kailan kayo nakaranas o ang isang kakilala ninyo ng kapayapaan at kaligayahan sa pamumuhay sa mga walang-hanggang katotohanan ng ebanghelyo ng Tagapagligtas?

  Sabihin sa mga estudyante na magsulat ng sagot sa taong nasa sitwasyon gamit ang mga walang-hanggang katotohanan, paanyaya, at ipinangakong pagpapala na itinuro sa bahaging “Ang Katotohanan ay Magpapalaya sa Inyo” sa pahina 30–33. Anyayahan ang ilang grupo na ibahagi ang sitwasyong natanggap nila at kung paano nila ginamit ang impormasyon sa Para sa Lakas ng mga Kabataan upang makatulong.

  Upang tapusin ang lesson, maaari mong sabihin sa mga estudyante na sagutin ang sumusunod na tanong sa kanilang study journal.

• Anong mga pagbabago ang magagawa mo sa iyong buhay dahil sa natutuhan at nadama mo ngayon?

Sa pag-aaral ng mga estudyante ng “Ang Katotohanan ay Magpapalaya sa Inyo” sa pahina 30–33 o sa iba pang mga bahagi sa Para sa Lakas ng mga Kabataan, maaaring nadama nila na kailangan nilang gumawa ng ilang pagbabago sa kanilang buhay. Sabihin sa mga estudyante na saliksikin ang bahaging “Tutulungan Kayo ni Jesucristo” sa pahina 6–9, at alamin kung paano sila makatatanggap ng lakas mula kay Jesucristo upang magbago.

Karagdagang Resources

Ano ang nadarama ng Tagapagligtas tungkol sa mga kabataan ngayon?

Ipinahayag ni Pangulong Russell M. Nelson:

Minamahal kong mga batang kapatid, kayo ay kabilang sa mga pinakamahusay na ipinadala ng Panginoon sa mundong ito. Mayroon kayong kapasidad na maging mas matalino at mahusay at magkaroon ng epekto sa mundo kaysa naunang mga henerasyon! (Russell M. Nelson at Wendy W. Nelson, “Pag-asa ng Israel” [pandaigdigang debosyonal para sa mga kabataan, Hunyo 3, 2018], ChurchofJesusChrist.org)

Pinatotohanan ni Elder Dieter F. Uchtdorf ng Korum ng Labindalawang Apostol:

Mahal kong mga kaibigang kabataan, kung naririto mismo ang Panginoon ngayon, ano kaya ang sasabihin Niya sa inyo?

Naniniwala ako na magsisimula Siya sa pagpapahayag ng Kanyang matinding pagmamahal sa inyo. Maaaring bumigkas lamang Siya ng mga salita, ngunit tatagos din ito nang husto—mula lamang sa Kanyang presensya—kaya hindi iyon maipagkakamali, manunuot ito nang malalim sa inyong puso, pupuspos sa inyong buong kaluluwa! …

Naniniwala ako na gugustuhin ng Tagapagligtas na si Jesucristo na makita, madama, at malaman ninyo na Siya ang inyong lakas. Na sa tulong Niya, walang limitasyon sa maaari ninyong maisakatuparan. Na walang hangganan ang inyong potensyal. Nais Niyang tingnan ninyo ang inyong sarili tulad ng pagtingin Niya sa inyo. At ibang-iba iyan sa pagtingin sa inyo ng mundo. (Dieter F. Uchtdorf, “Si Jesucristo ang Lakas ng mga Kabataan,” Liahona, Nob. 2022, 9)

Paano ako matutulungan ng Para sa Lakas ng mga Kabataan na sundin si Jesucristo?

Itinuro ni Elder Dieter F. Uchtdorf ng Korum ng Labindalawang Apostol:

Kapag may mahahalagang pagpili kayong gagawin, si Jesucristo at ang Kanyang ipinanumbalik na ebanghelyo ang pinakamainam na piliin. Kapag may mga tanong kayo, si Jesucristo at ang Kanyang ipinanumbalik na ebanghelyo ang pinakamainam na sagot. Kapag nanghihina kayo, si Jesucristo ang inyong lakas. …

Para maging napakalinaw, ang pinakamahusay na gabay na posibleng mapasainyo sa paggawa ng mga pagpili ay si Jesucristo. Si Jesucristo ang lakas ng mga kabataan.

Ang layunin ng Para sa Lakas ng mga Kabataan ay ibaling kayo sa Kanya. Itinuturo nito sa inyo ang mga walang-hanggang katotohanan ng Kanyang ipinanumbalik na ebanghelyo—mga katotohanan tungkol sa kung sino kayo, kung sino Siya, at ano ang maisasakatuparan ninyo gamit ang Kanyang lakas. Itinuturo nito sa inyo kung paano gumawa ng mabubuting pasiya batay sa mga walang-hanggang katotohanang iyon.

Mahalaga ring malaman ninyo kung ano ang hindi ginagawa ng Para sa Lakas ng mga Kabataan. Hindi ito nagpapasiya para sa inyo. Hindi ito nagsasabi sa inyo ng “oo” o “hindi” sa bawat pagpiling kakaharapin ninyo. Ang Para sa Lakas ng mga Kabataan ay nagtutuon sa pundasyon ng inyong mga pagpili. Nagtutuon ito sa mga pinahahalagahan, alituntunin, at doktrina sa halip na sa bawat partikular na pag-uugali. (Dieter F. Uchtdorf, “Si Jesucristo ang Lakas ng mga Kabataan,” Liahona, Nob. 2022, 10–11)

Mga Karagdagang Aktibidad sa Pag-aaral

Mga scripture passage para sa bawat paksa

Habang pinag-aaralan ng mga estudyante ang iba’t ibang paksa sa Para sa Lakas ng mga Kabataan, sabihin sa kanila na maghanap ng mga nauugnay na scripture passage para sa karagdagang pag-unawa. Pagkatapos ay maaaring ipaliwanag ng mga estudyante kung paano makatutulong ang doktrinang itinuro sa mga scripture passage na ito sa mga tinedyer na mas masunod si Jesucristo at manatili sa landas ng tipan.

Isang puno ng desisyon o decision tree

Upang maituro sa mga estudyante ang paksang “Gumawa ng mga Inspiradong Pagpili” sa Para sa Lakas ng mga Kabataan, maaari mo silang anyayahan na isulat ang ilang mahalagang desisyon na maaari nilang gawin sa mga susunod na ilang taon. Maaari silang gumawa ng isang decision tree sa pamamagitan ng pagpili ng isa o mahigit pa sa kanilang mga desisyon at pagdodrowing ng mga sanga na nagmumula sa orihinal na pinili. Makatutulong ito sa mga estudyante na makita ang mga ibubunga ng kanilang mga pinili. Halimbawa, maaaring piliin ng isang estudyante ang “maglingkod sa full-time na misyon” bilang pangunahing pinili niya. Kabilang sa maaaring mga sanga para sa piniling iyon ang “mas matibay na pagbabalik-loob sa Tagapagligtas at sa Kanyang ebanghelyo,” “higit na kumpiyansa sa pakikipag-usap sa iba,” “mas mabubuting gawi sa pag-aaral,” “dagdag na pagmamahal sa mga anak ng Diyos,” at “higit na kagalakan at kasiyahan sa paglilingkod.” Matapos gumawa ang mga estudyante ng kanilang decision tree, sabihin sa kanila na pag-aralan ang bahaging “Gumawa ng mga Inspiradong Pagpili” sa pahina 4–5, at alamin ang mga katotohanan at payo na gagabay sa kanila ngayon at sa hinaharap.