“Leksyon 4 Materyal sa Pagpangandam sa Klase: Ang Doktrina sa Pagpadayag,” Materyal sa Pagpangandam sa Klase alang sa Mga Pundasyon sa Pagpahiuli (2019)
“Leksyon 4 Materyal sa Pagpangandam sa Klase,” Materyal sa Pagpangandam sa Klase alang sa Mga Pundasyon sa Pagpahiuli
Leksyon 4 Materyal sa Pagpangandam sa Klase
Ang Doktrina sa Pagpadayag
Pamalandunga ang mosunod nga mapanagnaon nga pagdapit ni Presidente Russell M. Nelson: “Sa umaabut nga mga adlaw, dili na posible ang espirituhanong pagsugakod kon wala ang giya, direksyon, makahupay, ug kanunay nga impluwensya sa Espiritu Santo. … Mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).
Samtang magtuon kamo niini nga materyal, pangitaa ang mga kamatuoran nga makatabang ninyo nga molambo ang inyong espirituhanong kapasidad sa pagdawat ug pag-ila sa pagpadayag.
Seksyon 1
Unsaon nako sa pag-ila kon ang Dios nakigsulti kanako?
Sa tingtugnaw niadtong 1828–29, usa ka 22 anyos nga magtutudlo nga ginganlan og Oliver Cowdery nakahibalo mahitungod ni Propeta Joseph Smith ug sa bulawan nga mga palid samtang nag-abang kauban sa mga ginikanan ni Joseph didto sa Palmyra, New York. Human mag-ampo sa pribado aron makahibalo kon tinuod ba ang iyang nadungog, si Oliver mibati og makakombinser nga kasiguroan sa kalinaw. Siya mibiyahe ngadto sa Harmony, Pennsylvania, diin iyang nahimamat ang Propeta. Nakombinser nga ang mensahe nga gipakigbahin ni Joseph mahitungod sa gipahiuli nga ebanghelyo tinuod, si Oliver miserbisyo isip tigsulat [eskriba] sa paghubad sa Basahon ni Mormon. Sa wala madugay human si Oliver nakasugod sa pagtabang sa paghubad, ang Propeta nakadawat og mga pagpadayag nga naghatag og instruksyon ngadto ni Oliver ug mitubag sa iyang tinguha nga motabang sa paghubad. Ang mga pulong gikan sa Ginoo ngadto ni Oliver nga anaa sa Doktrina ug mga Pakigsaad 6:14–15, 22–23 makatabang nato nga mas makasabut sa mga pamaagi nga Siya makigsulti kanato.
Pagtuon agi og Pagpangandam alang sa Klase
Basaha ang Doktrina ug mga Pakigsaad 6:14–15, 22–23.
Sa dihang si Joseph nakadawat niini nga pagpadayag, “Si Oliver natingala. Gisultihan dayon niya si Joseph mahitungod sa iyang [bag-o lang] nga pag-ampo ug sa balaan nga saksi nga iyang nadawat. Walay usa nga mahibalo niini gawas sa Dios” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 69).
Sa dihang si Oliver nagtinguha sa paghubad sa mga porsyon sa mga palid, ang Ginoo mitudlo kaniya og dugang mahitungod sa pagdawat og pagpadayag.
Pagtuon agi og Pagpangandam alang sa Klase
Basaha ang Doktrina ug mga Pakigsaad 8:2–4. Ikonsiderar ang pagmarka niini nga mga bersikulo diha sa imong mga kasulatan.
Sa paghisgot kon sa unsa nga paagi ang Ginoo makigsulti sa atong mga hunahuna ug mga kasingkasing pinaagi sa gahum sa Espiritu Santo, si Elder Richard G. Scott sa Korum sa Napulog Duha ka mga Apostoles mipasabut sa usa ka paagi nga kini mahitabo:
Ang komunikasyon ngadto sa kasingkasing usa ka kasagaran nga impresyon. Ang Ginoo sa kasagaran magsugod pinaagi sa paghatag og mga impresyon. Kon nahibaloan ang kaimportante niini ug kini gisunod, ang tawo makaangkon og dugang nga kapasidad sa pagdawat pa og detalyado nga instruksyon ngadto sa hunahuna. (Richard G. Scott, “Helping Others to Be Spiritually Led” [pakigpulong ngadto sa CES religious educators, Ago. 11, 1998, 4], ChurchofJesusChrist.org)
Si Elder Craig C. Christensen sa Seventy mitudlo usab:
Tanan kita may mga kasinatian sa Espiritu Santo, bisan dili nato kanunay kining mamatikdan. Samtang ang dinasig nga mga hunahuna moabut, nasayud ta nga tinuod kini pinaagi sa espirituhanong pagbati sa atong kasingkasing. (Craig C. Christensen, “Dili Mahulagway nga Gasa gikan sa Dios,” Liahona, Nob. 2012, 14)
Usahay maghunahuna kamo kon ang hunahuna o pagbati gikan ba gayud kaha sa Dios.
Seksyon 2
Unsay akong mahimo sa pagdapit sa espiritu sa pagpadayag sa akong kinabuhi?
Usahay, kamo mobati og kasagmuyo kon kana nga pagpadayag nga inyong gitinguha dili moabut. Kon kini mahitabo, mahimo ninyong ikonsiderar ang instruksyon sa Ginoo ngadto ni Oliver Cowdery sa dihang mibati siya og kasagmuyo dihang wala siya makadawat og pagpadayag nga gikinahanglan sa paghubad sa mga palid (tan-awa sa Mga Santos, 1:69–71).
Pagtuon agi og Pagpangandam alang sa Klase
Basaha giunsa sa pagtudlo sa Ginoo ni Oliver sumala sa narekord sa Doktrina ug mga Pakigsaad 9:7–8.
Si Presidente Dallin H. Oaks sa Unang Kapangulohan mipasabut og usa ka baruganan nga atong makat-unan gikan sa mga pagtulun-an sa Ginoo ngadto ni Oliver Cowdery:
Kita dasigon sa Espiritu kon atong buhaton ang tanan natong mahimo, kon kita nagkugi og maayo kaysa maglingkod lang nga nag-ampo og direksyon para sa unang lakang nga buhaton. Ang pagpadayag moabut kon ang mga anak sa Dios naglihok. …
Mao nga atong buhaton ang tanan natong mahimo. Dayon magpaabut kita sa pagpadayag sa Ginoo. Siya adunay iyang kaugalingong panahon.
… Kinahalanglan ta nga molihok aron matudloan sa Espiritu. Kanunay ang komunikasyon sa Ginoo dili moabut kon wala nato tun-i kining butanga sa atong mga hunahuna. Dayon kita makadawat og kumpirmasyon. (Dallin H. Oaks, “Sa Iyang Kaugalingong Panahon, sa Iyang Kaugalingong Paagi,” Liahona, Ago. 2013, 26, 28)
Bisan kon kamo nakaandam sa inyong kaugalingon sa pagdawat sa pagpadayag pinaagi sa inyong katakus ug matinud-anong mga aksyon, ang mga tubag sa Ginoo dili dayon moabut.
Si Elder Scott mitambag:
Unsay inyong buhaton kon kamo nangandam og maayo, tinud-anay nga nag-ampo, naghulat og dugay alang sa tubag, ug gihapon walay gibati nga tubag? Mahimo kamong magpasalamat kon mahitabo man kana, kay timailhan kana sa Iyang pagsalig. Kon kamo nagpuyo nga takus ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat, mopadayon uban sa pagsalig. … Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nakahimo kamo og sayop nga desisyon. (Richard G. Scott, “Ang Paggamit sa Langitnon nga Gasa sa Pag-ampo,” Liahona, Mayo 2007, 10)
Pamalandong ug Hisguti agi og Pagpangandam alang sa Klase
Ngano kaha nga ang Ginoo nagdahom kaninyo nga magtuon sa mga butang diha sa inyong hunahuna isip kabahin sa pagtinguha og pagpadayag?
Kon posible, hangyoa ang usa ka higala o sakop sa pamilya sa pagpakigbahin kaninyo unsay iyang nahimo sa pagdapit og pagpadayag. Mahimo ninyong pangutan-on ang tawo kon sa unsa nga paagi ang pagpadayag miabut ngadto kaniya kaniadto sa paghimo og dagkong mga desisyon. Moadto sa klase nga andam nga mopakigbahin og pipila sa inyong nakat-unan.
Seksyon 3
Sa unsa nga paagi moabut sa kasagaran ang pagpadayag?
Tun-i ang pamahayag ni Elder Bednar sa ubos:
Ang pipila ka mga pagpadayag madawat diha-diha dayon ug kusog kaayo; ang pipila mailhan sa inanay ug sa kalumo. …
Ang pagpasiga sa suga sa ngitngit nga kwarto susama sa dinalian nga pagdawat og mensahe gikan sa Dios, sa hingpit, ug sa hinanali. Ang kadaghanan kanato nakasinati niini nga sundanan sa pagpadayag dihang gitubag ang atong sinsero nga mga pag-ampo o gihatagan og mga direksyon o proteksyon, sumala sa kabubut-on ug panahon sa Dios. … Bisan pa niana, kini nga sundanan sa pagpadayag maingon og dili na kaayo sagad kay sa nailhan.
Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Labing kasagaran, ang pagpadayag motubo nga hinay-hinay sa pagdagan sa panahon ug ihatag sumala sa atong tinguha, katakus, ug pagpangandam. … Kini nga sumbanan sa pagpadayag nahilig nga mahimong mas sagad kay sa panagsa ra. …
Lain nga kasagarang kasinatian sa kahayag nga nagtabang kanato sa pagkat-on og dugang nga kamatuoran mahitungod sa “pagtulun-an human sa usa ka pagtulun-an, lagda human sa usa ka lagda” nga sundanan sa pagpadayag. Usahay ang adlaw mosubang sa kabuntagon nga dag-umon o gabunon. Tungod sa kisdum nga mga kondisyon, ang pagkakita sa kahayag mas lisud, ug ang pag-ila sa eksakto nga higayon kon kanus-a mosaka ang adlaw sa kapunawpunawan dili mahimo. Apan sa mao nga kabuntagon kita sa gihapon adunay igo nga kahayag sa pag-ila og bag-ong adlaw ug sa pagbuhat sa atong mga kalihokan.
Sa sama nga paagi, kita sa makadaghan nga panahon nakadawat og pagpadayag nga wala makaila sa eksakto kon giunsa o kanus-a kita nakadawat og pagpadayag. (David A. Bednar, “Ang Espiritu sa Pagpadayag,” Liahona, Mayo 2011, 88–89)
Pamalandong ug Irekord ang Inyong mga Hunahuna agi og Pagpangandam alang sa Klase
Hunahunaa ang mga panahon sa dihang kamo nakadawat og giya ug pagpadayag. Ikonsiderar unsay inyong nakat-unan gikan sa inyong kaugalingong kasinatian nga nagdawat og pagpadayag ingon man gikan sa inyong personal nga pagtuon karon. Dayon paggahin og pipila ka minuto sa pagsulat sa journal o sa luna nga gihatag kon sa unsa nga paagi nga kini nga mga baruganan makaimpluwenysa sa inyong pagpangita og mga tubag sa inyong mga pangutana karon.