“Leksyon 22 Materyal sa Pagpangandam sa Klase: Dinaghan nga Kaminyoon,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 22 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 22 Materyal sa Pagpangandam sa Klase
Dinaghan nga Kaminyoon
Ang Ginoo mitudlo ni Abraham nga usa sa mga katuyoan sa pagka-mortal mao ang “pagsulay” sa mga anak sa Dios “sa pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Ang pipila ka mga sugo sa Dios ingon og lisud kaayo, ilabi na kon kini batok sa naandan sa kultura o sa atong kaugalingong mga panglantaw. Samtang kamo magtuon, pamalandungi unsay inyong makat-unan gikan sa dili ordinaryong pagtuo ug pagkamasulundon ni Propeta Joseph Smith ug sa unang mga Santos ngadto sa sugo sa Ginoo sa pagbuhat sa dinaghan nga kaminyoon.
Seksyon 1
Ngano nga si Propeta Joseph Smith ug daghan sa unang mga Santos nagbuhat sa dinaghan nga kaminyoon?
Sayo sa tuig 1831, sa dihang si Joseph Smith nagtrabaho sa iyang dinasig nga hubad sa Daang Tugon, nag-ampo siya aron makasabut ngano ang pipila ka karaang mga propeta ug ang Israelite nga mga hari nagbuhat sa dinaghan nga kaminyoon (tan-awa sa ulohan sa seksyon ug sa bersikulo 1 sa Doktrina ug mga Pakigsaad 132). Ang Ginoo mihatag og pagpadayag ngadto sa propeta.
Pagtuon agi og Pagpangandam alang sa Klase
Basaha ang Doktrina ug mga Pakigsaad 132:34–37.
Sa bersikulo 37, ang pulong puyo-puyo nagpasabut sa usa ka babaye kinsa, sa mga panahon sa Daang Tugon, legal nga naminyo ngadto sa usa ka lalaki apan adunay ubos nga sosyal nga kahimtang kay sa usa ka asawa. Ang mga puyo-puyo dili kabahin sa buhat sa dinaghan nga kaminyoon sa atong dispensasyon.
Sa wala madugay human gipadayag sa Ginoo ang baruganan sa dinaghan nga kaminyoon ngadto ni Joseph Smith, Siya misugo sa Propeta sa pagsunod niini nga baruganan ug sa pagtudlo niini ngadto sa uban. Samtang wala kita makasabut sa tanang mga katuyoan sa Dios sa pagsugod sa dinaghan nga kaminyoon sa unang mga adlaw sa Simbahan, ang pagsugod niini kabahin sa ulahing adlaw nga pagpahiuli sa “tanan nga mga butang” (Doktrina ug mga Pakigsaad 132:40, 45; tan-awa usab sa Mga Buhat 3:19–21).
Seksyon 2
Unsay atong nahibaloan mahitungod sa kasinatian ni Propeta Joseph Smith sa dinaghan nga kaminyoon?
Ang mga indibidwal nga suod ni Joseph Smith mireport nga misulti siya kanila nga usa ka anghel sa Dios ang mipakita kaniya sa tulo ka higayon tunga-tunga sa 1834 ug 1842, misugo kaniya sa pagsunod sa dinaghan nga kaminyoon. “Ang dili kompleto nga ebidensya nagsugyot nga gisunod ni Joseph Smith ang unang sugo sa anghel pinaagi sa pakigminyo og asawa alang sa dinaghan nga kaminyoon, si Fanny Alger, didto sa Kirtland, Ohio, sa tunga-tungang bahin sa mga 1830. … Gamay ra ang nahibaloan mahitungod niini nga kaminyoon, ug walay nahibaloan mahitungod sa panagsultihanay tali ni Joseph ug Emma kalabut ni Alger. Human ang kaminyoon ngadto ni Alger natapos sa panagbulag, daw gikalimtan ni Joseph ang hilisgutan mahitungod sa dinaghan nga kaminyoon hangtud nga nabalhin na ang Simbahan ngadto sa Nauvoo, Illinois” (“Plural Marriage in Kirtland and Nauvoo,” Gospel Topics, topics.ChurchofJesusChrist.org).
Niadtong 1841 si Propeta Joseph Smith nakigminyo og dugang nga mga babaye sumala sa sugo sa Ginoo ug mipaila sa baruganan sa dinaghan nga kaminyoon ngadto sa limitado nga mga miyembro sa Simbahan.
Si Eliza R. Snow, kinsa nabugkos ngadto ni Propeta Joseph Smith ug sa wala madugay miserbisyo isip ikaduha nga Kinatibuk-ang Presidente sa Relief Society, nahinumdom:
Si Propeta Joseph … sa kalisud sa paghunahuna nga iyang nasinati sa pagbuntog sa pagsupak sa iyang mga pagbati … kalabut sa pagsugod sa dinaghan nga kaminyoon. Nasayud siya sa tingog sa Dios—nasayud siya nga ang sugo sa Labawng Makagagahum ngadto kaniya mao ang pagpadayon. … Nasayud siya nga dili lamang ang iyang kaugalingong mga pagpihig ug kanhi mga pagsabut [pagtuo] ang pakigbatukan ug buntugon, apan ang mga pagsupak usab sa tibuok Kristiyanong kalibutan nga nakatutok kaniya; hinoon ang Dios, nga labaw sa tanan, mihatag sa sugo, ug Siya kinahanglan gayud nga sundon. (Eliza R. Snow, sa Biography and Family Record of Lorenzo Snow [1884], 69)
Pamalandong agi og Pagpangandam alang sa Klase
Unsa ang gipadayag sa pagkaandam ni Propeta Joseph Smith sa pagsunod sa ingon nianang malisud nga sugo mahitungod sa iyang hugot nga pagtuo ug kinaiya?
Usa sa mga rason nganong limitado ang atong pagsabut sa gibuhat ni Joseph Smith nga dinaghan nga kaminyoon mao nga siya ug ang uban nga nagbuhat sa dinaghan nga kaminyoon didto sa Nauvoo panagsa ra nahisgutan sa sinulat nga mga rekord. Daghang mga detalye sa buhat sa dinaghan nga kaminyoon gihimong kompidensyal, ug ang mga rekord sa kasaysayan wala gayud motubag sa tanan natong mga pangutana.
Gikan sa artikulo sa Gospel Topics mahitungod sa dinaghan nga kaminyoon atong makat-unan:
Atol sa panahon nga gibuhat ang dinaghan nga kaminyoon, ang mga Santos sa Ulahing mga Adlaw miila sa kalainan tali sa mga pagbugkos alang sa karon ug sa kahangturan ug sa mga pagbugkos alang lamang sa kahangturan. Ang mga pagbugkos alang sa karon ug sa kahangturan naglakip sa mga pasalig ug mga relasyon niining kinabuhia, kasagaran lakip sa posibilidad sa sekswal nga relasyon. Ang mga pagbugkos nga alang lamang sa kahangturan nagpasabut og mga pakigrelasyon nga alang lamang sa sunod nga kinabuhi. …
Ang ubang mga babaye nga nabugkos ngadto ni Joseph Smith sa kadugayan mipamatuod nga ang ilang kaminyoon alang sa karon ug sa kahangturan, samtang ang uban miingon nga ang ilang pakigrelasyon alang lamang sa kahangturan.
Kadaghanan sa nabugkos ngadto ni Joseph Smith anaa sa mga edad nga 20 ug 40 anyos sa panahon sa ilang pagkabugkos ngadto kaniya. Ang kinamagulangan, si Fanny Young, 56 anyos ang panuigon. Ang kinamanghuran mao si Helen Mar Kimball, … kinsa nabugkos ngadto ni Joseph pipila ka bulan sa wala pa ang iyang ika-15 nga adlaw nga natawhan. Ang kaminyoon sa ingon niana nga edad, dili angay sa mga sumbanan karong panahona, legal niana nga panahon, ug ang ubang mga babaye nagminyo sa mga tunga-tunga sa ilang pagkatin-edyer. Si Helen Mar Kimball naghisgot sa iyang pagkabugkos ngadto ni Joseph isip “alang lamang sa kahangturan,” nagsugyot nga ang relasyon wala maglakip og sekswal nga mga relasyon. …
… Si Joseph Smith gibugkos ngadto sa pipila ka mga babaye nga naminyo na. Kini nga mga babaye ug si Joseph wala kaayo mopasabut mahitungod niini nga mga pagbugkos, hinoon ang pipila sa mga babaye miingon nga alang lamang kadto sa kahangturan. …
Adunay pipila ka posible nga mga pagpasabut niini nga buhat. Kini nga mga pagbugkos tingali nakahatag og paagi sa pagmugna og mahangturong relasyon o sumpay tali sa pamilya ni Joseph ug sa ubang mga pamilya diha sa Simbahan. …
Kini nga mga pagbugkos mapasabut usab sa pagduha-duha ni Joseph sa pagsulod ngadto sa dinaghan nga kaminyoon tungod sa kasubo nga ihatag niini ngadto sa iyang asawa nga si Emma. Posibling nagtuo siya nga ang pagkabugkos ngadto sa minyo nga mga babaye katumanan sa sugo sa Ginoo nga wala magkinahanglan nga siya dunay normal nga mga relasyon sa kaminyoon. …
Laing posibilidad mao nga, sa usa ka panahon nga ang gidugayon sa kinabuhi mas mubo kay sa karon, ang matinud-anong mga babaye mibati og dinalian nga mabugkos pinaagi sa awtoridad sa pagkapari. Pipila niini nga babaye naminyo ngadto sa dili mga Mormon o kanhi mga Mormon, ug sobra sa usa ka babaye ang mipadayag nga wala malipay sa ilang mga kasamtangang kaminyoon. Nagpuyo sa usa ka panahon nga ang diborsyo lisud makuha, kini nga mga babaye tingali nagtuo nga ang pagpabugkos ngadto ni Joseph Smith makahatag nila og mga panalangin nga unta dili nila madawat sa sunod kinabuhi. …
… Human sa kamatayon ni Joseph, kadaghanan sa mga babaye nga nabugkos ngadto kaniya mibalhin ngadto sa Utah uban sa mga Santos, nagpabilin nga matinud-anon nga mga miyembro sa Simbahan, ug nanalipud sa dinaghan nga kaminyoon ug ni Joseph. (“Plural Marriage in Kirtland and Nauvoo,” topics.ChurchofJesusChrist.org)
Seksyon 3
Giunsa sa mga miyembro sa Simbahan pagtubag ang baruganan sa dinaghan nga kaminyoon?
Ang pagbuhat sa dinaghan nga kaminyoon dili komon ug lisud alang sa kadaghanan sa unang mga Santos ingon man sa mga miyembro sa Simbahan karon. “Sa daghang mga bahin sa kalibutan, ang daghan og asawa sosyal nga gidawat ug legal nga gitugutan. Apan sa Estados Unidos, kadaghanan sa mga tawo naghunahuna nga ang maong buhat sayop sa moral nga paagi” (“The Manifesto and the End of Plural Marriage,” Gospel Topics, topics.ChurchofJesusChrist.org). Ang sugo sa pagbuhat sa dinaghan nga kaminyoon “mao ang labing mahagiton nga mga aspeto sa Pagpahiuli—alang ni Joseph sa personal ug sa ubang mga miyembro sa Simbahan. … Alang sa asawa ni Joseph Smith nga si Emma, kini usa ka malisud kaayo nga pagsulay. … Magusab-usab ang iyang panan-aw sa dinaghan nga kaminyoon, dunay higayon nga nagsuporta siya niini ug sa ubang mga higayon nagsaway niini” (“Plural Marriage in Kirtland and Nauvoo,” topics.ChurchofJesusChrist.org).
Dili tanang mga Santos sa Ulahing mga Adlaw gilauman nga mosunod sa dinaghan nga kaminyoon. Ug pipila ka mga miyembro sa Simbahan kinsa nakigbisog sa baruganan sa dinaghan nga kaminyoon napanalanginan og espiritwal nga saksi nga naghatag kanila og kaisug sa pagpadayon sa maong buhat. Ang mga kasinatian sa duha ka miyembro gi-summarize dinhi:
Miingon si Brigham Young nga, sa pagkahibalo nako sa dinaghan nga kaminyoon, “mao kadto ang unang higayon sa akong kinabuhi nga ako nagtinguha nga mamatay.” “Kinahanglan akong mag-ampo nga walay hunong,” miingon siya, “ug ako kinahanglan nga magbaton og hugot nga pagtuo ug ang Ginoo mipadayag ngari nako sa kamatuoran niini ug kana nakatagbaw nako.” …
Si Lucy Walker nahinumdom sa gubot niyang pagbati sa dihang gidapit siya ni Joseph Smith nga mahimo niyang asawa. “Ang matag pagbati sa akong kalag misupak niini,” misulat siya. Bisan pa niana, human sa pipila ka gabii nga pag-ampo nga wala mahimutang, nakakaplag siya og kahupayan sa dihang ang iyang kwarto “napuno sa balaang impluwensya” susama sa “masanag nga kahayag sa adlaw.” Miingon siya, “Ang akong kalag napuno sa matam-is nga kalinaw nga wala sukad nako mahibaloi”, ug ang “hilabihan nga kalipay misulod sa akong tibuok pagkatawo.”
Dili tanan ang aduna sa maong mga kasinatian. Ang pipila ka mga Santos sa Ulahing mga Adlaw misalikway sa baruganan sa dinaghan nga kaminyoon ug mibiya sa Simbahan, samtang ang uban nagdumili sa pagsulod sa maong binuhatan apan nagpabilin nga matinud-anon. Bisan pa niana, alang sa daghang mga babaye ug mga lalaki, ang sinugdanan nga pagkahimangud ug pag-antus, gisundan sa pakigbisog, kasulbaran, ug sa katapusan, kahayag ug kalinaw. Ang sagrado nga mga ordinansa nakapahimo sa mga Santos sa pagpadayon diha sa hugot nga pagtuo. (“Plural Marriage in Kirtland and Nauvoo,” topics.ChurchofJesusChrist.org)
Pamalandong agi og Pagpangandam alang sa Klase
Sa unsang paagi kaha nga kini nga mga kasinatian sa unang mga miyembro sa Simbahan makatabang sa usa ka tawo kinsa adunay mga pangutana kon si Joseph Smith naglihok ba isip usa ka dinasig nga propeta sa Dios sa dihang giimplementar niya ang buhat sa dinaghan nga kaminyoon?
Seksyon 4
Sa unsa nga paagi nga ang dinaghan nga kaminyoon sa Ang Simbahan ni Jesukristo sa mga Santos sa Ulahing mga Adlaw natapos?
Wala madugay human sa kamatayon ni Propeta Joseph Smith niadtong 1844, ang mga Santos mibalhin ngadto sa Walog sa Salt Lake sa kasadpang bahin sa Estados Unidos, diin ang mga miyembro sa Simbahan sa katapusan nagbuhat sa dinaghan nga kaminyoon sa dayag nga paagi. Gikan sa mga 1860 ngadto sa mga 1880, ang gobyerno sa Estados Unidos mipasar og mga balaod batok sa maong binuhatan ug sa katapusan mihimo og grabe nga silot niadtong wala mosunod, lakip sa pagkabilanggo. Human mangayo sa giya sa Ginoo ug sa pagdawat sa Iyang direksyon, si Presidente Wilford Woodruff miandam og pamahayag niadtong Septyembre 1890 nga nailhan nga “ang Manipesto” (Opisyal nga Pahayag 1), sa katapusan misangpot sa paghunong sa pagbuhat og dinaghan nga kaminyoon sa mga miyembro sa Simbahan.
Adunay pipila ka mga miyembro sa Simbahan nga mipadayon sa pagsulod ngadto sa bag-ong dinaghan nga mga kaminyoon human nahatag ang Manipesto. Atol sa Abril 1904 nga kinatibuk-ang komperensya, si Presidente Joseph F. Smith miisyu sa ikaduhang manipesto ug mipahibalo “nga gidili ang tanang [dinaghan] nga mga kaminyoon, ug kon si bisan kinsa nga opisyal o miyembro sa Simbahan nga mopadayon sa pagpahigayon o mosulod sa maong kaminyoon siya … i-excommunicate” (sa Conference Report, Abr. 1904, 75). Kini nga polisiya nagpadayon karon.
Seksyon 5
Gikinahanglan ba ang dinaghan nga kaminyoon alang sa kahimayaan?
Si Elder Marcus B. Nash sa Seventy mitudlo:
Ang uban [sayop sa pagbasa sa mga kasulatan] nga nagpasabut nga ang dinaghan nga kaminyoon gikinahanglan alang sa kahimayaan. … Kini, hinoon, walay suporta sa mga pagpadayag. … Ang kinabuhing dayon gisaad ngadto sa usa ray bana ug usa ray asawa nga magtiayon kinsa gibugkos pinaagi sa awtoridad sa pagkapari ug kinsa motuman sa pakigsaad—nga walay dugang nga kondisyon o gikinahanglan [tan-awa sa Doktrina ug mga Pakigsaad 132:19]. … Ang Simbahan nagpamatuod nga ang usa ray bana ug usa ray asawa nga kaminyoon mao ang sumbanan sa Dios alang sa kaminyoon gawas kon Siya nagtugot o nagsugo pinaagi sa Iyang propeta. Ang Simbahan wala magtudlo nga ang pag-apil sa dinaghan nga kaminyoon gikinahanglan alang sa kahimayaan. (“The New and Everlasting Covenant,” Ensign, Dis. 2015, 44, 46)
Sa pagsubli, wala kita makasabut sa tanang mga katuyoan sa Dios sa pagpaila sa dinaghan nga kaminyoon sa unang mga adlaw sa Simbahan. Apan ang mga Santos sa Ulahing mga Adlaw karon nagtahud sa mga sakripisyo ug mahalarong mga paningkamot nga gihimo niadtong kinsa nagbuhat sa dinaghan nga kaminyoon sa pagsunod sa sugo sa Dios.
Irekord ang Inyong mga Hunahuna
Base sa unsay inyong nakat-unan, sa unsa nga paagi nga ang pagbuhat sa dinaghan nga kaminyoon sa unang mga Santos niini nga dispensasyon usa ka pagpakita sa ilang hugot nga pagtuo, pagsalig, ug gugma sa Ginoo?