184-р хичээл: Бие махбод, сэтгэл санааны эрүүл мэнд

Бие махбоддоо анхаарал тавих

Бие махбодын эрүүл мэндийн хуулийг дагаж мөрдөх нь

Бидний бие махбод бол хайраар дүүрэн Тэнгэрлэг Эцэгээс өгсөн гайхамшигт бэлэг юм. Бид бие махбоддоо анхаарал тавих ухаалаг сонголт хийсээр энэ бэлгийг нандигнан хайрладаг. Энэ хичээл бие махбоддоо анхаарал тавих замаар Тэнгэрлэг Эцэг, Есүс Христ хоёрт талархлаа илэрхийлэхэд суралцагчдад тусална.

Боломжит суралцах үйл ажиллагаа

Бидний бие махбод

Тайлбар: Энэ хичээлийг зааж байхдаа энэ сэдэв зарим суралцагчид хэцүү байж болох юм гэдгийг санах нь зүйтэй. Бие махбоддоо анхаарал тавих нь хооллох эмгэгтэй, хөгжлийн бэрхшээлтэй, хүнд өвчтэй болон өөр бусад нөхцөл байдалд байгаа хүмүүст нэн хэцүү байж болох юм.

Биеийн гаднах төрхтэй холбоотой ирдэг дарамт, хүмүүсийн үзүүлдэг хандлагыг талаар хуваалцахад суралцагчдыг урих замаар энэ хичээлд бэлтгэхэд нь тусал. Самбарт Бие махбод гэж бичээд, дараах асуултуудын талаарх бодол санаагаа хуваалцахад суралцагчдыг урих замаар үүнийг хийж болно.

• Өөрсдийн бие махбодтой холбоотой ямар ямар дарамтыг хүмүүс мэдэрч болох вэ?

• Бие махбодтой нь холбоотой ямар өөр хандлагууд хүмүүст байдаг вэ?

  Судлах тэмдэглэлдээ дараах асуултуудад хариулахад суралцагчдыг урь.

• Та бие махбодынхоо талаар юу гэж боддог вэ? Яагаад?

• Таны бодлоор та бие махбоддоо хэр сайн анхаарал тавьдаг вэ? Яагаад?

Та энэ хичээлийг судлахдаа бие махбоддоо хэрхэн анхаарал тавих талаар мэдэхийн тулд Ариун Сүнсний сүнслэг удирдамжийг эрэлхийл.

Бидний бие махбодын талаарх Их Эзэний үнэн

Өсвөр үеийнхний бат бөх байдлын төлөө: Сонголт хийхэд туслах хөтөч ([2022], 23) дэх Таны бие махбод бол ариун нандин юм хэсгийн эхний догол мөрийг унш.

• Юу нь таны анхаарлыг татсан бэ?

  Суралцагчдыг хуваалцах үед тэдний дурдсан үнэнүүдийг самбарт бич. Тухайн үнэн яагаад орчин үеийн өсвөр үеийнхэнд чухал гэж бодож байгаагаа тайлбарлахыг суралцагчдаас хүсэх талаар бодож үз.

  Хэрэв суралцагчид энэ тухай дурдаагүй бол самбар дээрх жагсаалтад Таны бие махбод бол Тэнгэрлэг Эцэгээс өгсөн гайхамшигт бэлэг юм гэсэн үнэнийг нэмж бич.

• Бие махбод нь Бурханы бэлэг гэдгийг мэдэх нь бидний бие махбоддоо ханддаг хандлагад хэрхэн нөлөөлж болох вэ?

• Энэ үнэнийг мэдэх бидний бие махбоддоо тавьдаг анхааралд хэрхэн нөлөөлж болох вэ?

Энэ зарчмын тухай мөн бие махбод гэх бэлэгтээ хэрхэн анхаарах талаар ойлголттой болоход нь суралцагчдад туслахын тулд та “Бие махбоддоо анхаарал тавих” тараах материалыг дөрвөн байршилд хуваан байрлуулж болно. Та ангийнхныг жижиг бүлгүүдэд хуваагаад, үйл ажиллагаа бүрийг ээлжлэн хийлгүүлж болно. Та үйл ажиллагаа бүрийн төгсгөлд бичих боломжийг суралцагчдад олгохын тулд тухайн байршил үлдэх цаасыг бэлдэж болно. Ингэснээр суралцагчид бусад бүлгийн бичсэн зүйлийг уншаад, дээр нь нэмж бичиж болно

Бие махбоддоо анхаарал тавих

Бидний бие махбодын дүр төрх

• Бусдын үзэл бодол хэрхэн бидний бие махбодын талаарх бодолд нөлөөлдөг вэ?

• Их Эзэний бидэнд мэдүүлэхийг хүсдэг, Эхлэл 1:26–27, 1 Коринт 6:19–20 гээд шүлгүүдэд цэдэглэгдсэн үнэнүүд нь бусдаас авдаг мэдээллээс юугаараа өөр вэ?

Арван хоёр төлөөлөгчийн чуулгын ерөнхийлөгч Рассэлл М.Нэлсон, ахлагч Жэффри Р.Холланд хоёроор дамжуулан Их Эзэний өгсөн дараах зөвлөгөөг судлаад, бидний бие махбодын талаарх үзэл бодолд юу тусалж болохыг олж мэд.

Толинд харах болгондоо өөрийнхөө биеийг ариун сүм мэт төсөөлөн харж бай. Ингэх нь өдөр бүр талархаж байх ёстой энэхүү үнэн нь таныг биеэ хэрхэн арчилж, ашиглах талаар зөв шийдвэр гаргахад туслах болно. Таны гаргасан шийдвэр бүр таны ирээдүйг тодорхойлдог. (Рассэлл М.Нэлсон, “Мөнхийн ач холбогдолтой шийдвэрүүд,” 2013 оны 10-р сарын Ерөнхий чуулган, 124)

Биеийн галбир, хэв маягийн хувьд бусадтай адилхан байхыг хичээлгүй, өөрийгөө байгаагаар нь хүлээн зөвшөөрч байгаарай гэж та бүхнээс хүсэж байна. Бид өөр хоорондоо адилгүй. Бидний зарим нь өндөр байхад зарим нь намхан байдаг. Зарим нь мариалаг байхад нөгөө хэсэг нь туранхай байдаг. Бараг хүн бүр байгаагаасаа өөр байхыг хэзээ нэгэн цагт хүсэж байсан байх! Гэвч өсвөр насны охидын нэгэн зөвлөхийн хэлснээр “Дэлхий чамайг харж байгаа гэдэгт санаа зовон амьдрах боломжгүй. Бусдын үзэл санаанаас болж өөрөө өөрөөсөө ичиж зовсноор та бусдад өөрийн эрхийг өгч байна гэсэн үг. … [Өөртөө итгэлтэй] байхын түлхүүр бол өөрийнхөө дотоод хүнийг—[бодит хүнээ] байнга сонсох явдал юм.” Харин Бурханы хаант улсад бодит хүн болох та “эрдэнэсээс илүү нандин” [Сургаалт үгс 3:15] билээ. (Jeffrey R. Holland, “To Young Women,” Liahona, Nov. 2005, 29)

• Та эдгээр мэдэгдлээс юу сурч мэдсэн бэ?

Өөрийн биеийн талаар эерэг бодол тээж явдаггүй хүнд таныг юу хэлээсэй гэж Их Эзэн хүсэж байгаа талаар бич.

Унтах

Сургаал ба Гэрээ 88:124-ийг уншаад, Их Эзэн унтах талаар юу гэж заасныг олж мэд.

• Унтах нь яагаад чухал гэж та бодож байна вэ?

Хангалттай унтаж амрахгүй байх нь эрүүл мэндийн ноцтой асуудалд хүргэж болох юм. Ихэнх мэргэжилтэн өсвөр насныханд өдөрт 8–10 цаг унтаж амрахыг зөвлөдөг (National Sleep Foundation, “How Much Sleep Do You Really Need?,” Oct. 1, 2020, thensf.org-ийг үзнэ үү). Нойр дутуу байснаар хүн ядарч сульдан, ажиллах чадвар буурч, бие махбодын болоод сэтгэцийн эрүүл мэндийн асуудалд өртөмтгий болгодог. Ядарч сульдах нь биднийг уруу таталтад илүү өртөмтгий болгодог.

• Унтах дадал хэвшил тань таны амьдралд хэрхэн нөлөөлж байгааг анзаарч байсан уу?

• Зөв зохистой унтаж амрах дадал хэвшил нь хэрхэн Их Эзэнд үйлчлэх чадварыг маань хэрхэн сайжруулж болох вэ?

Унтаж амрах дадал хэвшлээ сайжруулахыг хүсэж буй хүнд ямар зөвлөгөө өгөх вэ эсвэл хэнээс зөвлөгөө авахыг тэдэнд зөвлөхөө бүлгийнхэнтэйгээ ярилц. Тарааж өгсөн цаасан дээр санал бодлоо бич.

Дасгал хөдөлгөөн, идэвхтэй амьдралын хэв маяг

Залхуурах гэдэг нь цагаа дэмий үрэх, залхуурах, ажил хийхээс зайлсхийхийг хэлдэг. Дараах шүлгүүдээс нэг эсвэл хоёрыг нь уншаад, Их Эзэн хүүхдүүд нь залхуу байх талаар ямар бодолтой байдгийг олж мэд. Үүнд: Сургаал ба Гэрээ 42:42; 60:13; 75:3.

• Их Эзэн яагаад биднийг залхуурахын оронд идэвхтэй, хөдөлмөрч байгаасай гэж хүсдэг гэж та бодож байна вэ?

• Таныг идэвхтэй, хөдөлмөрч байхыг хичээхэд Их Эзэн хэрхэн адисалсан бэ?

• Дасгал хөдөлгөөн, идэвхтэй амьдралын хэв маяг бидний сэтгэцийн эрүүл мэндэд хэрхэн сайнаар нөлөөлдөг вэ? Энэ нь Их Эзэнд үйлчлэхэд хэрхэн бидэнд тусалдаг вэ?

Илүү их дасгал хөдөлгөөн хийж, идэвхтэй байх хүсэлтэй өсвөр насны хүүхдэд өгөх зөвлөгөөгөө бич.

Эрүүл хооллох дадал хэвшил

Сургаал ба Гэрээ 59:16–20; 89:10–16 дээр шүлгүүдээс эрүүл хоол хүнстэй холбоотой сонголтын тухай Аврагчийн өгсөн зөвлөгөөг олж мэд.

• Хоол хүнсний сонголт маань бидний амьдралд ямар нөлөө үзүүлдэг вэ?

Эрүүл хооллоход саад болдог зарим зүйлийн талаар ярилц. Эдгээр саад бэрхшээлийг даван гарахад Их Эзэний тусламжийг эрэлхийлэх зарим арга замыг хуваалц.

• Залуу насандаа зөв хооллож сурах тухай Аврагчийн өгсөн зөвлөгөөг дагах нь урт хугацаанд ямар ашиг тустай байж болох вэ?

Бүлэг болгон “Идэхээс зайлсхийх,” “Хааяа идэх,” “Эрүүл” гэсэн гарчигтай гурван жагсаалт гарга. Өдөр бүр иддэг нийтлэг хоол хүнсийг сонгож, хамтдаа ажилла. Тухайн хоол хүнс аль ангилалд багтахыг ярилц.

Ээлжлэн сурч мэдсэн зүйлээ мөн тулгамдаж буй асуудлаа хуваалцахад суралцагчдыг урь. Дараах асуултууд тус болж магад.

• Эрүүл дадал хэвшилтэй болж, бие махбоддоо зохих ёсоор анхаарал тавих нь яагаад хэцүү вэ?

• Бидний бие махбод бол Бурханы өгсөн бэлэг гэдгийг санах нь хэр тустай гэж та бодож байна вэ?

• Их Эзэн танд эсвэл таны таньдаг хэн нэгэнд эрүүл дадал хэвшилтэй болоход хэрхэн тусалсан бэ?

Суралцагчдын дурдсан бэрхшээл, асуудалд тусалж болох үнэнүүдийг эсвэл туршлагуудыг хуваалцахад ангийнхныг урь.

Төгсгөлд нь бие махбоддоо илүү сайн анхаарал тавих тал дээр Их Эзэн юу хийхийг тэднээс хүсэж байгааг судлах тэмдэглэлдээ бичихэд суралцагчдыг урь.

Нэмэлт эх сурвалж

Ямар зорилгоор бидэнд бие махбод өгсөн бэ?

Зүрхний мэс засалч байсан ерөнхийлөгч Рассэлл М.Нэлсон ийн заасан.

Би урт наслахынхаа хэрээр илүү их мэдлэг хуримтлуулдаг. Тэр мэдлэг маань надад бидний бие махбодын энэ бэлэг бол агуу гайхамшиг юм гэдгийг ойлгоход тусалдаг. Бидний хайраар дүүрэн Тэнгэрлэг Эцэг хүн нэг бүрд дахин давтагдашгүй бие махбодыг өгсөн. Бүтээгдсэн зорилгодоо бүрэн гүйцэлдүүлэхийн төлөө хийж буй эрэл хайгуулд маань туслахын тулд Тэр сүнсний маань асар болгон бие махбодыг бүтээсэн. Бидний бие махбод эрдэнэ мэт хүүхдэдээ зориулан бүтээсэн Түүний авралын агуу төлөвлөгөөг өөрийн биеэр туулах боломжийг хүн нэг бүрд олгодог. Эцэст нь Тэр биднийг Өөртэй нь илүү адил болж, Өөртэй нь хамт амьдрахаар эргэн ирээсэй гэж хүсдэг. Энэхүү туршилтын байдалд эхлээд бие махбодыг хүлээн авахгүйгээр тэр агуу адислалаас хүртэх боломжгүй байх байсан юм. (Russell M. Nelson, “Your Body: A Magnificent Gift to Cherish,” New Era, Aug. 2019, 2)

Арван хоёр төлөөлөгчийн чуулгын ахлагч Д.Тодд Кристоффэрсон ийн тайлбарласан.

Амьдралаа өргөл болгосон хүн нь Бурханы дүр төрхөөр бүтээгдсэн зүйрлэшгүй бэлэг болох бие махбодыг хүндэлдэг. Сүнс болгон бие махбодыг хүлээн авч, махан бодын асарт оршихдоо ёс суртахууны сонгох эрхийг ашиглаж сурах нь мөнх бус амьдралын гол зорилгуудын нэг юм. … Энэхүү унасан дэлхийд зарим амьдрал маш өрөвдөм богино, зарим махбод бүрэн бүрэлдээгүй, өвчтэй аль эсвэл дөнгөж амьсгалах төдий байдаг хэр нь сүнс болгоны хувьд амьдрал хангалттай урт, бие махбод бүр амилах эрхтэй. (Д.Тодд Кристоффэрсон, “Өргөл болгосон амьдралын тухай бодол эргэцүүлэл,” 2010 оны 10-р сарын Ерөнхий чуулган, 19)

Бие махбодын эрүүл мэнд амьдралын бусад талууд хоорондоо уялдаа холбоотой юу?

Далын ахлагч Адриан Очоа ийн тайлбарласан.

Амьдрал хүнд хэцүү, зарим үед бидэнд айж түгших, сэтгэлээр унах, өөрийгөө чамлах мэдрэмж төрдөг байж болно. Гэвч биеийн болон сэтгэл санааны эрүүл мэндийн хувьд дасгал хөдөлгөөн, биеийн хүчний хөдөлмөр нь эерэг үзэл бодолтой байхад тусалдаг. Бие махбоддоо анхаарах нь бас таны оюун ухааныг адисалж, Бурханы хүүхэд гэдгээ санаж, өөртөө итгэлтэй, аз жаргалтай байхад танд тусална. Бидний сэтгэл санаа, бие махбод, сүнслэг байдал бүгд хоорондоо холбоотой. (Adrián Ochoa, “Be Strong, Be Healthy, Be Smart,” New Era, Oct. 2013, 42)

Тэргүүлэх бишопын зөвлөлийн бишоп Жэралд Коссэй ийн хэлсэн.

Хувь хүний хувьд сайн сайхан байхын тулд одоо хэвшил болгосон таны дадал хэвшил амьдралын тань үлдсэн хугацаанд материаллаг болон сүнслэг байдлын хувьд нөлөөлнө. Таны анхаарал дэлхийн хоосон чиг хандлагыг дагахад төвлөрөх ёсгүй. Энэ нь энд тэнд байх өөхнөөсөө салах эсвэл нэг өрөөнд амьдардаг хүн шигээ хав дөрвөлжин биетэй харагдахын тулд төмөр өргөн 9 килограмм нэмэх гэсэн энгийн асуудал биш юм! Үүний зорилго бол сэтгэл санаагаар илүү өөдрөг байх, материаллаг болон сүнслэг байдлын хувьд тэнцвэрээ олох явдал юм. Ингэж чадвал энэ танд насан туршдаа эрүүл саруул байх сайхан боломжийг олгох бөгөөд энэ нь эргээд баяр баясгаланг авчирч, мөнх бус чадвартаа итгэлтэй байж, мөнхийн чадавхаа илүү сайн ухамсарлан ойлгох чадварыг өгнө. (Gérald Caussé, “Harmony of Body and Spirit: A Key to Happiness” [Brigham Young University devotional, Oct. 13, 2020], 5, speeches.byu.edu)

Нэмэлт суралцах үйл ажиллагаа

Бид хэн бэ? Бид ямар хувь заяатай вэ?

Тэнгэрлэг мөн чанараа мөнхийн талаас авч үзэх нь бие махбодоо эерэг талаас харахад тусалж болохыг ойлгоход нь суралцагчдад туслахын тулд та “Our True Identity” (3:39) видеог үзүүлж болно. Арван хоёр төлөөлөгчийн чуулгын ахлагч Дийтр Ф.Угдорф бид үнэндээ хэн бэ, ялангуяа Тэнгэрлэг Эцэгийн хувьд хэн гэдгээ ойлгоход нь туслахын тулд нугасны муухай дэгдээхэйн түүхийг хуваалцсан. (Энэ видеог мөн “Миний тэнгэрлэг мөн чанар ба зорилго” гарчигтай хичээлд оруулсан болно.)

Хувийн ариун цэвэр

Дэлхийн бүх газарт эрүүл ахуйн жишиг, бүтээгдэхүүний хүртээмж өөр өөр байдгийг ойлгож, ангийнхантайгаа хувийн ариун цэвэр сахих талаар ярилцах нь тус болж болох юм. Хэрэв та энэ үйл ажиллагааг сонгох юм бол Сургаал ба Гэрээ 42:41-ийг уншаад, цэвэр цэмцгэр байдлын талаар хэлсэн Их Эзэний үгсийг олж мэдэхэд суралцагчдыг урьж болно. Бие махбодын гайхамшигт бэлэгтээ анхаарах нэг арга зам бол хувийн ариун цэврийг чанд сахих явдал билээ.

Хувийн ариун цэврээ хэр сайн сахидгаа 1-ээс (ховорхон) 5 хүртэлх (тогтмол) оноо тавьж, энэ талаар тунгаан бодоход суралцагчдыг урь. Үүнд дараах зүйлс багтаж болно.

• Гараа савантай усаар тогтмол угаадаг.

• Өдөр бүр шүдээ мяндсан утсаар цэвэрлэж, сойздон угаадаг.

• Усанд орж, үсээ тогтмол угаадаг.

• Хувцсаа байнга угааж цэвэрлэдэг.

Сүмийн үйл ажиллагаанд зориулж хувийн ариун цэврийн тухай танилцуулсан бүхээг юм уу толилуулга хийхийг суралцагчдаас хүсжээ гэж төсөөлөхөд тэднийг урь. Хувийн ариун цэврээ сахиснаар ирэх адислалуудын талаар мөн энэ нь хэрхэн Тэнгэрлэг Эцэгт талархаж байгаагаа харуулахад туслах талаар ярилцахад урь.