Դաս 184. Ֆիզիկական և էմոցիոնալ առողջություն

Հոգ տանենք մեր ֆիզիկական մարմինների մասին

Պահպանենք ֆիզիկական առողջության կանոնները

Մեր ֆիզիկական մարմինը անհավանական պարգև է սիրող Երկնային Հոր կողմից: Մենք հարգանքով ենք վերաբերվում այս պարգևին՝ կատարելով խելամիտ ընտրություն մեր մարմինների մասին հոգ տանելու հարցում: Այս դասը կօգնի ուսանողներին երախտագիտություն ցուցաբերել Երկնային Հոր և Հիսուս Քրիստոսի հանդեպ՝ հոգ տանելով իրենց ֆիզիկական մարմինների մասին:

Հնարավոր ուսումնական վարժություններ

Մեր ֆիզիկական մարմինները

Նշում․ Այս դասն ուսուցանելիս պետք է հիշել, որ այս թեման կարող է դժվար ընկալվել որոշ ուսանողների կողմից: Սննդի խանգարումներ, հաշմանդամություն, լուրջ հիվանդություններ և այլ հանգամանքներ ունեցողների համար հատկապես դժվար է հոգ տանել իրենց ֆիզիկական մարմինների մասին:

Օգնեք ուսանողներին նախապատրաստվել ուսումնասիրելու այս դասը՝ առաջարկելով նրանց կիսվել մարդկանց կողմից ճնշումների և իրենց ֆիզիկական արտաքինի հանդեպ մարդկանց վերաբերմունքի մասին։ Դա անելու համար գրատախտակին գրեք Ֆիզիկական մարմին բառակապակցությունը և ուսանողներին առաջարկեք կիսվել իրենց մտքերով հետևյալ հարցերի վերաբերյալ.

• Ի՞նչ ճնշումների կարող են ենթարկվել մարդիկ իրենց ֆիզիկական մարմինների պատճառով:

• Ինչպե՞ս է տարբերվում մարդկանց վերաբերմունքն իրենց մարմինների հանդեպ:

  Ուսանողներին առաջարկեք իրենց ուսումնասիրության օրագրում պատասխանել հետևյալ հարցերին.

• Ինչպե՞ս եք վերաբերվում ձեր մարմնին: Ինչո՞ւ։

• Ըստ ձեզ, որքանո՞վ եք հոգ տանում ձեր մարմնի մասին: Ինչո՞ւ։

Այս դասը ուսումնասիրելիս՝ ոգեշնչում փնտրեք Սուրբ Հոգուց, որպեսզի իմանաք, թե ինչպես կարող եք հոգ տանել ձեր ֆիզիկական մարմնի մասին:

Ճշմարտություն Տիրոջից մեր մարմինների մասին

Կարդացեք «Ձեր մարմինը սուրբ է» բաժնի առաջին պարբերությունը Երիտասարդներին զորացնելու համար. Ընտրություն կատարելու ուղեցույց գրքույկից ([2022], 23)։

• Ի՞նչն էր առանձնահատուկ ձեզ համար:

  Երբ ուսանողները կիսվեն, գրատախտակին գրեք իրենց նշած ցանկացած ճշմարտություն: Խնդրեք ուսանողներին բացատրել, թե ըստ իրենց, որ ճշմարտությունն է այսօր կարևոր դեռահասների համար:

  Եթե ուսանողները չնշեն դա, գրատախտակին ավելացրեք հետևյալ ճշմարտությունը. Ձեր մարմինը հիանալի պարգև է Երկնային Հոր կողմից:

• Իմացությունը, որ մեր մարմինն Աստծո կողմից տրված պարգև է, ինչպե՞ս կարող է ազդել դրա նկատմամբ մեր վերաբերմունքի վրա:

• Ինչպե՞ս կարող է այս ճշմարտության իմացությունն ազդել մեր մարմինների մասին հոգ տանելու վրա:

Որպեսզի օգնեք ուսանողներին հասկանալ այս սկզբունքը և այն, թե ինչպես պետք է հոգ տանենք որպես պարգև ստացած մեր ֆիզիկական մարմինների մասին, կարող եք չորս ուսումնական անկյուններում բաժանել «Հոգ տանենք մեր ֆիզիկական մարմինների մասին» աշխատաթերթը: Դասարանը բաժանեք փոքր խմբերի, որոնք հերթականությամբ կկատարեն ուսումնական վարժություններից յուրաքանչյուրը: Յուրաքանչյուր անկյունին տրամադրեք թուղթ, որպեսզի ուսանողները կատարեն վարժության գրավոր մասը յուրաքանչյուր բաժնի վերջում: Այնուհետև ուսանողները կարող են կարդալ, թե ինչ են գրել մյուս խմբերը և ավելացնել դա իրենց գրածին։

Հոգ տանենք մեր ֆիզիկական մարմինների մասին

Մեր մարմնի պատկերը

• Ինչպե՞ս կարող են ուրիշների կարծիքներն ազդել մեր մարմինների հանդեպ մեր վերաբերմունքի վրա:

• Ճշմարտությունները, որոնք Տերը ցանկանում է, որ մենք հասկանանք Ծնունդ 1.26–27 և Ա Կորնթացիներին 6.19–20 հատվածներից, ինչպե՞ս են տարբերվում այն ուղերձներից, որոնք մենք կարող ենք ստանալ ուրիշներից:

Ուսումնասիրեք հետևյալ խորհուրդը, որը Տերը տվել է նախագահ Ռասսել Մ. Նելսոնի և Տասներկու Առաքյալների Քվորումից երեց Ջեֆրի Ռ. Հոլլանդի միջոցով՝ փնտրելով, թե ինչը կարող է օգտակար լինել մեր մարմնի պատկերի համար.

Ամեն անգամ հայելու մեջ նայելիս ձեր մարմնին նայեք որպես ձեր տաճարի: Ամեն օր այդ ճշմարտությունը երախտագիտությամբ թարմացնելը կարող եք դրական ազդեցություն թողնել ձեր մարմնի մասին հոգ տանելու և այն խելամտորեն օգտագործելու ձեր որոշումների վրա: Իսկ այդ որոշումները կկանխորոշեն ձեր ճակատագիրը: (Ռասսել Մ․ Նելսոն, «Հավերժական որոշումներ», Լիահոնա, նոյեմբեր 2013, 107)

Ես խնդրում եմ ձեզ … ավելի հանդուրժող եղեք ձեր նկատմամբ, այդ թվում՝ ձեր մարմնի կազմվածքի և ձևի նկատմամբ և ավելի քիչ ցանկացեք նմանվել մեկ ուրիշին: Մենք բոլորս տարբեր ենք։ Ոմանք բարձրահասակ են, ոմանք՝ ցածրահասակ: Ոմանք գեր են, ոմանք՝ նիհար։ Եվ գրեթե բոլորը ինչ-որ պահի ուզում են լինել ոչ այնպիսին, ինչպիսին հիմա են: Սակայն, ինչպես ասել է դեռահաս աղջիկների մի խորհրդական. «Դուք չեք կարող ապրել ձեր կյանքն՝ անհանգստանալով, որ աշխարհը նայում է ձեզ: Երբ թույլ եք տալիս, որ մարդկանց կարծիքները ձեզ ստիպեն ամաչել, դուք կորցնում եք ձեր ուժը: … [Վստահության] զգացում ունենալու բանալին միշտ լսելն է ձեր ներքին «ես»-ին՝ [ձեր իրական ինքնությանը։]» Իսկ Աստծո արքայությունում ձեր իրական ինքնությունը «սուտակից էլ թանկ է» [Առակներ 3.15]: (Ջեֆրի Ռ. Հոլլանդ, «To Young Women,» Լիահոնա, նոյ. 2005, 29)

• Ի՞նչ սովորեցիք այս հատվածներից։

Գրեք ինչ-որ բան, որն ըստ ձեզ, Տերը կցանկանար, որ դուք ասեիք մեկին, ով դժվարանում է դրականորեն վերաբերվել իր մարմնին:

Քունը

Կարդացեք Վարդապետություն և Ուխտեր 88․124 հատվածը՝ փնտրելով, թե ինչ է Տերն ուսուցանել քնի մասին:

• Ըստ ձեզ, ինչո՞ւ է քունը կարևոր։

Ոչ բավարար քունը կարող է լուրջ առողջական խնդիր առաջացնել: Փորձագետների մեծամասնությունը խորհուրդ է տալիս դեռահասներին քնել օրական 8–10 ժամ (տես National Sleep Foundation, «How much Sleep Do You Really Need?», հոկտ․ 1, 2020, thensf.org)։ Ոչ բավարար քնի դեպքում մարդը կարող է հոգնածություն զգալ, վատ աշխատել և ունենալ ֆիզիկական և հոգեկան առողջության հետ կապված խնդիրներ: Հոգնածության զգացումը կարող է հանգեցնել նրան, որ մենք ավելի ընկալունակ դառնանք գայթակղությունների հանդեպ:

• Նկատե՞լ եք, որ քնելու սովորություններն ազդում են ձեր կյանքի վրա:

• Ինչպե՞ս կարող են քնելու առողջ սովորությունները բարելավել Տիրոջը ծառայելու մեր կարողությունը:

Ձեր խմբի հետ քննարկեք մի խորհուրդ, որը կտայիք այն մարդուն, որը ցանկանում է բարելավել քնելու իր սովորությունները, կամ ում խորհուրդ կտայիք դիմել խորհրդատվության համար: Գրեք ձեր մտքերը տրամադրված թղթի վրա:

Ֆիզիկական վարժություններ և ակտիվ ապրելակերպ

Ծուլանալ նշանակում է վատնել մեր ժամանակը կամ խուսափել աշխատանքից: Կարդացեք հետևյալ հատվածներից մեկը կամ երկուսը՝ փնտրելով Տիրոջ վերաբերմունքն Իր զավակների ծուլության հանդեպ. Վարդապետություն և Ուխտեր 42.42, 60․13, 75․3։

• Ըստ ձեզ, ինչո՞ւ է Տերը ցանկանում, որ մենք լինենք ակտիվ և աշխատասեր, այլ ոչ թե ծույլ:

• Տերն ինչպե՞ս է օրհնել ձեզ, երբ փորձել եք լինել ակտիվ և աշխատասեր:

• Ինչպե՞ս կարող են ֆիզիկական վարժությունները և ակտիվ ապրելակերպը բարելավել մեր հոգեկան առողջությունը: Ինչպե՞ս դա կարող է օգնել մեզ՝ ծառայել Տիրոջը:

Գրեք ձեր խորհուրդն՝ ուղղված դեռահասին, որը ցանկանում է բարելավել իր ֆիզիկական վարժությունների և ակտիվ ապրելակերպի մակարդակը:

Առողջ սնվելու սովորություններ

Կարդացեք հետևյալ հատվածները՝ փնտրելով Փրկչի խորհուրդն առողջ սնունդ ընտրելու վերաբերյալ. Վարդապետություն և Ուխտեր 59.16–20, 89․10–16։

• Ինչպե՞ս է սննդի ընտրությունն ազդում մեր կյանքի վրա:

Քննարկեք, թե ինչ խոչընդոտներ կան, որոնք խանգարում են առողջ սնվելուն: Կիսվեք, թե մենք ինչպես կարող ենք խնդրել Տիրոջ օգնությունը և հաղթահարել այդ խոչընդոտները:

• Ինչպիսի՞ երկարաժամկետ օգուտներ կարող ենք ստանալ՝ հետևելով երիտասարդ տարիքում ճիշտ սնվելու Փրկչի խորհրդին:

Խմբով կազմեք երեք սյունակ հետևյալ վերանգրերով՝ «Խուսափել», «Երբեմն» և «Առողջ սնունդ»: Վարժությունը միասին կատարելու համար՝ ընտրեք մի քանի տարածված մթերք, որոնց դուք առնչվում եք ամեն օր: Քննարկեք, թե ձեր ընտրած սնունդը որ սյունակին է համապատասխանում։

Ավարտելուց հետո ուսանողներին առաջարկեք կիսվել իրենց սովորածով և մտահոգություններով: Ստորև ներկայացվող հարցերը կարող են օգտակար լինել.

• Ինչո՞ւ կարող է դժվար լինել զարգացնել առողջ սովորությունները և մեր մարմինների մասին պատշաճ կերպով հոգ տանելը:

• Ըստ ձեզ, ինչպե՞ս կարող է մեզ օգնել հիշելը, որ մեր մարմինն Աստծո կողմից տրված պարգև է:

• Ինչպե՞ս է Տերն օգնել ձեզ կամ ձեր ծանոթին զարգացնել առողջ սովորություններ:

Դասարանին առաջարկեք կիսվել ճշմարտություններով կամ փորձառություններով, որոնք կարող են օգնել ուսանողների կողմից նշված դժվարությունների հաղթահարմանը կամ մտահոգությունների փարատմանը:

Դասի ավարտին ուսանողներին առաջարկեք իրենց օրագրում գրել, թե ըստ իրենց, Տերը ինչ կցանկանար, որ իրենք անեին՝ իրենց մարմինների մասին ավելի լավ հոգ տանելու համար:

Լրացուցիչ նյութեր

Ի՞նչ նպատակով է մեզ տրվել ֆիզիկական մարմինը:

Նախկինում սրտաբան-վիրաբույժ նախագահ Ռասսել Մ. Նելսոնն ուսուցանել է.

Որքան երկար եմ ապրում, այնքան ավելի շատ գիտելիք եմ ձեռք բերում: Այդ գիտելիքն ինձ օգնում է հասկանալ, որ մեր ֆիզիկական մարմինների շնորհը բացառիկ հրաշք է: Մեր եզակի մարմինը մեզանից յուրաքանչյուրին տրված է մեր սիրող Երկնային Հոր կողմից: Նա ստեղծել է այն որպես խորան մեր հոգիների համար, որպեսզի օգնի մեզանից յուրաքանչյուրին կատարել «մեր արարման ամբողջ չափը»: Մեր մարմինը հնարավորություն է տալիս մեզանից յուրաքանչյուրին լինել փրկության մեծ ծրագրի մի մասը, որը Նա մշակել է Իր բոլոր թանկագին զավակների համար: Նա ցանկանում է, որ մենք, ի վերջո, ավելի նմանվենք Իրեն և վերադառնանք՝ ապրելու Իր հետ: Այդ մեծ օրհնությունը հնարավոր չէր լինի առանց մեր ֆիզիկական մարմինը ստանալու՝ այս փորձնական վիճակում: (Ռասսել Մ. Նելսոն, «Your Body: A Magnificent Gift to Cherish,» New Era, օգոստոս 2019, 2)

Տասներկու Առաքյալների Քվորումից երեց Դ. Թոդ Քրիստոֆերսոնը բացատրել է․

Նվիրաբերված կյանքը գնահատում է ֆիզիկական մարմնի անզուգական պարգևը՝ չնաշխարիկ ստեղծագործությունն Աստծո պատկերով: Մահկանացու կյանքի առանցքային նպատակն է, որ յուրաքանչյուր հոգի ստանա այդպիսի մարմին և սովորի բարոյական ազատ կամք գործադրել այդ մարմնական խորանում: … Աշխարհի այս ընկած վիճակում ոմանց կյանքը կլինի ցավալիորեն կարճ, ոմանց մարմինները կլինեն տձև, խախտված կամ կյանքը պահպանելու համար հազիվ բավարարող, սակայն կյանքը բավականաչափ երկար կլինի յուրաքանչյուր հոգու համար և ամեն մարմին արժանի կլինի հարության: (Դ. Թոդ Քրիստոֆերսոն, «Մտորումներ նվիրաբերված կյանքի մասին», Լիահոնա, նոյ. 2010, 17)

Ի՞նչ կապ կա ֆիզիկական առողջության և իմ կյանքի այլ ոլորտների միջև:

Յոթանասունից երեց Ադրիան Օչոան բացատրել է․

Կյանքը կարող է դժվար լինել և երբեմն մենք կարող ենք ունենալ անհանգստության, ընկճվածության կամ ինքնագնահատականի բացակայության զգացողություն: Սակայն հիշեք, որ և ֆիզիկական, և էմոցիոնալ առողջության առումով վարժությունները և քրտնաջան աշխատանքն օգնում են պահպանել դրական տեսանկյունը: Ձեր մարմնի մասին հոգալը նաև օրհնում է ձեր միտքը և օգնում ձեզ հիշել, որ դուք Աստծո զավակն եք և կարող եք վստահ և երջանիկ լինել: Մեր էմոցիոնալ, ֆիզիկական և հոգևոր կողմերը կապված են միմյանց հետ: (Ադրիան Օչոա, «Եղեք ուժեղ, եղեք առողջ, եղեք խելացի», New Era, հոկտ. 2013, 42)

Նախագահող Եպիսկոպոսությունից Եպիսկոպոս Ժերալդ Կոսեն ասել է․

Այն սովորությունները, որոնք ձեռք եք բերում հիմա՝ կապված ձեր անձնական բարեկեցության հետ, ձեր ողջ կյանքում կազդեն ձեզ վրա և աշխարհիկ, և հոգևոր առումներով: Ձեր ուշադրությունը չպետք է կենտրոնացած լինի աշխարհիկ սին միտումներին հետևելու վրա: Հարցը պարզապես նրանում չէ, որ այս կամ այն մասում որոշ քանակությամբ ճարպ կորցնեք կամ լրացուցիչ քսան ֆունտ քաշ բարձրացնեք, որպեսզի ձեր հարևանի պես առույգ երևաք: Նպատակն այն է, որ ձեզ ավելի լավ զգաք և գտնեք աշխարհիկ և հոգևոր հավասարակշռություն: Սա ձեզ համար լավագույն հնարավորություն է՝ ողջ կյանքի ընթացքում լինել առողջ, որն իր հերթին ձեզ ուրախություն և վստահություն կբերի ձեր մահկանացու կարողությունների նկատմամբ, ինչպես նաև ձեր հավերժական ներուժի ավելի լավ գիտակցում: (Ժերալդ Կոսե, «Harmony of Body and Spirit: A Key to Happiness» [Brigham Young University devotional, հոկտ․ 13, 2020], 5, speeches.byu.edu)

Օժանդակ ուսումնական վարժություններ

Ովքե՞ր ենք մենք և ո՞րն է մեր ճակատագիրը:

Որպեսզի օգնեք ուսանողներին հասկանալ, թե իրենց աստվածային ինքնության հավերժական հեռանկարն ինչպես կարող է օգնել ձևավորել իրենց մարմնի պատկերը, կարող եք ցուցադրել «Our True Identity» (3:39) տեսանյութը։ Տասներկու Առաքյալների Քվորումից երեց Դիտեր Ֆ. Ուխդորֆը կիսվում է անճոռնի ճուտիկի պատմությունով, որպեսզի օգնի մեզ հասկանալ, թե ով ենք մենք իրականում՝ հատկապես մեր Երկնային Հոր համար: (Այս տեսանյութն ընդգրկված է նաև «Աստվածային ինքնություն և նպատակ» վերնագրով դասում։)

Անձնական հիգիենա

Օգտակար կլինի ձեր դասարանի հետ քննարկել անձնական հիգիենային վերաբերող հարցերը՝ նկատի ունենալով, որ աշխարհի ոչ բոլոր մասերում են գործում նույն նորմերը կամ ոչ նույն ձևով են հասանելի հիգիենայի պարագաները: Եթե ընտրել եք այս վարժությունը, ուսանողներին առաջարկեք կարդալ Վարդապետություն և Ուխտեր 42.41 հատվածը՝ փնտրելով Տիրոջ խոսքերը մաքրության մասին: Մեր մարմնի հրաշալի պարգևի մասին հոգ տանելու եղանակներից մեկը անձնական հիգիենայի պահպանումն է:

Ուսանողներին առաջարկեք լուռ խորհել, թե որքան լավ են իրենք հետևում իրենց անձնական հիգիենային՝ 1-ից (հազվադեպ) 5-ը (հաճախ) սանդղակով: Դա կարող է ներառել հետևյալը․

• Ձեռքերն օճառով և ջրով պարբերաբար լվանալը։

• Ամեն օր ատամի թել և խոզանակ օգտագործելը՝ ձեր ատամները մաքրելու համար։

• Պարբերաբար լոգանք ընդունելը և մազերը լվանալը։

• Ձեր հագուստը պարբերաբար լվանալը:

Ուսանողներին առաջարկեք պատկերացնել, որ իրենց խնդրել են ստեղծել անձնական հիգիենայի տաղավար կամ ցուցադրություն՝ Եկեղեցու միջոցառման համար: Առաջարկեք նրանց քննարկել անձնական հիգիենայի օրհնությունները և, թե ինչպես այն կարող է օգնել մեզ երախտագիտություն ցուցաբերել Երկնային Հոր հանդեպ: