“Lesona 177—Mandray andraikitra amin’ny fampiasana ny teknôlôjia: Misaina tsara amin’ny safidy ataontsika momba ny teknôlôjia,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Mandray andraikitra amin’ny fampiasana ny teknôlôjia,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 177: Ho zatovo mahery!: Manao Safidy
Mandray andraikitra amin’ny fampiasana ny teknôlôjia
Misaina tsara amin’ny safidy ataontsika momba ny teknôlôjia
Sambatra isika miaina amin’ny fotoana ahitana teknôlôjia maro. Ny fampiasana ny teknôlôjia dia afaka manampy antsika hanakaiky kokoa an’i Jesoa Kristy sy hanampy ny asany handroso. Mety hitarika antsika hiala Aminy koa anefa izany. Ity lesona ity dia afaka manampy ireo mpianatra hampihatra fiarovana mba handraisan’izy ireo andraikitra amin’ny fampiasana ny teknôlôjia.
Ireo sahanasa fianarana azo atao
Fampiasana teknôlôjia
Hevero ny hampiseho ny sarin’ireo takela-bolamena. Hazavao fa nankinin’ Andriamanitra tamin’ny Mpaminany Joseph Smith ireo takela-bolamena.
Vakio ny Joseph Smith—Tantara 1:46, ka tadiavo ny fampitandremana nomen’i Môrônia an’i Joseph Smith momba ireo takela-bolamena.
Soraty eny amin’ny solaitrabe eo amin’ny lafy iray ny lohateny hoe Fampiasana amin’ny tsara ary ny lohateny hoe Fampiasana amin’ny ratsy eo amin’ny ilany. Azonao atao ny manoratra ny valintenin’ny mpianatra amin’ireto fanontaniana manaraka ireto eo ambanin’ny lohateny tsirairay.
-
Ahoana no fomba hanandraman’i Satana mba hitarika an’i Joseph Smith hampiasa amin’ny fomba ratsy ireo takela-bolamena?
-
Ahoana no nampiasan’i Joseph Smith ireo takela-bolamena tamin’ny tsara?
Atsangano ny finday iray na mampisehoa sarin’izany anankiray ary lazao amin’ny mpianatra fa nankinin’ Andriamanitra tamin’izy ireo ny teknôlôjia.
-
Ahoana no ahafahantsika mampiasa ny teknôlôjia ho amin’ny tsara?
-
Amin’ny fomba ahoana no mety hahatonga ny zatovo ho alaim-panahy hampiasa amin’ny fomba ratsy ny teknôlôjia?
Asao ny mpianatra hisaintsaina mangina ity fanontaniana manaraka ity.
-
Ahoana no fomba ampiasanao ny teknôlôjia amin’ny fomba izay tian’ny Tompo hanaovanao izany?
Amporisiho ny mpianatra hifantoka amin’ny fahatsapana momba ny fomba ahafahan’izy ireo mandray andraikitra eo amin’ny fampiasana ny teknôlôjia. Hevero ny hizara fa tahaka ny nitarihan’ny Tompo an’i Joseph Smith hampiasa ireo takela-bolamena tamin’ny tsara, dia afaka manampy antsika hanao izany amin’ny teknôlôjia koa Izy.
Tari-dalana tena tsara
Ity asa atao manaraka ity dia afaka manampy ireo mpianatra hianatra avy amin’ny fitarihana tena tsara avy amin’ny Tompo mikasika ny fandraisana andraikitra momba ny teknôlôjia.
Ny fomba iray ahafahanareo mandalina ireto fizarana manaraka ireto dia amin’ny alalan’ny fizarana ny kilasinao ho vondrona roa. Izarao fizarana iray ny vondrona tsirairay. Asao ny mpianatra handalina manokana ny fizarana nomena azy ireo, hanoratra ao amin’ny diary fandalinany ny valintenin’izy ireo amin’ireo fanontaniana ary ho vonona ny hampianatra ny zavatra nianarany.
Raha tsy izany dia azonao atao ny manasa ireo mpianatra handalina izay fizarana mahaliana kokoa azy ireo.
Mandray andraikitra amin’ny fampiasana ny teknôlôjia
Fizarana 1. Manokana fotoana amim-pahendrena amin’ny fampiasana ny teknôlôjia
Ao amin’ny Fotopampianarana sy Fanekempihavanana, ny Tompo dia mampiasa ny teny hoe “[m]azoto [m]irotsaka” sy “[m]idonana-poana.”
-
Inona araka ny eritreritrao no dikan’ireo teny ireo?
Vakio ireto andinin-tsoratra masina manaraka ireto ary saintsaino ny zavatra ampianarin’ny Tompo momba ny fahazotoana hirotsaka sy ny fidonanaham-poana: Fotopampianarana sy Fanekempihavanana 58:27–28; 60:13; 68:31; 75:3.
-
Ahoana no hamintinanao ny zavatra ampianarin’ny Tompo?
(Ao anatin’ireo fahamarinana maro, dia mety hahita anankiray toy izao manaraka izao ianao: Irin’ny Tompo isika mba hazoto hirotsaka amin’ny fanaovan-tsoa ary tsy handanilany ny fotoanantsika.)
-
Ahoana no ahafantarantsika raha mandanilany ny fotoanantsika amin’ny teknôlôjia isika?
Halalino ity teny nambara manaraka ity, ka tadiavo ireo hevi-baovao momba ny fampiasana amim-pahendrena ny teknôlôjia.
Nampianatra izao ny Loholona David A. Bednar ao amin’ny Kôlejin’ny Apôstôly Roambinifolo:
Ny [olona] iray tsy matotra na diso lalana dia mety hanokana fotoana be loatra amin’ny filalaovana jeux vidéo, fifampiresahana amin’ny Internet, na amin’ny fomba hafa ahafahan’ny nomerika hibahana ny zavatra araka ny tena izy. Amin’ny voalohany, ilay fampiasam-potoana dia toa tsy mampidi-doza fa raisina ho toy ny minitra vitsivitsy hahazoana ilay fanamaivanana ilaina eo anatrehan’ireo zavatra takian’ilay fandaharam-potoana mavesatra isan’andro. Saingy very ireo fotoana manan-danja azo araraotina mba hampivoarana sy hanatsarana ny fahaiza-manao eo amin’ny fifandraisana amin’olona. … Ny fialam-boly toa tsy hatahorana dia mety ho lasa endrika fanandevozana manimba tsikelikely. (David A. Bednar, “Things as They Really Are,” Ensign, June 2010, 21)
-
Inona avy ireo antony ampiasain’ny olona hanamarinana ny fandanilaniana fotoana amin’ny teknôlôjia?
-
Inona no manampy anao hiala amin’ny fandanilaniana ny fotoananao amin’ny teknôlôjia?
-
Ahoana no mety hampidiranao ny Tompo ao anatin’ny ezaka ataonao amin’ny fampiasana amim-pahendrena ny teknôlôjia?
Fizarana 2. Misafidy zavatra tsara avy ao amin’ny haino aman-jery
-
Inona avy ireo zavatra safidinao tsy tapaka ao amin’ny haino aman-jery?
-
Inona no nampianarin’ny zavatra niainanao anao izay afaka manampy anao hijanona ho akaiky kokoa ny Ray any An-danitra sy an’i Jesoa Kristy rehefa misafidy zavatra avy ao amin’ny haino aman-jery ianao?
Vakio ny Fotopampianarana sy Fanekempihavanana 50:23–24; Fanekem-pinoana 1:13; ary ny Môrônia 7:12–17, ka tadiavo ireo fahamarinana izay afaka manampy antsika hanavaka ny tsara sy ny ratsy.
-
Inona avy ireo fahamarinana hitanao ao amin’ireo andininy ireo?
(Ao anatin’ireo fahamarinana maro dia mety hahita zavatra toy izao manaraka izao ianao: Izay manazava ny saina amam-panahy sy mandresy lahatra hanao ny tsara dia avy amin’ Andriamanitra.)
-
Inona no mety ho tombontsoanao amin’ny fampiharana io fahamarinana io rehefa misafidy izay haino aman-jery hampiasaina ianao?
Ny Loholona David A. Bednar dia nanasa antsika hametraka ity fanontaniana manaraka ity amin’ny tenantsika momba ny haino aman-jery ampiasaintsika:
Moa ve ny fampiasana ireo teknôlôjia sy haino aman-jery samihafa manasa na manakana ny fananana tsy tapaka ny Fanahy Masina ho namana eo amin’ny fiainanao? (David A. Bednar, “Things as They Really Are,” Ensign, June 2010, 23)
-
Ahoana no ahafahanao manasa ny Fanahy Masina rehefa misafidy zavatra ao amin’ny haino aman-jery ianao?
-
Inona no manampy anao hisoroka ireo karazana zavatra ao amin’ny haino aman-jery izay afaka mampanalavitra anao amin’ny Mpamonjy?
Rehefa avy nandalina ny mpianatra, dia angataho izy ireo hizara ny zavatra nianarany. Azo atao miaraka amin’ny iray kilasy izany na amin’ny alalan’ny fampiarahana ny mpianatra amin’ny olona iray izay nandalina fizarana hafa. Rehefa avy mifampianatra ny mpianatra dia hevero ny hanasa azy ireo mba hampihatra ny iray amin’ireto fahaiza-manao manaraka ireto na izy roa mba hanampiana azy ireo hampiasa ny teknôlôjia amin’ny fomba azo antoka. ChurchofJesusChrist.org
Ny fanaovana drafitra mialoha dia afaka manampy antsika handray andraikitra amin’ny teknôlôjia
Mba hanampiana ny mpianatra hampihatra ny zavatra nianarany dia ampio izy ireo hampihatra ity fahaiza-manao manaraka ity:
Farito: Ny fanaovana drafitra momba ny fomba hampiasantsika ny teknôlôjia dia afaka manampy antsika hazoto hirotsaka amin’ny fanaovan-tsoa ary tsy handanilany ny fotoanantsika. Mitadiava ny fanampian’ny Ray any An-danitra rehefa manao drafitra.
Manaova maodely: Manomeza maodely ho an’ny mpianatra amin’ny alalan’ny fanasana azy ireo hieritreritra ny fomba ahafahan’izy ireo mampiasa amim-pahombiazana ny teknôlôjia. Afaka manao izany ianao amin’ny alalan’ny fanontaniana hoe:
-
Inona avy ireo fomba azonao eritreretina mialoha mba handraisana andraikitra eo amin’ny fampiasanao ny teknôlôjia?
Ireto misy valiny azo heverina:
-
Diniho ny fomba tian’ny Ray any An-danitra hampiasanao ny teknôlôjia.
-
Manàna tanjona alohan’ny hampiasanao teknôlôjia (ohatra, mifandray amin’ny namana amin’ny findainao).
-
Mametraha fe-potoana isan’andro amin’ny fampiasana teknôlôjia.
-
Manàna toerana tsy ahitana fitaovana ifaneraserana, toy ny efitrano fandrianao sy ny efitra fandroana.
-
Fahano any amin’ny toerana iraisan’ny fianakaviana mba hametrahan-javatra ny findainao amin’ny alina, lavitra ny fandriananao.
-
Mampiasà sivana manakana ny votoatin-kevitra tsy mendrika na tsy azo antoka.
-
-
Nahoana araka ny eritreritrao no mety hitondra fiovana ny fananana drafitra?
Manaova fampiharana: Asao ny mpianatra hikatsaka ny fanampian’ny Ray any An-danitra mba hanao drafitra momba ny fomba handraisan’izy ireo andraikitra eo amin’ny fampiasana ny teknôlôjia.
Anontanio raha misy mpianatra manaiky hizara ny eritreriny amin’ny iray kilasy.
Afaka manampy antsika handray andraikitra amin’ny amin’ny fampiasana ny teknôlôjia ny fiatoana kely
Mba hanampiana ny mpianatra hahatakatra ny zavatra tokony hatao rehefa sendra zavatra tsy mendrika ao amin’ny haino aman-jery izy ireo, dia mety hilaina ity fahaiza-manao manaraka ity:
Farito: Rehefa sendra zavatra tsy mendrika ao amin’ny haino aman-jery isika dia afaka miato kely ary miala sasatra amin’ny fampiasana ny teknôlôjia.
Manaova maodely: Omeo maodely ny mpianatra amin’ny alalan’ny fizarana ireto dingana telo manaraka ireto izay afaka manampy azy ireo hiato kely sy hiala sasatra amin’ny fampiasana ny teknôlôjia rehefa sendra zavatra tsy mendrika ao amin’ny haino aman-jery izy ireo.
-
Lazao izany: Rehefa mahita votoatin-kevitra tsy mendrika ianao na mahatonga anao halahelo, na ho manirery, na ho tsy mahazo aina, dia afaka miteny ianao hoe, “Tsy mety ity.” Ireo fahatsapana ireo dia mety ho bitsika avy amin’ny Fanahy Masina.
-
Manaova safidy tsara kokoa: Azonao atao ny mamono ilay fitaovana na mampangina ireo hafatra fampandrenesana. Afaka mivoaka any ivelany ianao na mifindra any amin’ny efitrano hafa, ka tsy entinao manaraka anao ilay fitaovana. Afaka mieritreritra an’i Jesoa Kristy ianao na mitadidy soratra masina iray izay tianao indrindra mba hanasana ny Fanahy Masina hiaraka aminao.
-
Mifandraisa amin’olona: Azonao atao ny miresaka amin’ny namana na olona ao amin’ny fianakavianao momba ny zavatra tsapanao. Afaka mivavaka amin’ny Ray any An-danitra ianao.
Manaova fanazaran-tena: Asao ny mpianatra hieritreritra fomba ahafahan’izy ireo miato kely sy miala sasatra rehefa ny sendra zavatra tsy mendrika ao amin’ny haino aman-jery.
Raha tian’ny mpianatra dia afaka mizara ny heviny amin’ny iray kilasy izy ireo.
Zarao ny zavatra nianaranao
-
Inona no zavatra nianaranao tamin’ity lesona ity ka tsy tianao hohadinoina?
Farano amin’ny fijoroanao ho vavolombelona fa ny Tompo dia afaka manampy antsika amin’ny fampiasana ny teknôlôjia amin’ny fomba azo antoka sy amim-pahendrena.