“190-р хичээл—Эрүүл холбоо харилцаа тогтоох нь: Гэр бүл, найз нөхөдтэйгөө бат бөх харилцаа үүсгэх,” Сургаал ба Гэрээнүүдийн семинарын багшийн гарын авлага (2025)
“Эрүүл холбоо харилцаа тогтоох нь,” Сургаал ба Гэрээнүүдийн семинарын багшийн гарын авлага
190-р хичээл—Бие махбод, сэтгэл санааны эрүүл мэнд
Эрүүл холбоо харилцаа тогтоох нь
Гэр бүл, найз нөхөдтэйгөө бат бөх харилцаа үүсгэх нь
Тэнгэрлэг Эцэг биднийг Өөрийг нь болон өөрсдийн эргэн тойрон дахь хүмүүсийг хайрлаасай гэж хүсдэг. Бид гэр бүл, найз нөхөдтэйгөө ойр дотно харилцаа холбоо тогтоосноор тайван үед бас хүнд хэцүү үед шаардлагатай тайтгарал, хүч чадал, дэмжлэгээр адислагдах болно. Энэ хичээл нь эрүүл энх, сайн сайхан аж төрөхөд туслах холбоо харилцааг үүсгэхдээ Их Эзэний тусламжийг эрэлхийлэхэд суралцагчдад тусална.
Боломжит суралцах үйл ажиллагаа
Хамгийн чухал зүйл юу вэ?
Амьдралдаа хамгийн чухал гэж боддог зүйлсээ самбарт жагсаан бичихэд суралцагчдыг урих талаар бодож үз.
Дараах мэдэгдлийг харуулаад, чанга уншихад нэг суралцагчийг урь.
Тэргүүн зөвлөлийн ерөнхийлөгч асан Дийтр Ф.Угдорф хамгийн чухал зүйлсийн талаар ийн заасан.
Бид Тэнгэрлэг Эцэгтээ хандан хамгийн чухал зүйлсийн талаарх Түүний мэргэн ухааныг асуухаар хандахдаа дараах гол дөрвөн харилцааны тухай дахин дахин сурдаг. Үүнд: Бурхан бидний хоорондох харилцаа, гэр бүлийн болон найз нөхдийн харилцаа, мөн бидний өөрсөдтэйгөө харилцах харилцаа орно. (Дийтр Ф.Угдорф, “Хамгийн чухал зүйлсийн тухай,” 2010 оны 10-р сарын Ерөнхий чуулган, 22)
-
Та ерөнхийлөгч Угдорфын мэдэгдлээс юу мэдэж авсан бэ?
Бурхантай болон бусадтай харилцах бидний харилцаа холбоо маань амьдралд хамгийн чухал зүйлсийн нэг гэдгийг илэрхийлсэн, самбарт бичсэн хэллэгүүдийг дугуйлахад суралцагчдыг урь. Шаардлагатай гэж үзвэл, самбар дахь жагсаалтад “Бурхантай болон бусадтай харилцах бидний харилцаа холбоо” гэж нэмнэ үү.
Энэ хичээл бидний бусадтай харилцах харилцаанд төвлөрөх болно гэдгийг тайлбарла. Одоо байгаа зарим харилцааныхаа талаар мөн эдгээр харилцаа нь тэднийг Бурханд ойртуулж, тэдний амьдралд хэрэгтэй байгаа хүч чадал, дэмжлэгийг өгч байгаа эсэх талаар бодоход суралцагчдыг урь. Тэд мөн Их Эзэн одоо байгаа холбоо харилцаагаа бэхжүүлэх эсвэл шинээр харилцаа үүсгэхийг тэднээс хэрхэн хүсэж байгаа талаар тунгаан бодож болно.
Бидний харилцаа
“Сүмийн түүх болон Сургаал ба Гэрээнүүдэд гардаг дотно харилцаа холбооны жишээ” гарчигтай тараах материалыг өгч, Бурхан бидний амьдралыг адисалж, итгэлийг маань хүчирхэгжүүлэх нэг арга бол бусадтай дотно харилцаа тогтоох явдал юм гэсэн үнэний нотолгоог хайхад суралцагчдыг урь. (Та энэ үнэнийг самбар дээр бичихийг хүсэж болно.)
Тараах материал ашиглахад нь суралцагчдад туслах аргуудын талаар бодож үз. Нэг арга нь суралцагчдыг гурав гурваар нь бүлэг болгон хуваарилаад бүлгийн гишүүн бүрд тараах материал дээрх жишээнүүдийн аль нэгийг судлахыг даалгах юм. Суралцагчдыг жишээгээ судалж дуусахад Бурхан биднийг бусадтай харилцах харилцаа холбоогоор дамжуулан хэрхэн адисалж болох талаар сурсан зүйлээ бүлэгтэйгээ ээлжлэн хуваалцахад тэднийг урамшуул.
Сүмийн түүх болон Сургаал ба Гэрээнүүдэд гардаг дотно холбоо харилцааны жишээ
1-р жишээ
Иосеф Смит 1823 оны 9-р сард Кумора гүвээнд очсоныхоо дараа өөрт тохиолдсон явдал болон тэнгэр элч Моронайн үзэгдлийг гэрийнхэнтэйгээ хуваалцжээ. Иосеф хамгийн ойр дотно хүмүүстэйгээ өөрт тохиолдсон явдал, үзэгдлийг хуваалцсаар байв. Бошиглогчийн ээж Люси Мак Смит эдгээр ариун нандин уулзалтыг дурсан ийн тэмдэглэн үлдээжээ.
Бид орой бүр хүүхдүүдээ цуглуулдаг байлаа. Аав, ээж, хөвгүүд, охид бүгд суудлаа эзэлж, … хөвгүүний заадаг шашны сургаалуудыг амьсгаа даран сонсдог байсан нь энэ хорвоо дээр аж төрж байсан гэр бүлийн хамгийн өвөрмөц төрх байдлыг харуулсан гэж би боддог. …
… Ер бусын бат бөх эв нэгдэл, аз жаргал манай гэрт ноёрхдог байлаа. Амар амгаланг маань эвдэн бусниулагч хэрүүл маргаан, санал зөрөлдөөний аль аль нь бидний дунд байсангүй. (Люси Мак Смит, Сүмийн ерөнхийлөгчдийн сургаалаас: Иосеф Смит [2007], 486)
-
Энэ түүхээс Смитийн гэр бүлийн талаар юу нь танд хамгийн чухал санагдаж байна вэ?
-
Иосефын гэртээ байхдаа мэдэрсэн хайр чухал дуудлагаа биелүүлэхэд нь түүнд хэрхэн тусалсан байж болох вэ?
-
Энэ жишээнээс Бурхан таныг хэрхэн адисалж болох мөн та дотно холбоо харилцаагаар дамжуулан бусдыг адислахад нь хэрхэн тусалж болох талаар юу сурсан бэ?
2-р жишээ
Иллинойс мужийн Науву хотод амьдарч байхдаа Иосеф Смит дотно холбоо харилцааны ашиг тусын талаар эргэцүүлж байв.
Үүнийг би агуу адислалуудын нэг хэмээн үзнэ. Би энэ дэлхийд зовох хувь тавилантай ч ахан дүүс, анд нөхдийг хаа сайгүй эргэн тойрноосоо олж чадна. (Сүмийн ерөнхийлөгчдийн сургаалаас: Иосеф Смит, 466)
-
Хэцүү сорилтуудтай тулгарах үед гэр бүл, найз нөхөд бидэнд хэрхэн туслах вэ?
-
Гэр бүл, найз нөхөд бидний амьдралыг өөр ямар арга замаар адисалж болох вэ?
3-р жишээ
Сургаал ба Гэрээнүүд 108:7-г уншаад, Далын ахлагч Лайман Шерманд өгсөн Их Эзэний зөвлөгөөг олж мэд.
-
Энэ зөвлөгөөг дагахад яагаад заримдаа хэцүү байдаг вэ?
-
Та нар хэзээ өөр нэгэнтэй харилцсанаар хүчирхэгжиж, өөдрөг болсон бэ?
Сурч мэдсэн зүйлээ болон бидний холбоо харилцаагаар дамжуулан Бурхан биднийг хэрхэн адисалж болохыг ангийнхантайгаа хуваалцахад суралцагчдыг урь.
-
Амьдралдаа бусадтай дотно холбоо харилцаа тогтоохын үнэ цэнийн талаар та нар юу сурсан бэ?
-
Бусадтай харилцаа тогтоож, бэхжүүлэх нь Бурхантай харилцах бидний холбоо харилцаанд, түүнчлэн эрүүл мэнд, зөв аж төрөх байдалд маань хэрхэн нөлөөлдөг вэ?
Харилцаа холбоо үүсгэх
Та холбоо харилцаа үүсгэх чадварын талаар ярилцахад цаг гаргахыг хүсэж болно. Суралцагч нэг бүрд хоосон цаас өгөх талаар бодож үз. Хэн нэгэнд бусадтай харилцах холбоо харилцаагаа хөгжүүлэх, бэхжүүлэхэд тус болох дор хаяж нэг зүйл бичихэд тэднийг уриал. Бичсэн цааснуудыг цуглуулж аваад, цөөн хэдийг ангийнханд чанга уншиж өг. Шаардлагатай гэж үзвэл, дараах санаануудын заримыг эсвэл бүгдийг нь ярилц.
-
Нийтлэг сонирхлыг олж мэд.
-
Хүмүүсийн нэрийг тогтоож, тэднийг нэрээр нь дууд.
-
Инээмсэглэ.
-
Бусдыг ярьж байхад анхааралтай сонс.
-
Хүмүүсийг чин сэтгэлээсээ сайшаан магт, хүндэтгэлтэй харьц.
-
Шүүмжлэх, алдаа хайхаас зайлсхий.
-
Үнэхээр сонирхож буйгаа харуул.
-
Хүмүүсийн төлөө нэрээр нь дуудан залбир.
-
Энэрлийг эрэлхийл.
-
Тэвчээртэй бай.
-
Үйлчлэх боломжуудыг хай.
Холбоо харилцаа тогтоох эдгээр чадварыг суралцагчдад дадлагажуулах зорилгоор хичээл дээр цаг гаргаж өгөх талаар бодож үз. Суралцагчид бие биеийнхээ нэрийг сайн мэдэхгүй бол дараах жишээ туслах болно. Хэрэв суралцагчид бие биеийнхээ нэрийг мэддэг бол дадлага хийх өөр чадварыг сонгох талаар бодож үз.
Тодорхойлох: Бусдыг нэрээр нь дуудах нь эрүүл зөв холбоо харилцаа үүсгэхэд тустай гэдгийг тайлбарла. Их Эзэн биднийг нэрээр маань дууддаг гэдгийг тайлбарла (Эхлэл 35:10; Лук 19:5; Инос 1:5; Иосиф Смит—Түүх 1:17-г үзнэ үү). Бусад хүн таныг таньж, нэрээр тань дуудахад танд ямар сэтгэгдэл төрдөг талаар суралцагчдаас асуухыг бодож үз.
Загвар: Бие биеийнхээ нэрийг мэдэж авч, нэрээр нь дуудахыг тэднээс хүсэх болно гэдгийг суралцагчдад хэл. Хүмүүсийн нэрийг бичиж аваад, харж байх нь дараа нь санах нэг арга гэдгийг тайлбарла. Ангийн гишүүн бүрийг нэрээр нь дуудахдаа мэдэхгүй нэрээ бичиж авахад суралцагчдыг урь.
Хүмүүсийн нэрийг санахад юу саад болдог мөн эдгээр бэрхшээлийг хэрхэн арилгаж болохыг суралцагчдаас асуух нь тустай байж болно.
Дадлага: Бичиж авсан нэрсээ шалгаж харах цөөн минутыг суралцагчдад гаргаж өг. Дараа нь тэдэнд дадлага хийхийг зөвшөөр. Тэднийг хоёр хоёроор нь хуваарилаад, хамтдаа ангид байгаа хүн нэг бүрийг нэрлэж чадах эсэхийг харж болно. Ангийн хүн бүрийн нэрийг хэлж чадах хүн байгаа эсэхийг асуугаад, хэрэв боломжтой бол ийн нэрлэхэд урь. Хэрэв нэмэлт сорилго тохиромжтой гэж үзвэл, суралцагчдаас суудлаа өөрчлөхийг хүсээд, суралцагчид хүн нэг бүрийг нэрлэж чадах эсэхийг хар.
Цаг хүрэлцээтэй байвал нэмэлт чадварыг сонго. Жишээлбэл: Бусадтай нийтлэг байдаг зүйлсээ олоход суралцагчдыг урь. Суралцагчид хамтран ажилладаггүй ангийнхаа хэн нэгэнтэй хамтарч ажиллаж болох ба бие биедээ нийтлэг сонирхол байгаа эсэхийг олж мэдэх асуулт тавьж болно. Дараа нь өөр суралцагч дээр очиж, дадлага ажлыг давтаж болно. (Хоёр чадварыг хослуулах үүднээс дадлага ажлын үеэр бие биеэ нэрээр нь дуудахад суралцагчдыг уриал.)
Хувьдаа хэрэгжүүлэх
Тэнгэрлэг Эцэг, Есүс Христ хоёр суралцагч нэг бүрд хайртай гэдгийг гэрчлэх талаар бодож үз. Тэдний хөгжүүлж, төлөвшүүлэхийг эрмэлздэг дотно холбоо харилцаагаар дамжуулан Бурхан тэдний амьдралыг адисалж, хүчирхэгжүүлж чадна гэдгийг гэрчил. Та мөн амьдралдаа тогтоосон холбоо харилцаагаар дамжуулан адислагдаж, хүчирхэгжсэн өөрийн жишээг хуваалцаж болно.
Дараах зүйлсийг хийхээр Ариун Сүнсний удирдамжийг эрэлхийлэхэд суралцагчдыг урь. Үүнд:
Их Эзэн одоо байгаа холбоо харилцаагаа бэхжүүлэхийг эсвэл шинэ харилцаа үүсгэхийг та нараас хэрхэн хүсэж байгаа талаар тунгаан бод. Өнөөдөр сурч мэдсэн зүйлээ ашиглан, уг хүнтэй холбоо харилцаагаа гүнзгийрүүлэх төлөвлөгөө гарга. Энэхүү үйл явцад хэрхэн Их Эзэнээс тусламж эрэлхийлж болох тухай бод.