Lesona 176: Ho zatovo mahery!: Manao safidy

Ny toetra maha-Andriamanitra antsika sy ny tanjontsika araka an’ Andriamanitra

Manana toetra sy anjara araka an’ Andriamanitra isika

Amin’ny maha-zanaky ny ray aman-dreny any an-danitra antsika dia afaka ny ho tonga tahaka azy ireo isika ary handova izay ananany. Ireo fitahiana ireo dia afaka ny ho azon’ny tsirairay amintsika noho ny i Jesoa Kristy sy ny Sorompanavotany. Ity lesona ity dia afaka manampy ireo mpianatra hahatsapa fa amin’ny maha-zanak’ Andriamanitra azy ireo dia manana toetra sy tanjona araka an’ Andriamanitra izy ireo.

Ireo sahanasa fianarana azo atao

Iza moa aho ary inona no tanjoko?

Atombohy ny lesona amin’ny alalan’ny fanampiana ny mpianatra hieritreritra ny maha-mora ny fanadinoana ny toetra maha-Andriamanitra antsika sy ny maha-sarobidy antsika.

Atombohy amin’ny alalan’ny fizarana rafi-tantara iray toy izao manaraka izao ka arindra ny antsipirian’izany mba hanehoana ireo ahiahy mey hananan’ireo mpianatrao.

15 taona i Amelia. Matetika izy no mahatsiaro ho irery sy tsy tsikaritry ny hafa. Maniry ny hanana namana bebe kokoa izay tsy mitovy aminy izy. Mahita ny hafa manao zavatra manan-danja i Amelia saingy tsy mihevitra ny tenany ho manana fahaiza-manao ampy hanaovana zavatra manan-danja izy. Miahiahy ny amin’ny hasarobidin’ny tenany izy.

• Inona no mety hanasarotra ny fitadidiantsika ny maha-zanak’ Andriamanitra antsika?

Hazavao fa mandritra ity lesona ity dia hianatra momba ny fananan’izy ireo toetra maha-Adriamanitra amin’ny maha-zanakavavy sy zanakalahin’ Andriamanitra azy ireo ny mpianatra. Asao izy ireo hieritreritra ny fomba sasantsasany mahatonga ny fahafantarana fa zanak’ Andriamanitra izy ireo ho lasa misy fiantraikany eo amin’ny fiainan’izy ireo. Afaka manoratra ny valintenin’izy ireo ao amin’ny diary fandalinany izy ireo. Asao ny mpianatra hihaino ny Fanahy Masina mampianatra azy ireo momba ny fananan’izy ireo toetra maha-Andriamanitra sy ny tanjon’izy ireo araka an’ Andriamanitra.

Toetra sy tanjona araka an’Andriamanitra

Amin’ity sahanasa manaraka ity dia azonao atao ny mizara ny kilasy ho vondrona kely. Asao ny mpianatra mba hampiasa ilay taratasy zaraina hoe “Ny fiizoko sy ny tanjoko araka an’ Andriamanitra” mba hanomanana valiny ho an’i Amelia. Manendre mpitarika vondrona iray izay afaka manampy ny vondrona misy azy ireo hanatanteraka andraikitra samihafa. Ohatra, ny mpianatra iray dia afaka mamaky teny, ny iray hafa afaka manoratra valiny ary ny iray hafa afaka mizara izany amin’ny iray kilasy.

Afaka mitady soratra masina na fanambarana fanampiny ireo mpianatra amin’ny alalan’ny fikarohana ny hoe “toetra araka an’ Andriamanitra” na “anjara masina” ao amin’ny Médiathèque de l’Evangile.

Vakio ny soratra masina sy ireo fanambarana ao amin’ilay taratasy zaraina. Mitadiava andian-teny izay heverinao fa afaka manampy an’i Amelia, ary diniho ny antony mety hanampian’izy ireny.

Ilay toetra maha-Andriamanitra ahy sy ny tanjoko araka an’ Andriamanitra

1. Vakio ity teny nambaran’ny Loholona Dieter F. Uchtdorf ao amin’ny Kôlejin’ny Apôstôly Roambinifolo ity, ka tadiavo ny fanirian’ny Mpamonjy ho anao:

Mino aho fa tian’i Jesoa Kristy Mpamonjy ho hitanao sy ho tsapanao ary ho fantatrao fa Izy no herinao. Fa noho ny fanampiany dia tsy misy fetra ny zavatra azonao atao. Tsy misy fetra ny hery anaty anananao. Tiany hahita ny tenanao amin’ny fomba fahitany anao ianao. Ary izany dia tena hafa noho ny fomba fijerin’izao tontolo izao anao.

Hambaran’ny Mpamonjy tsy am-pihambahambana fa ianao dia zanakavavy na zanakalahin’ilay Andriamanitra Tsitoha. Ny Rainao any An-danitra no olona be voninahitra indrindra eo amin’izao rehetra izao, feno fitiavana, fifaliana, fahadiovana, fahamasinana, fahazavana, fahasoavana ary fahamarinana. Ary indray andro any dia tiany handova izay rehetra ananany ianao. (Dieter F. Uchtdorf, “I Jesoa Kristy no maha-zatovo mahery,” Liahona, nôv. 2022, 9–10)

Vakio ny Fotopampianarana sy Fanekempihavanana 14:7 ka tadiavo ny zavatra irin’ny Ray any An-danitra homena anao.

---

2. Vakio ity teny nambaran’ny Rahavavy Michelle D. Craig ity, izay tao amin’ny Fiadidian’ny Zatovovavy Maneran-tany teo aloha, ka tadiavo ny toroheviny ho an’izay rehetra miahiahy momba ny hasarobidiny araka an’ Andriamanitra:

Angamba ny zavatra manan-danja indrindra tokony ho hitantsika mazava tsara dia hoe iza Andriamanitra sy hoe iza marina isika. Isika dia zanakalahy sy zanakavavin’ireo ray aman-dreny any an-danitra izay manana “toetra araka an’ Andriamanitra sy anjara mandrakizay.” [teny filamatry ny Zatovovavy, ChurchofJesusChrist.org]. Angataho Andriamanitra mba hanambara ireo fahamarinana ireo aminao sy ny zavatra tsapany momba anao. (Michelle D. Craig, “Maso hahita,” Liahona, nôv. 2020, 15)

Vakio ny Fotopampianarana sy Fanekempihavanana 18:10–13, ka tadiavo ny zavatra tsapan’ny Ray any An-danitra momba anao.

---

3. Vakio ity teny nambaran’ny Filoha Susan H. Porter, izay Filohan’ny Kilonga maneran-tany ity, ka tadiavo ny antony ilantsika tsirairay mahafantatra ny zavatra tsapan’ny Ray any An-danitra momba antsika:

Rehefa fantatrao sy takatrao fa tena tiana tanteraka ianao amin’ny maha-zanak’ Andriamanitra anao dia manova ny zavatra rehetra izany. Manova ny fahatsapanao momba ny tenanao izany rehefa manao fahadisoana ianao. Manova ny fahatsapanao izany rehefa sendra zavatra sarotra mitranga. Manova ny fahitanao ireo didin’ Andriamanitra izany. Manova ny fahitanao ny hafa sy ny fahaizanao mitondra fiovana izany. (Susan H. Porter, “Ny fitiavan’ Andriamanitra: Ilay mampiravoravo indrindra ny fanahy,” Liahona, nôv. 2021, 33)

---

4. Vakio ity teny nambaran’ny Filoha Russell M. Nelson ity, ka tadiavo ny zavatra nampianariny momba ny fanantenan’ny Raintsika any An-danitra ho antsika tsirairay avy:

Ny drafitry ny Ray any An-danitra ho an’ny zanany dia manome fahafahana antsika hiaina any amin’ny toerana iainany sy hiaina ny fomba iainany ary amin’ny farany dia ho tonga kokoa hatrany tahaka Azy. Ny drafiny dia manao izay ahafahantsika mahazo ara-bakiteny ireo fitahiana sarobidy indrindran’ny mandrakizay rehetra, anisan’izany ny fahafahantsika ho tonga “mpiray lova amin’i Kristy” [Romana 8:17]. (Russell M. Nelson, “Safidy ho an’ny mandrakizay” [fampaherezam-panahy maneran-tany ho an’ny tanora tokan-tena sy mpivady vao herotrerony, 15 mey 2022], broadcasts.ChurchofJesusChrist.org)

Asao ireo mpianatra hanampy ny zavatra mety hozarain’izy ireo amin’i Amelia.

Rehefa avy namarana ny fifanakalozan-kevitry ny vondrona misy azy ny mpianatra dia asao izy ireo hanao tatitra amin’ny iray kilasy momba ny zavatra nianarany. Mba hamporisihana ny fifanakalozan-kevitra ao an-dakilasy dia azonao atao ny manasa ireo mpianatra hizara ny zavatra hitany fa manan-danja mikasika ny fanehoan-kevitry ny hafa.

Ny maha-zava-dehibe ny maha-izaho ahy sy ny hoe mety ho lasa toy ny ahoana aho

Ny fanoratana diary dia afaka manampy ny mpianatra hampitombo ny fahatakarany sy hahafantatra bebe kokoa ny zavatra tsapany. Afaka manampy ny mpianatra hanasa ny Fanahy Masina hampianatra azy ireo ihany koa izany. Asao ny mpianatra hamaly ireto fanontaniana manaraka ireto ao amin’ny diary fandalinan’izy ireo.

• Inona no eritreritra na fahatsapana nanananao rehefa nandalina momba ilay toetra maha-Andriamanitra anao sy ny tanjonao araka an’ Andriamanitra ianao?

• Inona araka ny eritreritrao no mety ho fiantraikan’io fahalalana io eo amin’ny fanapahan-kevitra raisinao na eo amin’ny fomba itondranao ny hafa?

• Inona no zavatra niainanao izay nanampy anao hahatsapa fa zanak’ Andriamanitra manana anjara araka an’ Andriamanitra ianao?

Asao ireo mpianatra maniry hanao izany mba hizara ny zavatra tsapany sy ny zavatra niainany mikasika ny maha-zava-dehibe ny fananan’izy ireo toetra araka an’ Andriamanitra sy ny anjaran’izy ireo araka an’ Andriamanitra.

Hevero ny hizara ny fijoroana ho vavolombelona anananao momba ny fananan’ny zanak’ Andriamanitra tsirairay toetra maha-Andriamanitra sy tanjony araka an’ Andriamanitra.

Loharanom-pitaovana fanampiny

Ahoana no ahafahako mahazo ny anjarako mandrakizay?

Nampianatra izao ny Loholona Gary E. Stevenson ao amin’ny Kôlejin’ny Apôstôly Roambinifolo:

Manasa anao aho mba hanatona an’i Kristy (jereo ny Môrônia 10:32). Tsy misy azo tanterahina ny zava-drehetra ao amin’ny drafitr’Andriamanitra mandrakizay raha tsy miaraka Aminy, ary rehefa miaraka Aminy dia azo tratrarina avokoa ny zavatra mahasoa rehetra. …

… Afaka ny hanana fifaliana ianao eto amin’ity fiainana ity sy any amin’ny fiainana manaraka amin’ny alalan’i Jesoa Kristy sy ny fahasoavany manavotra. Afaka manatanteraka ny anjaranao araka an’ Andriamanitra ianao amin’ny alalan’ny fandraisana ny zava-drehetra ananany sy amin’ny alalan’ny fiainana ilay karazam-piainana izay hitarihany, dia ny “fiainana mandrakizay, … izay fanomezana lehibe indrindra amin’ny fanomezan’ Andriamanitra rehetra” (Fotopampianarana sy Fanekempihavanana 14:7). (Gary E. Stevenson, “Your Divine Destiny,” For the Strength of Youth, Jan. 2022, 5)

Manazava ny Ho zatovo mahery!: Torolalana amin’ny fanaovana safidy hoe:

Fanahy zanaka malalan’ Andriamanitra ianao. Ny drafiny lehibe ho an’ny fahasambarana no mahatonga anao ho afaka mivoatra ara-panahy sy mampitombo ny fahafahanao ho tonga tahaka an’ Andriamanitra. Izany no antony nandefasany an’i Jesoa Kristy mba ho Mpamonjy anao. (Ho zatovo mahery!: Torolalana amin’ny fanaovana safidy [2022], 4)

Inona no toetrako araka an’ Andriamanitra?

Manambara ny “Ny fianakaviana: Fanambarana ho an’izao tontolo izao” hoe:

Ny olombelona rehetra—ny lahy sy ny vavy—dia [noharina] araka ny endrik’ Andriamanitra. Ny tsirairay dia fanahy izay zanakalahy sy zanakavavy malalan’ny ray aman-dreny any an-danitra, ary araka izany, ny tsirairay dia samy manana dia samy manana toetra sy anjara araka an’ Andriamanitra. Ny maha-lahy na maha-vavy dia toetra fototra iray mamaritra ny maha-izy azy ny olona tsirairay sy ny tanjony tany amin’ny fiainana talohan’ny nahaterahana, sy amin’izao fiainana an-tany izao, ary any amin’ny mandrakizay. (“Ny fianakaviana: Fanambarana ho an’izao tontolo izao,” ChurchofJesusChrist.org)

Nampianatra toy izao ny Loholona Dale G. Renlund ao amin’ny Kôlejin’ny Apôstôly Roambinifolo:

Manana “toetra araka an’ Andriamanitra” isika. Ampahany manan-danja amin’ny maha-isika antsika izany. “Fototarazo” ara-panahy nolovaintsika avy amin’ireo ray aman-drenintsika ara-panahy izany ary tsy ilana ezaka avy amintsika. Ilay maha-izy antsika faran’izay manan-danja indrindra izany, na dia misy fomba hafa safidintsika hamaritana ny tenantsika aza. Zava-dehibe ho an’ny rehetra ny mahatakatra io fahamarinana lalina io, indrindra fa ho an’ireo olona izay ao anatina vondrona izay voailikilika, na voageja, na nobaboina. Tsarovy fa ny tena maha-izy anao lehibe indrindra dia mifandray amin’ny toetranao araka an’ Andriamanitra amin’ny maha-zanak’ Andriamanitra anao. (Dale G. Renlund, “Ny toetranao araka an’ Andriamanitra sy ny anjaranao mandrakizay,” Liahona, mey 2022, 75)

Inona no afaka manampy ahy hahita ilay toetrako araka an’ Andriamanitra sy ny anjarako mandrakizay?

Nanasa ny Filoha Russell M. Nelson hoe:

Fantaro hoe iza marina ianao.

Makà fotoana hieritreretana ombam-bavaka mikasika ireto fahamarinana ireto:

• Zanakalahy sy zanakavavin’ Andriamanitra nofinidiny ianareo.

• Noharina araka ny endriny ianareo.

• Nampianarina tany amin’ny tontolo talohan’ny nahaterahana ianareo mba hanomanana anareo amin’izay zavatra rehetra mety hatrehinareo mandritra ity ampahany farany amin’izao andro farany ity izao. Mitoetra miaraka aminareo ny zavatra izay nampianarina anareo!

(Russell M. Nelson, “Ho tena zanaky ny Arivo Taona” [Fampaherezam-panahy maneran-tany ho an’ny tanora tokan-tena sy mpivady vao herotrerony, 10 jan. 2016], broadcasts.ChurchofJesusChrist.org)

Sahanasa fianarana fanampiny

Fanontaniana sy ahiahy ananan’ny mpianatra

Any am-piandohan’ny fotoam-pianarana dia mety hanampy ny manasa ireo mpianatra hanoratra tsy mitonona anarana ireo fanontaniana na ahiahy izay ananan’izy ireo na ananan’ny olona iray fantany momba ilay toetra maha-Andriamanitra azy sy ny tanjony araka an’ Andriamanitra. Azonao atao ny manangona ireo taratasy ary misafidy fanontaniana vitsivitsy horesahina mandritra ny lesona.

Mahatsapa ny fitiavan’ Andriamanitra

Ny mpianatra sasany dia mety handray soa avy amin’ny fianarana ny fomba ahafahan’izy ireo mahatsapa kokoa ny fitiavan’ Andriamanitra azy ireo. Azon’ny mpianatra atao ny mamantatra ny zavatra nianarany momba ny fitiavan’ Andriamanitra avy amin’ity teny manaraka nambaran’ny Loholona Dale G. Renlund ao amin’ny Kôlejin’ny Apôstôly Roambinifolo ity.

[Zanaka malalan’ Andriamanitra] ianareo. Tsy misy zavatra ataonao, na tsy ataonao, afaka manova izany. Tia anao Andriamanitra satria fanahy [zanany] ianao. Mety tsy mahatsapa ny fitiavany isika indraindray, fa eo foana nefa izany. Lavorary ny fitiavan’ Andriamanitra. Tsy lavorary kosa ny fahafahantsika mahatsapa izany fitiavana izany. (Dale G. Renlund, “Ny toetranao araka an’ Andriamanitra sy ny anjaranao mandrakizay,” Liahona, mey 2022, 70)

Azonao atao ny mametraka fanontaniana toy izao amin’ny mpianatra:

• Inona no azonao atao izay afaka manampy anao hahatsapa ny fitiavan’ Andriamanitra anao?

Azonao atao avy eo ny mampiseho ny ampahan’ny lahateniny izay manaraka avy hatrany io teny nambara io. Rehefa manao izany ianao dia afaka mitanisa ireo zavatra azon’izy ireo atao mba hahatsapana ny fitiavan’ Andriamanitra sy ny zavatra tokony hohalaviriny. Avy eo dia afaka misafidy zavatra iray ao amin’ny lisitry ny zavatra tiany hatomboka na hajanona ny mpianatra.