“179-р хичээл—Удирдагчдаа дэмжих: Бусдыг удирдан чиглүүл хэмээн Их Эзэний дуудсан хүмүүсийг дагах нь,” Сургаал ба Гэрээний семинарын багшийн гарын авлага (2025)
“Удирдагчдаа дэмжих,” Сургаал ба Гэрээний семинарын багшийн гарын авлага
179-р хичээл: Өсвөр үеийнхний бат бөх байдлын төлөө: Сонголт хийх нь
Удирдагчдаа дэмжих
Бусдыг удирдан чиглүүл хэмээн Их Эзэний дуудсан хүмүүсийг дагах нь
Бид олон талаараа сайн удирдагч байж чадна. Ийн байх нэг арга зам бол сайн дагалдагч байх явдал юм. Бид Есүс Христийн удирдлаган дор дуудагдсан удирдагчдыг дэмжих замаар Түүнд итгэх итгэлээ харуулдаг. Энэ хичээл нь бусдыг удирдан чиглүүл хэмээн Их Эзэний дуудсан хүмүүсийг дэмжихийн ач холбогдлыг суралцагчдад ойлгуулахад туслах зорилготой.
Боломжит суралцах үйл ажиллагаа
Дагахад бэлэн байх
Бусдыг удирдан чиглүүл хэмээн Их Эзэний дуудсан хүмүүсийг дэмжих эсвэл дэмжихийн ач холбогдлын талаар эргэцүүлэн бодоход суралцагчдад туслахын тулд дараах жишээг үзүүлэх талаар бодож үз.
Таны нэг найз жил хүрэхгүй хугацааны өмнө баптисм хүртэж, дөнгөж сая танай ангийн эсвэл чуулгын ерөнхийлөгчөөр дуудагдсан гэж төсөөл. Та сайн мэдээнд түүнээс удаан итгэлтэй байсан бөгөөд найз тань өөр шиг чинь эсвэл бусадтай адил анги, чуулгын ерөнхийлөгч байх чадахгүй гэж боджээ.
-
Та удирдагчдаа дэмждэг анги, чуулгын гишүүн байхын тулд энэ бодлоо хэрхэн өөрчилж болох вэ?
-
Энэ дуудлагад найзыгаа дэмжихийн тулд та юу хийж болох вэ?
Та тэдэнд эсвэл тэдний таньдаг хүнд үүнтэй адил зүйл тохиолдож байсан эсэхийг суралцагчдаас асууж болно. Тэд хэрхэн хариулсан бэ?
Их Эзэний дуудсан хүмүүсийг дагахад бэлэн байхын нэгэн жишээ бол Хайрум Смит юм. Хэдийгээр Хайрум дүүгээсээ зургаан насаар ах байсан ч Иосефыг дуудлагаа хийхэд нь дэмжсэн.
Арван хоёр төлөөлөгчийн чуулгын ахлагч M.Рассэлл Баллард Хайрумын талаар ийн хуваалцсан.
[Хайрум] Сэргээлтийн урт бөгөөд амаргүй үйл явцын туршид өөрийн дүү бошиглогч Иосефт тусалж, үйлчилж байв. …
Энэ бүхнийг туулахдаа Хайрум халширч бууж өгөөгүй. Амьдрал нь ямар замаар явахыг тэр мэдэж байсан төдийгүй уг замналаар явахаа ухамсарлан сонгосон. Иосефын хувьд Хайрум хамтрагч, хамгаалагч, тэтгэгч, итгэлт хүн нь болж, эцэст нь үйл хэргийнхээ төлөө амь насаа өгөхөд нь хамт байсан юм. Тэд насан туршдаа шударга бусаар хавчигдаж байжээ. Хэдийгээр Хайрум ах нь байсан ч дүүгийнхээ бурханлаг нөмрөгийг хүлээн зөвшөөрсөн юм. Хайрум Иосефт хааяа хатуухан үг хэлдэг байсан ч дүүгийнхээ саналыг үргэлж сонсдог байв. (M. Russell Ballard, “Hyrum Smith: ‘Firm as the Pillars of Heaven,’” Ensign, Nov. 1995, 6–7)
-
Хайрум шиг хүнд Иосефыг санваарын удирдагчийнх нь хувьд дагахад юу саад болох байсан бэ?
-
Хайрумын Христийнхтэй адил ямар зан чанар нь Иосефыг дагахад тусалсан байж болох вэ? (Сургаал ба Гэрээ 124:15-ыг үзнэ үү).
Сургаал ба Гэрээ 124:94–96-г уншаад, Хайрум дүүгээ дагаснаар хэрхэн адислагдсаныг олж мэд. (94-р шүлэг нь Иосеф биш, Хайрумын тухай гэдгийг анхаарна уу.)
-
Та эдгээр шүлгээс ямар ямар адислалыг олсон бэ?
Удирдагчдыг дэмжих
Удирдагчдаа дагах хүсэлтэй байгаагаа харуулах нэг арга зам бол тэднийг дэмжих явдал гэдгийг тайлбарла. Дэмжих гэдэг нь ямар утгатай уг болохыг суралцагчид хэр сайн ойлгож байгааг шалгах нь тустай байж болно. Ийн шалгах нэг арга бол дэмжих гэдэг нь юу гэсэн үг болохыг суралцагчдаар өөрсдөөр нь тодорхойлуулан бичүүлэх явдал юм. Дараа нь бичсэн зүйлээ Судрын удирдамж: “Сүмийн ерөнхий болон орон нутгийн удирдлагын албан тушаалд үйлчилж буй хүмүүсийг дэмжихээ амлах” (Судруудын удирдамж, “Сүмийн удирдагчдыг дэмжин батлах,” Gospel Library) гэсэн тодорхойлолттой харьцуулахад суралцагчдыг урь.
Тэргүүн зөвлөлийн ерөнхийлөгч Хэнри Б.Айринг бусдыг удирдан чиглүүл хэмээн Их Эзэний дуудсан хүмүүсийг дэмжих талаар дараах зүйлийг ажиглажээ.
Гараа өргөн дэмжсэнээр та нар амлалт өгдөг. Та нар Бурханы үйлчлэгчдийг дэмжинэ гэсэн амлалтыг Түүнд өгдөг.
Тэд бол таны адил төгс бус хүмүүс. Амлалтаа биелүүлэхэд тань Их Эзэн тэднийг дуудсан гэсэн гуйвшгүй итгэлтэй байх хэрэг гарна. Эдгээр амлалтыг сахих нь мөнхийн аз жаргалыг авчирна. (Хэнри Б.Айринг, “Дэмжих итгэлийн хүч,” 2019 оны 4-р сарын Ерөнхий чуулган, 71–72)
-
Та ерөнхийлөгч Айрингийн заасныг хэрхэн дүгнэх вэ?
-
Тэрээр Есүс Христэд итгэх итгэлээ хэрэгжүүлэх талаар юу заасан бэ?
Бид Есүс Христийн бусдыг удирдан чиглүүл гэж дуудсан хүмүүсийг дэмжин батлахдаа Түүнд итгэх итгэлээ хэрэгжүүлдэг гэсэн үнэнийг тодорхойлоход нь суралцагчдад тусал.
-
Удирдагчдыг дэмжихэд яагаад Есүс Христэд итгэх итгэл хэрэгтэй гэж та бодож байна вэ?
-
Таныг удирдан чиглүүлэхээр Бурханы дуудсан хүнийг дэмжсэнийхээ төлөө адислагдсанаа та хэзээ мэдэрч байсан бэ?
Хэрэв суралцагчдын санаанд жишээ орж ирэхгүй бол та Бурханы удирдан чиглүүл хэмээн дуудсан хүнийг дэмжиж байсан туршлагаа эсвэл гэрчлэлээ тэдэнтэй хуваалцаж болно.
Христэд найдан бусдыг удирдан чиглүүлэхээр дуудсан хүмүүсийг дэмжих
Бурханы дуудсан хүмүүсийг дэмжихдээ Христэд найдах зарчим нь хэрхэн тэдний амьдралтай холбоотой болохыг илүү сайн ойлгоход нь суралцагчдад тусал. Жишээнүүдийг үзүүлэх эсвэл суралцагчдад илүү тохирох өөр жишээнүүдийг зохиох нь ийн ойлгуулах нэг арга зам юм. Тараах материалын нэг юм уу хэд хэдэн хэсгийг судалж байхдаа өөрсдийн бодсон нэг жишээг сонгоход суралцагчдыг урь. Суралцагчид мөн хичээлийн эхэнд өгсөн жишээг ашиглаж болно.
Амандагийн Залуу эмэгтэйчүүдийн ангийн ерөнхийлөгчийн зөвлөл дөнгөж сая өөрчлөгджээ. Ерөнхийлөгчөөр дуудагдсан охин өмнө нь Амандатай муухай харьцдаг байсан охин байв.
Жош бол шаргуу ажилладаг номлогч юм. Номлолын ерөнхийлөгч нь саяхан Жошид таалагдаагүй номлолын нэгэн дүрмийг зарлажээ.
Жөүсигийн сайн найзыг ангийн даргаар саяхан дуудав. Найз нь түүнийг ерөнхийлөгчийн зөвлөлд орооч гэж гуйна гэж хүлээж байсан ч тэр тэгсэнгүй.
Кэйдээс чуулгын ерөнхийлөгчөөр үйлчлэхийг хүсжээ. Тэр бүрэг ичимхий нэгэн бөгөөд шийдвэр гаргах дургүй нэгэн аж. Чуулга, ерөнхийлөгчийн зөвлөлөө хэр үр дүнтэй удирдах бол гэдэгтээ тэр санаа зовж байв.
“Бусдыг удирдан чиглүүл хэмээн дуудсан хүмүүсийг дэмжих талаарх сургаал” нэртэй тараах материал нь тэдний тодорхойлсон үнэн сонгосон жишээтэй нь мөн өөрсдийнх нь амьдралтай хэрхэн хамаатай болохыг ойлгоход суралцагчдад тусална.
Тараах материалыг танхимд тойруулан байрлуулан тэдгээрийг авч үзэж болно. Суралцагчид байрлалуудыг тойрон алхаж, тараах материалын хэсэг бүрийг дотроо судлаад, өөрсдийнх нь жишээтэй холбоотой ойлголтыг олж, бичиж тэмдэглэнэ. Дараа нь суралцагчид бүлгүүдэд эсвэл хоёр хоёроороо хуваагдан сурсан зүйлсээ хуваалцаж болно.
Түүнчлэн суралцагчдыг дөрвөн хүнтэй бүлэгт хувааж, бүлгийн гишүүн бүрд тараах материалын нэг хэсгийг оноож өгөх замаар тараах материалыг судалж болно. Суралцагчид өөр өөрийн хэсгийг судлаад, тэр нь тэдний жишээтэй хэрхэн холбоотой болохыг олж мэдэж болно. Дараа нь суралцагч бүр олж мэдсэн зүйлээ бүлгийнхэндээ зааж болох юм.
Бусдыг удирдан чиглүүл хэмээн дуудсан хүмүүсийг дэмжих талаарх сургаал
1-р хэсэг
Тэргүүн зөвлөлийн ерөнхийлөгч Хэнри Б.Айринг ийн заасан.
Их Эзэний Сүмийн удирдагч тань та нарт сул дорой эсвэл хүчтэй, сүнсээр өдөөгдсөн мэт санагдаж болно. Үнэндээ удирдагч болгонд эдгээр болон өөр олон зан чанар холилдон байдаг. Биднийг удирдахаар дуудагдсан Их Эзэний үйлчлэгчдийг Их Эзэн тэднийг дуудах үед хэрхэн харснаар нь харах юм бол бидний хувьд тэдэнд тусалж байгаа хэрэг юм.
Их Эзэн үйлчлэгчдээ төгс байдлаар хардаг. Тэрээр тэдний чадавх бас ирээдүйг хардаг бөгөөд мөн чанар нь хэрхэн өөрчлөгдөх боломжтойг мэддэг. Удирдах хүмүүсээсээ олж авсан туршлага нь тэднийг хэрхэн өөрчлөх боломжтойг Тэрээр бас мэддэг билээ. …
… Хэрэв та Их Эзэн дуудсан төгс бус үйлчлэгчдээ өгсөн илчлэлээрээ дамжуулан Сүмээ удирддаг гэдэгт итгэдэг бол Тэрээр тэнгэрийн цонхыг тэдэнд болон өөрт тань мөн адил нээж өгнө. (Хэнри Б.Айринг, “Их Эзэн Өөрийн Сүмийг удирддаг,” 2017 оны 10-р сарын Ерөнхий чуулган, 76–79)
2-р хэсэг
Залуу эрэгтэйчүүдийн ерөнхий ерөнхийлөгч асан Стифэн В.Өвэн ах ийн хэлсэн.
Та нарын амьдралд бусдыг танаар удирдуулахаар дуудах цаг ирнэ. Бусад үед бусдыг дагахыг та нараас хүснэ. Гэвч өнөөдөр миний та нарт өгөх захиас бол та нар ямар дуудлагатайгаасаа үл шалтгаалан үргэлж удирдагч мөн үргэлж дагалдагч байдаг гэсэн захиас юм. Удирдлага нь дагалдагчийн илэрхийлэл юм. Энгийнээр хэлэхэд, энэ нь Христэд ирэхэд нь бусдад туслах явдал бөгөөд жинхэнэ дагалдагчид үүнийг хийдэг. Хэрэв та Христийн дагалдагч болохоор хичээж байгаа бол Түүнийг дагахад бусдад тусалж чадна. Ингэснээр та удирдагч болж чадна.
Таны удирдах чадвар нээлттэй байдал, бусдад урам дэм өгөх чадвар эсвэл олны өмнө ярих авьяасаас ирдэггүй. Энэ нь таны Есүс Христийг дагах амлалтаас ирдэг. (Стифэн В.Өвэн, “Агуу удирдагч агуу дагалдагч байдаг,” 2016 оны 4-р сарын Ерөнхий чуулган, 57–59)
3-р хэсэг
Дараах шүлгүүдийг унш.
Сургаал ба Гэрээ 107:22 (Энэ шүлэг нь Тэргүүн зөвлөлийг дэмжих талаар бидэнд юу зааж байгааг анзаар. Удирдагчдыг дэмжих эдгээр арга зам нь хэрхэн бусад дуудлагад хамаатай байж болох талаар бодож үзээрэй.)
Гэтлэл 17:9–12 (Израил Амалекийн ард түмэнтэй тулалдаж байхад Мосед хэрхэн дэмжин тусалж байсныг анзаарна уу.)
4-р хэсэг
Залуу эрэгтэйчүүдийн ерөнхий ерөнхийлөгч асан Стифэн В.Өвэн ах ийн заасан.
[Есүс Христ] бол агуу дагалдагч учраас агуу удирдагч болсон. Тэрээр Эцэгээ бүх зүйлд төгс дагадаг. (Стифэн В.Өвэн, “Агуу удирдагч агуу дагалдагч байдаг,” 2016 оны 4-р сарын Ерөнхий чуулган, 57–59)
Та эдгээр шүлгийг уншихдаа Есүс Эцэгээ ямар ямар арга замаар дагасан, ингэснээрээ Тэрээр хэрхэн хүчирхэгжсэнийг анзаараарай.
Сурсан зүйлээ эргэцүүлэн бодох
Өнөөдрийн хичээлээс сурсан зүйлсийнх нь юу нь, яагаад Сүмийн өсвөр үеийнхэнд чухал гэж бодож байгаагаа хамтрагчдаа эсвэл бүлгийнхэндээ хуваалцахад суралцагчдыг урих талаар бодож үз.
Суралцагчдад хуваалцах цаг гаргаж өгснийхөө дараа тэднийг дараах асуултын талаар дотроо эргэцүүлэн бодож, Ариун Сүнсний удирдамжийг хүлээн авахад бэлэн байхад урь.
-
Та Их Эзэний дага хэмээн хүссэн хүмүүсийг дэмжих тал дээр та хэр сайн байгаа вэ?
-
Бусдыг удирдан чиглүүл хэмээн дуудсан хүмүүсийг илүү сайн дэмжихийн тулд та Аврагчид итгэх итгэлээ хэрхэн хэрэгжүүлж болох вэ?
Та Есүс Христэд итгэх итгэлээ хэрэгжүүлэн Сүмийн удирдагчдыг дэмжсэнээр хэрхэн адислагдсанаа хуваалцан хичээлээ дуусгаж болно.