“Leksyon 16 Materyal sa Pagpangandam sa Klase: Ang Templo sa Kirtland ug ang mga Yawe sa Pagkapari,” Materyal sa Magtutudlo alang sa Mga Pundasyon sa Pagpahiuli (2019)
“Leksyon 16 Materyal sa Pagpangandam sa Klase,” Materyal sa Magtutudlo alang sa Mga Pundasyon sa Pagpahiuli
Leksyon 16 Materyal sa Pagpangandam sa Klase
Ang Templo sa Kirtland ug ang mga Yawe sa Priesthood
Ang sugo sa Dios nga magtukod og “usa ka balay sa Dios” (Doktrina ug mga Pakigsaad 88:119) usa ka importanting bahin sa Pagpahiuli sa ebanghelyo. Ang unang mga miyembro sa Simbahan andam sa paghatag sa tanan nga sila aduna aron makadawat sa gisaad nga panalangin nga “pagatugahan uban sa gahum nga gikan sa kahitas-an” (Doktrina ug mga Pakigsaad 38:32). Samtang kamo magtuon, pangitaa ang mga panalangin nga moabut gikan sa pagkaandam sa mga Santos nga mosakripisyo sa pagtukod sa Templo sa Kirtland.
Seksyon 1
Unsa ang akong makat-unan gikan sa mga sakripisyo sa unang mga Santos sa pagtukod sa Templo sa Kirtland?
Sa usa ka pinadayag nga gihatag kaniadtong Disyembre 27 ug 28, 1832, gimandoan sa Ginoo ang mga Santos sa pagtukod og templo sa Kirtland, Ohio.
Pagtuon agi og Pagpangandam alang sa Klase
Basaha ang Doktrina ug mga Pakigsaad 88:119.
Nagpasabut ngadto niini nga mando, misulat si Propeta Joseph Smith: “Kini ang pulong sa Ginoo kanamo, ug kami kinahanglan, oo, ang Ginoo magtabang kanamo, kami mosunod: tungod sa matang sa among pagkamasulundon Siya misaad kanamo og mahinungdanong mga butang; oo, gani usa ka bisita gikan sa langit aron sa pagpasidungog kanamo uban sa Iyang presensya ” (Mga Pagtulun-an sa mga Presidente sa Simbahan: Joseph Smith [2007], 502).
Si Eliza R. Snow, kinsa mipuyo sa Kirtland samtang gitukod ang templo, mihinumdom:
Diyutay ra ang mga Santos, ug kasagaran kanila kabus kaayo; ug, kon dili pa sa kasiguroan nga gipamulong sa Dios, ug mimando nga usa ka balay kinahanglang tukuron sa Iyang ngalan, … ang pagsulay og tukod niana nga Templo, ubos sa mga kahimtang nga diha kaniadto, tingali mahimo, sa tanang may kalabutan, makita nga kataw-anan. …
Uban sa diyutay nga mga kapanguhaan gawas sa unsay ilang mahuman gamit ang ilang utok ug ang ilang pisikal nga kusog, inubanan sa walay pagduhaduha nga pagsalig sa Dios, mga lalaki, mga babaye, ug bisan mga bata, mitrabaho uban sa ilang kusog; … ang ilang mga enerhiya naawhag pinaagi sa paglaum nga makaapil sa mga panalangin sa usa ka balay nga gitukod pinaagi sa paggiya sa Labing Halangdon ug pagadawaton Kaniya. (Sa Eliza R. Snow, an Immortal [1957], 54, 57)
Lain usab nga hagit mipahinay sa kauswagan sa pagtukod sa templo:
Ang tingpamulak ug ang ting-init sa 1834 malisud nga mga panahon alang sa pagtukod sa templo tungod kay kadaghanan sa mga lalaki diha sa komunidad mikuyog uban ni Joseph Smith ngadto sa Missouri didto sa Kampo sa Israel. … Wala ang mga lalaki, ang mga babaye mipadayon sa trabaho. Ang pipila nahimong mga mason, ang uban nagbitad og mga baka ug naghakot og mga bato, ug ang uban pa gayud nanahi, nagbubod, ug naggansilyo aron maghimo og mga saput alang sa mga trabahador. (Lisa Olsen Tait and Brent Rogers, “A House for Our God,” Revelations in Context [2016], 170)
Aron sa pagtabang sa mga Santos sa ilang mga paninguha sa pagtukod og templo, mipadayag ang Ginoo ngadto ni Joseph Smith ug sa iyang mga magtatambag sa Unang Kapangulohan og usa ka talagsaong panan-awon diin ilang nakita ang detalyadong mga plano alang sa templo. Si Frederick G. Williams, ang Ikaduhang Magtatambag sa Unang Kapangulohan, sa wala madugay naghinumdom:
Si Joseph [Smith] nakadawat sa pulong sa Ginoo nga dad-on ang iyang duha ka mga magtatambag, si [Frederick G.] Williams ug [Sidney] Rigdon, ngadto sa atubangan sa Ginoo, ug nga Siya mopakita kanila sa plano o modelo sa balay nga pagatukuron. Nanluhod dayon kami, misangpit sa Ginoo, ug ang gambalay [building] mitunga sa gilay-on nga igong makita, ako ang unang nakakita niini. Unya kaming tanan mitan-aw niini. Human namo matan-aw og maayo ang gawas nga bahin, ang gambalay ingon og diha gayud sa atubangan kanamo. (Mga Pagtulun-an sa mga Presidente sa Simbahan: Joseph Smith, 327
Usa niadtong kinsa misakripisyo og dako kaayo sa pagtukod sa Templo sa Kirtland mao ang usa ka kinabig nga ginganlan og John Tanner:
Si [John] “nakadawat og pagdasig pinaagi sa usa ka damgo o panan-awon sa gabii, nga siya … kinahanglan gayud nga moadto dayon ngadto sa Simbahan” sa Kirtland. Gibaligya niya ang iyang kabtangan—daghang naglambo nga mga umahan, usa ka hotel, ug mga prutasan—gipasakay ang iyang daghang pamilya ug daghang mga silingan ngadto sa mga karomata sa buntag sa Pasko, ug gitabok ang 500 ka milya [800 ka kilometro] ang gilay-on aron moabut sa Kirtland og Dominggo, Enero 1835.
Siya sa tinuod gikinahanglan. Ang tagal sa paglukat sa prenda nga tukuran sa templo hapit na moabut ug, sumala sa pipila ka mga taho, ang nagkalisud nga Propeta Joseph ug pipila sa mga kaigsoonan kanunay nga nag-ampo alang sa panabang.
Wala magpanuko si John Tanner. Iyang gipahulam ang Propeta og duha ka libo nga dolyares, gikuha ang iyang sinulat nga saad sa pagbayad, gipahulam ang komitiba sa templo og trese ka libo nga dolyares, mipirma og saad nga bayran og treynta ka libo nga dolyares uban sa Propeta ug mga kauban alang sa mga butang nga napalit didto sa New York, ug mihatag og “walay pagkuto nga mga donasyon” ngadto sa pagtukod sa templo. (Leonard J. Arrington, “The John Tanner Family,” Ensign, Mar. 1979, 46)
Si Presidente Thomas S. Monson mipasabut kon ngano nga ang mga Santos sa Ulahing mga Adlaw kanunay nga andam sa pagsakripisyo sa pagtukod og mga templo ug sa pagsimba sa Ginoo dinhi niini nga balaang mga gambalay [building]:
Ang pipila ka ang-ang sa sakripisyo ang gilambigit sa pagtukod og templo ug sa pagtambong sa templo. Dili maihap kadtong nagtrabaho ug naningkamot aron maangkon alang sa ilang mga kaugalingon ug alang sa ilang mga pamilya ang mga panalangin nga anaa sa mga templo sa Dios.
Nganong daghan man kaayo ang andam sa paghatag og daghan aron makadawat sa mga panalangin sa templo? Kadtong nakasabut sa mahangturong mga panalangin nga magagikan sa templo nasayud nga walay sakripisyo nga dako kaayo, walay kantidad nga bug-at kaayo, walay paningkamot nga lisud kaayo aron makadawat niana nga mga panalangin. (Thomas S. Monson, “Ang Balaan nga Templo—ang Suga sa Kalibutan,” Liahona, Mayo 2011, 92)
Pamalandong agi og Pagpangandam alang sa Klase
Unsa ang imong nakat-unan gikan sa ehemplo ug sakripisyo sa unang mga Santos sa pagtukod sa Templo sa Kirtland?
Seksyon 2
Unsaon sa mga yawe sa pagkapari nga gitugyan pinaagi sa langitnong mga mensahero didto sa Templo sa Kirtland pagpanalangin sa akong kinabuhi karon?
Gigantihan sa Dios ang sakripisyo sa mga Santos sa pagtukod sa Templo sa Kirtland uban sa naghingaping espiritwal nga mga pagpakita sa mga adlaw nga wala pa ug sa human na ang pagpahinungod (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 264–66, 268–70).
Daghang mga Santos ang mipamatuod nga langitnong mga linalang mitambong didto atol sa tulumanon sa pagpahinungod.
Si Eliza R. Snow, mihandum: “Ang mga tulumanon nianang pagpahinungod mahimong maasoy pag-usab, apan walay mortal nga pinulongan nga makahulagway sa langitnong mga pagpakita niadtong halandumong adlaw. Ang mga anghel mipakita sa uban, samtang usa ka matang sa balaanong nanambong namatngonan sa tanan nga miadto, ug ang matag kasingkasing napuno sa dili matukib nga ‘hingpit nga kalipay ug napuno sa himaya.’” [tan-awa sa 1 Pedro 1:8].
Nianang gabhiona, samtang nagpundok ang Propeta uban sa mga 400 ka naghupot sa pagkapari diha sa templo, “usa ka saba ang nadungog sama sa usa ka naghaguros nga hangin, diin mipuno sa Templo, ug ang tanan sa kongregasyon nagdungan pagpamarug, natandog sa dili makita nga gahum.” Sumala sa Propeta, “daghang nagsugod sa pagsulti og mga pinulongan ug pagpanagna; ang uban nakakita og mahimayaong mga panan-awon; ug nakakita ako sa Templo nga napuno uban sa mga anghel, diin sa tinuod akong gipahayag sa kongregasyon” (Mga Pagtulun-an: Joseph Smith, 372).
Ang labing importanting espiritwal nga mga pagpakita nahitabo sa Dominggo sa Pasko sa Pagkabanhaw, Abril 3, 1836, usa ka semana human ang templo gipahinungod. Samtang sila nag-ampo didto sa templo, usa ka panan-awon miabli ngadto ni Joseph Smith ug Oliver Cowdery, ug ang Ginoong Jesukristo mipakita. Mipahayag Siya nga Iyang gidawat ang templo ug misaad sa pagbu-bu og mga panalangin diha sa mga Santos (tan-awa sa Doktrina ug mga Pakigsaad 110:1–10).
Kana nga pagbisita gisundan pinaagi sa pagpakita sa langitnong mga mensahero kinsa mitugyan sa mga yawe sa pagkapari nga gikinahanglan sa pagtuman sa buhat sa Dios sa ulahing mga adlaw. Mahimo nimong markahan sa mosunod nga mga tudling kinsa ang mipakita ngadto ni Joseph ug Oliver ug unsa nga mga yawe ilang gitugyan ngadto sa mga kamot sa mga lider sa Simbahan:
Pagtuon agi og Pagpangandam alang sa Klase
Basaha ang Doktrina ug mga Pakigsaad 110:11.
Si Presidente Joseph Fielding Smith mipasabut:
Si Moises mihupot sa mga yawe sa pagpundok sa Israel. Gigiyahan niya ang Israel nga makagawas sa Ehipto ngadto sa yuta sa Canaan. Kadto iyang katungdanan niini nga dispensasyon sa pag-anhi ug sa pagpahiuli niadtong mga yawe alang sa bag-ong pagpundok. (Joseph Fielding Smith, Church History and Modern Revelation [1953], 2:48)
Pagtuon agi og Pagpangandam alang sa Klase
Basaha ang Doktrina ug mga Pakigsaad 110:12.
“Usa ka tawo nga gitawag og Elias maklaro nga nagpuyo sa pagka-mortal sa mga panahon ni Abraham, kinsa mitugyan sa dispensasyon sa ebanghelyo ni Abraham ngadto kang Joseph Smith ug Oliver Cowdery. … Kita walay piho nga impormasyon sa mga detalye sa iyang mortal nga kinabuhi o pagpangalagad” (Bible Dictionary, “Elias”).
Si Elder Bruce R. McConkie mipasabut ngano si Elias mipakita didto sa templo sa Kirtland:
Ang lalaki nga si Elias nagdala og balik “sa ebanghelyo ni Abraham,” ang halangdon/importante nga pakigsaad ni Abraham diin ang matinud-anong makadawat sa mga saad sa mahangturong paglambo, mga saad nga pinaagi sa celestial nga kaminyoon ang ilang mahangturong kaliwatan modaghan sama sa mga balas sa dagat o sama sa mga bitoon sa kalangitan. (Bruce R. McConkie, “The Keys of the Kingdom,” Ensign, Mayo 1983, 22)
Pagtuon agi og Pagpangandam alang sa Klase
Basaha ang Doktrina ug mga Pakigsaad 110:13–16.
Si Presidente Joseph Fielding Smith mitudlo:
Kini nga gahum sa pagbugkos nga gitugyan diha ni Elijah, mao ang gahum sa pagbugkos sa mga bana ug mga asawa, ug sa mga anak ngadto sa mga ginikanan alang sa karon ug sa kahangturan. Mao kini ang gahum nga nagbugkos nga anaa sa matag ordinansa sa Ebanghelyo. … Pinaagi niini nga gahum nga ang tanang mga ordinansa kalabut sa kaluwasan gibugkos, o gi-seal, ug mao ang misyon ni Elijah sa pag-anhi, ug sa pagpahiuli niini. (Joseph Fielding Smith, Elijah the Prophet and His Mission [1957], 5)
Ang pagpakita sa propeta sa Daang Tugon nga si Elijah mituman sa mga saad nga gihimo sa Ginoo pinaagi ni propeta Malaquias ug gibalik ngadto ni Propeta Joseph Smith pinaagi ni Moroni sa dihang una siyang mipakita didto sa lawak katulganan ni Joseph kaniadtong Septyembre 21, 1823.
Pagtuon agi og Pagpangandam alang sa Klase
Tan-awa sa Doktrina ug mga Pakigsaad 2 (tan-awa usab sa Malaquias 4: 5–6).
Pamalandong agi og Pagpangandam alang sa Klase
Sa unsa nga mga paagi kamo napanalanginan pinaagi sa mga yawe ug sa mga gahum sa pagkapari nga gitugyan ni Moises, Elias, ug Elijah ngadto ni Propeta Joseph Smith ug Oliver Cowdery didto sa Templo sa Kirtland? Unsa kaha ka lahi ang imong kinabuhi kon kini nga mga yawe sa pagkapari wala ipahiuli?