“Leksyon 9 Materyal sa Pagpangandam sa Klase: Jesukristo: Atong Balaan nga Manunubos,” Materyal sa Pagpangandam sa Klase alang sa Mga Pundasyon sa Pagpahiuli (2019)
“Leksyon 9 Materyal sa Pagpangandam sa Klase,” Materyal sa Pagpangandam sa Klase alang sa Mga Pundasyon sa Pagpahiuli
Leksyon 9 Materyal sa Pagpangandam sa Klase
Jesukristo: Atong Balaan nga Manunubos
Ang pipila ka mga tawo nakakita ni Jesukristo isip usa ka maayong ehemplo nga sundon, ang uban isip usa ka propeta sa karaan, ug ang uban isip Manluluwas sa kalibutan. Unsa ang labing komon nga mga gituohan ug mga kinaiya mahitungod sa Ginoo diin kamo magpuyo? Unsa ang inyong mga gituohan ug mga kombiksyon mahitungod Kaniya? Samtang inyong tun-an ang mga panan-awon, mga pagpadayag, ug kasulatan nga nadawat ni Propeta Joseph Smith mahitungod ni Jesukristo, ikonsiderar sa unsa nga paagi kini makapalawom sa inyong pagtuo ug pagpamatuod Kaniya isip inyong balaan nga Manunubos.
Seksyon 1
Sa unsa nga paagi nga si Joseph Smith ug ang Pagpahiuli importante sa akong panabut kabahin ni Ginoong Jesukristo?
Ang personal nga relasyon ni Joseph Smith sa Ginoo nagsugod sa batan-on pa si Joseph. Siya misulat nga sa edad nga mga 12, “Ang akong hunahuna nahasol, kay ako mibati nga nakasala. … Gibati nako nga magbangutan alang sa akong kaugalingong mga sala ug alang sa mga sala sa kalibutan.”
Unya, ang batan-ong si Joseph “misangpit sa Ginoo alang sa kalooy,” ug ang Ginoo namulong ngadto kaniya sa usa ka panan-awon, nag-ingon: “Joseph, akong anak, ang imong mga sala gipasaylo na. Lakaw, magalakaw kamo sa akong kabalaoran, ug pagabantayan ninyo ang akong mga sugo. Tan-awa, Ako mao ang Ginoong Dios sa himaya. Ako gilansang sa krus alang sa kalibutan, aron kadtong tanan nga motuo sa akong ngalan makaangkon og kinabuhing dayon.”
Pinaagi niini nga kasinatian sa Unang Panan-awon, si Joseph personal nga nakahibalo nga si Jesukristo ug ang Langitnong Amahan maloloy-on ug mapasayloon. Human makigsulti sa Ginoo ug napasaylo sa iyang mga sala, si Joseph mipamatuod: “Ang akong kalag napuno sa gugma, ug sulod sa daghang mga adlaw ako nagmaya uban sa tumang kalipay. Ang Ginoo nagauban kanako” (“Joseph Smith’s Accounts of the First Vision,” Circa Summer 1832 History, josephsmithpapers.org).
Paghunahuna og mga panahon sa inyong kinabuhi sa dihang kamo mibati og mga kabalaka susama sa kabalaka ni Joseph. Tingali masabtan ninyo ang iyang tinguha nga mapasaylo ug usab ang iyang kalipay sa pagkahibalo nga ang Ginoo nagauban kaniya.
Ang daghang panan-awon ni Joseph Smith bahin sa Manluluwas nakapahimo kaniya nga usa ka gamhanang saksi ni Jesukristo sa ulahing mga adlaw. Niadtong Pebrero 16, 1832, samtang nagtrabaho sa dinasig nga mga kausaban sa Biblia (nailhan nga Hubad ni Joseph Smith), si Joseph Smith ug Sidney Rigdon nakakita sa usa ka panan-awon diin sila “nakakita sa himaya sa Anak, sa tuong bahin sa Amahan.” Naghisgot ni Jesukristo, sila mipamatuod: “Siya buhi!” (Doktrina ug mga Pakigsaad 76:20, 22–23).
Tan-awa unsa ang ubang mga kamatuoran mahitungod ni Jesukristo ang gipakita ngadto sa Propeta niini nga panan-awon.
Pagtuon agi og Pagpangandam alang sa Klase
Basaha ang Doktrina ug mga Pakigsaad 76:23–24.
Human sa upat ka tuig, ang Propeta mipamatuod pag-usab nga nakakita sa Manluluwas diha sa Templo sa Kirtland ug mipahayag nga “ang iyang panagway mihayag labaw sa kahayag sa adlaw; ug ang iyang tingog ingon sa dahunog sa dagko nga mga katubigan” (Doktrina ug mga Pakigsaad 110:3).
Ang Ginoo mitudlo sa mga Santos nga kon sila magtuon sa mga pagpadayag nga gihatag pinaagi sa Espiritu, “kamo makapamatuod nga kamo nakadungog sa akong tingog, ug nahibalo sa akong mga pulong.” (Doktrina ug mga Pakigsaad 18:36).
Namalandong sa kontribusyon ni Joseph Smith sa atong nasabtan mahitungod ni Jesukristo, si Elder D. Todd Christofferson sa Korum sa Napulog Duha ka mga Apostoles mipahayag:
Pinaagi sa iyang personal nga pakig-uban sa Ginoo, sa iyang paghubad ug pagmantala sa Basahon ni Mormon, ug sa pagsilyo sa iyang pagpamatuod uban sa iyang martir nga dugo, si Joseph nahimong nag-unang tigpadayag ni Jesukristo sa Iyang tinuod nga kinaiya isip balaan nga Manunubos. (D. Todd Christofferson, “Natawo Pag-usab,” Liahona, Mayo 2008, 79)
Pamalandong agi og Pagpangandam alang sa Klase
Tungod sa mga panan-awon, mga pagpadayag, ug kasulatan nga gihatag ngadto ni Joseph Smith, mas nakasabut kita sa kinaiya sa Manluluwas.
-
Unsa nga kahibalo mahitungod sa Manluluwas ang mawala kon wala si Propeta Joseph Smith? Unsa ang epekto niini sa inyong kinabuhi kon wala kana nga kahibalo? (Ibutang sa hunahuna kini nga mga pangutana samtang kamo magpadayon sa pagtuon.)
Seksyon 2
Unsa nga gipahiuli nga mga kamatuoran mahitungod sa Pag-ula sa Manluluwas ang makapadugang sa akong pagtuo Kaniya?
Pahinumdom: Samtang magbasa kamo sa mosunod nga mga tudling sa kasulatan ug sa mapanagnaong mga pagtulun-an, ikonsiderar ang pagmarka sa mga kamatuoran kalabut sa Pag-ula sa Manluluwas nga importante kaninyo.
Daghang yano ug bililhong mga kamatuoran mahitungod sa ebanghelyo ug Pag-ula sa Manluluwas ang gipahiuli pinaagi sa paghubad ni Joseph Smith sa Basahon ni Mormon (tan-awa sa 1 Nephi 13:34, 40).
Pagtuon agi og Pagpangandam alang sa Klase
Basaha ang Alma 34:10, 12, nga mangita unsay gitudlo sa propeta sa Basahon ni Mormon nga si Amulek ngadto sa usa ka grupo sa mga Zoramite mahitungod sa maulaong sakripisyo sa Manluluwas.
Si Presidente Russell M. Nelson mipasabut unsay nakapahimo sa Pag-ula ni Jesukristo nga walay kinutuban:
Ang Iyang Pag-ula walay kinutuban—walay katapusan [tan-awa sa 2 Nephi 9:7; 25:16; Alma 34:10, 12, 14]. Kadto usab walay kinutuban diin ang tanang katawhan maluwas gikan sa walay katapusan nga kamatayon. Kadto walay kinutuban kon hisgutan ang hilabihan Niya nga pag-antus. Kadto walay kinutuban nga panahon, nga mitapos sa nag-una nga sundanan sa pagsakripisyo og hayop. Kadto mahangturon sa gidak-on—kinahanglan kining pagabuhaton makausa alang sa tanan [tan-awa sa Mga Hebreohanon 10:10]. Ug ang kalooy gumikan sa Pag-ula modangat dili lamang sa walay kinutubang gidaghanon sa katawhan, apan ngadto usab sa walay kinutubang gidaghanon sa mga kalibutan nga Iyang gilalang [tan-awa sa Doktrina ug mga Pakigsaad 76:24; Moises 1:33]. Kadto walay kinutuban sa bisan unsang tawhanong pangsukod o mortal nga panabut.
Si Jesus lamang ang makahalad sa ingon nianang walay kinutuban nga pag-ula, kay gipakatawo Siya sa mortal nga inahan ug imortal nga Amahan. Tungod nianang talagsaong katungod sa pagkatawo, si Jesus usa ka walay kinutuban nga Nilalang. (Russell M. Nelson, “The Atonement,” Ensign, Nob. 1996, 35)
Pagtuon agi og Pagpangandam alang sa Klase
Si propeta Alma mitudlo usab sa importante nga mga kamatuoran ngadto sa mga tawo sa Gideon mahitungod sa Pag-ula sa Manluluwas. Basaha ang Alma 7:11–13.
Human mokutlo sa Alma 7, si Elder David A. Bednar sa Korum sa Napulog Duha ka mga Apostoles mitudlo:
Walay pisikal nga sakit, walay espiritwal nga samad, walay kasakit sa kalag o kaguol, walay balatian o kaluya nga kamo o ako sukad nakahimamat niini nga mortalidad nga wala masinati og una sa Manluluwas. Diha sa higayon sa kahuyang mahimong mosinggit kita, “Walay nahibalo sama sa unsa kini. Walay makasabut.” Apan ang Anak sa Dios hingpit nga nakahibalo ug nakasabut, kay Iyang nabati ug napas-an ang atong indibidwal nga mga alantuson. Ug tungod sa Iyang walay katapusan ug mahangturong sakripisyo (tan-awa sa Alma 34:14), Siya adunay hingpit nga pagsabut ug makalugway ngari kanato sa Iyang bukton sa kalooy. Siya makakab-ot, makahikap, makaabag, makaayo, ug makalig-on kanato. (David A. Bednar, “Makadaug sa Ilang mga Alantuson uban sa Kasayon,” Liahona, Mayo 2014, 90)
Si Joseph Smith nakadawat og pagpadayag nga mikonektar sa dili matugkad nga pag-antus sa Ginoo ngadto sa bili sa mga kalag. Human si Oliver Cowdery ug David Whitmer gitawag nga mosangyaw og paghinulsol, ang Ginoo mitudlo kanila.
Pagtuon agi og Pagpangandam alang sa Klase
Basaha ang Doktrina ug mga Pakigsaad 18:10–11, 13.
Ang Ginoo midugang sa pagpasabut kabahin sa Iyang maulaong sakripisyo diha sa usa ka pagpadayag nga gihatag ngadto kang Martin Harris. Si Martin nakigbisog sa kalagmitan nga mawala ang iyang uma aron ibayad alang sa pagmantala sa Basahon ni Mormon. Diha sa pagpadayag, ang Ginoo misugo ni Martin sa paghinulsol ug dayon mipadayag sa talagsaong istorya sa Iya mismong pag-antus.
Pagtuon agi og Pagpangandam alang sa Klase
Basaha ang Doktrina ug mga Pakigsaad 19:16–19.
Samtang kamo mamalandong sa pag-antus nga gilahutay ni Jesukristo alang kaninyo, ikonsiderar ang pagbasa o pagpaminaw sa mga pulong sa himno “Ako Nagpabilin nga Natingala” (Mga Himno, no. 114).
Unsaon nako nga mas makaila ni Jesukristo?
Sa inyong journal o sa luna nga giandam, isulat ang pipila ka kamatuoran nga importante kaninyo gikan sa mga tudling ug mga pagtulun-an sa kasulatan niini nga seksyon ingon man usab sa bisan unsa nga ubang mga hunahuna ug mga pangutana ninyo mahitungod sa maulaong sakripisyo sa Manluluwas. Moabut sa klase nga andam nga mopakigbahin sa mga kamatuoran nga inyong nakita ug sa bisan unsa nga mga panabut.