“Lesona 186: Mikolokolo fomba fisainana mahasoa: Afaka manampy antsika hanitsy ireo eritreritra tsy mahasoa i Jesoa Kristy,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Mikolokolo fomba fisainana mahasoa,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 186: Fahasalamana ara-batana sy ara-pihetsehampo
Mikolokolo fomba fisainana mahasoa
Afaka manampy antsika hanitsy ireo eritreritra tsy mahasoa i Jesoa Kristy
Mety hisy fiantraikany mahery vaika eo amin’ny zavatra tsapantsika sy ny zavatra ataontsika ny eritreritsika. Rehefa ampandraisintsika anjara amin’ny fomba fitantanantsika ny eritreritra ao amintsika ny Mpamonjy, dia afaka manampy antsika handresy eritreritra tsy mahasoa Izy. Ity lesona ity dia afaka manampy ny mpianatra hampitombo fahatsiarovan-tena amin’ny zavatra eritreretin’izy ireo sy hametraka fomba fisainana mahasoa.
Ireo sahanasa fianarana azo atao
Fihetsika manoloana ny andro ratsy iray
Ho fanombohana ny fotoam-pianarana dia azonao atao ny mampiseho ireto toe-javatra manaraka ireto ary asao ireo mpianatra hanoratra ny eritreritra voajanahary mety hananan’izy ireo ao anatin’ireo toe-javatra tsirairay ireo. Manaova fanitsiana amin’ireo toe-javatra mba hifanaraka tsara kokoa amin’ny zavatra ilain’ny mpianatra.
-
Mandeha manatrika hetsika fihaonana amin’ny olon-kafa aho ka mahatsapa fa zara raha mahafantatra ny olona ao aho.
-
Tsy maintsy miaraka amin’ny olona iray izay tsy mifankahazo amiko aho.
-
Maheno olona mitsikera ny Fiangonana aho.
-
Nahazo vokatra ratsy aho tamin’ny fanadinana izay nianarako mafy.
-
Inona no mety eritreritra sasantsasany anananao ho setrin’ireo toe-javatra ireo?
-
Manampy ve ireo eritreritra ireo? Marina tanteraka ve izy ireo? Ahoana no ahafahanao milaza izany?
Asao ny mpianatra handinika ny hatetiky ny fahitan’izy ireo ny fomba fisainany manokana sy ny hoe manampy na marina kokoa ve ireo fomba ireo sa tsia.
Azonao atao ny mizara amin’ny mpianatra fa hanao fanazaran-tena hanasa ny fanampian’ny Mpamonjy izy ireo mba hanitsiana ireo fisainana diso sy tsy mahasoa. Asao ny mpianatra hikatsaka fitarihana amin’ny alalan’ny Fanahy Masina mba hahatakarana tsara kokoa ny fomba fisainan’izy ireo manokana, indrindra rehefa manoloana toe-java-tsarotra.
Banjino i Kristy
Vakio ny Fotopampianarana sy Fanekempihavanana 6:36, ka tadiavo ny zavatra asain’ny Tompo hataontsika.
-
Inona no hitanao?
-
Inona, araka ny eritreritrao, no dikan’ny hoe mibanjina ny Mpamonjy ao an’eritreritsika?
Ohatra sasany amin’izany ireto manaraka ireto: misaintsaina ny amin’izay mety hataon’ny Mpamonjy ao anatin’ny toe-javatra atrehintsika, mitady fomba mety hampiharana ireo fampianarany amin’ilay toe-javatra ary mahatsiaro ny fitiavany.
-
Nahoana no mety ho sarotra ny mibanjina ny Mpamonjy ao an-tsaintsika?
Raha niresaka momba io soratra masina io ny Filoha Russell M. Nelson dia nampianatra hoe:
Tsy maintsy aorina mafy eo amin’ny Mpamonjy sy ny filazantsarany ny fifantohantsika. Mitaky ezaka ara-tsaina be ny fiezahana mibanjina Azy amin’ny eritreritra rehetra. Kanefa rehefa manao izany isika dia hisinda ireo tahotra sy ahiahy. (Russell M. Nelson, “Misintona ny herin’i Jesoa Kristy ho eo amin’ny fiainantsika,” Liahona, mey 2017, 41.)
-
Inona no manaitra anao amin’io teny nambaran’ny Filoha Nelson io?
Ankoatra ireo fahamarinana samihafa mety ho hitan’ny mpianatra dia ampio izy ireo hahita fa rehefa miezaka mibanjina ny Mpamonjy amin’ny eritreritra rehetra isika, dia handositra ny ahiahy sy ny tahotra ananantsika.
-
Nahoana ny fitodihana amin’ny Mpamonjy ao an-tsaintsika no mahatonga ny ahiahy sy ny tahotsika handositra?
Mba hahitana ny fomba ahafahan’ny fitodihana amin’ny Tompo hisy fiantraikany eo amin’ny eritreritra, dia hevero ny hanasa ny mpianatra hitantara ny toe-javatra niainan’ny Mpaminany Joseph tao amin’ny Fonjan’i Liberty. Ataovy izay hahatakaran’ny mpianatra fa nogadraina tsy ara-drariny izy raha mbola niharan’ny fanenjehana mahery vaika kosa ny Olomasina. Azon’ny mpianatra atao ny mamaky ny Fotopampianarana sy Fanekempihavanana 121:1–9 manontolo na ny ampahany amin’izany, ka hitady ny fomba nanampian’ny Tompo an’i Joseph tamin’ny ahiahy sy ny tahotra nananany.
Fomba fieritreretana tsy mahasoa
Mba hahatakarana ny fomba mety hanampian’ny fitodihana amin’ny Tompo ao an-tsaintsika antsika dia hevero ny hanao ity sahanasa manaraka ity:
Asehoy ity tabilao manaraka ity izay nalaina avy tamin’ny Finding Strength in the Lord: Emotional Resilience (Mahita hery ao amin’ny Tompo: Ny fananana herin-tsaina) ary alamino ho vondrona kely na tsiroaroa ny mpianatra. Azonao atao ny manasa ny mpianatra hisafidy iray na roa farafahakeliny amin’ireo fomba fisainana tsy marina ary hifanakalo hevitra momba ity fanontaniana manaraka ity. Ankoatra izany dia azon’ny mpianatra atao ny miezaka mamantatra ireo fomba fisainana tsy marina hafa izay tsikaritr’izy ireo.
Misy fomba fisainana tsy marina fanampiny izay azonao ampiasaina ho solony na fanampin’ireo izay voalaza eto. Mba hahitana ohatra amin’ny fomba fisainana tsy marina hafa, dia jereo ny Mahita hery ao amin’ny Tompo: Ny fananana herin-tsaina.
|
Fomba fisainana tsy mahasoa |
Fanazavana |
Ohatra |
|---|---|---|
Fomba fisainana tsy mahasoa Mandika vilana | Fanazavana Manao vinavina midadasika loatra na diso manoloana ny zavatra iray izay nitranga. | Ohatra “Tsy nahomby tamin’ity enti-mody ity aho, tsy mahay matematika aho izany.” |
Fomba fisainana tsy mahasoa Maika hanatsoaka hevitra | Fanazavana Fiheverana an-tendrony ny eritreritry ny hafa na ny fakana sary an-tsaina ny mety ho vokatra ratsy indrindra mety hitranga. | Ohatra “Azoko antoka fa mihomehy ahy izy ireo.” |
Fomba fisainana tsy mahasoa Tsy mijery ny lafin-tsaran-javatra | Fanazavana Mandà ireo zava-nitranga tsara rehetra satria mihevitra ianao hoe tsy misy dikany izy ireny. | Ohatra “Nilaza ny ray aman-dreniko hoe nety tsara ilay fampisehoana nataoko, saingy fantatro fa tian’izy ireo fotsiny aho hahatsapa hoe tsy nampaninona ireo fahadisoana nataoko.” |
Fomba fisainana tsy mahasoa Manitatra | Fanazavana Manitatra ny fahalemenao na mampitaha izany amin’ny tanjaky ny hafa. | Ohatra “Zara raha afaka miresaka amin’olona aho, ary rehefa mba afaka aho dia tsy mba mahay mivazivazy tahaka azy.” |
-
Inona avy ireo loza sasantsasany ateraky ny fananana eritreritra tahaka izany?
Manaova fanazaran-tena amin’ny fihetsika manoloana ireo eritreritra tsy mahasoa
Hevero ny hizara amin’ny mpianatra tsirairay ilay taratasy zaraina hoe “Manitsy ireo eritreritra tsy mahasoa na tsy marina” amin’ny mpianatra tsirairay. Mariho fa hanao fanazaran-tena izy ireo amin’ny alalan’ny fampiasana ireo zava-nitranga noresahina tany am-piandohan’ny fotoam-pianarana.
Hevero ny hanao izao manaraka izao mba hamaritana sy hanehoana ohatra ary hampiharana fahaiza-manao mba hanitsiana ireo eritreritra ratsy na tsy marina:
Farito: Rehefa manana eritreritra ratsy isika dia afaka manao izay hahatonga izany ho tsara amin’ny alalan’ny:
-
Famantarana ilay eritreritra tsy mahasoa na tsy marina.
-
Fametrahana fanontaniana iray na roa amin’ireto fanontaniana manaraka ireto:
-
Raha manana ireo eritreritra ireo ny namana iray dia inona no holazaiko azy?
-
Ahoana no mety hanampian’ny fieritreretana ny Mpamonjy sy ny fampianarany hanitsy io eritreritra io?
Manaova maodely: Hevero ny haka ho maodely io fahaiza-manao io amin’ny alalan’ny fampiasana ny andalana voalohany ao amin’ilay tabilao etsy ambany miaraka amin’ny iray kilasy.
Fantaro ny eritreritra tsy mahasoa na tsy marina izay mety ho setrin’ilay zava-mitranga. Ny ohatra sasantsasany dia mety hahitana ny hoe “mitsara ahy ny olona rehetra” na “tsy haiko ny miaina amin’ny toe-javatra toy izany. Tsara kokoa ho an’ny olona rehetra raha toa ka tsy mandeha fotsiny aho.”
Eritrereto ny zavatra holazainao amin’ny namana iray izay niteny an’io eritreritra tsy mahasoa na tsy marina io. Mety hahitana izao ny ohatra sasantsasany: “Mieritreritra ve ianao fa marina 100% ny hoe mitsara anao ny hafa? Mety hoe manahy ny amin’ny tenany koa ve izy ireo?” sy ny hoe “Mahafinaritra ahy ianao. Tsy mahafaty antoka ny mahafantatra anao.”
Eritrereto ny fomba mety hanampian’ny fieritreretana ny Mpamonjy sy ny fampianarany amin’ny fanitsiana io eritreritra io. Ohatra, ny mpianatra dia mety hieritreritra momba ny hatsaram-panahin’ny Mpamonjy tamin’ny hafa, na ilay soratra masina manao hoe, “Didy vaovao no omeko anareo, dia ny mba hifankatiavanareo; eny aoka ho tahaka ny nitiavako anareo no mba hifankatiavanareo kosa” (Jaona 13:34). Ao anatin’io maodely io dia azonao atao mihitsy aza ny mizara ny zavatra nambaran’ny Tompo ao amin’ny Isaia 55:8 mba hanampiana ny mpianatra hahita fa ny eritreriny momba antsika dia matetika tsy mitovy amin’ny antsika.
Manaova fanazaran-tena: Asao ny mpianatra hiasa ao anaty vondrona kely maromaro mba hiasa amin’ny ambin’ilay tabilao, hanoratra ny zavatra mety holazain’izy ireo amin’ny namana iray manana io eritreritra io sy ny fomba mety hanitsian’ny Mpamonjy amim-pitiavana io eritreritra io.
Amin’ny fiafaran’ny lesona dia hameno ny andalana banga eo amin’ny farany ambanin’ilay taratasy zaraina ny mpianatra.
Manitsy ireo eritreritra tsy mahasoa na tsy marina
|
Tranga |
Inona no eritreritra tsy mahasoa na tsy marina mety hanananao? |
Raha nanana izany eritreritra izany ny namana iray dia inona no holazainao aminy? |
Ahoana no mety hanitsian’ny Mpamonjy io eritreritra io? |
|
Mandeha manatrika hetsika fihaonana amin’ny olon-kafa izay tsy hahafantaranao na iza na iza ianao. | |||
|
Tsy maintsy miaraka amin’ny olona iray izay tsy mifankahazo aminao ianao. | |||
|
Maheno olona mitsikera ny Fiangonana ianao. | |||
|
Nahazo vokatra ratsy ianao tamin’ny fanadinana izay nianaranao mafy. |
Rehefa avy nomena fahafahana hizara ny zavatra nosoratany tao amin’ilay taratasy zaraina ny mpianatra dia hevero ny hanasa azy ireo hieritreritra zavatra tsy mahasoa na tsy marina izay mety hananan’izy ireo sy hanoratra izany eo amin’ny tsanganana mifanaraka amin’izany eo amin’ny andalana farany. Amporisiho izy ireo hampiditra ilay zava-nitranga izay afaka mitondra mankany amin’io eritreritra io. Asao ny mpianatra hanohy hampihatra io fahaiza-manao io amin’ny alalan’ny famenoana ireo toerana malalaka roa hafa eo amin’io andalana io.
-
Inona no nianaranao na tsapanao androany mikasika ireo fomba fisainana mahasoa izay mety ho fitahiana ho anao?
Azonao atao ny mizara ny fijoroana ho vavolombelona anananao momba ny fanirian’ny Mpamonjy sy ny fahafahany manampy antsika eo anatrehan’ireo eritreritra manahirana sy tsy marina ao amintsika rehefa mibanjina Azy ao an-tsaintsika isika.