Lesson 178: Para sa Lakas ng mga Kabataan: Paggawa ng mga Pagpili

Mga Patriarchal Blessing

“Personal na Banal na Kasulatan para sa Inyo”

Ang ating mapagmahal na Ama sa Langit ay maraming paraan ng pagbibigay ng gabay at patnubay sa Kanyang mga anak. Ginagawa Niya ito sa pamamagitan ng mga patriarchal blessing. Ang lesson na ito ay makatutulong sa mga estudyante na madama ang hangarin ng Panginoon na gabayan sila sa pamamagitan ng kanilang patriarchal blessing.

Mga Posibleng Aktibidad sa Pag-aaral

Direksyon sa ating buhay

Maaari mong ipakita ang sumusunod na larawan o magdrowing ng larawang tulad nito sa pisara.

• Sa aling mga aspekto ng buhay mo naramdaman ang nararamdaman ng taong nasa larawang ito? Bakit?

• Ano ang makatutulong sa atin na malaman kung ano ang gagawin kapag nag-aalinlangan tayo sa direksyong dapat nating tahakin sa buhay?

Ipaliwanag na nagtuturo ang mga banal na kasulatan ng mahahalagang katotohanan tungkol sa Diyos na makatutulong sa atin kapag kailangan natin ng patnubay.

Basahin ang Doktrina at mga Tipan 6:14; 42:61; at 112:10, at alamin ang mga katotohanang makatutulong sa atin kung maharap tayo sa mga alanganing sitwasyon.

Sabihin sa mga estudyante na ibahagi ang mga katotohanang nahanap nila. Gamit ang sarili nilang mga salita, maaari silang magbahagi ng mga katotohanang katulad ng:

Kapag madalas tayong magtanong sa Diyos, tuturuan Niya tayo sa pamamagitan ng Kanyang Espiritu (Doktrina at mga Tipan 6:14).

Kung tayo ay magtatanong, pagpapalain tayo ng Diyos ng paghahayag sa paghahayag (Doktrina at mga Tipan 42:61).

Aakayin tayo ng Diyos sa kamay at bibigyan tayo ng mga sagot sa ating mga panalangin (Doktrina at mga Tipan 112:10).

Maaari mo ring sabihin sa mga estudyante na ibahagi ang iba pang talata sa banal na kasulatang alam nila na nagpapakita ng sigasig ng Diyos na bigyan tayo ng gabay at patnubay.

• Paano nakakaapekto sa iyong mga damdamin o saloobin sa Diyos ang pag-alala sa mga katotohanang ito?

• Ano ang ilang paraan na binibigyan tayo ng Diyos ng patnubay para sa ating buhay?

Mga patriarchal blessing

Kung kinakailangan, banggitin na isang paraan ang patriarchal blessing upang makatanggap tayo ng patnubay mula sa Diyos. Upang matulungan ang mga estudyante na masuri ang kanilang kasalukuyang kaalaman tungkol sa mga patriarchal blessing, maaari mong ipakita ang sumusunod na nilalaman at bigyan ng oras ang mga estudyante na sagutin ang mga pahayag nang tahimik o sa kanilang study journal.

Gamit ang scale mula sa isa (hindi totoo) hanggang lima (napakatotoo), isipin kung gaano katotoo ang bawat isa sa mga sumusunod na pahayag para sa iyo:

1. Nauunawaan ko kung ano ang patriarchal blessing.

2. Alam ko kung paano makakaapekto sa aking buhay ang isang patriarchal blessing.

3. Naniniwala akong mabibigyan ako ng Diyos ng patnubay para sa buhay ko sa pamamagitan ng aking patriarchal blessing.

Bigyan ng oras ang mga estudyante na isulat sa pisara ang kanilang mga tanong tungkol sa mga patriarchal blessing. Maaaring may mga tanong sila tulad ng sumusunod:

• Ano ang patriarchal blessing?

• Paano makakaapekto ang isang patriarchal blessing sa aking ugnayan sa Ama sa Langit at kay Jesucristo?

• Paano ako maghahanda para sa aking patriarchal blessing?

• Kailan ko dapat matanggap ang aking patriarchal blessing?

Pumili ng kahit isang tanong tungkol sa mga patriarchal blessing na gusto mong sagutin. Isulat ang iyong mga tanong sa itaas ng isang pahina sa journal o sa isang pahina ng mga tala sa iyong mobile device. Hangarin ang gabay ng Ama sa Langit sa pamamagitan ng Espiritu Santo upang matulungan kang mahanap ang mga sagot sa iyong mga tanong.

Pagsagot sa mga tanong tungkol sa mga patriarchal blessing

Bigyan ng oras ang mga estudyante na mahanap ang mga sagot sa kanilang mga tanong tungkol sa mga patriarchal blessing. Isipin ang mga pangangailangan at kakayahan ng iyong mga estudyante sa pagpapasya kung paano sila maghahanap ng mga sagot. Maaaring makatulong sa ilan na maghanap ng mga sagot sa maliliit na grupo.

Pumili mula sa mga sumusunod na opsiyon para maghanap ng mga sagot sa iyong mga tanong tungkol sa mga patriarchal blessing:

1. Maghanap ng magagamit na resources sa Gospel Library app. Halimbawa, maaari mong pag-aralan ang “Mga Patriarchal Blessing” sa Mga Paksa ng Ebanghelyo o hanapin ang “mga patriarchal blessing” sa mga mensahe sa pangkalahatang kumperensya.

2. Pag-aralan ang isa sa mga sumusunod na mensahe mula sa pangkalahatang kumperensya noong Abril 2023: “Kailan Tatanggap ng Inyong Patriarchal Blessing” ni Elder Kazuhiko Yamashita (Liahona, Mayo 2023, 88–90) o “Ang Inyong Patriarchal Blessing—Inspiradong Patnubay mula sa Ama sa Langit” ni Elder Randall K. Bennett (Liahona, Mayo 2023, 42–43).

3. Pag-aralan ang mga pahayag sa handout na may pamagat na “Pagsagot sa mga Tanong tungkol sa mga Patriarchal Blessing.”

Pagsagot sa mga Tanong tungkol sa mga Patriarchal Blessing

Ibinahagi ni Pangulong Russell M. Nelson:

Mahalaga [ang patriarchal blessing]. Ito ay personal na banal na kasulatan para sa inyo. Ipinahahayag nito ang inyong espesyal na angkan. Ipinaaalala nito sa inyo ang inyong kaugnayan sa nakaraan. At tutulungan kayo nitong maunawaan ang inyong potensyal sa hinaharap. Talagang makukuha ninyo sa Panginoon ang katuparan ng mga pagpapalang iyon sa pamamagitan ng inyong katapatan. (Russell M. Nelson, “Thanks for the Covenant” [debosyonal sa Brigham Young University, Nob. 22, 1988], 5)

Pinatotohanan ni Elder Kazuhiko Yamashita ng Pitumpu:

Madalas at mapanalangin kong binabasa ang aking patriarchal blessing; lagi akong hinihikayat nito. Nauunawaan ko ang inaasahan sa akin ng Panginoon, at natulungan ako nitong magsisi at magpakumbaba. Kapag binabasa at pinagninilayan ko ito, ninanais kong mamuhay nang karapat-dapat upang matanggap ang mga pagpapalang ipinangako nito. …

… Pinatototohanan ko na ang Ama sa Langit at ang Kanyang Pinakamamahal at Bugtong na Anak, ang Panginoong Jesucristo, ay buhay. Mahal Nila tayo. Ang mga patriarchal blessing ay sagradong mga kaloob mula sa Kanila. Kapag natanggap ninyo ang inyong patriarchal blessing, matatanto at madarama ninyo kung gaano Nila kayo kamahal at kung gaano Sila nakatuon sa bawat isa sa inyo. (Kazuhiko Yamashita, “Kailan Tatanggap ng Inyong Patriarchal Blessing,” Liahona, Mayo 2023, 90)

Ibinahagi ni Sister Bonnie H. Cordon, na dating Young Women General President:

Sa isang FSY conference, nakilala ko ang dalawang dalagita na nahihirapan. Binanggit nilang dalawa ang pagbaling sa kanilang patriarchal blessing para muling matuklasan ang personal na pagmamahal at patnubay ng Panginoon sa kanila. Hanapin ang patriarchal blessing ninyo, hipan ninyo ang mga alikabok nito kung kailangan, at palagi itong pag-aralan. Kung wala pa kayo nito, kumuha na kayo—kaagad. Huwag ipagpaliban ang pagtuklas sa gustong sabihin ng Panginoon tungkol sa kung sino kayo. (Bonnie H. Cordon, “Lumapit kay Cristo at Huwag Lumapit nang Nag-iisa,” Liahona, Nob. 2021, 10)

© 2025 by Intellectual Reserve, Inc. All rights reserved.

Matapos magkaroon ang mga estudyante ng pagkakataong mag-aral, maaari mo silang anyayahang magbahagi ng kanilang natutuhan sa pamamagitan ng pagtatanong ng mga sumusunod:

• Ano ang natutuhan mo mula sa iyong mga pag-aaral na lubos na makatutulong sa iyo?

• Ano ang ilang sagot na nahanap mo sa iyong mga tanong?

• Sa iyong palagay, paano makakaapekto ang patriarchal blessing sa iyong ugnayan sa Ama sa Langit at kay Jesucristo?

Maaari mong ibahagi kung paano ka pinagpala o pinatnubayan ng Diyos sa pamamagitan ng iyong patriarchal blessing. Maaari mo ring hikayatin ang mga estudyante na nakatanggap na ng kanilang patriarchal blessing na ibahagi ang kanilang mga karanasan. Tiyakin na nauunawaan ng mga estudyante na hindi nila dapat ibahagi ang mga detalye ng kanilang mga blessing. Gayunpaman, naaangkop na ibahagi ang kanilang mga karanasan sa pagtanggap ng patriarchal blessing at kung paano nito napagpala ang kanilang buhay.

Maaari mo ring ipanood ang isa sa mga sumusunod na video, na makikita sa ChurchofJesusChrist.org, upang magpakita ng mga halimbawa ng kung paano nakatatanggap ng patnubay ang mga indibiduwal sa pamamagitan ng kanilang mga patriarchal blessing.

• “Enemy Territory” (sa time code na 0:00 hanggang 2:25) — Isang salaysay mula sa buhay ni Pangulong Boyd K. Packer ng Korum ng Labindalawang Apostol (1924–2015).

• “Walang Takot” (3:30) — Inilarawan ng isang binatilyo mula sa Italy kung paano siya natulungan ng kanyang patriarchal blessing na magpasyang magmisyon.

Isipin ang natutuhan mo

Upang matulungan ang mga estudyante na pagnilayan ang natutuhan at nadama nila, maaari mo silang anyayahang gawin ang sumusunod:

Pagnilayan ang mga pahiwatig o impresyong nadama mo ngayon mula sa Espiritu Santo. Sa iyong study journal, magsulat ng ilang pangungusap tungkol sa gabay at patnubay na ibinigay sa iyo ngayon ng Ama sa Langit at kung paano ka kikilos ayon sa mga pahiwatig na iyon.

Hikayatin ang mga estudyante na kumilos ayon sa mga impresyong nadama nila ngayon. Patotohanan ang gabay at patnubay ng Ama sa Langit na matatamo natin sa pamamagitan ng mga patriarchal blessing.

Karagdagang Resources

Ano ang patriarchal blessing?

Itinuro ni Sister Rebecca L. Craven, na dating miyembro ng Young Women General Presidency:

Ang patriarchal blessing ay inspiradong pagpapala mula sa Ama sa Langit na ibinibigay ng isang inorden na patriarch, na karaniwang mula sa inyong stake. Ito ay personal na mensahe ng paghahayag na para lang sa iyo. Ang iyong blessing ay magbibigay sa iyo ng payo, mga babala, at pangako na tutulong na gabayan ang iyong buhay. (Rebecca L. Craven, “Ang Iyong Aklat ng mga Posibleng Mangyari,” Para sa Lakas ng mga Kabataan, Ago. 2022, 26)

Paano ako mapagpapala ng Ama sa Langit sa pamamagitan ng patriarchal blessing?

Noong Abril 2020, isang dalagitang nagngangalang Laudy Ruth Kaouk ang inanyayahang magsalita sa pangkalahatang kumperensya. Nagpatotoo siya na:

Paano Pinagpapala ng Priesthood ang mga Kabataan

Itinuro ni Sister Kaouk kung paano mapagpapala ng priesthood ang mga kabataan.

Natutuhan kong basahin ang aking patriarchal blessing kapag nalulungkot o nag-iisa ako. Tinutulungan ako ng aking patriarchal blessing na maunawaan ang potensyal ko at ang partikular na plano ng Diyos para sa akin. Pinapanatag at tinutulungan ako nito na makita ang mga bagay-bagay nang higit pa sa aking pananaw sa mundo. Ipinapaalala nito sa akin ang mga kaloob na ibinigay sa akin at ang mga pagpapalang matatanggap ko kung mamumuhay ako nang karapat-dapat. Tinutulungan din ako nito na maalala at mapanatag na maglalaan ang Diyos ng mga sagot at bagong oportunidad para sa akin sa eksaktong tamang sandali na pinakakailangan ko ito.

Tumutulong ang mga patriarchal blessing na maihanda tayo na makabalik sa ating Ama sa Langit upang makapiling Siya. Alam ko na ang mga patriarchal blessing ay mula sa Diyos at matutulungan tayo nito na madaig ang ating mga kahinaan. Hindi nagmula ang mga mensaheng ito sa mga manghuhula; sinasabi sa atin ng patriarchal blessing ang kailangan nating marinig. Ang patriarchal blessing ay parang Liahona para sa bawat isa sa atin. Kapag inuuna natin ang Diyos at nananampalataya sa Kanya, aakayin Niya tayo palabas ng ating sariling ilang. (Laudy Ruth Kaouk, “Paano Pinagpapala ng Priesthood ang mga Kabataan,” Liahona, Mayo 2020, 56–57)

Paano ako makatatanggap ng patriarchal blessing?

Ang mga sumusunod na tuntunin ay inilalarawan sa Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw:

Iniinterbyu ng bishop o ng isang inatasang counselor ang miyembrong nais tumanggap ng patriarchal blessing. Kapag ang miyembro ay karapat-dapat, ang nag-iinterbyu ay naghahanda ng isang Patriarchal Blessing Recommend. …

Matapos makatanggap ng recommend, kokontakin ng miyembro ang patriarch upang iiskedyul ang pagtanggap ng patriarchal blessing. Sa araw ng appointment, ang miyembro ay dapat makipagkita sa patriarch nang may mapanalanging saloobin at nakasuot ng kasuotang pangsimba. Maaaring mag-ayuno ang miyembro, ngunit ang pag-aayuno ay hindi kinakailangan. (Pangkalahatang Hanbuk, 18.17; 18.17.1, ChurchofJesusChrist.org) .

Mga Karagdagang Aktibidad sa Pag-aaral

Paghiling ng kopya ng iyong Patriarchal Blessing

Maaari mong ituro sa mga estudyante kung paano makita ang kanilang mga patriarchal blessing, o ang mga blessing ng mga yumaong kapamilya, sa ChurchofJesusChrist.org. Maaari mong ibahagi sa kanila ang sumusunod na website, o ibigay ito sa kanila bilang QR code, at sabihin sa kanilang mag-log in gamit ang username at password ng kanilang account sa Simbahan.

https://pb.churchofjesuschrist.org/pbrequest/home/personal

Maaari mo ring ipakita ang mga sumusunod na tagubilin para gabayan sila.

1. Pumunta sa ChurchofJesusChrist.org.

2. Mag-click sa My Account and Ward.

3. Mag-log in gamit ang iyong account sa Simbahan.

4. Piliin ang Patriarchal Blessing mula sa menu.

5. Mag-click sa asul na icon na My Blessings.

6. Mag-click sa Humiling ng personal na blessing o Humiling ng blessing ng kapamilya at kumpletuhin ang form sa pagsusumite. (Kung humihiling ng blessing ng kapamilya, maghandang magbigay ng mga pangalan at tinatayang petsa ng kapanganakan.)

Maaaring mag-ukol ng ilang minuto ang mga estudyante at humiling ng kopya ng kanilang patriarchal blessing o ng yumaong kapamilya. Maaari mong talakayin sa mga estudyante kung paano makatutulong sa kanila ang pagbabasa ng patriarchal blessing ng isang yumaong kapamilya na mas mapalapit sa kanilang mga ninuno.

Pagpapahayag ng angkan

Maaaring isipin ng ilang estudyante kung bakit mahalagang tumanggap ng pagpapahayag ng angkan sa patriarchal blessing. Upang matulungan silang maunawaan kung bakit mahalaga ang kanilang angkan, maaari mong ipakita ang sumusunod na pahayag:

Kailan Tatanggap ng Inyong Patriarchal Blessing

Hinikayat ni Elder Yamashita ang mga miyembro ng tanggapin at rebyuhin ang kanilang mga patriarchal blessing, na naglalaman ng personal na payo mula sa Panginoon.

Kapag nakatanggap ka ng pagpapahayag ng angkan, malalaman mong ikaw ay kabilang sa sambahayan ng Israel at binhi ni Abraham [tingnan sa Abraham 2:10]. Upang maunawaan ang kahalagahan nito, magtuon sa mga pangakong ginawa ng Panginoon sa sambahayan ni Israel sa pamamagitan ni Abraham.

Kabilang sa mga pangakong iyon ang sumusunod:

• “Darami ang kanyang lahi (tingnan sa Genesis 17:5–6; Abraham 2:9; 3:14).

• “Tatanggapin ng kanyang binhi, o mga inapo, ang ebanghelyo at tataglayin ang priesthood (tingnan sa Abraham 2:9).

• “Sa pamamagitan ng paglilingkod ng kanyang binhi, ’[mapagpapala] ang lahat ng mag-anak sa mundo, maging ng mga pagpapala ng Ebanghelyo, na mga pagpapala ng kaligtasan, maging ng buhay na walang-hanggan’ (Abraham 2:11)” [Mga Paksa at Mga Tanong, “Tipang Abraham,” Gospel Library].

(Kazuhiko Yamashita, “Kailan Tatanggap ng Inyong Patriarchal Blessing,” Liahona, Mayo 2023, 89)

Maaari ding basahin ng mga estudyante ang “You are part of the house of Israel” (Inspiration, ChurchofJesusChrist.org) o “Declaration of Lineage” “Mga Patriarchal Blessing,” Gospel Library) upang alamin pa ang tungkol sa angkan.

Pagkatapos ay maaari mong sabihin sa mga estudyante na ipaliwanag kung bakit sa palagay nila ay mahalagang bahagi ng patriarchal blessing ang pagpapahayag ng angkan.

Mga halimbawa mula sa kasaysayan ng Simbahan

Upang matulungan ang mga estudyante na makita kung paano nakaapekto ang mga patriarchal blessing sa buhay ng mga indibiduwal sa kasaysayan ng simbahan, maaari mong ibahagi ang isa o mahigit pa sa mga sumusunod na kuwento. Maaari kang gumawa ng mga QR code para sa bawat kuwento at ipakita ang mga ito sa pisara. Pagkatapos ay maaaring piliin ng mga estudyante na pag-aralan ang isa o mahigit pa sa mga salaysay.

• Natulungan si Phebe Carter Woodruff ng kanyang pananampalataya sa kanyang patriarchal blessing na sumulong kahit hindi pa niya natatanggap ang mga bagay na kanyang hinahangad (tingnan sa Mga Banal: Ang Kuwento ng Simbahan ni Jesucristo sa mga Huling Araw, tomo 1, Ang Pamantayan ng Katotohanan, 1815–1846 [2018], 298–301).

• Dahil sa pananampalataya at kasigasigan ni Connie Taylor, nakita niya ang katuparan ng mga pangako sa kanyang patriarchal blessing (tingnan sa Mga Banal: Ang Kuwento ng Simbahan ni Jesucristo sa mga Huling, tomo 3, Magiting, Marangal, at Malaya, 1893–1955, 431–34, 661–63).

• Natulungan si Elder Neal A. Maxwell ng kanyang patriarchal blessing na manatiling malakas at tapat sa mga panganib na kinaharap niya habang nakikipaglaban sa Ikalawang Digmaang Pandaigdig (tingnan sa Mga Banal, 3:573–77).

• Nagbago ang buhay ni Ruben Gapiz at nasagot ang kanyang mga panalangin dahil sa kanyang patriarchal blessing (tingnan sa Global Histories, Philippines, “Growing While Serving the Lord,” Gospel Library).

• Nakita ni Eva Hernández ang katuparan ng pangako sa kanyang patriarchal blessing (tingnan sa Global Histories, Spain, “A Blessing Fulfilled,” Gospel Library).