« មេរៀនទី ១៩០—ការស្ថាបនាទំនាក់ទំនងវិជ្ជមាន ៖ ការបង្កើតទំនាក់ទំនងដ៏រឹងមាំជាមួយគ្រួសារ និង មិត្តភក្តិ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៥ )
« ការស្ថាបនាទំនាក់ទំនងវិជ្ជមាន » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
មេរៀនទី ១៩០—សុខភាពខាងផ្លូវកាយ និងផ្លូវចិត្ត
ការស្ថាបនាទំនាក់ទំនងវិជ្ជមាន
ការបង្កើតទំនាក់ទំនងដ៏រឹងមាំជាមួយគ្រួសារ និងមិត្តភក្តិ
ព្រះវរបិតាសួគ៌ចង់ឲ្យយើងស្រឡាញ់ទ្រង់ និងអស់អ្នកដែលនៅជុំវិញយើង ។ ពេលយើងអភិវឌ្ឍទំនាក់ទំនងជិតស្និទ្ធជាមួយក្រុមគ្រួសារ និងមិត្តភក្តិ នោះយើងអាចទទួលបានពរជ័យដោយការលួងលោម កម្លាំង និងការគាំទ្រដែលយើងត្រូវការក្នុងអំឡុងពេលទាំងស្ងប់ និងពេលលំបាកផងដែរ ។ មេរៀននេះអាចជួយសិស្សស្វែងរកជំនួយរបស់ព្រះអម្ចាស់ក្នុងការបង្កើតទំនាក់ទំនងដែលរួមចំណែកដល់សុខភាព និងសុខុមាលភាពទាំងមូលរបស់ពួកគេ ។
សកម្មភាពរៀនសូត្រដែលអាចមាន
អ្វីដែលសំខាន់បំផុត ?
សូមពិចារណាអញ្ជើញសិស្សឲ្យរាយបញ្ជីនៅលើក្ដារខៀនអំពីអ្វីដែលពួកគេមានអារម្មណ៍ថាសំខាន់បំផុតក្នុងជីវិត ។
សូមបង្ហាញសេចក្តីថ្លែងការណ៍ដូចខាងក្រោម ហើយសូមអញ្ជើញសិស្សម្នាក់ឲ្យអានវា ៖
ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយ បានបង្រៀនអំពីអ្វីដែលសំខាន់បំផុត ៖
Of Things That Matter Most
ពេលយើងងាកទៅរកព្រះវរបិតាសួគ៌របស់យើង ហើយស្វែងរកប្រាជ្ញារបស់ទ្រង់ទាក់ទងនឹងរឿងដែលសំខាន់បំផុត នោះយើងរៀនម្តងហើយម្តងទៀតអំពីសារៈសំខាន់នៃទំនាក់ទំនងបួនយ៉ាងគឺ ៖ ជាមួយនឹងព្រះរបស់យើង ជាមួយនឹងក្រុមគ្រួសាររបស់យើង ជាមួយនឹងមិត្តរួមការងាររបស់យើង និងជាមួយនឹងខ្លួនឯង ។ ( ឌៀថើរ អេហ្វ អុជដូហ្វ « Of Things That Matter Most » Liahona ខែវិច្ឆិកា ឆ្នាំ២០១០ ទំព័រ ២១ )
-
តើអ្នកបានរៀនអ្វីខ្លះមកពីសេចក្ដីថ្លែងការណ៍របស់អែលឌើរ អុជដូហ្វ ?
សូមអញ្ជើញសិស្សឲ្យគូសរង្វង់ឃ្លាដែលពួកគេបានសរសេរនៅលើក្ដារខៀនដែលបង្ហាញអំពីទំនាក់ទំនងរបស់យើងជាមួយនឹងព្រះ និងអ្នកដទៃទៀតដែលស្ថិតក្នុងចំណោមរឿងដែលសំខាន់បំផុតក្នុងជីវិត ។ ប្រសិនបើចាំបាច់សូមបន្ថែម « ទំនាក់ទំនងរបស់យើងជាមួយនឹងព្រះ និងអ្នកដទៃ » ទៅក្នុងបញ្ជីនៅលើក្តារខៀន ។
សូមពន្យល់ថាមេរៀននេះនឹងផ្តោតទៅលើទំនាក់ទំនងរបស់យើងជាមួយនឹងអ្នកដទៃ ។ សូមអញ្ជើញសិស្សឲ្យគិតអំពីទំនាក់ទំនងបច្ចុប្បន្នរបស់ពួកគេមួយចំនួន ហើយថាតើទំនាក់ទំនងទាំងនេះនាំពួកគេឲ្យខិតទៅជិតព្រះ ហើយផ្ដល់ឲ្យពួកគេនូវកម្លាំង និងផ្តល់ការគាំទ្រដែលពួកគេត្រូវការក្នុងជីវិតរបស់ពួកគេដែរឬអត់ ។ ពួកគេក៏អាចពិចារណាអំពីរបៀបដែលព្រះអម្ចាស់អាចចង់ឲ្យពួកគេពង្រឹងទំនាក់ទំនងដែលមានស្រាប់ ឬអភិវឌ្ឍទំនាក់ទំនងថ្មី ។
ទំនាក់ទំនងរបស់យើង
សូមចែកចាយសំណៅចែកដែលមានចំណងជើងថា « គំរូនៃទំនាក់ទំនងដ៏មានអត្ថន័យនៅក្នុងប្រវត្តិសាស្រ្តសាសនាចក្រ និងគោលលទ្ធិ និងសេចក្ដីសញ្ញា » ហើយអញ្ជើញសិស្សឲ្យស្វែងរកភស្តុតាងនៃសេចក្ដីពិតដូចខាងក្រោមនេះ ៖ វិធីមួយដែលព្រះអាចប្រទានពរដល់ជីវិតរបស់យើង និងពង្រឹងសេចក្តីជំនឿរបស់យើង គឺតាមរយៈទំនាក់ទំនងដ៏មានអត្ថន័យជាមួយនឹងអ្នកដទៃ ។ ( អ្នកអាចនឹងចង់សរសេរសេចក្ដីពិតនេះនៅលើក្ដារខៀន ) ។
សូមពិចារណាអំពីវិធីដើម្បីជួយសិស្សឲ្យប្រើសំណៅចែកនេះ ។ វិធីមួយគឺត្រូវរៀបចំពួកគេជាក្រុមដែលមានគ្នាបីនាក់ ហើយចាត់សមាជិកក្រុមនីមួយៗឲ្យសិក្សាអំពីគំរូមួយក្នុងចំណោមគំរូទាំងនោះនៅលើសំណៅចែក ។ នៅពេលសិស្សបញ្ចប់ការសិក្សាអំពីគំរូរបស់ពួកគេហើយ សូមលើកទឹកចិត្តពួកគេឲ្យធ្វើការចែកចាយជាមួយក្រុមរបស់ពួកគេនូវអ្វីដែលពួកគេបានរៀនអំពីរបៀបដែលព្រះអាចប្រទានពរដល់យើងតាមរយៈទំនាក់ទំនងរបស់យើងជាមួយនឹងអ្នកដទៃ ។
គំរូនៃទំនាក់ទំនងដ៏មានអត្ថន័យនៅក្នុងប្រវត្តិសាស្រ្តសាសនាចក្រ និងគោលលទ្ធិ និងសេចក្ដីសញ្ញា
គំរូទី ១
បន្ទាប់ពីលោកបានទៅភ្នំគូម៉ូរ៉ានៅខែកញ្ញា ឆ្នាំ១៨២៣ យ៉ូសែប ស្ម៊ីធ បានចែកចាយព័ត៌មានលម្អិតអំពីបទពិសោធន៍របស់លោក និងការយាងមកជួបរបស់ទេវតាមរ៉ូណៃជាមួយគ្រួសាររបស់លោក ។ យ៉ូសែបបានបន្តចែកចាយបទពិសោធន៍ និងទស្សនៈរបស់លោកជាមួយនឹងអ្នកដែលជិតស្និទ្ធនឹងគាត់បំផុត ។ កាលរំឭកអំពីការមកជួបដ៏ពិសិដ្ឋទាំងនេះ ម្តាយរបស់ព្យាការី លូស៊ី ម៉ាក ស្ម៊ីធ បានកត់ត្រាដូចខាងក្រោមនេះ ៖
រៀងរាល់ល្ងាចយើងបានប្រមូលកូនៗរបស់យើងមកជួបជុំគ្នា ។ ខ្ញុំគិតថា យើងបានបង្ហាញនូវទិដ្ឋភាពដ៏ចម្លែកបំផុតនៃគ្រួសារណាមួយដែលធ្លាប់រស់នៅលើផែនដី ទាំងអស់គ្នាអង្គុយនៅក្នុងរង្វង់ មានឪពុក ម្តាយ កូនប្រុស និងកូនស្រីដែលស្តាប់ចង់ភ្លេចដកដង្ហើមចំពោះការបង្រៀនខាងសាសនារបស់ក្មេងប្រុសម្នាក់ ។ …
… ការជួបជុំគ្នា និងសុភមង្គលដ៏ផ្អែមល្ហែមបំផុតបានសាយភាយពេញផ្ទះរបស់យើង ។ គ្មានការមិនចុះសម្រុង ឬរំខានដល់សន្តិភាពរបស់យើងឡើយ ហើយភាពស្ងប់ស្ងាត់បានមាននៅក្នុងចំណោមពួកយើងទាំងអស់គ្នា ។ ( លូស៊ី ម៉ាក ស្ម៊ីធ នៅក្នុង Teachings of Presidents of the Church: Joseph Smith [ ឆ្នាំ២០០៧ ] ទំព័រ ៤៨៦ )
-
តើអ្វីដែលលេចធ្លោជាងគេចំពោះអ្នកអំពីគ្រួសារ ស្ម៊ីធ ចេញមកពីដំណើររឿងនេះ ?
-
តើសេចក្ដីស្រឡាញ់ដែលយ៉ូសែបមាននៅក្នុងផ្ទះបានជួយលោកឲ្យបំពេញការហៅដ៏សំខាន់របស់លោកដោយរបៀបណា ?
-
តើអ្នករៀនអ្វីខ្លះមកពីគំរូនេះអំពីរបៀបដែលព្រះអាចប្រទានពរដល់អ្នក ឬរបៀបដែលអ្នកអាចជួយអ្នកដទៃឲ្យទទួលបានពរតាមរយៈទំនាក់ទំនងដ៏មានអត្ថន័យនោះ ?
គំរូទី ២
ខណៈដែលកំពុងរស់នៅក្នុងទីក្រុងណៅវូ រដ្ឋអិលលីណោយ យ៉ូសែប ស្ម៊ីធ បានជញ្ជឹងគិតអំពីអត្ថប្រយោជន៍នៃទំនាក់ទំនងដ៏មានអត្ថន័យទាំងឡាយ ៖
ខ្ញុំនឹងចាត់ទុកវាជាពរជ័យដ៏អស្ចារ្យមួយ ប្រសិនបើខ្ញុំត្រូវរងទុក្ខនៅក្នុងពិភពលោកនេះដើម្បីឲ្យខ្ញុំមានសំណាងដែលខ្ញុំអាចស្វែងរកបងប្អូន និងមិត្តភក្តិនៅជុំវិញខ្ញុំ ។ ( Teachings: Joseph Smith ទំព័រ ៤៦៦ )
-
តើគ្រួសារ និងមិត្តភក្តិអាចជួយយើងបានយ៉ាងដូចម្ដេចនៅពេលយើងកំពុងជួបឧបសគ្គដ៏លំបាក ?
-
តើគ្រួសារ និងមិត្តភក្តិអាចប្រទានពរដល់ជីវិតរបស់យើងតាមវិធីណាទៀត ?
គំរូទី ៣
សូមអាន គោលលទ្ធិ និងសេចក្តីសញ្ញា ១០៨:៧ ដោយស្វែងរកដំបូន្មានដែលព្រះអម្ចាស់បានប្រទានដល់ ឡៃម៉ាន ស៊ើម៉ាន នៃពួកចិតសិបនាក់ ។
-
ហេតុអ្វីពេលខ្លះវាពិបាកក្នុងការធ្វើតាមដំបូន្មាននេះ ?
-
តើនៅពេលណាអ្នកមានអារម្មណ៍ថាត្រូវបានពង្រឹង ឬលើកទឹកចិត្តដោយការប្រាស្រ័យទាក់ទងជាមួយមនុស្សម្នាក់ទៀត ?
សូមអញ្ជើញសិស្សឲ្យចែកចាយជាមួយសិស្សក្នុងថ្នាក់នូវអ្វីដែលពួកគេបានរៀន និងរបៀបដែលព្រះអាចប្រទានពរដល់យើងតាមរយៈទំនាក់ទំនងរបស់យើង ។
-
តើអ្នកបានរៀនអ្វីខ្លះអំពីតម្លៃនៃការអភិវឌ្ឍទំនាក់ទំនងដ៏មានអត្ថន័យជាមួយអ្នកដទៃនៅក្នុងជីវិតរបស់អ្នក ?
-
តើការស្ថាបនា និងការពង្រឹងទំនាក់ទំនងជាមួយអ្នកដទៃអាចមានឥទ្ធិពលដល់ទំនាក់ទំនងរបស់យើងជាមួយនឹងព្រះព្រមទាំងសុខភាព និងសុខមាលភាពទាំងមូលរបស់យើងដោយរបៀបណា ?
ការស្ថាបនាទំនាក់ទំនង
អ្នកអាចចំណាយពេលពិភាក្សាអំពីជំនាញក្នុងការស្ថាបនាទំនាក់ទំនង ។ សូមពិចារណាផ្ដល់ចម្រៀកក្រដាសទទេមួយទៅឲ្យសិស្សគ្រប់គ្នា ។ សូមលើកទឹកចិត្តពួកគេឲ្យសរសេរយ៉ាងហោចណាស់រឿងមួយដែលអាចជួយនរណាម្នាក់អភិវឌ្ឍ ឬពង្រឹងទំនាក់ទំនងជាមួយមនុស្សម្នាក់ទៀត ។ ប្រមូលចម្រៀកក្រដាស និងអានរឿងនៅលើក្រដាសមួយចំនួនឲ្យឮៗទៅកាន់សិស្សក្នុងថ្នាក់ ។ បើចាំបាច់សូមចែកចាយគំនិតមួយចំនួន ឬទាំងអស់ខាងក្រោមនេះជាមួយសិស្ស ។
-
រកមើលចំណាប់អារម្មណ៍រួម ។
-
រៀន និងហៅឈ្មោះមនុស្ស ។
-
ញញឹម ។
-
ស្តាប់ដោយប្រុងប្រយ័ត្នខណៈដែលអ្នកដទៃនិយាយ ។
-
លើកតម្កើង និងកោតសរសើរមនុស្សដោយស្មោះ ។
-
ជៀសវាងការវិនិច្ឆ័យ ឬការចាប់កំហុស ។
-
បង្ហាញចំណាប់អារម្មណ៍ចេញពីចិត្ដ ។
-
អធិស្ឋានសម្រាប់ពួកគេចំៗឈ្មោះ ។
-
ស្វែងរកសប្បុរសធម៌ ។
-
មានចិត្តអត់ធ្មត់ ។
-
រកមើលឱកាសដើម្បីបម្រើ ។
សូមពិចារណាផ្តល់ពេលវេលាដល់សិស្សក្នុងថ្នាក់ដើម្បីអនុវត្តជំនាញស្ថាបនាទំនាក់ទំនងទាំងនេះ ។ ឧទាហរណ៍ខាងក្រោមនេះអាចជួយបាន ប្រសិនបើសិស្សមិនសូវស្គាល់ឈ្មោះគ្នាទៅវិញទៅមកទេ ។ ប្រសិនបើសិស្សរបស់អ្នកស្គាល់ឈ្មោះគ្នាទៅវិញទៅមករួចហើយ សូមពិចារណាជ្រើសរើសជំនាញផ្សេងគ្នាដើម្បីអនុវត្ត ។
កំណត់ ៖ សូមពន្យល់ថាការប្រើឈ្មោះមនុស្សគឺជាជំនាញដ៏មានប្រយោជន៍មួយក្នុងការស្ថាបនាទំនាក់ទំនងដែលល្អ ។ សូមពន្យល់ថាព្រះអម្ចាស់ហៅយើងតាមឈ្មោះរបស់យើង ( សូមមើល លោកុប្បត្ដិ ៣៥:១០; លូកា ១៩:៥; អេណុស ១:៥; យ៉ូសែប ស្ម៊ីធ—ប្រវត្តិ ១:១៧ ) ។ សូមពិចារណាសួរសិស្សថាតើវាធ្វើឲ្យពួកគេមានអារម្មណ៍យ៉ាងណានៅពេលអ្នកដទៃស្គាល់ និងហៅពួកគេតាមឈ្មោះ ។
ពុម្ពគំរូ ៖ សូមជូនដំណឹងដល់សិស្សថាពួកគេនឹងជួបការលំបាកក្នុងការរៀនពីឈ្មោះគ្នាទៅវិញទៅមក និងការហៅគ្នាតាមឈ្មោះ ។ សូមពន្យល់ថាវិធីមួយដើម្បីចងចាំឈ្មោះមនុស្សគឺសរសេរឈ្មោះទាំងនោះ ហើយពិនិត្យមើលឈ្មោះទាំងនោះឡើងវិញ ។ ពេលអ្នករាប់ឈ្មោះសមាជិកម្នាក់ៗក្នុងថ្នាក់រៀនរួចហើយ សូមអញ្ជើញសិស្សឲ្យសរសេរឈ្មោះណាមួយដែលពួកគេមិនទាន់ស្គាល់ ។
វាក៏អាចមានប្រយោជន៍ក្នុងការសួរសិស្សនូវអ្វីដែលរារាំងធ្វើឲ្យមិនចងចាំឈ្មោះរបស់មនុស្ស និងរបៀបដែលពួកគេអាចយកឈ្នះលើឧបសគ្គទាំងនេះ ។
អនុវត្ត ៖ សូមឲ្យពេលសិស្សពីរបីនាទីដើម្បីពិនិត្យមើលឈ្មោះដែលពួកគេបានសរសេរ ។ បន្ទាប់មកអនុញ្ញាតឲ្យពួកគេអនុវត្ត ។ អ្នកអាចដាក់ពួកគេធ្វើការជាគូ ហើយមើលថាតើពួកគេអាចធ្វើការជាមួយគ្នាដើម្បីរាប់ឈ្មោះមនុស្សគ្រប់គ្នានៅក្នុងថ្នាក់ដែរឬអត់ ។ សូមសួរថាតើនរណាអាចរាប់ឈ្មោះមនុស្សគ្រប់គ្នានៅក្នុងថ្នាក់ដោយខ្លួនឯង ហើយប្រសិនបើមានអ្នកអាចធ្វើបាន សូមអញ្ជើញពួកគេឲ្យធ្វើវា ។ ប្រសិនបើសមរម្យអាចបន្ថែមការល្បងប្រាជ្ញាគឺសូមឲ្យសិស្សផ្លាស់ប្ដូរកន្លែងដែលពួកគេអង្គុយ ហើយបន្ទាប់មកសាកមើលថាតើសិស្សនៅតែអាចរាប់ឈ្មោះមនុស្សគ្រប់គ្នាបានដែរឬទេ ។
ប្រសិនបើមានពេលវេលាគ្រប់គ្រាន់ សូមជ្រើសរើសជំនាញបន្ថែម ។ ឧទាហរណ៍ សូមអញ្ជើញសិស្សឲ្យស្វែងរកអ្វីដែលពួកគេមានដូចគ្នានឹងអ្នកដទៃ ។ ពួកគេអាចធ្វើការជាមួយនរណាម្នាក់នៅក្នុងបន្ទប់ដែលជាធម្មតាពួកគេមិនធ្លាប់ធ្វើការជាមួយគ្នាទេ ហើយសួរសំណួរគ្នាទៅវិញទៅមក ដើម្បីស្វែងរកចំណាប់អារម្មណ៍រួម ។ ក្រោយមកពួកគេអាចផ្លាស់ទៅសិស្សម្នាក់ទៀតដើម្បីធ្វើការអនុវត្តនេះឡើងវិញ ។ ( ដើម្បីដាក់ជំនាញទាំងពីរបញ្ចូលគ្នា សូមលើកទឹកចិត្តសិស្សឲ្យហៅគ្នាតាមឈ្មោះក្នុងដំណើរការ ) ។
ការអនុវត្តផ្ទាល់ខ្លួន
សូមពិចារណាអំពីការថ្លែងទីបន្ទាល់អំពីសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទដែលមានសម្រាប់សិស្សម្នាក់ៗ ។ សូមថ្លែងជាសាក្សីថាព្រះអាចប្រទានពរ និងពង្រឹងជីវិតរបស់ពួកគេតាមរយៈទំនាក់ទំនងដ៏មានអត្ថន័យដែលពួកគេស្វែងរកដើម្បីអភិវឌ្ឍ និងថែរក្សា ។ អ្នកក៏អាចចែកចាយឧទាហរណ៍មួយអំពីការទទួលបានពរជ័យ និងការពង្រឹងដោយទំនាក់ទំនងក្នុងជីវិតរបស់អ្នកផ្ទាល់ផងដែរ ។
សូមអញ្ជើញសិស្សស្វែងរកការណែនាំពីព្រះវិញ្ញាណបរិសុទ្ធដើម្បីធ្វើដូចខាងក្រោមនេះ ៖
សូមគិតអំពីរបៀបដែលព្រះអម្ចាស់អាចនឹងជួយអ្នកពង្រឹងទំនាក់ទំនងដែលមានស្រាប់ ឬអភិវឌ្ឍទំនាក់ទំនងថ្មីមួយ ។ ដោយប្រើអ្វីដែលអ្នកបានរៀននៅថ្ងៃនេះ សូមធ្វើផែនការដើម្បីធ្វើឲ្យទំនាក់ទំនងរបស់អ្នកកាន់តែស៊ីជម្រៅជាមួយបុគ្គលនេះ ។ ដាក់បញ្ចូលរបៀបដែលអ្នកនឹងងាកទៅរកព្រះអម្ចាស់ដើម្បីទទួលជំនួយក្នុងដំណើរការនេះ ។