Lesson 189—Pisikal at Emosyonal na Kalusugan

Pagiging Ganap kay Jesucristo

Isang Proseso ng Pagiging Higit na katulad ng Tagapagligtas

Maraming pamimilit at inaasahan sa buhay ang maaaring maging dahilan upang mahirapan tayo dahil sa pagiging perpeksyonista o sa maling pag-iisip na kailangan nating maging ganap o perpekto nang mag-isa. Dahil sa dakilang sakripisyo ng Tagapagligtas, tayo ay maaaring “maging ganap sa kanya” (Moroni 10:32). Ang lesson na ito ay makatutulong sa mga estudyante na matukoy ang mga maling pananaw na nauugnay sa pagiging perpeksyonista at makatutulong sa kanila na bumaling sa Panginoon.

Mga Posibleng Aktibidad sa Pag-aaral

Pagiging Perpeksyonista

Maaari mong ipakita ang ilan sa mga sumusunod na kaisipan sa pisara at basahin ang mga ito nang sama-sama bilang isang klase. Huwag mag-atubiling iangkop o palitan ang mga ito ng iba pang perpeksyonistang kaisipan na mas nauugnay sa iyong mga estudyante.

• ”Hindi ko alam kung magiging sapat ba ang kabutihan ko.”

• “Hindi ako kasinggaling niya sa paggawa nito. Ni hindi ko na alam kung bakit ko pa nga ba sinusubukan.”

• “Pakiramdam ko, kailangan kong magkunwaring mukhang mas masaya at mas okay na hindi naman totoo.”

Para sa isang halimbawa ng ilan sa mga kaisipang ito, maaari mong ipapanood ang video na “Self-Compassion” (2:58) mula sa time code na 0:00 hanggang 0:53.

Sabihin sa mga estudyante na bumaling sa kapartner at sagutin ang mga sumusunod na tanong.

• Gaano ka kadalas magkaroon ng mga kaisipang tulad ng mga ito?

• Bakit maaaring matukso ang mga tao na mag-isip sa ganitong paraan?

Maaari mong ipaliwanag na ang mga pahayag na ito ay maituturing na mga halimbawa ng perpeksyonistang pag-iisip. Maaari mong isulat sa pisara ang pagiging perpeksyonista at anyayahan ang mga estudyante na magsulat ng mga posibleng paglalarawan sa paligid nito.

Maaari mong ipakita ang sumusunod na pahayag. Hikayatin ang mga estudyante na maghanap ng mga karagdagang ideya na maidaragdag nila sa pisara.

Ipinaliwag ni Elder Vern P. Stanfill ng Pitumpu:

Ang pagnanais na maging perpekto ang lahat ay nangangailangan ng isang imposibleng pamantayang nagpapahirap sa sarili na ikinukumpara tayo sa iba. Nagiging sanhi Ito ng pagkabagabag ng konsiyensya at pagkabalisa at maaaring pagnaisin tayong lumayo at ihiwalay ang ating sarili. (Vern P. Stanfill, “Ang Hindi Perpektong Pag-ani,“ Liahona, Mayo 2023, 113)

Upang matulungan ang mga estudyante na masuri kung paano nila nakikita ang pagiging perpeksyonista sa kanilang buhay at kung paano ito madaraig, maaari mong ipakita ang mga sumusunod na tanong at sabihin sa mga estudyante na pag-isipan ang kanilang mga sagot.

Isipin kung paano ka maaaring madaling matukso na magkaroon ng mga perpeksiyonistang kaisipan. Maaari mong isulat ang iyong mga sagot sa ilan sa mga sumusunod na tanong sa iyong study journal.

• Anong mga di-makatotohanang pamantayan ang maaaring itinatakda mo para sa iyong sarili?

• Paano mo ikinukumpara ang iyong sarili sa iba sa hindi magagandang paraan?

• Paano ka makakabaling sa Panginoon upang madaig ang ganitong uri ng pag-iisip?

Hikayatin ang mga estudyante na maghangad ng paghahayag mula sa Ama sa Langit sa pamamagitan ng Espiritu Santo habang pinag-aaralan nila ang mga paraan kung paano sila makakabaling sa Tagapagligtas upang madaig ang perpeksyonistang pag-iisip.

Naging Ganap kay Jesucristo

Ibinahagi ni Elder Vern P. Stanfill kung ano ang maaari nating pagtuunan upang madaig ang perpeksyonistang pag-iisip:

Tandaan na ang pagnanais na maging perpekto ang lahat ay hindi kapareho ng pagiging [perpekto] kay Cristo….

Ang pagiging [perpekto] kay Cristo … ang proseso—sa mapagmahal na paggabay ng Espiritu Santo—ng pagiging higit na katulad ng Tagapagligtas. Ang mga pamantayan ay itinakda ng isang mabait na Ama sa Langit na nakakaalam ng lahat at malinaw na nakasaad sa mga tipan na inaanyayahan tayong tanggapin at ipamuhay. Pinapawi nito ang bigat ng kasalanan at kakulangan, na laging binibigyang-diin kung sino tayo sa paningin ng Diyos. (Vern P. Stanfill, “Ang Hindi Perpektong Pag-ani,” Liahona, Mayo 2023, 113)

• Ano ang nakikita ninyong makabuluhan sa pahayag na ito?

Kung hindi kusang magbabahagi ang mga estudyante, maaari mo silang anyayahan na ibuod kung ano ang ibig sabihin ng maging ganap kay Cristo. Gamit ang mga salita ng mga estudyante, sumulat ng isang alituntunin sa pisara na tulad ng sumusunod: Ang pagiging ganap kay Jesucristo ang proseso—sa mapagmahal na paggabay ng Espiritu Santo—ng pagiging higit na katulad ng Tagapagligtas. Maaaring isulat sa pisara ang Pagiging ganap kay Cristo sa tabi ng pagiging perpeksyonista.

Sa pagdalaw sa mga sinaunang naninirahan sa Amerika, muling pinagtibay ng Tagapagligtas na ang pagiging ganap o perpekto ay isang bagay na hangad Niya at ng Kanyang Ama para sa ating lahat. Basahin ang 3 Nephi 12:48 (tingnan din sa Mateo 5:48), at alamin ang sinabi ng Tagapagligtas.

Maaaring mahirapan ang ilang perpeksyonistang tao kapag nabasa nila ang talatang ito.

• Paano makatutulong sa atin ang mga pahayag ni Elder Stanfill na mas maunawaan ang itinuturo ng Tagapagligtas sa talatang ito?

• Paano ito makatutulong sa atin na bumaling sa Panginoon kapag nahihirapan tayo dahil sa perpeksyonistang pag-iisip?

Pagiging higit na katulad ng Tagapagligtas

Upang matulungan ang mga estudyante na mas maunawaan ang alituntunin, maaari mong ipamahagi ang handout na “Pagiging Ganap kay Jesucristo.“

Maaaring pag-aralan ng mga estudyante ang mga scripture reference at pahayag sa maliliit na grupo, kung saan ang bawat tao ay pag-aaralan ang isa o dalawang pahayag at mga scripture reference. O maaari mong bigyan ang bawat grupo ng isang pahayag at scripture reference na pag-aaralan nila.

Pagiging Ganap kay Jesucristo

Basahin ang mga sumusunod na scripture reference. Maghanap ng mga parirala na nagpapalakas ng iyong kumpiyansa na matutulungan tayo ng Tagapagligtas na madaig ang ating mga kakulangan at maging higit na katulad Niya. Maaari kang gumawa ng listahan ng nalaman mo sa iyong study journal o sa likod ng handout.

• Doktrina at mga Tipan 76:40–42

• Eter 12:27

• Moroni 10:32–33

Basahin ang mga sumusunod na pahayag. Alamin kung ano ang magagawa natin upang madaig ang perpeksyonistang pag-iisip at magtuon sa pagiging mas mabuti sa pamamagitan ni Jesucristo. Maaari mong i-highlight ang mga parirala na namukod-tangi sa iyo.

Itinuro ni Elder Dieter F. Uchtdorf ng Korum ng Labindalawang Apostol kung ano ang inaasahan at hindi inaasahan ng Panginoon sa atin:

Hindi kailangan ng Diyos ang mga taong walang kamalian. Hinahanap Niya ang mga maghahandog ng kanilang mga “puso at may pagkukusang isipan” [Doktrina at mga Tipan 64:34], at gagawin Niya silang “ganap kay Cristo” [Moroni 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University Education Week devotional, Ago. 17, 2021], 3, speeches.byu.edu)

Ipinaliwanag ni Pangulong Russell M. Nelson kung ano ang magagawa natin kapag nakikita natin ang ating mga kakulangan:

Gawin natin ang lahat ng ating makakaya at sikaping magpakabuti pa bawat araw. Kapag nagkamali tayo, maaari nating sikaping itama ang mga ito. Maaari tayong maging mas mapagpatawad sa mga pagkakamali natin at ng mga minamahal natin. (Russell M. Nelson, “Perfection Pending,” Ensign, Nob. 1995, 88)

Kapag tapos nang mag-aral ang mga estudyante, sabihin sa kanila na ibahagi sa kanilang grupo ang natutuhan nila. Tulungan silang talakayin kung paano nauugnay sa kanila ang mga banal na kasulatan at pahayag na ito.

Talakayin kung anong mga parirala ang nakita ninyo sa mga banal na kasulatan o mga pahayag na ito na:

• Nakatulong sa inyo noon sa pakiramdam na hindi ninyo natutugunan ang mga inaasahan.

• Mga tanong ninyo.

• Gusto ninyong ipamuhay.

Pagiging ganap kay Jesucristo sa halip na pagiging perpeksyonista

Ang sumusunod na kasanayan ay makatutulong sa atin na itama ang perpeksyonistang pag-iisip at magtuon sa pagsisikap na maging mas mabuti sa pamamagitan ni Jesucristo.

Bigyang-kahulugan: Tiyaking malinaw ang sumusunod na kasanayan para sa mga estudyante. Maaari mong isulat ang mga tanong sa pisara.

Kapag may natukoy kang isang perpeksyonistang kaisipan, itanong sa iyong sarili ang mga sumusunod:

• Paano maaaring naisin ng Tagapagligtas na makita ko ang aking sarili nang may habag at pagtitiis?

• Sa halip na sikaping gawin ang lahat nang mag-isa, paano ko kikilalanin at aasahan ang Tagapagligtas at ang Kanyang kapangyarihang tulungan ako?

Ipakita: Pumili ng isa sa mga perpeksyonistang kaisipan mula sa simula ng lesson, tulad ng “Hindi ako kasinggaling niya sa paggawa nito. Ni hindi ko na alam kung bakit ko pa nga ba sinusubukan.” Habang isinasaisip ng mga estudyante ang kaisipang ito, itanong sa kanila ang unang tanong (“Paano maaaring naisin ng Tagapagligtas na makita ko ang aking sarili nang may habag at pagtitiis?”). Para makarinig ng ilang posibleng sagot, panoorin ang natitirang bahagi ng video na “Self-Compassion” (2:58) mula sa time code na 0:54 hanggang 2:58.

Maaaring ibahagi ng mga estudyante ang ilan sa mga sumusunod: Hindi mahalaga sa Panginoon kung mas mabilis ang pag-unlad ng iba kaysa sa atin. Maaari tayong maging matiyaga sa ating sarili kung hindi tayo umuunlad nang mabilis tulad ng iba at matanto na mayroon ding sariling pinagdadaanan ang iba. Mapagtatanto natin na karamihan sa pag-unlad ay nangyayari nang paunti-unti. Maaari nating hangarin ang mga pahiwatig ng Espiritu na bumaling sa Panginoon at malaman na uunlad tayo sa takdang panahon ng Panginoon.

Itanong ang pangalawang tanong sa itaas (“Sa halip na sikaping gawin ang lahat nang mag-isa, paano ko kikilalanin at aasahan ang Tagapagligtas at ang Kanyang kapangyarihang tulungan ako?”). Maaaring ibahagi ng mga estudyante na kapag tayo ay nagsisi at bumaling sa Tagapagligtas, may kapangyarihan Siyang linisin tayo mula sa kasalanan at tulungan tayong maging mas mabuti at maging katulad Niya. Inaanyayahan Niya tayong magtuon sa Kanya, hindi sa iba, para sa tulong. Maaari nating sikaping tularan ang halimbawa ng Tagapagligtas at manalangin na pagpalain ng Ama sa Langit ang ating mga pagsisikap. Mapanalangin tayong naghahanap ng katibayan ng Kanyang tulong at mga paraan kung paano tayo mas huhusay.

Magsanay: Sabihin sa mga estudyante na gawin ang sumusunod na aktibidad nang magkakapartner, at tiyakin na magkakaroon ang bawat estudyante ng pagkakataong magsanay.

Pumili ng isa sa mga halimbawa ng mga perpeksyonistang kaisipan sa simula ng lesson. Habang isinasaisip ito, sagutin ang mga tanong sa itaas.

Pagkatapos ng sapat na oras, anyayahan ang ilang magkapartner na ibahagi ang natutuhan nila sa kanilang pagsasanay. Maaaring mapansin ng ilan na ang pag-anyaya sa Tagapagligtas sa kanilang isipan ay nakatutulong sa kanila na madama ang Kanyang pagmamahal at pagtitiis.

Hikayatin ang mga estudyante na pagnilayan kung paano nila magagamit ang mga kasanayang ito sa kanilang buhay. Anyayahan silang kumilos ayon sa mga impresyong maaaring natanggap nila habang hinihingi nila ang tulong ng Tagapagligtas.

Maaari mong tapusin ang klase sa pagpapatotoo sa mga pagpapalang nagmumula sa patuloy nating pagsisikap na maging tulad ni Jesucristo.

Karagdagang Resources

3 Nephi 12:48 (tingnan din sa Mateo 5:48). Ano ang ibig sabihin ng “maging ganap“?

Ibinahagi ni Pangulong Russell M. Nelson:

Sa Mateo 5:48, ang salitang sakdal ay isinalin mula sa salitang Griyego na teleios, na ang ibig sabihin ay “kumpleto.” Ang teleios ay isang pang-uri na nagmula sa pangngalan na telos, na ang ibig sabihin ay “wakas.” Ang pawatas na anyo ng pandiwa ay teleiono, na ang ibig sabihin ay “marating ang isang malayong layunin, ganap na umunlad, malubos, o matapos.” Mangyaring tandaan na ang salita ay hindi nagpapahiwatig ng “kalayaan mula sa pagkakamali”; ito ay nagpapahiwatig ng “pagkakamit ng isang malayong layunin.” (Russell M. Nelson, “Perfection Pending,” Ensign, Nob. 1995, 86)

Itinuro ni Elder Jeffrey R. Holland ng Korum ng Labindalawang Apostol:

Bawat isa sa atin ay naghahangad ng buhay na mas katulad ng kay Cristo kaysa sa pamumuhay natin ngayon. Kung tapat nating aaminin iyan, at nagsisikap na mas bumuti pa, hindi tayo mga mapagkunwari; tayo ay tao. … Kung magsusumigasig tayo, sa isang dako ng kawalang-hanggan ang ating kadalisayan ay magiging ganap at lubos—na siyang kahulugan ng pagiging sakdal. (Jeffrey R. Holland, “Kayo Nga’y Mangagpakasakdal—Sa Wakas,” Liahona, Nob. 2017, 42)

Paano nagiging posible ang pagiging sakdal o ganap?

Ipinaliwanag ni Pangulong Russell M. Nelson:

Hindi tayo dapat masiraan ng loob kung ang masigasig na mga pagsisikap natin ngayon tungo sa pagiging ganap ay tila napakahirap at walang katapusan. Ang pagiging ganap ay hindi pa darating nang lubusan. Darating lamang ito nang lubusan pagkaraan ng Pagkabuhay na Mag-uli at sa pamamagitan lamang ng Panginoon. Naghihintay ito sa lahat ng nagmamahal sa kanya at sumusunod sa kanyang mga kautusan. (Russell M. Nelson, “Perfection Pending,” Ensign, Nob. 1995, 88)

Tingnan din sa “Maging Ganap sa Kanya,” mula sa time code na 7:00 hanggang 7:57, ni Elder Paul V. Johnson ng Pitumpu.

Ano ang pagiging perpeksyonista?

Ipinaliwanag ni Elder Gerrit W. Gong ng Korum ng Labindalawang Apostol:

Ang maling pagkaunawa sa ibig sabihin ng maging perpekto ay maaaring mauwi sa pagiging perpeksyonista—isang pag-uugali o asal na may kahanga-hangang hangaring maging mabuti at nagkakaroon ng di-makatotohanang pag-asa na maging perpekto ngayon. Ang pagiging perpeksyonista kung minsan ay bunga ng damdamin na iyon lamang mga perpekto ang dapat mahalin o na hindi tayo nararapat maging masaya kung hindi tayo perpekto. (Gerrit W. Gong, “Pagiging Ganap kay Cristo,” Liahona, Hulyo 2014, 17)

Ang paging karapat-dapat at pagiging ganap ay pareho lang?

Tingnan sa “Ano ang pagkakaiba ng pagiging perpeksyonista at pagnanais na maging karapat-dapat?” (mula sa page na “Kalusugang Pangkaisipan: Tulong para sa Akin” sa ChurchofJesusChrist.org).

Mga Karagdagang Aktibidad sa Pag-aaral

Mga kilos at pag-uugali na tumutulong sa akin na madaig ang pagiging perpeksyonista

Upang matulungan ang mga estudyante na maunawaan kung paano nila makakamit ang balanse sa pagitan ng mga hinihingi ng buhay at pag-iwas sa pagiging perpeksyonista, maaari mong ipabasa sa kanila ang ilang bahagi ng “Pagiging Ganap kay Cristo” ni Elder Gerrit W. Gong ng Korum ng Labindalawang Apostol (Liahona, Hulyo 2014, 14–19). Habang nagbabasa ang mga estudyante, maaari silang gumawa ng listahan ng mga kilos at pag-uugali na makatutulong sa kanila na madaig ang mga posibilidad na maging perpeksyonista at, sa halip, maging ganap kay Jesucristo.

Paghahambing at pagtulad

Ang isang posibleng sanhi ng pagiging perpeksyonista ay ang hangaring ikumpara ang ating sarili sa iba. Maaaring makinabang ang mga estudyante sa pag-aaral tungkol sa mga pagkakaiba ng pagkukumpara sa sarili at pagtulad. Maaari mong ipakita ang sumusunod na pahayag ni Elder Vern P. Stanfill ng Pitumpu:

Natutuhan ko na tulad ng … ang [pagiging perpeksyonista] ay hindi kapareho ng pagiging [perpekto] kay Cristo, ang pagkukumpara ng sarili ay hindi kapareho ng pagtulad. Kapag ikinukumpara natin ang ating sarili sa iba, dalawa lamang ang magiging resulta nito. Ituturing natin ang ating sarili na mas mabuti tayo kaysa sa iba at magiging mapanghusga at mapamintas tayo sa kanila, o ituturing natin ang ating sarili na mas mababa kaysa sa iba at magiging balisa, mapamintas sa sarili, at manghihina ang loob. Ang pagkukumpara ng ating sarili sa iba ay bihirang kapaki-pakinabang, hindi nakakasigla, at kung minsa’y talagang nakakapanlumo. Sa katunayan, ang mga pagkukumparang ito ay maaaring espirituwal na makapinsala, at humadlang sa atin na matanggap ang espirituwal na tulong na kailangan natin. Sa kabilang dako, ang pagtulad sa mga taong iginagalang natin na nagpapamalas ng mga katangiang tulad ng kay Cristo ay maaaring magturo at magpasigla at matutulungan tayong maging mas mabubuting disipulo ni Jesucristo. (Vern P. Stanfill, “Ang Hindi Perpektong Pag-ani,“ Liahona, Mayo 2023, 115)

Pagkatapos ay maaari ninyong talakayin ang mga tanong na tulad ng sumusunod:

• Bakit dapat nating hangaring iwasang ikumpara ang ating sarili sa iba?

• Bakit dapat nating hangaring tularan ang mga taong nagpapakita ng mga katangiang tulad ng kay Cristo?

• Ano ang nakatulong sa inyo na maiwasan ang tukso na ikumpara ang inyong sarili sa iba?

Mga Sitwasyon

Upang matulungan ang mga estudyante na matukoy ang mga maling pananaw na nauugnay sa pagiging perpeksyonista at pagkatapos ay magpraktis na palitan ang mga ito ng mga paraan na makababaling tayo kay Cristo, maaari kang magpagawa sa mga estudyante ng mga sitwasyon. Sa mga grupo, maaaring gumawa ang mga estudyante ng makatotohanang sitwasyon na kinabibilangan ng ilang elemento ng perpeksyonistang pag-iisip. Ang mga grupo ay maaaring magpalitan ng kanilang mga sitwasyon. Maaari silang tumugon sa sitwasyon sa pamamagitan ng pagbabahagi ng sasabihin nila upang mahikayat ang indibiduwal sa sitwasyon na bumaling kay Cristo upang maging ganap siya sa Kanya.

Mga opsiyon sa video

Sa “Perfectionism: Will I Ever Be Good Enough?,” inilarawan ni Olivia ang kanyang karanasan sa pagiging perpeksyonista. Habang pinanonood ng mga estudyante ang video na ito, maaari nilang tukuyin ang mga paraan kung paano ipinakita ang pagiging perpeksyonista at kung paano ito nakaapekto sa kanya. Maaari din nilang tukuyin kung paano niya dinaig ang pagiging perpeksyonista. Maaari mo ring gamitin ang unang tatlong minuto at limang segundo ng video bilang alternatibong paraan upang masimulan ang lesson. Pagkatapos ay maaari mong ipanood ang natitirang bahagi ng video sa pagtatapos ng lesson.

Maaaring makinabang ang mga estudyante sa panonood ng “Ang Pagiging Karapat-dapat ay Hindi Pagiging Walang Kamalian“ mula sa time code na 3:34 hanggang 7:03. Sa video na ito, iniuugnay ni Brother Bradley R. Wilcox ng Young Men General Presidency ang isang kuwento tungkol kay Damon at kung paano siya natulungan ng pagbaling sa Diyos na madaig ang nadarama niyang kakulangan.