«Դաս 185. Ամրացնենք էմոցիոնալ կայունությունը Տիրոջ օգնությամբ. Մեծացնենք մեր վստահությունը Տիրոջ օգնության նկատմամբ՝ մեր էմոցիոնալ խնդիրները լուծելու համար», Վարդապետություն և Ուխտեր․ Սեմինարիայի ուսուցչի ձեռնարկ (2025)
«Ամրացնենք էմոցիոնալ կայունությունը Տիրոջ օգնությամբ», Վարդապետություն և Ուխտեր․ Սեմինարիայի ուսուցչի ձեռնարկ
Դաս 185. Ֆիզիկական և էմոցիոնալ առողջություն
Ամրացնենք էմոցիոնալ կայունությունը Տիրոջ օգնությամբ
Մեծացնենք մեր վստահությունը Տիրոջ օգնության նկատմամբ՝ մեր էմոցիոնալ խնդիրները լուծելու համար
Քանի որ Երկնային Հայրը սիրում է մեզ, Նա ուղարկեց Իր Որդուն՝ Հիսուս Քրիստոսին, որպեսզի զորացնի և մխիթարի մեզ՝ կյանքի դժվարությունները հաղթահարելիս: Այս դասը կօգնի ուսանողներին վստահ լինել, որ Փրկիչը կաջակցի իրենց էմոցիոնալ կայունություն զարգացնելու գործում:
Հնարավոր ուսումնական վարժություններ
Էմոցիոնալ դժվար իրավիճակներ
Նշում․ Այս նյութը նախատեսված է օգնելու ուսումնասիրել, թե ինչպես Տիրոջ օգնությամբ ամրացնել էմոցիոնալ կայունությունը, այլ ոչ թե հոգեկան և էմոցիոնալ հիվանդությունների ախտորոշման կամ բուժման համար: Դասի ժամանակ ձեռք բերած փորձառությունը նույնպես նախատեսված չէ որևէ տեսակի խմբային թերապիա անկացնելու համար:
Որպեսզի օգնեք ուսանողներին պատրաստվել այս դասին, առաջարկեք նրանց քննարկել և գրել էմոցիոնալ առումով դժվար մի քանի իրավիճակ, որոնց իրենք կամ իրենց նման դեռահասները կարող են առաջիկայում բախվել։ Օրինակները կարող են ներառել հետևյալ իրավիճակները․ նրանք կարող են ծաղրի ենթարկվել իրենց հասակակիցների կողմից, հայտնվել մի իրավիճակում, երբ իրենք պետք է փոխգործակցեն իրենց անծանոթ մարդկանց հետ կամ մի իրավիճակ, երբ որևէ հաճելի բան ավարտվում է: Ուսանողներին խնդրեք իրենց իրավիճակները պատկերացնել որպես իրատեսական և իրենց կյանքին առնչվող։
Ապա ուսանողներին առաջարկեք իրենց օրագրերում կատարել հետևյալը.
Մտածեք էմոցիոնալ դժվար իրավիճակի մասին, որին բախվել եք կամ, հավանաբար, շուտով կբախվեք: Սուրբ գրությունների ուսումնասիրության ձեր օրագրում պատասխանեք հետևյալ հարցերին.
-
Ըստ ձեզ, որքանո՞վ եք արդյունավետ արձագանքում էմոցիոնալ դժվար իրավիճակներին: Ինչո՞ւ։
-
Ըստ 1-ից 10 սանդղակի (1= բոլորովին վստահ չեմ, 10=լիովին վստահ եմ)՝ որքանո՞վ եք վստահ, որ Փրկիչը կարող է օգնել և կօգնի ձեզ այդ իրավիճակներում: Ինչո՞ւ։
Դասի ընթացքում խրախուսեք ուսանողներին աղոթքով ձգտել վստահություն ձեռք բերել էմոցիոնալ դժվար իրավիճակներում իրենց օգնելու Փրկչի կարողության նկատմամբ և դառնալ էմոցիոնալ առումով ավելի կայուն:
Էմոցիոնալ կայունություն
Կարող եք գրատախտակին գրել էմոցիոնալ կայունություն արտահայտությունը։ Ուսանողներին հարցրեք, թե ինչ են իրենք հասկանում դրա մասին: Կարող եք նաև ցուցադրել հետևյալ տեղեկությունը.
Ըստ Երկնային Հոր ծրագրի՝ մենք բոլորս այս կյանքի ընթացքում բախվում ենք խնդիրների և դժվարությունների: Այնուամենայնիվ, երբ մենք դիմում ենք Հիսուս Քրիստոսին և ապավինում Նրա ողորմածությանը և շնորհին, Նա կարող է օգնել մեզ զարգացնել էմոցիոնալ կայունությունը: Էմոցիոնալ կայունությունը հետևյալն է․
-
Էմոցիոնալ մարտահրավերներին համարձակությամբ և հավատքով հարմարվելու կարողություն՝ կենտրոնացած Հիսուս Քրիստոսի վրա:
-
Կարողություն՝ օգնելու ինքներս մեզ և ուրիշներին մեր ուժերի ներածին չափով։
-
Անհրաժեշտության դեպքում լրացուցիչ օգնության համար դիմելը։
Փրկչի օրինակը
Բացատրեք, որ Իր մահկանացու կյանքի ընթացքում Հիսուսը զգացել է սրտի կսկիծ ու վիշտ: Ուսանողներին հարցրեք, արդյոք իրենք կարող են մտաբերել որևէ օրինակ: Հետևյալ վարժությունը կատարելու համար ուսանողներին բաժանեք զույգերի և առաջարկեք նրանց իրենց օրագրերում ուղեկցող աղյուսակ նկարել: Զուգընկերներից յուրաքանչյուրին խրախուսեք ուսումնասիրել աղյուսակում գրված սուրբ գրությունների հատվածներից մեկը: Երբ ուսանողներն ավարտեն, առաջարկեք նրանց կիսվել միմյանց հետ իրենց սովորածով:
Կարդացեք սուրբ գրությունների հետևյալ հատվածները՝ փնտրելով, թե ինչպես է Փրկիչն արձագանքել յուրաքանչյուր իրավիճակին: Գրեք Փրկչի ցուցաբերած ցանկացած զգացմունքի և Նրա կատարած գործողությունների մասին:
|
Էմոցիոնալ դժվար իրավիճակ |
Ինչպես արձագանքեց Փրկիչը |
|---|---|
Էմոցիոնալ դժվար իրավիճակ Հովհաննես Մկրտիչը սպանվեց Հերովդես Անտիպասի կողմից։ | Ինչպես արձագանքեց Փրկիչը |
Էմոցիոնալ դժվար իրավիճակ Հիսուսն ուղևորություն կատարեց, որպեսզի լինի Մարիամի և Մարթայի կողքին նրանց եղբոր՝ Ղազարոսի մահից հետո։ | Ինչպես արձագանքեց Փրկիչը |
-
Ի՞նչ սովորեցիք կամ զգացիք Հիսուս Քրիստոսի հանդեպ այս սուրբ գրությունների պատմություններից:
-
Ինչպե՞ս կարող եք հետևել Փրկչի օրինակին էմոցիոնալ ծանր իրավիճակում:
«Յիրաւի Նա մեր ցաւերը վեր առաւ, եւ մեր վիշտերը բեռնեց իր վերայ»
Բացատրեք, որ Հիսուս Քրիստոսը ոչ միայն էմոցիոնալ կայունության մեծագույն օրինակն է, Նա նաև կատարելապես հասկանում է մահկանացու յուրաքանչյուր զգացմունք և դժվարություն: Հնարավորության դեպքում գրատախտակին ցուցադրեք Գեթսեմանիում տառապող Փրկչի նկարը: Երբ ուսանողները կատարեն հետևյալ վարժությունը, առաջարկեք նրանց նկարի շուրջ գրել իմաստալից բառեր կամ արտահայտություններ Եսայի 53.3–5 հատվածներից: Կարող եք նշել, որ Եսայի 53.3–5 հատվածները վարդապետության սերտման հատվածներ են և ուսանողներին առաջարկեք նշել դրանք իրենց սուրբ գրություններում:
Կարդացեք Եսայի 53.3–5 հատվածները՝ փնտրելով հաստատումներ, որ Փրկիչը կատարելապես հասկանում է մեր էմոցիոնալ խնդիրները:
-
Ո՞ր բառերն ու արտահայտություններն են առավել նշանակալից ձեզ համար: Ինչո՞ւ։
Որպեսզի օգնեք ուսանողներին ավելի լավ գիտակցել Հիսուսի կարողությունը՝ կատարելապես կարեկցելու և մխիթարելու իրենց, կարող եք կիսվել հետևյալ խոսքերով.
Տասներկու Առաքյալների Քվորումից երեց Ուլիսես Սոարեսը հայտարարել է․
Հիսուս Քրիստոսը․ մեր հոգու խնամատարը
Փրկության վեհաշուք պարգևն ապահովելուց բացի, Փրկիչը մեզ առաջարկում է սփոփանք և մխիթարություն, երբ հանդիպում ենք տառապանքների, գայթակղությունների և մահկանացու կյանքի թուլությունների։ … Կարող եմ ձեզ հավաստիացնել, որ Քրիստոսը տեղյակ է այն դժվարությունների մասին, որոնց մենք բախվում ենք մահկանացու կյանքում: Նա հասկանում է թե՛ մեր առջև ծառացած դառնությունները, տվայտանքները և ֆիզիկական ցավը, թե՛ մեր էմոցիոնալ և հոգևոր մարտահրավերները: Փրկիչի սիրտը լի է ողորմածությամբ, և Նա միշտ պատրաստ է սատարել մեզ: Դա հնարավոր է, քանի որ Նա անձամբ անցել է դրանով և մարմնով Իր վրա է վերցրել մեր թուլության և տկարությունների ցավը։
Հեզությամբ և սրտի խոնարհությամբ՝ Նա վայր իջավ բոլոր բաներից ցած և թույլ տվեց, որպեսզի մարդիկ արհամարհեն, մերժեն և ցածրացնեն Իրեն՝ խոցվելով մեր օրինազանցությունների և անօրինությունների համար: Նա տառապեց բոլոր այդ բաների համար՝ Իր վրա վերցնելով աշխարհի մեղքերը, այդպիսով դառնալով մեր վերջնական հոգևոր խնամատարը։
Ավելի շատ մոտենալով Նրան, հոգևոր առումով հանձնվելով Նրա հոգածությանը, մենք կկարողանանք մեզ վրա վերցնել նրա լուծը, որ քաղցր է, և Նրա բեռը, որ թեթև է, այդպիսով գտնելով խոստացված մխիթարությունն ու հանգիստը: Ավելին, մենք կստանանք այն ուժը, որը մեզ բոլորիս պետք է, որպեսզի հաղթահարենք կյանքի դժվարությունները, թուլությունները և վշտերը, որոնց չափազանց դժվար է դիմանալ՝ առանց Նրա օգնության և բժշկող զորության: (Ուլիսես Սոարես, «Հիսուս Քրիստոսը․ մեր հոգու խնամատարը», Լիահոնա, մայիս 2021, 83–84)
-
Մեր ուսումնասիրությունից ի՞նչ ճշմարտություններ կարող ենք սովորել Հիսուս Քրիստոսի և մեզ օգնելու Նրա կարողության մասին:
Ուսանողների պատասխանները գրեք գրատախտակին: Ճշմարտություններից մեկը, որն ուսանողները կարող են նշել, հետևյալն է. Հիսուս Քրիստոսը կարող է մխիթարել և զորացնել մեզ մեր էմոցիոնալ դժվարությունների ժամանակ, քանի որ Նա նույնպես զգացել է այդ ամենը:
-
Ինչպե՞ս կարող է Փրկչին դիմելը և հավատքով Նրա օրինակին հետևելը օգնել մարդուն ավելի զարգացնել իր էմոցիոնալ կայունությունը:
Պատկերացրեք Փրկչի օգնությունը
Հետևյալ հմտության ձեռք բերումը կօգնի ուսանողներին հասկանալ, թե այս սկզբունքն ինչպես կարող է օգնել իրենց: Հմտությունը սահմանելու, մոդելավորելու և կիրառելու համար կատարեք հետևյալը.
-
Սահմանեք հմտությունը. բացատրեք ուսանողներին, որ պատկերացնելով, որ Փրկիչը մեզ հետ է և օգնում է մեզ մեր էմոցիոնալ դժվար իրավիճակներում, կարող ենք ստանալ Նրա օգնությունն ու ուղղորդումը:
-
Մոդելավորեք հմտությունը. մտածեք մի էմոցիոնալ դժվար իրավիճակի մասին, որին բախվել եք կամ կարող եք բախվել ապագայում, որով կցանկանաք կիսվել ուսանողների հետ: Օգտագործելով հետևյալ քայլերը, կիսվեք, թե ինչպես եք պատկերացնում, որ Փրկիչը ձեզ հետ է, զորացնում է ձեզ և ինչպես կարող եք պատասխանել ստորև ներկայացված որոշ հարցերին: Դասին նախապատրաստվելիս կարող եք խորհել դրա շուրջ:
-
Կիրառեք․ որպեսզի օգնեք ուսանողներին կիրառել այս հմտությունը, բաժանեք նրանց փոքր խմբերի և յուրաքանչյուր խմբի առաջարկեք մտածել դեռահասի համար էմոցիոնալ դժվար իրավիճակի մասին: Երբ ուսանողները մտածեն համապատասխան սցենար, առաջարկեք նրանց ինքնուրույն անել հետևյալը, ապա կիսվել իրենց պատասխաններով իրենց խմբի հետ: Զգուշացրեք ուսանողներին, որ իրենք չպետք է կիսվեն իրենց կյանքի խիստ անձնական որևէ բանով:
Փակեք ձեր աչքերը և պատկերացրեք հարություն առած Փրկչին ձեզ հետ՝ ձեր դժվարությունների ժամանակ: Պատասխանեք հետևյալ հարցերին․
-
Որտե՞ղ կլիներ Փրկիչը ձեր դժվարությունների ժամանակ: Ի՞նչ կարող էր Նա անել, եթե լիներ ձեզ հետ:
-
Ի՞նչ կմտածեիք կամ կզգայիք Հիսուս Քրիստոսի կողքին գտնվելու ժամանակ:
-
Ինչպե՞ս կարող էր Նրա ներկայությունը, սերը և աջակցությունը օգնել ձեզ կառավարել և հաղթահարել ձեր էմոցիոնալ սթրեսը:
-
Ի՞նչ կարող էր Փրկիչն ասել ձեզ՝ ելնելով նրանից, ինչ դուք գիտեք Նրա մասին: (Կարող եք օգտագործել արտահայտություններ սուրբ գրություններից, որոնք Նա ասել է ուրիշներին:) Ի՞նչ կարող էր Նա ցանկանալ, որ դուք անեք: Ո՞ւմ կցանկանար Նա, որ դուք դիմեիք՝ լրացուցիչ օգնության համար:
Մի քանի խմբի առաջարկեք կիսվել, թե ինչ են քննարկել և ինչպես դա կարող է օգնել իրենց: Դուք կարող եք նշել, որ ծանր կամ երկարատև էմոցիոնալ խնդիրների դեպքում ուսանողները պետք է օգնություն և առաջնորդություն խնդրեն ծնողներից, Եկեղեցու ղեկավարներից և արտոնագրված մասնագետներից:
Կարող եք տալ հետևյալ հարցերը և կիսվել ձեր զգացողություններով Երկնային Հոր և Հիսուս Քրիստոսի կողմից տրված ուժի և մխիթարության մասին.
-
Ե՞րբ եք դուք կամ ձեր ծանոթը զգացել Փրկչի օգնությունը էմոցիոնալ դժվար իրավիճակում:
-
Ինչո՞ւ եք կարծում, որ դիմելով Տիրոջը, մենք էմոցիոնալ առումով ավելի կայուն ենք դառնում։
Դասի ավարտին ուսանողներին առաջարկեք գրել ցանկացած միտք կամ տպավորություն, որ իրենք ստացան Երկնային Հոր և Հիսուս Քրիստոսի մասին և Նրանց կարողության մասին՝ օգնելու իրենց և իրենց սիրելիներին զարգացնել էմոցիոնալ կայունություն:
Խրախուսեք ուսանողներին ապավինել Հիսուս Քրիստոսին՝ էմոցիոնալ խնդիրների և խոչընդոտների ժամանակ օգնություն և ուժ ստանալու համար։ Հետագա դասերը նվիրված կլինեն հատուկ եղանակներին, որոնցով ուսանողները կարող են օգնություն խնդրել Տիրոջից՝ կապված իրենց մտքերի, սթրեսի, անհանգստության, ընկճվածության և այլ վիճակների հետ: