Leksyon 23 Materyal sa Pagpangandam sa Klase

Ang Propetikanhong Misyon ug Pagkamartir ni Joseph Smith

Paghunahuna og mga tawo diha sa mga kasulatan kinsa andam nga mosakripisyo sa ilang kinabuhi aron mobuhat sa kabubut-on sa Ginoo. Unsa ang matudlo niining maong mga sakripisyo kaninyo mahitungod sa pagpamatuod ug pagtuo niining mga tawhana? Samtang kamo magtuon sa misyon ug pagkamartir ni Propeta Joseph Smith, hunahunaa kon sa unsa nga paagi nga ang iyang mga kontribusyon ug kabilin nakaapekto kaninyo.

Seksyon 1

Unsa nga mga panghitabo ang misangpot ngadto sa pagkabilanggo ni Propeta Joseph Smith didto sa Bilanggoan sa Carthage?

“Sila si Joseph ug Hyrum Smith patay na. Si [John] Taylor nasamdan. … Ako maayo.” Kini nga mga pulong mao ang porsyon sa mensahe ni Willard Richards nga gipadala ngadto ni Emma Smith ug sa ubang mga Santos sa Nauvoo pipila lang ka oras human si Joseph ug Hyrum Smith bangis nga gipatay diha sa Bilanggoan sa Carthage kaniadtong gabii sa Hunyo 27, 1844 (Willard Richards letter, Carthage Jail, Hunyo 27, 1844, Church History Library, Salt Lake City). Hunahunaa ang mga gihunahuna ug mga pagbati ni Emma ug sa mga Santos samtang sila nagbasa niini nga mga pulong.

Ang nagkadako nga politikanhon ug ekonomikanhong impluwensya gitan-aw isip hulga sa kasilinganang mga komunidad. Sa ting-init niadtong 1844, ang oposisyon kang Joseph Smith ug sa Simbahan migrabe pag-ayo. Ang pipila nga mibiya sa Simbahan nagkunsabo sa paghulhog sa opinyon sa publiko batok sa Propeta. Ang pipila ka lumulupyo sa Illinois naghisgot sa pag-abug sa mga Santos gikan sa estado, samtang ang uban nagplano sa pagpatay sa Propeta.

Pagka Hunyo 10, 1844, si Joseph Smith, nga mayor sa Nauvoo, ug ang konseho sa siyudad sa Nauvoo mimando sa pagguba sa Nauvoo Expositor ug sa mantalaan diin kini gimantala. Ang Nauvoo Expositor usa ka anti-Mormon nga mantalaan nga nagdaot sa Propeta ug sa ubang mga Santos ug nanawagan alang sa pagsupak sa Balaod sa Nauvoo. Ang mga opisyales sa siyudad nahadlok nga ang pagmantala niini mohaling sa paglihok sa mga manggugubot. Agi og resulta sa aksyon nga gihimo sa mayor ug sa konseho sa siyudad, ang mga awtoridad sa Illinois mihimo og mga pasangil nga walay basihanan sa kagubot batok sa Propeta, sa iyang igsoon nga si Hyrum, ug sa ubang mga opisyales sa siyudad sa Nauvoo. Ang gobernador sa Illinois, si Thomas Ford, mimando sa katawhan sa pag-atubang sa bista didto sa Carthage, Illinois, ang dapit sa sibil nga administrasyon, ug misaad kanila og proteksyon. Si Joseph nasayud nga kon siya moadto sa Carthage, ang iyang kinabuhi mamiligro gayud gikan sa mga manggugubot kinsa naghulga kaniya. …

… Pagka Hunyo 24, si Joseph ug Hyrum Smith nanamilit sa ilang mga pamilya ug misakay kuyog sa lain pang mga opisyales sa siyudad sa Nauvoo ngadto sa Carthage. (Mga Pagtulun-an sa mga Presidente sa Simbahan: Joseph Smith [2007], 641–42)

Kompletuha ang usa o duha sa mosunod nga kalihokan:

2. Tun-i ang nahibilin sa seksyon 1.

Samtang ang Propeta nagbiyahe kuyog sa uban padulong sa Carthage, gitagna niya ang iyang pagkamartir.

Pagtuon agi og Pagpangandam alang sa Klase

Tun-i ang Doktrina ug mga Pakigsaad 135:4.

Si Joseph ug Hyrum “boluntaryo nga mitahan sa ilang kaugalingon ngadto sa mga opisyal sa lalawigan sa Carthage pagkasunod adlaw. Human ang managsoon gibuhian tungod sa piyansa alang sa nag-una nga pasangil, gipasanginlan sila og usa ka sayop nga pasangil nga sila nagluib sa gobyerno batok sa estado sa Illinois, gidakop, ug gipriso sa Bilanggoan sa Carthage aron maghulat sa husay. Sila si Elder John Taylor ug Willard Richards, mao lang ang mga sakop sa Napulog Duha kinsa wala magserbisyo og misyon, miboluntaryo nga motipon kanila” (Mga Pagtulun-an: Joseph Smith, 642).

Seksyon 2

Unsay nahitabo didto sa Bilanggoan sa Carthage?

Kompletuha ang usa o duha sa mosunod nga mga kalihokan:

2. Basaha ang mosunod nga istorya gikan sa Mga Santos: Ang Istorya sa Simbahan ni Jesukristo sa Ulahing mga Adlaw:

Ang oras hinay kaayong milabay didto sa bilanggoan sa Carthage nianang hapona. Sa kainit sa ting-init, ang kalalakin-an mihukas sa ilang mga kupo ug nangabli sa mga bintana aron makasulod ang hangin. Sa gawas, walo ka mga tawo … nagbantay sa bilanggoan samtang ang uban sa militia nagkampo sa duol. Laing guardiya naglingkod sa gawas sa pikas habig sa pultahan.

Si Stephen Markham, Dan Jones, ug ang uban gisugo-sugo ni Joseph. Sa mga lalaki nga mipabilin didto sa miaging gabii, sila lang si Willard Richards ug John Taylor ang miuban nilang Joseph ug Hyrum. Sa sayo pa nianang adlaw, ang mga bisita mipahuyot og duha ka pusil ngadto sa mga binilanggo—usa ka six-shooter nga rebolber ug single-shot nga pistola—basin og may moatake. Nagbilin usab si Stephen og usa ka gahi nga sungkod nga gitawag niya og “pambunal sa badlungon.”

Aron mapagaan ang gibati ug magpalabay sa oras, si John miawit og usa ka British nga himno. …

[Sa wala madugay human nakanta ni John Taylor ang himno sa ikaduhang higayon] ang mga binilanggo nakadungog sa kanaas diha sa pultahan ug dayon ang tulo o upat ka buto sa pusil. Mipasiplat si Willard sa abli nga bintana ug nakita ang gatusan ka kalalakin-an sa ubos, ang ilang mga nawong gibulitan og lapok ug pulbora, nagdasok sa pagsulod sa bilanggoan. Gilabni ni Joseph ang usa sa mga pistola samtang gikuha sad ni Hyrum ang lain. … Ang upat ka mga lalaki miduot sa pultahan samtang ang mga manggugubot midali pagsaka sa hagdanan ug misulay sa pagpwersa nga makasulod.

Nagbuto-buto diha sa mga ang-ang samtang ang mga manggugubot mipusil sa pultahan. … [Usa ka] bala milapos sa kahoy. Miigo kini sa nawong ni Hyrum ug miliso siya, nasukamod gikan sa pultahan. Laing bala ang miigo sa ubos nga bahin sa iyang buko-buko. …

“Igsoong Hyrum!” Misangpit si Joseph. Naggunit sa iyang six-shooter, giabli niya ang pultahan og pila ka pulgada ug mipabuto og kausa. Dugang pang mga bala ang nanglupad, ug gipabuthan ni Joseph ang mga manggugubot nga bisan asa lang tira samtang si John [Taylor] migamit sa sungkod sa pagbunal sa mga sumbuhan sa mga pusil ug mga bayoneta nga nanglapos sa pultahan.

Human si Joseph nakapabuto sa rebolber og kaduha o katulo ka higayon, si John midagan sa bintana ug misulay sa pagsaka sa taas nga kordeso sa bintana. Usa ka lingin nga bala ang milapos sa kwarto ug miigo sa iyang batiis, natakilpo siya nga wala na ka balanse. Namanhud ang iyang lawas ug nalamba siya sa kurdiso sa bintana, nabuak ang iyang orasan diha sa bulsa sa dise-sais minutos pasado alas singko.

“Naigo ko!” miping-it siya.

Mikamang si John sa salog ug miligid ngadto sa ilawom sa higdaanan samtang ang mga manggugubot balik-balik nga mitira. Usa ka bala migisi sa iyang dapi-dapi, milangkat og tipik sa unod. Duha pa ka bala ang miigo sa iyang pulso ug sa bukog nga ibabaw lang og gamay sa tuhod.

Diha sa kwarto, si Joseph ug Willard mihurot sa ilang kusog sa pagduot sa pultahan samtang si Willard nangwakli sa mga sumbohan sa pusil ug sa mga bayoneta sa iyang atubangan. Sa kalit lang, nabuhian ni Joseph ang rebolber ngadto sa salog ug milayat sa bintana. Sa iyang paglakang sa kordeso sa bintana, duha ka bala ang miigo sa iyang buko-buko. Laing bala ang misiak sa bintana ug mitusak sa ubos sa iyang kasingkasing.

“O Ginoo, akong Dios,” misinggit siya. Ang iyang lawas nasagbay sa bintana, ug midailos nga nag-una ang ulo gawas sa bintana.

Midali si Willard sa pagtabok sa kwarto ug gigawas ang iyang ulo samtang ang bala mihadyong agi niya. Sa ubos, nakita niya ang mga manggugubot nga mihugpa naglibut sa nagkadugo nga lawas ni Joseph. …

Si Joseph Smith, ang propeta ug manalagna sa Ginoo, patay na. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 624–627; tan-awa usab sa Doktrina ug mga Pakigsaad 135:1–2)

Pamalandong agi og Pagpangandam alang sa Klase

Unsa ang inyong mga hunahuna ug mga pagbati samtang kamo maghunahuna sa gihimo nga sakripisyo nila ni Joseph ug Hyrum Smith sa ilang mga pagpamatuod sa gipahiuli nga ebanghelyo ni Jesukristo?

Seksyon 3

Sa unsa nga paagi nga ang mapanagnaong misyon ni Joseph Smith nakapanalangin sa akong kinabuhi?

Ubos sa direksyon sa Korum sa Napulog Duha ka mga Apostoles, usa ka sinulat nga pahibalo sa pagkamartir giandam base sa mga istorya sa saksi nga sila si Elder John Taylor ug Elder Willard Richards. Kini nga pahibalo girekord na karon sa Doktrina ug mga Pakigsaad 135.

Pagtuon agi og Pagpangandam alang sa Klase

Tun-i ang Doktrina ug mga Pakigsaad 135:3. Ikonsiderar ang pagmarka sa mga pulong nga ingon og importante kaninyo.

Irekord ang Inyong mga Hunahuna

Hunahunaa ang inyong pagpamatuod sa Propeta nga si Joseph Smith ug ang mga paagi nga ang iyang mapanagnaong misyon nakaimpluwensya ug nakapanalangin sa inyong kinabuhi. Ikonsiderar ang pagrekord sa inyong mga hunahuna diha sa inyong journal.

Gusto pa ba Mo og Dugang? (Opsyonal)

Asa pa ko makakat-on og dugang mahitungod sa propetikanhong misyon ug sa pagkamartir ni Joseph Smith?

Si Presidente Dallin H. Oaks sa Unang Kapangulohan mipakigbahin sa iyang saksi sa talagsaong kinabuhi ug propetikanhong misyon ni Joseph Smith sa iyang artikulo nga “Ang Milagrosong Misyon ni Propeta Joseph Smith” (Liahona, Ene. 2019, 30–39).