“Leksyon 1 Materyal sa Pagpangandam sa Klase: Pasiuna sa Pagpahiuli,” Materyal sa Pagpangandam sa Klase alang sa Mga Pundasyon sa Pagpahiuli (2019)
“Leksyon 1 Materyal sa Pagpangandam sa Klase,” Materyal sa Pagpangandam sa Klase alang sa Mga Pundasyon sa Pagpahiuli
Leksyon 1 Materyal sa Pagpangandam sa Klase
Pasiuna sa Pagpahiuli
Welcome alang sa Mga Pundasyon sa Pagpahiuli. Niini nga kurso, tun-an ninyo ang pundasyon sa mga pagpadayag, doktrina, mga tawo, ug makasaysayanong mga hitabo kalabut sa ulahing adlaw nga Pagpahiuli sa Simbahan ni Jesukristo. Ang mainampoong pagtuon niining mga butanga makatabang ninyo sa pagkumpara niini nga mga konsepto ug mga tawo sa inyong kinabuhi ug mga sirkumstansya. Kamo usab mas makahimo sa pag-angkon og espirituhanon nga kahibalo ug makaila sa kamatuoran gikan sa sayop.
Kini nga materyal sa pagpangandam makahatag ninyo og pundasyon alang sa inyong kasinatian sa klase. Ang pagtuon sa matag materyal sa pagpangandam sa leksyon sa dili pa ang klase makatabang ninyo nga makabaton og mas lawom, mas makahuluganon nga kasinatian sa pagkat-on.
Samtang magmaninampoon kamo nga motambong niini nga kurso, makita ninyo ang impluwensya sa Ginoo diha sa kasaysayan sa Pagpahiuli ug makadungog sa Iyang tingog sa mga pagpadayag sa Pagpahiuli (tan-awa sa Doktrina ug mga Pakigsaad 18:34–36). Sa katapusan niining una nga leksyon, kinahanglan nga makahimo na mo sa pagpasabut ngano nga ang Simbahan kinahanglan nga ipahiuli. Kinahanglan makahibalo usab kamo giunsa pag-andam sa Ginoo ang dalan alang sa usa ka bag-ong dispensasyon sa kamatuoran sa atong panahon.
Seksyon 1
Unsay nakaingon sa Dakong Apostasiya?
Human sa kamatayon ug Pagkabanhaw ni Jesukristo, ang Iyang mga Apostoles padayon nga nangulo sa Simbahan samtang kini milambo. Si Presidente M. Russell Ballard sa Korum sa Napulog Duha ka mga Apostoles mipasabut kon sa unsa nga paagi ang Simbahan ni Jesukristo sa katapusan nahulog ngadto sa apostasiya:
Ang Bag-ong Tugon nagpakita nga ang unang mga Apostoles naningkamot pag-ayo sa pagpatunhay sa simbahan nga gibilin ni Jesukristo nga ilang atimanon, apan sila nasayud nga ang ilang paningkamot sa katapusan makawang ra. Si Pablo misulat ngadto sa mga Santos nga Taga-Tesalonica, kinsa madasigong nagpaabut sa ikaduhang pag-anhi ni Kristo, nga “kadtong adlawa dili pa moabut, hangtud nga mahitabo una ang pagsupil” (2 Tes. 2:3). …
Sa katapusan, gawas sa nahitabo ni Juan ang Hinigugma, si Pedro ug ang iyang isig ka mga Apostoles gipangpatay. Si Apostol Juan ug ang mga miyembro sa Simbahan naningkamot sa pagpakabuhi samtang nakigbisog sa makalilisang nga pangdaug-daog. Alang sa walay katapusang pasidungog ngadto nila, ang Kristiyanismo nakalahutay ug sa tinuod usa na ka gibantog nga gahum dapit sa katapusan sa ikaduhang siglo A.D. Daghang maisugong mga Santos ang nahimong instrumento sa pagtabang nga makalahutay ang Kristiyanismo.
Bisan sa dakong epekto sa mga pangalagad niini nga mga Santos, wala sila maghupot sa samang apostolikanhong awtoridad nga nadawat ni Pedro ug sa ubang mga Apostoles pinaagi sa ordinasyon ubos sa mga kamot ni Ginoong Jesukristo Mismo. Sa dihang kana nga awtoridad nawala, ang mga tawo nagsugod sa pagpangita sa ubang mga tinubdan alang sa pagsabut sa doktrina. Isip resulta, daghan sa yano ug bililhong mga kamatuoran ang nawala. (M. Russell Ballard, “Restored Truth,” Ensign, Nob. 1994, 65–66)
Si propeta Nephi nakakita sa Dakong Apostasiya diha sa panan-awon. Nakita niya nga atol niini nga apostasiya, ang dautang mga tawo “[motangtang] gikan sa ebanghelyo sa Kordero, sa daghan nga mga bahin sa yano ug labing bililhon; ug daghan usab nga mga pakigsaad sa Ginoo nga sila [mitangtang]” (1 Nephi 13:26). Nakita usab niya nga “daghan nga yano ug mga bililhon nga mga butang [nga] gikuha gikan” sa Biblia panahon sa Dakong Apostasiya (1 Nephi 13:28). Usa ka anghel misulti ni Nephi, “Tungod niini nga mga butang nga gikuha gikan sa ebanghelyo sa Kordero, hilabihan ka daghan kaayo ang mapandol, oo, hangtud nga si Satanas adunay dako nga gahum ibabaw kanila” (1 Nephi 13:29).
Pamalandong agi og Pagpangandam alang sa Klase
Ngano nga ang pagpahiuli sa kahingpitan sa ebanghelyo ni Jesukristo gikinahanglan?
Seksyon 2
Giunsa sa Ginoo sa pag-andam ang paagi alang sa Pagpahiuli?
Human sa mga siglo sa apostasiya, diin gamay ra kaayo nga mga tawo ang maka-access sa mga kasulatan, dinasig nga mga lalaki ug mga babaye mibuhat kon unsay ilang mahimo, kasagaran mirisgo sa kaugalingon, aron matabangan ang uban nga makakita sa kamatuoran. Sa ulahing bahin sa mga 1300 si John Wycliffe nagsugod og hubad sa Biblia ngadto sa Iningles ug gikonsiderar isip usa ka erehes sa mga awtoridad sa relihiyon sa iyang panahon. Ang pagkaimbento sa printahanan sa tunga-tunga sa mga 1400 nakapahimo sa daghang tawo nga makaangkon og mga kopya sa Biblia. Niadtong mga 1500 ang Espiritu sa Ginoo mitandog ni Martin Luther, Huldrych Zwingli, John Calvin, John Knox, Ann Askew, ug daghang uban pa sa pagsulti batok sa mga sayop sa dagkong mga simbahan sa ilang panahon. Si William Tyndale ug ang uban mihimo usab og bag-ong mga hubad sa Biblia. Daghan niini nga mga reformer gipangpatay tungod sa ilang mga gihimo. Ang ilang mga paningkamot midangat ngadto sa pag-organisar sa bag-ong mga simbahan nga Protestante. Tungod kay ang Europe kulang sa kagawasan sa relihiyon, ang pagkamugna niining bag-ong mga simbahan misangpot sa mga panagbangi.
Ang relihiyoso nga pagpanggukod nakaaghat sa daghan niini ug sa ubang mga indibidwal sa pagpangita og bag-ong panimalay diin sila makasimba nga gawasnon, lakip sa mga Pilgrim [relihiyusong tigbiyahe], kinsa mibiyahe gikan sa England ngadto sa Amerika sa sayong bahin sa mga 1600. Si propeta Nephi nakakita sa usa ka panan-awon nga daghan sa maong mga reformer sa katapusan mopuyo sa Amerika.
Pagtuon agi og Pagpangandam alang sa Klase
Basaha ang 1 Nephi 13:13–16, 19.
Ang mga kaliwat sa mga Pilgrim ug ubang mga imigrante kinsa nangita og dugang nga kagawasan mibulag gikan sa Great Britain, nga misangpot ngadto sa American Revolutionary War. Usa ka sundalo nga nakig-away habig sa Amerika ginganlan og Asael Smith. Si Asael, ang apohan nga habig sa amahan ni Propeta Joseph Smith, mahinumduman nga nakasulti sa usa ka okasyon, “Nakadawat ko og pag-aghat nga usa sa akong mga kaliwat mopasiugda sa buhat sa pag-usab sa kalibutan sa relihiyosong pagtuo” (Joseph Fielding Smith, Church History and Modern Revelation, 2 vols. [1953], 1:4). Si Asael nakasaksi sa pagkatukod sa usa ka bag-ong nasud, diin ang relihiyoso nga kagawasan mao ang importante.
Si Elder Robert D. Hales sa Korum sa Napulog Duha ka mga Apostoles mitudlo nga ang pagkatukod sa Estados Unidos sa Amerika usa ka lakang sa pag-andam sa kalibutan alang sa Pagpahiuli sa ebanghelyo:
Ang maong relihiyoso nga debosyon migiya sa mga magtutukod [founder] sa usa ka bag-ong nasud sa kayutaan sa Amerika. Ubos sa impluwensya sa Dios, nakaangkon sila og relihiyosong kagawasan alang sa matag lumulupyo uban sa dinasig nga Bill of Rights. Paglabay sa katorse ka tuig, niadtong Disyembrer 23, 1805, si Propeta Joseph Smith natawo. Ang pagpangandam hapit na mahuman alang sa Pagpahiuli.
… Ako mopamatuod nga si [Jesukristo] nangilabut sa buhat sa Pagpahiuli gikan pa sa pagkatukod niini nga kalibutan. (Robert D. Hales, “Mga Pagpangandam alang sa Pagpahiuli ug sa Ikaduhang Pag-anhi: ‘Ang Akong Kamot Anaa Ibabaw Kanimo,’” Liahona, Nob. 2005, 90, 92)
Si Presidente M. Russell Ballard mitudlo sa mosunod:
Si Joseph Smith Sr., ang amahan sa Propeta, naglisud sa panalapi. … [Siya] nagnegosyo nga may kasosyo. Ang kasosyo midala sa kwarta ug nawala kini. Mipalit sila og umahan nga naalkansi. Mipalit sila og lain, ug kana naalkansi; mipalit og lain, ug kana naalkansi. Sa katapusan si Joseph Smith Sr. mibalhin ngadto sa Palmyra. Ang Ginoo miimpluwensya nila, mibalhin sa pamilyang Smith ngadto sa dapit nga Siya nagkinahanglan kanila. (M. Russell Ballard, “The Tapestry of God’s Hand” [Joseph Smith Memorial Fireside, Peb. 13, 2011, Logan Institute of Religion, Utah State University])
Pinaagi sa balaanong plano si Joseph Smith natawo sa eksaktong panahon, sa eksaktong dapit, ug ubos sa eksaktong mga kahimtang aron mapasiugdahan ang mga kalihokan sa pagsugod sa Pagpahiuli. Si Presidente Brigham Young mipamatuod:
Si [Joseph Smith] gi-orden nang daan sa kahangturan sa pagdumala niining katapusang dispensasyon. (Mga Pagtulun-an sa mga Presidente sa Simbahan: Brigham Young [1997], 113)
Pamalandong agi og Pagpangandam alang sa Klase
Unsay atong makat-unan mahitungod sa Ginoo kon giunsa Niya pag-andam ang agianan alang ni Joseph Smith ug sa Pagpahiuli?