“Lesona 189: Hatao tanteraka ao amin’i Jesoa Kristy: Dingana iray hahatongavana tahaka ny Mpamonjy kokoa,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Hatao tanteraka ao amin’i Jesoa Kristy,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 189: Fahasalamana ara-batana sy ara-pihetseham-po
Hatao tanteraka ao amin’i Jesoa Kristy
Dingana iray hahatongavana tahaka ny Mpamonjy kokoa
Ireo tsindry sy ny zavatra andrandraina maro eo amin’ny fiainana dia mety hahatonga antsika ho sahirana amin’ny fikatsahana ny tonga lafatra na hieritreritra amim-pahadisoana fa ny tenantsika ihany no tokony hanao izay hahatonga lafatra antsika. Noho ny sorona lehibe nataon’ny Mpamonjy dia afaka ny “hatao tanteraka ao Aminy” isika (Môrônia 10:32). Ity lesona ity dia afaka manampy ny mpianatra hamantatra ireo eritreritra diso mifandray amin’ny fikatsahana ny tonga lafatra ary afaka manampy azy ireo hitodika amin’ny Tompo.
Sahanasa fianarana azo atao
Fikatsahana ny tonga lafatra
Asehoy eny amin’ny solaitrabe ny sasany amin’ireto hevitra manaraka ireto dia vakio miaraka amin’ny iray kilasy izany. Aza misalasala mampifanaraka na manova azy ireo amin’ireo eritreritra hafa mitondra amin’ny fikatsahana ny tonga lafatra izay mifanaraka kokoa amin’ny zavatra iainan’ireo mpianatrao.
-
“Tsy azoko antoka hoe hanana fahatsarana ampy aho.”
-
“Tsy mahay an’io zavatra io tahaka azy aho. Tsy fantatro akory hoe maninona aho no mbola mikiry manandrana ihany.”
-
“Tsapako hoe mila manao mody faly kokoa sy manana fiainana milamina kokoa noho izay tena iainako aho.”
Asao ny mpianatra hitodika any amin’ny mpiara-mpianatra iray hafa ary hamaly ireto fanontaniana manaraka ireto.
-
Toy ny ahoana ny habetsahan’ny olona manana eritreritra tahaka ireo raha ny fahatsapanao azy?
-
Nahoana ny olona no mety halaim-panahy hieritreritra toy izany?
Azonao atao ny manazava fa ireo teny lazain’ny olona ireo dia azo raisina ho ohatra amin’ny fananana eritreritra mikatsaka ny tonga lafatra. Azonao soratana eny amin’ny solaitrabe ny hoe fikatsahana ny tonga lafatra ary asao ny mpianatra hanoratra ireo famaritana azo heverina rehetra mahakasika izany.
Asehoy ity teny ambara manaraka ity. Amporisiho ny mpianatra hitady hevi-baovao fanampiny azony anampiana ny eny amin’ny solaitrabe.
Nanazava ny Loholona Vern P. Stanfill ao amin’ny Fitopololahy hoe:
Ny fikatsahana ho tonga lafatra dia mitaky fenitra tsy azo takarina sy napetraky ny tena manokana izay mampitaha antsika amin’ny hafa. Miteraka fahatsapana ho meloka, sy fiasan-tsaina, ary mety hitarika antsika hiala sy hitokana izany. (Vern P. Stanfill, “Ilay fijinjana tsy tonga lafatra,” Liahona, mey 2023, 113)
Mba hanampiana ny mpianatra hanombantombana ny fomba fahatakarany ny fikatsahana ny tonga lafatra eo amin’ny fiainany sy ny fomba handresena izany dia azonao atao ny mampiseho ireto fanontaniana manaraka ireto ary manasa ny mpianatra hisaintsaina ny ho valin-tenin’izy ireo.
Eritrereto ny fomba mety hahatonga anao ho mora manana eritreritra mikatsaka ny tonga lafatra. Azonao atao ny mirakitra an-tsoratra ny valin-teninao amin’ny sasany amin’ireto fanontaniana manaraka ireto ao anatin’ny diary fandalinanao.
-
Inona avy ireo fenitra tsy azo tanterahina mety hapetrakao ho an’ny tenanao?
-
Ahoana no ampitahanao ny tenanao amin’ny hafa amin’ny fomba tsy mahasoa?
-
Ahoana no ahafahanao mitodika amin’ny Tompo mba hiadiana amin’izany karazana fisainana izany?
Amporisiho ny mpianatra hikatsaka fanambarana avy amin’ny Ray any An-danitra amin’ny alalan’ny Fanahy Masina rehefa mandalina ny fomba ahafahan’izy ireo mitodika any amin’ny Mpamonjy mba handresena ny eritreritra mikatsaka ny tonga lafatra.
Tanteraka ao amin’i Jesoa Kristy
Nizara ny zavatra azontsika ifantohana ny Loholona Vern P. Stanfill mba handresena ireo eritreritra mikatsaka ny tonga lafatra:
Tsarovy fa ny fikatsahana ho tonga lafatra dia tsy mitovy amin’ny hoe hatao tanteraka ao amin’i Kristy….
Ny hoe hatao tanteraka ao amin’i Kristy dia … dingana, arahin’ny fitarihana feno fitiavan’ny Fanahy Masina, mba ho lasa tahaka ny Mpamonjy kokoa. Ireo fenitra dia apetraky ny Ray any An-danitra tsara fanahy sy feno fahalalana ary voafaritra mazava tsara amin’ireo fanekempihavanana izay hanasana antsika mba hataontsika. Manamaivana antsika amin’ilay ziogan’ny fahatsapana ho meloka sy tsy ampy fahatsarana izany, ary manantitrantitra mandrakariva ny maha isika antsika eo imason’ Andriamanitra. (Vern P. Stanfill, “Ilay fijinjana tsy tonga lafatra,” Liahona, mey 2023, 113)
-
Inona no tsapanao fa manan-danja ao amin’io teny nambara io?
Raha toa ka tsy mora amin’ny mpianatra ny mizara dia asao izy ireo hamintina ny dikan’ny hoe hatao tanteraka ao amin’i Kristy. Manorata fitsipika iray tahaka izao manaraka izao eny amin’ny solaitrabe amin’ny alalan’ny fampiasana ny tenin’ireo mpianatra ihany: Ny fahatongavana ho tanteraka ao amin’i Jesoa Kristy dia ilay dingana—dingana, arahin’ny fitarihana feno fitiavan’ny Fanahy Masina—mba ho lasa tahaka ny Mpamonjy kokoa. Soraty eo amin’ny solaitrabe eo akaikin’ny hoe Fikatsahana ny tonga lafatra ny hoe Hatao tanteraka ao amin’i Kristy.
Rehefa nitsidika ireo mponina fahiny tany Amerika ny Mpamonjy dia nanamafy indray fa ny fahatongavana ho tanteraka dia zavatra iriny sy irin’ny Rainy ho antsika rehetra. Vakio ny 3 Nefia 12:48 (jereo ihany koa ny Matio 5:48), ka tadiavo ny zavatra nolazain’ny Mpamonjy.
Ny olona sasany dia mety miady amin’ny fananana eritreritra mikatsaka ny tonga lafatra rehefa mamaky io andininy io.
-
Amin’ny fomba ahoana no mety hanampian’ny teny nambaran’ny Loholona Stanfill antsika hahatakatra kokoa ny zavatra izay ampianarin’ny Mpamonjy ao anatin’io andininy io?
-
Ahoana no ahafahan’izany manampy antsika hitodika any amin’ny Tompo rehefa mitolona amin’ny fisainana mikatsaka ny tonga lafatra isika?
Lasa tahaka ny Mpamonjy kokoa
Mba hanampiana ny mpianatra hahatakatra kokoa ilay fitsipika dia zarao ilay taratasy zaraina hoe “Hatao tanteraka ao amin’i Jesoa Kristy.”
Azon’ny mpianatra atao ny mandalina ireo andalan-tsoratra masina sy teny nambara ao anatina vondrona kely maromaro, ka ny olona tsirairay dia mandray teny nambara sy andalan-tsoratra masina iray na roa. Na azonao atao ny manome teny nambara iray sy andalan-tsoratra masina hohalalinin’ny vondrona tsirairay.
Hatao tanteraka ao amin’i Jesoa Kristy
Vakio ireto andalan-tsoratra masina manaraka ireto. Mitadiava andian-teny izay mampitombo ny fatokisanao fa ny Mpamonjy dia afaka manampy antsika handresy ny tsy fahatanterahantsika ka ho tonga tahaka Azy kokoa. Azonao atao lisitra ao amin’ny diary fandalinanao na any ambadiky ny taratasy zaraina ny zavatra hitanao.
Vakio ity teny nambara manaraka ity. Tadiavo izay azontsika atao mba handresena ny eritreritra mikatsaka ny tonga lafatra ary mifantoha amin’ny fahatongavana ho tsara kokoa amin’ny alalan’i Jesoa Kristy. Azonao atao ny manasongadina andian-teny iray izay miavaka aminao.
Nampianatra ny zavatra andrasan’ny Tompo sy izay tsy andrasany amintsika ny Loholona Dieter F. Uchtdorf ao amin’ny Kôlejin’ny Apôstôly Roambinifolo:
Andriamanitra dia tsy mitady olona tsy manana fahalemena. Mitady ireo izay vonona hanolotra “fo sy saina marisika” [Fotopampianarana sy Fanekempihavanana 64:34] Izy, ary izy ireo dia hataony “tanteraka ao amin’i Kristy” [Môrônia 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University Education Week devotional, 17 Aug. 2021], 3, speeches.byu.edu)
Nanazava ny zavatra azontsika atao ny Filoha Russell M. Nelson rehefa mahita ny tsy fahatanterahantsika isika:
Andeha isika hanao izay tsara indrindra vitantsika ary hiezaka hihatsara isan’andro. Rehefa miseho ny tsy fahatanterahantsika, dia afaka miezaka foana isika hanitsy izany. Afaka ny ho mpamela heloka kokoa isika amin’ireo fahalemena ao anatitsika sy eo anivon’ireo olona akaikin’ny fontsika. (Russell M. Nelson, “Perfection Pending,” Ensign, nôv. 1995, 88)
Rehefa avy nandalina ny mpianatra dia asao izy ireo hizara amin’ny vondrona misy azy ny zavatra nianarany. Ampio izy ireo hifanakalo hevitra momba ny maha-zava-dehibe ireo andalan-tsoratra masina sy teny nambara ireo amin’izy ireo.
Ifanakalozy hevitra hoe inona ireo andian-teny hitanao ao amin’ireo andalan-tsoratra masina ireo na ireo teny nambara ireo izay:
-
Nanampy anao tany aloha tany tamin’ireo fahatsapana ho tsy mahavita ny zavatra nandrasana taminao.
-
Anananao fanontaniana.
-
Tianao hampiharina amin’ny fiainanao.
Fanoloana ny fikatsahana ny tonga lafatra amin’ny fahatongavana ho tanteraka ao amin’i Jesoa Kristy
Ity fahaiza-manao manaraka ity dia afaka manampy antsika hanitsy ny fomba fisainana mikatsaka ny tonga lafatra sy hifantoka amin’ny fiezahana ho tonga tsaratsara kokoa amin’ny alalan’i Jesoa Kristy.
Farito: Alaovy antoka fa mazava amin’ny mpianatra ity fahaiza-manao manaraka ity. Soraty eo amin’ny solaitrabe ireo fanontaniana.
Rehefa mahatsikaritra fisainana mikatsaka ny tonga lafatra ianao, dia apetraho amin’ny tenanao ireto fanontaniana manaraka ireto:
-
Ahoana no mety ho tian’ny Mpamonjy hijereko ny tenako amim-pangorahana sy amim-paharetana?
-
Ahoana no ahafahako manaiky sy miantehitra amin’ny Mpamonjy sy ny heriny mba hanampy ahy, fa tsy miezaka manao samirery ny zava-drehetra?
Manaova ohatra: Misafidiana iray amin’ireo eritreritra fikatsahana ny tonga lafatra hatrany am-piandohan’ny lesona, toy ny hoe “Tsy mahay an’io zavatra io tahaka azy aho. Tsy fantatro akory hoe maninona aho no mbola mikiry manandrana ihany.” Apetraho amin’ny mpianatra ilay fanontaniana voalohany eo am-pieritreretana izany (“Ahoana no mety ho tian’ny Mpamonjy hijereko ny tenako amim-pangorahana sy amim-paharetana?”).
Mety hizara ny sasany amin’ireto manaraka ireto ny mpianatra: Tsy manahiran-tsaina ny Tompo ny hoe manao ahoana isika raha oharina amin’ny hafa. Afaka manam-paharetana amin’ny tenantsika isika raha tsy mandroso haingana toy ny hafa ary mahatsapa fa manana ny adiny koa ny hafa. Afaka mahatsapa isika fa ny ankamaroan’ny fivoarana dia mandeha miandalana. Afaka mikatsaka ny bitsiky ny Fanahy isika mba hitodika amin’ny Tompo sy hahafantatra fa hivoatra amin’ny fotoanan’ny Tompo isika.
Apetraho ny fanontaniana faharoa etsy ambony (“Ahoana no ahafahako manaiky sy miantehitra amin’ny Mpamonjy sy ny heriny mba hanampy ahy, fa tsy miezaka manao samirery ny zava-drehetra?”). Mety hilaza ny mpianatra fa rehefa mibebaka sy mitodika amin’ny Mpamonjy isika dia manana hery hanadio antsika amin’ny fahotana Izy ary hanampy antsika hivoatra sy ho tonga tahaka Azy. Manasa antsika Izy mba hifantoka Aminy fa tsy amin’ny hafa, raha hitady fanampiana. Afaka miezaka manaraka ny ohatry ny Mpamonjy isika ary mivavaka mba hitahian’ny Ray any An-danitra ny ezaka ataontsika. Mitady ombam-bavaka ireo zavatra maneho ny fanampiany sy ny fomba hihatsarantsika isika.
Manaova fanazaran-tena: Asao ny mpianatra hiaraka tsiroaroa hanao ity sahanasa manaraka ity ary ataovy izay hahazoana antoka fa ny mpianatra tsirairay dia manana fahafahana hanao fanazaran-tena.
Misafidiana iray amin’ireo ohatra momba ny eritreritra mikatsaka ny tonga lafatra any am-piandohan’ny lesona. Valio ireo fanontaniana etsy ambony sady mieritreritra izany ihany.
Rehefa avy nomena fotoana ampy ny mpianatra dia manasà mpiara-miasa tsiroaroa vitsivitsy hizara ny zavatra nianaran’izy ireo tao amin’ny vondrona nisy azy. Mety hahatsikaritra ny sasany fa manampy azy ireo hahatsapa ny fitiavan’ny Mpamonjy sy faharetana ny fampidirana Azy ao an-tsain’izy ireo.
Amporisiho ny mpianatra hisaintsaina ny fomba ahafahan’izy ireo mampihatra ireo fahaiza-manao ireo eo amin’ny fiainany. Asao izy ireo hanao zavatra mifanaraka amin’ny fahatsapana mety ho voarainy rehefa mikatsaka ny fanampian’ny Mpamonjy izy ireo.
Azonao faranana ny fotoam-pianarana amin’ny fijoroana ho vavolombelona momba ireo fitahiana izay azontsika avy amin’ny ezaka tsy tapaka ataontsika mba ho tahaka an’i Jesoa Kristy.