Leksyon 11 Materyal sa Pagpangandam sa Klase

Ang Pagpundok sa Israel

Sa pagpakigsulti ngadto sa kabatan-onan sa Simbahan, si Presidente Russell M. Nelson nangutana: “Gusto ba ninyo nga mahimong dakong parte sa labing dako nga hagit, sa labing dako nga kawsa, ug sa labing dako nga buhat sa yuta karon? Gusto ba ninyo nga motabang sa pagpundok sa Israel niining bililhong ulahing mga adlaw?” (“Paglaum sa Israel” [tibuok kalibutan nga debosyonal sa kabatan-onan, Hunyo 3, 2018], ChurchofJesusChrist.org).

Samtang magtuon kamo niini nga leksyon, pangitaa ngano nga ang Ginoo mipundok sa Iyang katawhan gikan sa matag suok sa kalibutan, ug ikonsiderar unsaon ninyo sa pagtabang Kaniya nga matuman kining importante nga buhat.

Seksyon 1

Unsa ang pagpundok sa Israel?

Ang mga anak sa Israel mao ang kaliwat ni Propeta Jacob sa Daang Tugon, kansang ngalan giusab ngadto sa Israel. Sila ang tig-ambit sa samang pakigsaad nga gihatag sa Dios ngadto sa amahan ni Jacob nga si Isaac ug sa iyang apohan nga si Abraham (tan-awa sa Genesis 26:3–4, 24; Abraham 2:6–11). Ang 12 ka anak nga lalaki ni Jacob ug ang ilang mga kaliwat mao ang “balay sa Israel” o ang “napulog duha ka tribo sa Israel.” Dunay mga panahon nga “ang Ginoo mipatibulaag ug misakit sa napulog duha ka mga tribo sa Israel tungod sa ilang pagkadili matarung ug sa pagsukol. Bisan pa niana, ang Ginoo usab migamit niini nga pagpatibulaag sa Iyang pinili nga mga katawhan taliwala sa mga kanasuran sa kalibutan aron sa pagpanalangin niadto nga mga kanasuran” (Giya ngadto sa mga Kasulatan, “Israel,” scriptures.ChurchofJesusChrist.org).

Ikonsiderar ang pagmarka sa pipila sa mosunod nga mga panagna mahitungod sa pagpundok sa Israel.

Pagtuon agi og Pagpangandam alang sa Klase

Basaha ang Isaias 11:11–12 (tan-awa usab ang 2 Nephi 25:17; 29:1; Jacob 6:2).

Ang Basahon ni Mormon nagtudlo nga ang Manluluwas Mismo mopundok sa mga kaliwat ni Jacob.

Pagtuon agi og Pagpangandam alang sa Klase

Basaha ang 3 Nephi 5:24–26.

Sa atong dispensasyon, pipila sa unang mga miyembro sa Simbahan adunay dakong tinguha sa pagpanagna sa Basahon ni Mormon mahitungod sa pagpundok sa katawhan sa Dios sa katapusang mga adlaw sa pagtukod sa Zion agi og pagpangandam alang sa Ikaduhang Pag-anhi sa Manluluwas (tan-awa sa 3 Nephi 21:23–26). Mga adlaw sa wala pa ang komperensya sa Simbahan niadtong Septyembre 1830, si Joseph Smith ug ang uban nangutana sa Ginoo mahitungod niini nga panagna ug nakadawat sa pagpadayag nga narekord sa Doktrina ug mga Pakigsaad 29.

Pagtuon agi og Pagpangandam alang sa Klase

Basaha ang Doktrina ug mga Pakigsaad 29:1–2, 7.

Usa ka bulan human gihatag kini nga pagpadayag, si Oliver Cowdery ug laing tulo nagsugod sa misyonaryo nga panaw aron makatabang sa pagpundok sa pinili sa Ginoo.

Ang pinakadakong kalampusan sa mga misyonaryo miabut sa dihang mihunong sila sa dapit sa Kirtland, Ohio. Didto ilang gibunyagan ang mga130 ka mga kinabig, ang kinadak-an gikan sa kapunongan sa Reformed Baptist ni Sidney Rigdon, nga sa ingon nag-abli sa nahimo nga pundukanan nga dapit alang sa gatusan ka mga miyembro sa Simbahan sa mosunod nga mga tuig. (Mga Pagtulun-an sa mga Presidente sa Simbahan: Joseph Smith [2007], 176)

Human niining misyonaryo nga paningkamot, ang Ginoo nagpadayon sa pagtawag og mga misyonaryo ngadto sa buhat sa pagpundok niadtong kinsa maminaw sa Iyang tingog.

Pagtuon agi og Pagpangandam alang sa Klase

Basaha ang Doktrina ug mga Pakigsaad 33:5–7.

Sa katapusan sa Disyembre 1830, ang Ginoo mipadayag pinaagi ni Joseph Smith sa Iyang kabubut-on alang sa Simbahan kabahin sa pundukanan nga dapit sa Ohio:

“Usa ka sugo ako naghatag ngadto sa simbahan,” mideklarar Siya, “nga sila kinahanglan magpundok nga maghiusa sa Ohio.” Kinahanglang magpundok sila uban sa bag-ong mga kinabig sa dapit sa Kirtland ug maghulat sa pagbalik sa mga misyonaryo gikan sa Kasadpan. …

Ang tawag sa pagbalhin ngadto sa Ohio daw magpaduol sa mga Santos sa pagtuman sa karaang mga panagna mahitungod sa pagpundok sa katawhan sa Dios. Ang Biblia ug ang Basahon ni Mormon misaad nga pundukon sa Ginoo ang Iyang sinaaran nga katawhan aron sa pagpanalipod kanila batok sa mga kakuyaw sa katapusang mga adlaw. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 125)

Pinaagi niini ug sa ubang mga pagpadayag, ang mga Santos gisugo sa pagpundok pag-una ngadto sa Ohio ug sa Missouri, dayon ngadto sa Illinois, ug dayon ngadto sa Walog sa Salt Lake. Sa matag usa niini nga mga dapit nga pundukanan, ang Ginoo misugo sa mga Santos nga magtukod og templo.

Si Elder David A. Bednar sa Korum sa Napulog Duha ka mga Apostoles mitudlo:

Ang Ginoo nagpundok sa Iyang katawhan sa pagsimba, sa pagtukod sa Simbahan, alang sa panalipod, ug sa pagdawat og tambag ug pagtudlo. …

Si Propeta Joseph Smith mipadayag nga sa tanang panahon ang balaan nga katuyoan sa pagpundok mao ang pagtukod og mga templo aron ang mga anak sa Ginoo makadawat sa labing taas nga mga ordinansa ug pinaagi niana makabaton og kinabuhing dayon [tan-awa sa Mga Pagtulun-an sa mga Presidente sa Simbahan: Joseph Smith (2007), 499–510]. (David A. Bednar, “The Spirit and Purposes of Gathering” [Brigham Young University–Idaho devotional, Okt. 31, 2006], byui.edu)

Karon ang Ginoo pisikal nga mipundok sa Iyang katawhan ngadto sa mga stake sa Zion ug sa mga templo sa mga nasud sa tibuok yuta.

Iya usab silang gipundok sa espirituhanong paagi ngadto sa kahibalo sa Iyang ebanghelyo (tan-awa sa 1 Nephi 15:12–16).

Pamalandong agi og Pagpangandam alang sa Klase

Unsay atong makat-unan mahitungod sa Ginoo ug sa Iyang kinaiya pinaagi sa pagkatibulaag ug pagpundok sa Iyang sinaaran nga katawhan? Sa unsa nga paagi nga ang pagpundok uban sa mga miyembro sa Simbahan diha sa mga ward, mga stake, ug mga templo nakapanalangin sa inyong kinabuhi?

Seksyon 2

Unsaon nako pagtabang ang Ginoo sa pagpundok sa ulahing adlaw nga Israel?

Usa sa unang kinabig ngadto sa bag-ong gipahiuli nga Simbahan nga ginganlan og Heber C. Kimball sa wala madugay gitawag nga mahimong sakop sa Korum sa Napulog Duha ka mga Apostoles. Si Heber mibati og kakulba mahitungod sa iyang abilidad sa pagpakigbahin sa ebanghelyo ngadto sa uban. Nahinumdom siya:

“Unang mga adlaw kadto sa Hunyo 1837, si Propeta Joseph miduol kanako, samtang ako naglingkod sa … Templo, sa Kirtland, ug mihunghong siya kanako, miingon, ‘Brother Heber, ang Espiritu sa Ginoo mihunghong ngari kanako, “Himoa nga ang akong sulugoong si Heber moadto sa England ug mosangyaw sa akong ebanghelyo ug moabli sa pultahan sa kaluwasan niadto nga nasud.”’” Si Elder Kimball nahinangop sa paghunahuna sa ingon nga buluhaton: “Gibati nako sa akong kaugalingon nga ako ang pinakahuyang nga sulugoon sa Dios. Gipangutana nako si Joseph unsa ang akong isulti kon moabut ako didto; miingon siya kanako nga moduol sa Ginoo ug Siya mogiya kanako, ug mosulti kanako pinaagi niadtong sama nga espiritu nga [misugo] kaniya.” (Mga Pagtulun-an sa mga Presidente sa Simbahan: Joseph Smith [2007], 397)

Si Elder Kimball mirekord sa mosunod sa iyang journal:

Mibati sa akong kaugalingong kahuyang ug pagkadili angayan sa ingon nga buluhaton, nakaduso kini kanako nga hugtanong mag-ampo ngadto sa Ginoo alang sa kaalam ug nianang kahupayan ug suporta nga gikinahanglan kaayo nako. …

Naningkamot ko nga mosalig sa Dios, nagtuo nga motabang siya kanako sa pagmantala sa kamatuoran, mohatag kanako sa unsay akong isulti, ug nga mohatag siya og tabang sa panahon sa panginahanglan. (Journal of Heber C. Kimball, ed. R. B. Thompson [1840], 15)

Si Heber C. Kimball dayon nahinumdom:

Miadto ko ug mipahigayon sa misyon sumala sa mga pulong sa Propeta sa buhi nga Dios ug nawala og onse ka bulan ug duha ka adlaw sa Kirtland, … diin sa maong panahon adunay mga duha ka libo ka kalag ang nadugang sa simbahan ug gingharian sa Dios. (Heber C. Kimball, “Sermon,” Deseret News, Dis. 2, 1857, 3)

Si Presidente Dallin H. Oaks sa Unang Kapangulohan mitudlo usab nga kita makasalig sa Ginoo samtang kita nagtabang sa pagpundok sa Israel pinaagi sa pagpakigbahin sa Iyang ebenghelyo:

Kita kinahanglan gayud nga mag-ampo alang sa panabang ug mga direksyon sa Ginoo aron kita mahimong mga instrumento diha sa Iyang mga kamot alang sa usa ka tawo kinsa andam na karon—usa ka tawo nga gusto Niya nga atong tabangan karon. Niana, kinahanglan gayud nga kita magmabinantayon sa pagpaminaw ug sa pagtagad sa mga pag-aghat sa Iyang Espiritu kon unsaon nato sa pagpadayon.

Kadto nga mga pag-aghat moabut. Nahibalo kita gikan sa dili maihap nga personal nga mga pagpamatuod nga sa Iyang kaugalingon nga paagi ug sa Iyang kaugalingon nga panahon ang Ginoo nag-andam og mga tawo nga modawat sa Iyang ebanghelyo. Ang maong mga tawo nagsiksik, ug kon kita maningkamot sa pag-ila kanila ang Ginoo motubag sa ilang mga pag-ampo pinaagi sa pagtubag sa atoa. Siya moaghat ug mogiya niadtong kinsa nagtinguha ug kinsa sa sinsero nga paagi naninguha og paggiya kon unsaon, asa, kanus-a, ug kang kinsa makigbahin sa Iyang ebanghelyo. (Dallin H. Oaks, “Sharing the Gospel,” Ensign, Nob. 2001, 8)

Si Presidente Nelson dugang nga mitudlo:

Karon, ang pag-apil sa pagpundok sa Israel magkinahanglan og sakripisyo diha sa inyong bahin. Gani magkinahanglan kini og pipila ka mga kausaban sa inyong kinabuhi. Siguradong magkinahanglan kini sa inyong panahon ug kusog ug sa inyong mga talento nga hinatag sa Dios. Interesado ba kamo? …

… Ang pagpundok sa Israel nagpasabut sa pagtanyag sa ebanghelyo ni Jesukristo ngadto sa mga anak sa Dios sa matag habig sa tabil kinsa wala makahimo og importanting mga pakigsaad sa Dios ug wala makadawat sa ilang importanting mga ordinansa. …

… Gipadala kamo sa yuta niining tukma nga panahon, ang labing importanting panahon sa kasaysayan sa kalibutan, aron motabang sa pagpundok sa Israel. Walay laing panghitabo dinhi sa kalibutan karon nga mas importante kay sa niana. Walay lain nga dunay mas dakong sangputanan. Walay lain gayud.

… Kini mao ang misyon diin gipadala kamo dinhi sa yuta. (Russell M. Nelson, “Paglaum sa Israel,” 8)

Buhata Unsay Inyong Nakat-unan

Unsay inyong mahimo sa umaabut nga mga adlaw ug mga semana aron mohimo og mas aktibo nga bahin sa pagpundok sa Israel?

Gusto pa ba Mo og Dugang? (Opsyonal)

Unsaon nako pagpagpakigbahin sa ebanghelyo ngadto sa uban nga mobati nga mas natural?

(Tan-awa ang iyang Oktubre 2016 nga pakigpulong sa kinatibuk-ang komperensya “Pagpakigbahin sa Gipahiuli nga Ebanghelyo” [Liahona, Nob. 2016, 57–60].)

Si Elder Dieter F. Uchtdorf mihatag og mga ideya unsaon nga kita mas makaandam sa pagpakigbahin sa ebanghelyo sa natural nga mga paagi diha sa iyang pakigpulong “Misyonaryo nga Buhat: Pagpakigbahin sa Unsay Anaa sa Inyong Kasingkasing” (Liahona, Mayo 2019, 15–18).

Sa iyang pakigpulong nga “Ang Partisipasyon sa mga Sister sa Pagpundok sa Israel” (Liahona, Nob. 2018, 68–70), si Presidente Nelson mihingalan sa espirituhanong mga gasa nga magamit sa mga babaye sa Simbahan sa pagtabang sa pagpundok sa Israel.