Leksyon 7 Materyal sa Pagpangandam sa Klase

Ang Pagpahiuli sa Pagkapari

Hunahunaa ang katapusang higayon nga kamo miapil sa usa ka ordinansa sa pagkapari o nakadawat og panalangin sa pagkapari. Unsay inyong gibati atol niana nga kasinatian? Samtang kamo magtuon, ikonsiderar sa unsa nga paagi ang awtoridad ug mga yawe sa pagkapari nakahatag kaninyo og kahigayunan sa pag-access sa mga panalangin sa gipahiuli nga ebanghelyo ni Jesukristo.

Seksyon 1

Giunsa sa Ginoo pagpahiuli ang awtoridad sa pagkapari dinhi sa yuta?

Sila si Joseph Smith ug Oliver Cowdery adunay mga pangutana mahitungod sa awtoridad sa pagkapari samtang sila naghubad sa Basahon ni Mormon. Sila si Joseph ug Oliver nagbasa sa 3 Nephi nga human matudloi ni Jesus ang Iyang napulog duha ka Nephite nga mga disipulo nga ang bunyag gikinahanglan alang sa kaluwasan, Siya mihatag dayon sa mga disipulo sa awtoridad sa pagkapari sa pagbunyag (tan-awa sa Joseph Smith—Kasaysayan 1:68; 3 Nephi 11:21–27).

Sila si Joseph ug Oliver nainteresado niini nga mga pagtulun-an. … Si Joseph wala gayud mabunyagi, ug siya gusto nga makahibalo mahitungod sa ordinansa ug sa awtoridad nga gikinahanglan sa pagpahigayon niini.

Niadtong Mayo 15, 1829, mihunong na ang ulan ug sila si Joseph ug Oliver miadto sa kakahoyan duol sa Suba sa Susquehanna. Nangluhod, sila nangutana sa Dios mahitungod sa bunyag ug sa kapasayloan sa mga sala. Samtang sila nag-ampo, ang tingog sa Manunubos namulong og kalinaw ngadto kanila, ug usa ka anghel nagpakita diha sa panganud sa kahayag. Iyang gipaila ang iyang kaugalingon nga siya si Juan Bautista ug mipandong sa iyang mga kamot sa ilang mga ulo. Ang kalipay mipuno sa ilang mga kasingkasing samtang ang gugma sa Dios milibut kanila. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 73–74)

Dayon si Juan Bautista mitugyan sa Aaronic nga Pagkapari diha kanila, sumala sa narekord sa Joseph Smith—Kasaysayan ug Doktrina ug mga Pakigsaad 13.

Pagtuon agi og Pagpangandam alang sa Klase

Basaha ang Joseph Smith—Kasaysayan 1:68–70, 72. (Tan-awa usab sa Doktrina ug mga Pakigsaad 13.)

Sa wala madugay human sila si Joseph Smith ug Oliver Cowdery nakadawat sa Aaronic nga Pagkapari gikan ni Juan Bautista, sila nakadawat sa Melchizedek nga Pagkapari gikan nila ni Pedro, Santiago, ug Juan (tan-awa sa Doktrina ug mga Pakigsaad 27:12–13). Ang eksakto nga petsa niini nga panghitabo wala mahibaloi. Hinoon, ang makasaysayanong ebidensya nagsugyot nga kini nahitabo sa Mayo o Hunyo sa 1829.

Ang Ginoo hinay-hinay nga mipadayag og dugang mahitungod sa pagkapari ug sa mga kalihokan niini ug mipadala og mga mensahero kinsa mihatag og dugang mga yawe sa pagkapari ngadto nila ni Joseph Smith ug Oliver Cowdery. Ang mosunod nga tsart naghulagway niini nga pagpahiuli.

Ang Pagpahiuli sa Awtoridad sa Pagkapari, mga Yawe, ug Kahibalo

Petsa	Langitnong mga Mensahero ug mga Pagpadayag	Ang Awtoridad sa Pagkapari, mga Yawe, ug Kahibalo Gipahiuli
Petsa 1829	Langitnong mga Mensahero ug mga Pagpadayag Juan Bautista	Ang Awtoridad sa Pagkapari, mga Yawe, ug Kahibalo Gipahiuli Mitugyan sa awtoridad ug sa mga yawe sa Aaronic nga Pagkapari (Doktrina ug mga Pakigsaad 13)
Petsa 1829	Langitnong mga Mensahero ug mga Pagpadayag Pedro, Santiago, ug Juan	Ang Awtoridad sa Pagkapari, mga Yawe, ug Kahibalo Gipahiuli Mitugyan sa Melchizedek nga Pagkapari ug sa mga yawe sa gingharian (Doktrina ug mga Pakigsaad 27:12–13)
Petsa 1830	Langitnong mga Mensahero ug mga Pagpadayag Doktrina ug mga Pakigsaad 20	Ang Awtoridad sa Pagkapari, mga Yawe, ug Kahibalo Gipahiuli Mipadayag sa mga pamaagi alang sa bunyag ug sa sakramento, ug milatid sa mga katungdanan sa mga naghupot sa pagkapari
Petsa 1832	Langitnong mga Mensahero ug mga Pagpadayag Doktrina ug mga Pakigsaad 84	Ang Awtoridad sa Pagkapari, mga Yawe, ug Kahibalo Gipahiuli Mipadayag sa kasaysayan, katuyoan, ug pakigsaad sa pagkapari
Petsa 1831, 1835	Langitnong mga Mensahero ug mga Pagpadayag Doktrina ug mga Pakigsaad 107	Ang Awtoridad sa Pagkapari, mga Yawe, ug Kahibalo Gipahiuli Mipadayag sa paghatag og pangalan, pagpangalagad, ug estraktura sa mga buhaton ug mga korum sa pagkapari
Petsa 1836	Langitnong mga Mensahero ug mga Pagpadayag Moises	Ang Awtoridad sa Pagkapari, mga Yawe, ug Kahibalo Gipahiuli Mihatag sa mga yawe sa pagpundok sa balay ni Israel (Doktrina ug mga Pakigsaad 110:11)
Petsa 1836	Langitnong mga Mensahero ug mga Pagpadayag Elias	Ang Awtoridad sa Pagkapari, mga Yawe, ug Kahibalo Gipahiuli Mihatag “sa dispensasyon sa ebanghelyo ni Abraham” (Doktrina ug mga Pakigsaad 110:12)
Petsa 1836	Langitnong mga Mensahero ug mga Pagpadayag Elijah	Ang Awtoridad sa Pagkapari, mga Yawe, ug Kahibalo Gipahiuli Mihatag sa mga yawe alang sa gahum sa pagsilyo (Doktrina ug mga Pakigsaad 110:13–16)
Petsa 1839	Langitnong mga Mensahero ug mga Pagpadayag Doktrina ug mga Pakigsaad 121:34–46	Ang Awtoridad sa Pagkapari, mga Yawe, ug Kahibalo Gipahiuli Mipadayag sa kahibalo mahitungod sa kinaiya sa mga naghupot sa pagkapari
Petsa Wala mahibaloi	Langitnong mga Mensahero ug mga Pagpadayag Adan, Gabriel, Rafael, ug daghang mga anghel	Ang Awtoridad sa Pagkapari, mga Yawe, ug Kahibalo Gipahiuli Mipahayag sa ilang dispensasyon, mga katungod, mga yawe, ug gahum sa ilang pagkapari (Doktrina ug mga Pakigsaad 128:21)
Petsa 1978	Langitnong mga Mensahero ug mga Pagpadayag Opisyal nga Pahayag 2	Ang Awtoridad sa Pagkapari, mga Yawe, ug Kahibalo Gipahiuli Mipadayag nga ang tanang takus nga miyembro nga lalaki sa Simbahan ni Jesukristo makadawat sa pagkapari

Pahibalo: Ang kahulugan sa piho nga mga yawe sa pagkapari hisgutan og dugang sa leksyon 16, “Ang Templo sa Kirtland ug ang mga Yawe sa Pagkapari.”

Pamalandong agi og Pagpangandam alang sa Klase

Sa unsa nga paagi nga ang inyong pagpamatuod bahin sa pagkapari malig-on pinaagi sa pagkahibalo giunsa kini sa pagpahiuli dinhi sa yuta?

Seksyon 2

Unsa ang relasyon tali sa awtoridad sa pagkapari ug sa mga yawe sa pagkapari?

Si Presidente Joseph F. Smith nagtudlo:

Ang Priesthood sa kinatibuk-an mao ang awtoridad nga gihatag ngadto sa tawo aron sa pagbuhat alang sa Dios. Ang matag lalaki nga naordinahan sa bisan unsa nga ang-ang sa Priesthood, aduna niini nga awtoridad nga gitugyan ngadto kaniya.

Apan gikinahanglan kini nga ang matag buhat nga gipahigayon ubos niini nga awtoridad kinahanglang buhaton sa tukma nga panahon ug dapit, diha sa tukma nga paagi, ug sunod sa tukma nga han-ay. Ang gahum sa pagdumala niini nga mga buhat naglangkob sa mga yawe sa Priesthood. (Mga Pagtulun-an sa mga Presidente sa Simbahan: Joseph F. Smith [1998], 274)

Si Presidente Dallin H. Oaks sa Unang Kapangulohan mitudlo usab:

“Ang mga yawe sa pagkapari mao ang awtoridad nga gihatag sa Dios ngadto [sa mga naghupot] sa pagkapari aron sa pagmando, pagkontrolar, ug pagdumala sa paggamit sa Iyang pagkapari dinhi sa yuta” [Handbook 2: Administering the Church (2010)], 2.1.1]. Matag buhat o ordinansa nga gipahigayon sa Simbahan gihimo ubos sa direkta o dili direkta nga pagtugot sa tawo nga naghupot sa mga yawe niana nga kalihokan. Sama sa gipasabut ni Elder M. Russell Ballard, “Kadtong adunay mga yawe sa priesthood … sa tinuoray naghimong posible nga ang tanan kinsa matinud-anong naghago ubos sa ilang direksyon makagamit sa awtoridad sa priesthood ug makagamit sa gahum sa priesthood.” …

Labaw sa tanan, ang tanang yawe sa priesthood gihuptan ni Ginoong Jesukristo, kansang priesthood Iya. Siya ang motino kon unsa nga mga yawe ang ihatag ngadto sa mga mortal ug kon unsaon kana paggamit. (Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 49–50)

Seksyon 3

Sa unsa nga paagi nga ang mga ordinansa sa pagkapari makatabang nato sa paggamit sa maulaong sakripisyo sa Manluluwas?

Sa Simbahan, ang usa ka ordinansa usa ka sagrado, pormal nga aksyon nga gipahigayon pinaagi sa awtoridad sa pagkapari. Pipila ka mga ordinansa gikinahanglan sa atong kahimayaan. Kini nga mga ordinansa gitawag og makaluwas nga mga ordinansa. Naglakip kini sa bunyag, kumpirmasyon, ordinasyon ngadto sa Melchizedek nga Pagkapari (alang sa mga lalaki), pagtuga [endowment] sa templo, ug ang pagbugkos sa kaminyoon. Pinaagi sa matag usa niini nga mga ordinansa, mosulod kita sa ligdong nga mga pakigsaad uban sa Ginoo

Si Elder Dale G. Renlund sa Korum sa Napulog Duha ka mga Apostoles mipasabut sa gahum nga atong magamit pinaagi sa mga ordinansa sa pagkapari:

Alang sa katumanan sa mga katuyoan sa Langitnong Amahan, ang matubsanong gahum ni Kristo kinahanglang anaa alang sa mga anak sa Dios [tan-awa sa 1 Nephi 11:31; 2 Nephi 2:8]. Ang priesthood naghatud niini nga mga oportunidad. … Ang priesthood importante tungod kay ang gikinahanglan nga mga ordinansa ug mga pakigsaad dinhi sa yuta ipahigayon lamang pinaagi sa awtoridad niini. Kon ang priesthood mapakyas sa paghatud sa oportunidad nga makabenepisyo sa matubsanong gahum sa Manluluwas, unsa man ang katuyoan niini?…

… Pinaagi sa priesthood, ang gahum sa pagkadiosnon mapakita diha sa mga kinabuhi sa tanan nga mohimo ug motuman sa mga pakigsaad sa ebanghelyo ug modawat sa konektado nga mga ordinansa [tan-awa sa Doktrina ug mga Pakigsaad 84:19–21]. Kini ang paagi nga ang mga tawo moduol kang Kristo, mahimong putli, ug makig-uli ngadto sa Dios. Ang matubsanong gahum ni Kristo magamit pinaagi sa priesthood. (Dale G. Renlund, “Ang Priesthood ug ang Matubsanong Gahum sa Manluluwas,” Liahona, Nob. 2017, 65)

Si Presidente Oaks mitanyag usab sa mosunod nga pagpasabut kon sa unsa nga paagi nga ang Aaronic nga Pagkapari usa ka paagi sa paggamit sa makapalimpyo nga gahum sa Ginoo:

Ang bunyag alang sa kapasayloan sa mga sala, ug ang sakrament usa ka pagbag-o sa mga pakigsaad ug mga panalangin sa bunyag. Ang duha kinahanglan nga unhan sa paghinulsol. …

Walay usa [nato] nga buhi nga walay sala sukad sa [atong] bunyag. Kon walay pipila ka probisyon alang sa dugang nga paglimpyo human sa atong bunyag, ang matag usa nato nawad-an sa mga butang nga espirituhanon. …

Gisugo kita sa paghinulsol sa atong mga sala ug sa pagduol ngadto sa Ginoo uban sa masulub-on nga kasingkasing ug mahinulsulon nga espiritu ug moambit sa sakrament agig pagtuman sa mga pakigsaad niini. Kon atong bag-uhon ang atong mga pakigsaad sa bunyag niini nga paagi, ang Ginoo mobag-o sa makalimpyo nga epekto sa atong bunyag. …

Dili kita makasulti pa og labaw sa kaimportante sa Aaronic Priesthood dinhi niini. Kining tanan nga importante nga mga lakang sa kapasayloan sa mga sala ipahigayon pinaagi sa makaluwas nga ordinansa sa bunyag ug sa makapabag-o nga ordinansa sa sakrament. (Dallin H. Oaks, “The Aaronic Priesthood and the Sacrament,” Ensign, Nob. 1998, 38)

Irekord ang Inyong mga Hunahuna

Gusto pa ba Mo og Dugang? (Opsyonal)

Unsa ang mga yawe sa pagkapari?

Sa iyang pakigpulong nga “Ang mga Yawe ug Awtoridad sa Priesthood,” si Presidente Dallin H. Oaks nagtudlo mahitungod sa awtoridad sa pagkapari ( Liahona, Mayo 2014, 49–52).