“Lesona 185—Manorina tanjaka ara-pihetseham-po ao amin’ny Tompo: Mampitombo ny fahatokiantsika ny fanampian’ny Tompo eo anatrehan’ireo olana ara-pihetseham-po ananantsika,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Manorina tanjaka ara-pihetseham-po ao amin’ny Tompo,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 185: Fahasalamana ara-batana sy ara-pihetseham-po
Manorina tanjaka ara-pihetseham-po ao amin’ny Tompo
Mampitombo ny fahatokiantsika ny fanampian’ny Tompo eo anatrehan’ireo olana ara-pihetseham-po ananantsika
Satria tia antsika ny Ray any An-danitra dia nandefa ny Zanany Jesoa Kristy Izy mba hampahery sy hampionona antsika mandritra ireo fotoan-tsarotra eo amin’ny fiainana. Ity lesona ity dia afaka manampy ireo mpianatra hanana fahatokian-tena fa hanohana azy ireo ny Mpamonjy eo amin’ny fanorenana tanjaka hiatrehana ny olana ara-pihetseham-po.
Ireo sahanasa fianarana azo atao
Toe-javatra sarotra ara-pihetseham-po
Fanamarihana: Ity fitaovana ity dia natao ho fandalinana mahasoa momba ny fanorenana hery ara-pihetseham-po ao amin’ny Tompo, fa tsy natao hamantarana na hitsaboana aretina ara-tsaina sy ara-pihetseham-po. Tsy natao ho karazana fitsaboana ho an’ny vondrona ihany koa ny zavatra iainan’ny kilasy.
Mba hanampiana ireo mpianatra hiomana amin’ity lesona ity dia asao ny mpianatra hikaon-doha sy hanoratra eny amin’ny solaitrabe toe-javatra sarotra ara-pihetseham-po izay mety hatrehin’izy ireo, na mety hatrehin’ireo zatovo toa azy ireo atsy ho atsy. Ny ohatra sasany dia mety hahitana ny fahatsapana hoe esoin’ireo namana mitovy taona aminy, ny fahatongavana ao anatin’ny toe-javatra izay tsy maintsy ifaneraserany amin’ny olona tsy fantany, na rehefa misy zavatra mahafinaritra mifarana. Angataho ny mpianatra mba hanao ny toe-javatra misy azy ireo ho toy ny zava-misy marina sy mandresy lahatra.
Avy eo dia manasà mpianatra hanao ity zavatra manaraka ity ao amin’ny diary fandalinan’izy ireo:
Eritrereto ny olana ara-pihetseham-po mahazo anao, na mety ho tojo anao tsy ho ela. Valio ao anatin’ny diary fandalinanao ireto fanontaniana manaraka ireto:
-
Manao ahoana ny fomba fiatrehanao toe-javatra sarotra ara-pihetseham-po? Nahoana?
-
Amin’ny alalan’ny maridrefy 1 hatramin’ny 10 (1 = tsy matoky mihitsy; 10 = faran’izay tena matoky), hatraiza ny handrefesanao ny fahatokianao fa afaka manampy anao sady hanampy ao anatin’ireo toe-javatra ireo ny Mpamonjy? Nahoana?
Mandritra ny lesona dia amporisiho ireo mpianatra hikatsaka ombam-bavaka fahatsapana fahatokiana amin’ny fahafahan’ny Mpamonjy manampy azy ireo ao anatin’ireo toe-javatra sarotra ara-pihetseham-po sy hanana tanjaka bebe kokoa hiatrehana ny olana ara-pihetseham-po.
Fananana tanjaka hiatrehana ny olana ara-pihetseham-po
Hevero ny hanoratra hoe Fananana tanjaka hiatrehana ny olana ara-pihetseham-po eny amin’ny solaitrabe. Anontanio ny mpianatra ny zavatra azony momba izany. Azonao atao koa ny mampiseho ireto fampahalalana manaraka ireto:
Tafiditra ao anatin’ny drafitry ny Ray any An-danitra ny hoe miatrika olana sy fahasahiranana isika rehetra mandritra ity fiainana ity. Na izany aza, rehefa mitodika any amin’i Jesoa Kristy sy miantehitra amin’ny famindram-pony sy ny fahasoavany isika dia afaka manampy antsika hanorina tanjaka hiatrehana ny olana ara-pihetseham-po Izy. Ny fananana tanjaka hiatrehana ny olana ara-pihetseham-po dia:
-
Fahaizana miatrika ireo olana ara-pihetseham-po amin-kerim-po sy amim-pinoana izay mifantoka amin’i Jesoa Kristy.
-
Fanampiana ny tenanao sy ny hafa araka izay vitanao.
-
Fitadiavana fanampiana fanampiny rehefa ilaina izany.
Ny ohatra nasehon’ny Mpamonjy
Hazavao fa nandritra ny fiainany teto an-tany dia niaina fihetseham-po toy ny ratram-po sy alahelo i Jesoa. Azonao atao ny manontany ny mpianatra raha manana ohatra ao an-tsainy izy ireo. Ho an’ny sahanasa manaraka dia azonao zaraina ho vondrona roa ny mpianatra ary asao izy ireo hanao sary ilay tabilao nampiarahana amin’izany ao anatin’ny diarin’izy ireo. Amporisiho ny mpiara-miasa tsirairay handalina ny iray amin’ireo andinin-tsoratra masina voatanisa ao amin’ilay tabilao. Rehefa vita izany dia asao izy ireo mba hifampizara ny zavatra nianarany.
Vakio ireto andinin-tsoratra masina manaraka ireto, ka tadiavo ny fomba niatrehan’ny Mpamonjy ny toe-javatra tsirairay. Raketo an-tsoratra izay fihetseham-po nasehon’ny Mpamonjy sy ny zavatra nataony.
|
Toe-javatra sarotra ara-pihetseham-po |
Ny fomba niatrehan’ny Mpamonjy izany |
|---|---|
Toe-javatra sarotra ara-pihetseham-po I Jaona Mpanao Batisa dia novonoina tamin’ny alalan’ny baikon’i Heroda Antipasy. | Ny fomba niatrehan’ny Mpamonjy izany |
Toe-javatra sarotra ara-pihetseham-po Nandeha niaraka tamin’i Maria sy Marta i Jesoa taorian’ny nahafatesan’i Lazarosy anadahiny. | Ny fomba niatrehan’ny Mpamonjy izany |
-
Inona no nianaranao na tsapanao momba an’i Jesoa Kristy avy amin’ireo tantara ao amin’ny soratra masina ireo?
-
Ahoana no ahafahanao manaraka ny ohatra nasehon’ny Mpamonjy mandritra ny toe-javatra sarotra ara-pihetseham-po iray?
“Nitondra ny aretintsika tokoa Izy sady nivesatra ny fahoriantsika”
Hazavao fa tsy vitan’ny hoe i Jesoa Kristy ihany no ohatra faratampony eo amin’ny fananana tanjaka hiatrehana olana ara-pihetseham-po fa mahatakatra tsara ihany koa ny fihetseham-po sy ny olan’ny olona rehetra eto an-tany Izy. Raha azo atao dia asehoy eny amin’ny solaitrabe ny sarin’ny Mpamonjy nijaly tao Getsemane. Rehefa manao ity sahanasa manaraka ity ny mpianatra dia asao izy ireo hanoratra teny na andian-teny manan-danja avy ao amin’ny Isaia 53:3–5 manodidina ilay sary. Azonao atao ny manazava fa ny Isaia 53:3–5 dia andinin-tsoratra masina fifehezana fotopampianarana ary asao ny mpianatra hanisy marika izany ao amin’ny soratra masiny.
Vakio ny Isaia 53:3–5, ka tadiavo ny porofo fa mahatakatra tanteraka ireo olana ara-pihetseham-po ananantsika ny Mpamonjy.
-
Inona avy ireo teny na andian-teny izay nanan-danja indrindra taminao? Nahoana?
Mba hanampiana ireo mpianatra hahafantatra bebe kokoa ny fahafahan’i Jesoa maneho fangorahana sy fampiononana azy ireo tanteraka dia azonao atao ny mizara ity teny nambara manaraka ity:
Ny Loholona Ulisses Soares ao amin’ny Kôlejin’ny Apôstôly Roambinifolo dia nanambara izao:
I Jesoa Kristy: ilay mpikarakara ny fanahintsika
Nampianatra momba an’i Jesoa Kristy sy ny Sorompanavotany ary ny fanomezam-pahasoavan’ny fibebahana ny Loholona Soares.
Ho fanampin’ny fanomezana mendri-kaja ny famonjena dia nanolotra antsika fanampiana sy fampiononana ny Mpamonjy rehefa miatrika ireo fahoriana sy fakam-panahy ary fahalemena iainantsika eto amin’ny fiainana an-tany isika. … Afaka manome toky anareo aho fa i Kristy dia mahafantatra foana ireo zava-tsarotra iainantsika eto amin’ny fiainana an-tany. Takany avokoa ny alahelo sy ny fijaliana ary ny fanaintainana ara-batana ary koa ireo olana ara-pihetseham-po sy ara-panahy atrehintsika. Feno famindram-po ny kibon’ny Mpamonjy, ary vonona mandrakariva Izy hamonjy antsika. Vitany izany satria niainany manokana ary nalainy tao anatin’ny nofo ny fanaintainana avy amin’ny fahalementsika sy ny kilemantsika.
Tamin’ny halemem-panahy sy fanetrentena no nidinany ambanin’ny zava-drehetra sy nanekeny hatao tsinontsinona, nolavina ary nalain’ny olona baraka, noratraina noho ny fandikan-dalàna nataontsika sy ny helotsika. Niaritra ireo zavatra ireo Izy ho an’ny rehetra, ka nitondra teo Aminy ny fahotan’izao tontolo izao, ka nahatonga Azy ho mpikarakara antsika faratampony ara-panahy Izy.
Rehefa manakaiky Azy isika, ka mamela ny tenantsika hokarakarainy ara-panahy, dia ho afaka ny hitondra eo amintsika ny ziogany izay mora, sy ny entany izay maivana, ka hahita izany fampiononana sy fitsaharana nampanantenainy izany. Ankoatra izany dia hahazo ny hery izay ilaintsika rehetra isika mba handresena ireo zava-tsarotra, sy fahalemena, ary alahelo eo amin’ny fiainana, izay tena sarotra hiaretana raha tsy misy ny fanampiany sy ny fanasitranany. (Ulisses Soares, “Jesoa Kristy: Ilay Mpanasitrana ny fanahintsika,” Liahona, mey 2021, 83–84)
-
Inona avy ireo fahamarinana azontsika ianarana momba an’i Jesoa Kristy sy ny fahafahany manampy antsika avy fandalinana nataontsika?
Soraty eny amin’ny solaitrabe ny valintenin’ny mpianatra. Iray amin’ireo fahamarinana mety ho hitan’ny mpianatra izao manaraka izao: Afaka mampionona sy mampahery antsika i Jesoa Kristy ao anatin’ireo olana ara-pihetsehampo ananantsika satria efa niaina izany koa Izy.
-
Ahoana no ahafahan’ny fitodihana any amin’ny Mpamonjy sy ny fanarahana ny ohatra nasehony amim-pinoana manampy ny olona iray hanorina tanjaka bebe hiatrehana ny olana ara-pihetseham-po?
Maka sary an-tsaina ny fanampian’ny Mpamonjy
Mba hanampiana ny mpianatra hahatakatra ny fomba hanampian’io fitsipika io azy ireo dia mety hilaina ity fahaiza-manao manaraka ity. Ataovy izao manaraka izao mba hamaritana sy hanaovana maodely ary hampiharana ny fahaiza-manao:
-
Famaritana ny fahaiza-manao: Hazavao amin’ny mpianatra fa ny fakana sary an-tsaina ny Mpamonjy miaraka amintsika sy manampy antsika mandritra ireo toe-javatra sarotra ara-pihetseham-po mahazo antsika dia afaka manasa ny fanampiany sy ny fitarihany.
-
Famolavolana ny fahaiza-manao: Mieritrereta toe-javatra sarotra ara-pihetseham-po iray izay natrehinao na mety hatrehinao any aoriana, ka tianao ny hizara izany amin’ny mpianatra. Amin’ny alalan’ny fampiasana ireo dingana etsy ambany, dia zarao ny fomba fahitanao ao an-tsaina ny Mpamonjy miaraka aminao, mampatanjaka anao, ary ny fomba mety hamalianao ny sasany amin’ireo fanontaniana etsy ambany. Azonao atao ny mieritreritra tsara momba izany ao anatin’ny fanomanana ny lesonao.
-
Fampiharana: Mba hanampiana ireo mpianatra hampihatra io fahaiza-manao io dia ataovy ao anaty vondrona kely izy ireo ary asao ny vondrona tsirairay hieritreritra toe-javatra sarotra ara-pihetseham-po iainan’ny zatovo iray. Rehefa avy nieritreritra rafi-tantara azo ampifandraisana izy ireo, dia asao hanao izao manaraka izao ary hizara ny valinteniny amin’ny vondrona misy azy. Azonao atao ny mampitandrina ireo mpianatra mikasika ny fizarana zavatra mikasika ny tena manokana loatra eo amin’ny fiainan’izy ireo.
Akimpio ny masonao ary alaivo sary an-tsaina ny Mpamonjy nitsangana tamin’ny maty miaraka aminao mandritra ny fotoan-tsarotra lalovanao. Valio ireto fanontaniana manaraka ireto:
-
Aiza no hifandraisan’ny Mpamonjy aminao mandritra ny fotoan-tsarotra lalovanao? Inona no mety ho nataony raha niaraka taminao Izy?
-
Inona no mety hoeritreretinao na ho tsapanao rehefa eo akaikin’i Jesoa Kristy ianao?
-
Ahoana no mety hanampian’ny fanatrehany sy ny fitiavany ary ny fanohanany anao hitantana sy handresy ny adin-tsainao?
-
Eo anatrehan’ny zavatra fantatrao momba ny Mpamonjy, inona no mety holazainy aminao? (Azonao atao ny mampiasa andian-teny avy ao amin’ny soratra masina izay nolazainy tamin’ny hafa.) Inona no mety hasainy ataonao? Iza no mety hasainy mifandray aminao mba hahazoana fanampiana fanampiny?
Manasà vondrona maromaro hizara ny zavatra nifanakalozan’izy ireo hevitra sy ny fomba ahafahan’izany manampy. Azonao atao ny manazava fa ho an’ireo olana ara-pihetsehampo lehibe na maharitra dia tokony hikatsaka fanampiana sy fitarihana avy amin’ny ray aman-dreny sy ny mpitarika ao amin’ny Fiangonana ary ny matihanina manana fahazoan-dalana ny mpianatra.
Apetraho ireto fanontaniana manaraka ireto ary zarao ny fahatsapanao manokana momba ny tanjaka sy fampiononana azo avy amin’ny Ray any An-danitra sy i Jesoa Kristy:
-
Oviana ianao na ny olona fantatrao no nahatsapa ny fanampian’ny Mpamonjy nandritra ny toe-javatra sarotra ara-pihetseham-po?
-
Nahoana araka ny eritreritrao no mahatonga antsika hanana tanjaka bebe kokoa hiatrehana ny olana ara-pihetseham-po ny fitodihana any amin’ny Tompo?
Ho famaranana dia asao ireo mpianatra hanoratra ireo fihetseham-po na fahatsapana izay noraisiny mikasika ny Ray any An-danitra sy an’i Jesoa Kristy ary ny fahafahan’Izy Ireo manampy azy ireo sy ireo olon-tiany mba hanorina tanjaka hiatrehana ny olana ara-pihetseham-po.
Amporisiho ny mpianatra hiantehitra amin’i Jesoa Kristy mba hahazoana fanampiana sy hery mandritra ny fahasahiranana ara-pihetseham-po sy ny tsy fahombiazana. Ireo lesona any aoriana dia hifantoka amin’ny fomba manokana ahafahan’izy ireo mikatsaka ny fanampian’ny Tompo amin’ny eritreriny, ny adin-tsaina, ny fanahiany, ny fahaketrahany, sy ny maro hafa.