Leksyon 21 Materyal sa Pagpangandam sa Klase

Ang Doktrina sa Mahangturong Kaminyoon ug sa Pamilya

Si Presidente Dallin H. Oaks mitudlo, “Ang katuyoan sa mortal nga kinabuhi ug ang misyon sa Ang Simbahan ni Jesukristo sa mga Santos sa Ulahing mga Adlaw mao ang pag-andam sa mga anak sa Dios alang sa ilang mahangturong kapalaran—nga mahimong sama sa atong langitnong mga ginikanan” (“Same-Gender Attraction,” Ensign, Okt. 1995, 7). Samtang ikaw magtuon sa doktrina sa mahangturong kaminyoon ug sa pamilya, pangitaa ang mga baruganan nga makatabang kanimo nga makasabut kon sa unsa nga paagi nga ang kaminyoon ug ang pamilya makaandam nato nga mahimong mas mahisama sa atong Langitnong mga Ginikanan.

Seksyon 1

Unsa ang mga katuyoan sa kaminyoon sa mahangturong plano sa Dios?

Niadtong 1831 ang usa ka bag-ong nabunyagan nga miyembro sa Simbahan nga ginganlan og Leman Copley mibisita ni Propeta Joseph Smith. Si Leman kanhi miyembro sa mga Shakers, usa ka relihiyoso nga sekta nga nagsalikway sa kaminyoon ug nagtuo nga ang hingpit nga selibasiya (paglikay gikan sa sekswal nga mga relasyon) mao ang labing taas nga matang sa Kristiyano nga debosyon. Human sa pagbisita ni Leman, si Propeta Joseph Smith nangutana sa Ginoo mahitungod sa mga pagtulun-an sa mga Shakers ug nakadawat og pagpadayag nga karon narekord diha sa Doktrina ug mga Pakigsaad 49. (Tingali makatabang ang pagbasa sa pasiuna alang niana nga seksyon.) Ikonsiderar ang pagmarka sa mga pulong sa mosunod nga tudling sa kasulatan nga nagtudlo sa doktrina sa Ginoo sa kaminyoon.

Pagtuon agi og Pagpangandam alang sa Klase

Basaha ang Doktrina ug mga Pakigsaad 49:15–17 (tan-awa usab sa Jacob 2:27–30).

Si Elder David A. Bednar sa Korum sa Napulog Duha ka mga Apostoles mipasabut ngano nga ang kaminyoon giorden sa Dios. Ikonsiderar ang pagmarka unsa ang importante kanimo gikan niini nga pamahayag.

Duha ka makaagning doktrinal nga mga rason ang makatabang kanato sa pagsabut ngano nga ang mahangturong kaminyoon importante sa plano sa Amahan.

Rason 1: Ang mga kinaiyahan sa mga espiritu sa lalaki ug babaye nagkompleto ug naghingpit sa usag usa, ug busa ang mga lalaki ug mga babaye tuyo nga magtambayayong sa pag-uswag ngadto sa kahimayaan. …

… Ang talagsaong kombinasyon sa espirituhanon, pisikal, mental, ug emosyonal nga mga kapasidad sa mga lalaki ug mga babaye gikinahanglan alang sa pagpatuman sa plano sa kalipay. Kon mag-inusara, ang babaye o lalaki dili makatuman sa mga katuyoan sa iyang pagkalalang. …

Rason 2:Pinaagi sa balaan nga plano, ang lalaki ug babaye gikinahanglan alang sa pagdala og mga anak nganhi sa mortalidad ug sa paghatag sa pinakamaayo nga kahimtang sa pagpadako ug pag-amuma sa mga anak.

Ang sugo nga gihatag kaniadto ngadto ni Adan ug Eva sa pagpasanay ug pagpuno sa yuta nagpabilin nga gipatuman karon. … Mao nga, ang kaminyoon tali sa lalaki ug babaye maoy gitugot nga agianan diin ang mga espiritu sa kalibutan nga wala pa dinhi sa yuta mosulod sa pagkamortal. …

Usa ka panimalay nga adunay mahigugmaon ug maunungon nga bana ug may asawa nga magpahiluna sa talagsaong paagi diin ang mga bata maamumahan sa gugma ug pagkamatarung ug diin ang espirituhanon ug pisikal nga panginahanglan makab-ot. Sama nga ang talagsaong kinaiya sa mga lalaki ug mga babaye makatampo sa paghingpit sa relasyon sa kaminyoon, mao gihapon kana nga mga kinaiya ang gikinahanglan kaayo sa pag-amuma, pagmatuto, ug pagtudlo sa mga anak. (David A. Bednar, “Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 51–52)

Pamalandong agi og Pagpangandam alang sa Klase

Unsaon nimo sa pagpasabut ngano nga ang kaminyoon tali sa usa ka lalaki ug babaye importante sa plano sa Langitnong Amahan?

Seksyon 2

Unsa ang pipila ka panalangin sa mahangturong kaminyoon?

Sa Nauvoo, si Joseph Smith nagsugod sa pagtudlo ngadto sa daghan sa doktrina sa mahangturong kaminyoon. Kini usa ka bag-o ug talagsaong doktrina ngadto sa mga Santos. Kadaghanan nila nagtuo nga ang kaminyoon matapos sa kamatayon.

Usa ka hulagway nila ni Joseph ug Emma Smith, nga nabugkos sa usag usa alang sa kahangturan niadtong Mayo 1843.

Si Elder Parley P. Pratt sa Korum sa Napulog Duha ka mga Apostoles mihulagway unsay iyang gibati sa dihang gitudloan siya sa Propeta mahitungod sa posibilidad sa mahangturong kaminyoon.

Gikan ni [Joseph Smith] akong nakat-unan nga ang akong pinalangga nga asawa akong ikauban alang sa karon ug sa kahangturan. … Gikan kaniya akong nakat-unan nga kita makaugmad niini nga mga pagbati, ug mosanay ug molambo sa gihapon hangtud sa kahangturan; samtang ang resulta sa atong walay katapusang panaghiusa mao ang mga anak nga sama sa gidaghanon sa mga bitoon sa langit, o sa mga balas sa baybayon sa dagat. …

Nahigugma ako kaniadto, apan wala ko masayud kon ngano. Apan karon ako nahigugma—uban sa kaputli—kalig-on sa nabayaw, nahimaya nga pagbati. (Autobiography of Parley P. Pratt, ed. Parley P. Pratt Jr. [2007], 260)

Niadtong 1843 ang Propeta midiktar sa pagpadayag nga karon narekord sa Doktrina ug mga Pakigsaad 132, nga naglakip sa doktrina sa mahangturong kaminyoon.

Pagtuon agi og Pagpangandam alang sa Klase

Basaha ang Doktrina ug mga Pakigsaad 132:19–20.

Si Presidente Russell M. Nelson mipasabut:

Aron mahimong takus alang sa kinabuhing dayon, kinahanglan gayud kitang mohimo og usa ka mahangturon ug walay katapusan nga pakigsaad uban sa atong Langitnong Amahan [tan-awa sa D&P 132:19]. Kini nagpasabut nga ang kaminyoon sa templo dili lamang tali sa bana ug asawa; naglakip kini sa pagpakig-alayon sa Dios [tan-awa sa Mateo 19:6]. …

… Kon ang usa ka pamilya nabugkos diha sa templo, kana nga pamilya mahimo nga ingon ka mahangturon sama mismo sa gingharian sa Dios [tan-awa sa Doktrina ug mga Pakigsaad 132:19–20]. (Russell M. Nelson, “Celestial nga Kaminyoon,” Liahona, Nob. 2008, 92–93)

Ang mga panalangin sa mahangturong kaminyoon dili lamang alang sa sunod nga kinabuhi. Kadtong kinsa naningkamot nga makatuman sa ilang mga pakigsaad sa matinud-anong paagi makatagamtam sa mga panalangin sa mahangturong kaminyoon niini usab nga kinabuhi . Si Presidente Thomas S. Monson mitudlo:

Kon kamo maalamon nga mopili ug kon kamo mapasaligon sa kalampusan sa inyong kaminyoon, wala nay lain pa niining kinabuhia nga makahatag kaninyo og mas dakong kalipay. (“Gahum sa Pagkapari,” o Liahona, Mayo 2011, 67)

Pipila ka mga miyembro sa Simbahan adunay mga pangutana mahitungod sa mga kahimtang nga naghimo sa mga indibidwal nga wala makasinati karon sa mga panalangin sa mahangturong kaminyoon ug pamilya. Si Elder D. Todd Christofferson sa Korum sa Napulog Duha ka mga Apostoles namulong niini nga butang:

Sa pagpahayag sa sukaranang mga kamatuoran kalabut sa kaminyoon ug pamilya mao ang dili pagbaliwala o pagpaubos sa sakripisyo ug kalampusan niadtong kansang ideyal [labing nindot] dili maoy kasamtangang kamatuoran [makita]. Ang uban ninyo nahikawan sa panalangin sa kaminyoon sa mga rason nga naglakip sa kakulang sa takus nga kaminyuan, pagkaibug sa sama nga sekso, pisikal o mental nga kakulangan, o kahadlok nga mapakyas nga, sa pagkakaron, nakababag sa pagtuo. O tingali naminyo mo, apan kana nga kaminyoon natapos, ug nagpabilin kamong nag-inusara sa unsay lisud ipatunhay sa duha. Ang uban ninyo nga naminyo dili makaanak bisan pa sa dakong tinguha ug sa mga pangamuyo sa pag-ampo.

… Uban sa pagsalig kami mopamatuod nga ang Pag-ula ni Jesukristo nagpaabut ug, sa katapusan, mobayad sa tanang paghikaw ug nawala alang niadtong modangup ngadto Kaniya. Walay usa nga gitakda nang daan nga makadawat og minus pa kay sa tanan nga aduna ang Amahan alang sa Iyang mga anak. (D. Todd Christofferson, “Nganong Kaminyoon, Nganong Pamilya,” Liahona, Mayo 2015, 52)

Paghisgot agi og Pagpangandam alang sa Klase

Ang tanang kaminyoon, ilabi na ang mahangturon, nagkinahanglan og paningkamot ug pasalig gikan sa matag kapikas. Pakigsulti ngadto sa minyo nga magtiayon kinsa adunay lig-on ug mahigugmaon nga kaminyoon, ug pangutan-a sila unsay ilang gibuhat sa paglig-on niini. Pangutan-a usab sila sa unsa nga paagi nga ang ilang kaminyoon nakapabuhong sa ilang kinabuhi isip resulta. Pangandam sa pagpakigbahin unsay imong nakat-unan diha sa klase.

Seksyon 3

Nganong panalipdan man nako ang doktrina sa Ginoo sa kaminyoon ug pamilya?

Samtang ang Pagpahiuli nagpadayon sa pagkahitabo, ang Ginoo midasig sa Iyang mga propeta sa pagpasabut sa doktrina sa kaminyoon ug pamilya. Niadtong Septyembre 1995, sa usa ka kinatibuk-ang miting sa Relief Society, si Presidente Gordon B. Hinckley mibasa sa “Ang Pamilya: Usa ka Pamahayag ngadto sa Kalibutan.” Ang panapos niana nga pamahayag nagtudlo ngano nga kita kinahanglang manalipod sa doktrina sa Ginoo sa kaminyoon ug pamilya.

Kami mopahimangno nga ang pagkabungkag sa pamilya makadala sa tagsa-tagsa, sa mga komunidad, ug sa nasud sa mga katalagman nga gipanagna sa karaan ug sa bag-o nga mga propeta.

Kami nagtawag sa may kapangakohan nga mga lumulupyo ug mga opisyal sa gobyerno bisan asa sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya isip sukaranan nga yunit sa katilingban. (“Ang Pamilya: Usa ka Pamahayag ngadto sa Kalibutan,” ChurchofJesusChrist.org)

Si Sister Julie B. Beck, kanhi Kinatibuk-ang Presidente sa Relief Society, mipasabut sa panginahanglan sa pagtuon sa doktrina sa pamilya nga makita sa “Ang Pamilya: Usa ka Pamahayag ngadto sa Kalibutan.”

Kini nga henerasyon pagatawagon aron sa pagpanalipod sa doktrina kabahin sa pamilya nga wala pa gayud mahitabo sukad. Kon sila wala masayud niini, sila dili makapanalipod niini. …

Si Presidente [Spencer W.] Kimball miingon:

“Daghang sosyal nga mga pagpugong sa nangagi nakatabang sa pagpalig-on ug pagsuporta sa pamilya nga nag-anam og kawala. Moabut ang panahon nga kadto lang hugot nga mituo ug aktibo sa pamilya ang makapreserbar sa ilang mga pamilya gikan sa dautan nga nag-alirong kanato” [Spencer W. Kimball, “Families Can Be Eternal,” Ensign, Nob. 1980, 4]. (Julie B. Beck, “Pagtudlo sa Doktrina kabahin sa Pamilya,” Liahona, Mar. 2011, 78)

Si Sister Bonnie L. Oscarson, kanhi kinatibuk-ang Presidente sa Young Women, mitudlo:

Kinahanglang dili kita mahadlok nga mopanalipod sa gipadayag sa Ginoo nga mga doktrina nga naghulagway sa kaminyoon, mga pamilya, sa balaang tahas sa kalalakin-an ug kababayen-an, ug sa importansya sa mga panimalay isip sagradong mga dapit—bisan kon ang kalibutan nagsinggit diha sa atong mga dunggan nga kini nga mga baruganan kinaraan, nagpugong, ug dili na angay. Ang tanan, sa walay pagsapayan sa ilang sitwasyon sa kaminyoon o gidaghanon sa mga anak, makapanalipod sa plano sa Ginoo nga gihulagway diha sa pamahayag bahin sa pamilya. Kon kini plano sa Ginoo, kinahanglan nga ato usab kini nga plano! …

… Magmahimo kitang tigpanalipod sa kaminyoon ingon nga gi-orden kini sa Ginoo samtang magpadayon sa pagpakita og gugma ug kalooy alang niadtong may lahi nga mga ideya. (Bonnie L. Oscarson, “Mga Tigpanalipod sa Pamahayag Bahin sa Pamilya,” Liahona, Mayo 2015, 15)

Irekord ang Inyong mga Hunahuna

Sa imong journal o sa luna nga gihatag, isulat ang imong mga hunahuna mahitungod kon sa unsa nga paagi ang usa ka young adult mamahimong tigpanalipod sa kaminyoon ug pamilya. Nakapanalipod na ba ikaw sa doktrina sa kaminyoon? Unsa ang imong kasinatian niini?

Gusto pa ba Mo og Dugang? (Opsyonal)

Unsa ang gitudlo sa mga propeta mahitungod sa kaminyoon ug pamilya?

Pangita og bag-ong tambag gikan sa mga lider sa Simbahan bahin sa kaminyoon ug pamilya:

Ang Unang Kapangulohan ug ang Konseho sa Napulog Duha ka mga Apostoles, “Ang Pamilya: Usa ka Pamahayag ngadto sa Kalibutan,” ChurchofJesusChrist.org

D. Todd Christofferson, “Nganong Kaminyoon, Nganong Pamilya,” Liahona, Mayo 2015, 50–53

Unsa ang pipila sa mga benepisyo sa kaminyoon?

Sa video nga “Renaissance of Marriage,” si Presidente Henry B. Eyring naghisgot sa daghang mga panalangin nga ikahatag sa kaminyoon sa atong kinabuhi.