Ang Bag-o ug Walay Katapusang Pakigsaad
Samtang kita nakasabut ug nagsunod sumala sa bag-o ug walay katapusan nga pakigsaad, kita makapanunod sa kinabuhing dayon.
MGA PAGHULAGWAY SA PAGKUMPIRMA NI SARAH CARABINE JENSON; litrato sa mga magtiayon atubangan sa Templo sa Los Angeles California pinaagi ni Jerry Garns; MGA HULAGWAY SA BACKGROUND GIKAN SA iStock/Thinkstock
Ang Katuyoan sa Kinabuhi
Ang matag tawo usa ka hinigugmang anak nga lalaki o babaye sa langitnong mga ginikanan.1 Ang plano sa kaluwasan sa Langitnong Amahan naghatag sa matag usa og oportunidad sa pagdawat og kinabuhing dayon, diin mao ang kinabuhi sa Dios.2 Walay mas labaw ka mahinungdanon nga gasa.3 Ang kahibalo sa plano sa kaluwasan nagpasabut sa katuyoan sa kinabuhi ug, kon pilion gyud nato, mogiya sa atong paghimo og desisyon ngadto sa usa ka mahangturong panglantaw.
Ang plano ug ang kalabutan niini sa mortalidad gamhanang gipasabut diha sa Oktubre 2015 Liahona nga artikulo mahitungod sa hilisgutan ni Elder Robert D. Hales sa Korum sa Napulog Duha Ka mga Apostoles.4 Isip kabahin sa Iyang plano, ang Amahan mihan-ay sa bag-o ug walay katapusan nga pakigsaad nga makahimo sa Iyang mga anak sa pagbalik ngadto sa Iyang presensya ug makapanunod sa kinabuhing dayon.
Sa Iyang pasiuna sa Doktrina ug mga Pakigsaad, ang Ginoo miingon: “Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, …
“Nga ang akong katapusan nga pakigsaad unta mapahimutang.”5
Kini nga pakigsaad, sa kasagaran gitawag sa Ginoo isip ang “bag-o ug walay katapusan nga pakigsaad,” naglangkob sa kahingpitan sa ebanghelyo ni Jesukristo, lakip ang tanan nga mga ordinansa ug mga pakigsaad nga gikinahanglan alang sa kaluwasan sa katawhan.6 Bisan og ang paghan-ay sa bag-o ug walay katapusan nga pakigsaad sa Ginoo dinhi sa yuta usa ka nag-unang katuyoan sa Pagpahiuli, ang pipila ka mga Santos sa Ulahing mga Adlaw wala makasabut sa kamahinungdanon sa mga pakigsaad ug sa saad sa maayong mga butang nga moabut niadtong kinsa nagsunod subay niini. Ang katuyoan niini nga artikulo mao ang pagtabang sa matag usa kanato nga mas makasabut ug magsunod sumala sa bag-o ug walay katapusan nga pakigsaad aron kita mahimong makapanunod sa kinabuhing dayon. Kini usab mopasabut kon sa unsang paagi nga ang usa sa labing importante nga mga ordinansa ug mga pakigsaad sa ebanghelyo—mahangturon nga kaminyoon—mohaum sa bag-o ug walay katapusan nga pakigsaad sa ebanghelyo.
Ang Kahulugan ug Katuyoan sa Bag-o ug Walay Katapusan nga Pakigsaad
Ang usa ka pakigsaad sa pagsabut sa ebanghelyo mao ang usa ka pakigsaad, usa ka kontrata, o usa ka kasabutan tali sa Dios ug sa usa ka tawo (o mga tawo) kinsa nagdawat og mga ordinansa sa priesthood nga gipahigayon pinaagi sa usa ka tawo nga may awtoridad sa priesthood ug kinsa uyon sa pagsunod sa mga lagda ug mga kondisyon sa kauban nga pakigsaad. Kini nga mga lagda ug mga kondisyon gihan-ay sa Dios.7
Ang bag-o ug walay katapusan nga pakigsaad “mao ang sumada sa tanang mga pakigsaad ug mga obligasyon sa ebanghelyo”8 nga gihatag sa karaang panahon9 ug gipahiuli pag-usab dinhi sa yuta niining ulahing mga adlaw. Kini gipasabut diha sa Doktrina ug mga Pakigsaad 66:2: “Sa pagkatinuod ako moingon nganha kanimo, bulahan ikaw tungod sa pagdawat sa akong walay katapusan nga pakigsaad, gani ang kahingpitan sa akong ebanghelyo, nga gipadala ngadto sa mga katawhan, nga sila unta makaangkon og kinabuhi ug mahimo nga mag-aambit sa mga himaya nga ipadayag diha sa ulahing mga adlaw, sumala sa nahisulat pinaagi sa mga propeta ug mga apostoles diha sa karaan nga mga adlaw.”10 Tungod kay ang pakigsaad gipahiuli sa katapusang dispensasyon sa panahon, kini “bag-o,” ug tungod kay kini molukop sa tanang kahangturan,11 kini “walay katapusan.”
Diha sa mga kasulatan ang Ginoo nagsulti sa “ang” bag-o ug walay katapusan nga pakigsaad ug sa “usa ka” bag-o ug walay katapusan nga pakigsaad. Sama pananglit, sa Doktrina ug mga Pakigsaad 22:1, Siya nagpasabut sa bunyag isip “usa ka bag-o ug walay katapusan nga pakigsaad, gani kana nga diin gikan sa sinugdanan.” Sa Doktrina ug mga Pakigsaad 132:4, Siya usab nagpasabut sa mahangturon nga kaminyoon sama sa “usa nga bag-o ug usa ka walay katapusan nga pakigsaad.” Kon Siya namulong og “usa ka” bag-o ug walay katapusan nga pakigsaad, Siya namulong og usa sa daghan nga mga pakigsaad nga nasakop sa Iyang ebanghelyo.
Kon ang Ginoo mamulong sa kinatibuk-an sa “ang” bag-o ug walay katapusan nga pakigsaad, Siya namulong sa kahingpitan sa ebanghelyo ni Jesukristo, nga naglakip sa tanan nga mga ordinansa ug mga pakigsaad nga gikinahanglan alang sa kaluwasan ug kahimayaan sa mga katawhan. Ni ang bunyag o ang mahangturon nga kaminyoon mao ang “ang” bag-o ug walay katapusan nga pakigsaad; hinoon, kini matag usa kabahin sa kinatibuk-an.
Kadtong Kinsa Molahutay hangtud sa Katapusan diha sa Bag-o ug Walay Katapusan nga Pakigsaad Makadawat og Kinabuhing Dayon
Mahinungdanon ug mahangturon nga mga panalangin gisaad ngadto niadtong kinsa modawat sa mga ordinansa sa ebanghelyo nga gipahigayon pinaagi sa tukmang awtoridad sa priesthood ug gi-sealed pinaagi sa Balaang Espiritu sa Saad,12 ug kinsa sa ingon mosunod sa sagradong mga pakigsaad nga giuban sa mga ordinansa. Kini nga mga panalangin naglakip sa pagpasaylo sa mga sala,13 sa gahum sa pagkadiosnon,14 ug sa pagpakig-uban sa Espiritu Santo,15 uban sa paggiya, inspirasyon, paghupay, kalinaw, paglaum, ug pagbalaan nga nag-uban niana nga gasa.16
Ang labing mahinungdanon sa tanang mga panalangin ug mga gasa sa Dios mao ang kinabuhi nga dayon---nga mao ang kinabuhi nga gipuy-an a Dios!17 Kini nga gasa gihatag lamang niadtong kinsa modawat sa tanang mga ordinansa sa ebanghelyo ug motuman sa mga pakigsaad nga anaa sa bag-o ug walay katapusang pakigsaad.18 Sa mga pulong sa Ginoo: “Ang bag-o ug walay katapusan nga pakigsaad … gitukod alang sa kahingpitan sa akong himaya.”19 Sa pagkatinuod, kadtong kinsa mosulod sa bag-o ug walay katapusan nga pakigsaad ug molahutay hangtud sa katapusan “mobangon sa unang pagkabanhaw … ug makapanunod sa mga trono, mga gingharian, mga kayutaan, ug mga kagamhanan, mga kamandoan, tanan nga mga kahitas-an ug kahiladman.”20 Ang Ginoo tataw nga mipahayag nga “kini pagahimoon ngadto kanila sa tanan nga mga butang bisan unsa ang akong sulugoon mobutang diha kanila, karon ug hangtud sa tanan nga kahangturan; ug walay kapuslanan sa panahon nga sila wala na sa kalibutan; ug sila moagi sa mga anghel, ug sa mga dios, diin gipahimutang didto, diha sa ilang pagkahimaya ug himaya sa tanan nga mga butang, ingon nga nabugkos diha sa ilang mga ulo, diin nga himaya mao ang kahingpitan ug pagpadayon sa mga binhi hangtud sa hangtud. Niana sila mga dios.”21
Sa laktud, kadtong mosulod sa bag-o ug walay katapusan nga pakigsaad ug matinud-anong molahutay hangtud sa katapusan (1) modawat sa kahingpitan sa himaya sa Dios, (2) motagamtam sa gahum sa pagkadiosnon sa karon ug sa kahangturan,22 (3) pagahimayaon, (4) motagamtam sa mahangturon nga kaminyoon ug paglambo, ug (5) mahimong dios. Kon tingbon, kini nga mga panalangin mosangput sa gasa sa kinabuhing dayon.
Kita Kinahanglan Gayud nga Mosunod sa Matag Pakigsaad sulod sa Bag-o ug Walay Katapusan nga Pakigsaad
Ang Ginoo tin-aw nga mipahayag nga madawat lamang nato kining langitnon nga mga panalangin samtang kita nagsunod sa Iyang mga balaod nga gihan-ay diha sa bag-o ug walay katapusan nga pakigsaad: “Sa bag-o ug walay katapusan nga pakigsaad … natukod alang sa kahingpitan sa akong himaya; ug siya nga modawat sa kahingpitan niini kinahanglan gayud nga mosunod sa balaod, o siya pagasilotan, miingon ang Ginoong Dios.”23 Siya usab mipahayag, “Alang sa tanan kinsa may panalangin sa akong mga kamot kinahanglan nga motuman sa balaod nga gitudlo alang niana nga panalangin, ug sa mga kinahanglanon niini, ingon nga gitukod sa wala pa ang katukuran sa kalibutan.”24 Diha sa sama nga seksyon sa Doktrina ug mga Pakigsaad, ang Ginoo mipalanog niini nga punto: “Sa pagkatinuod, sa pagkatinuod, Ako moingon nganha kaninyo, gawas kon kamo mosunod sa akong balaod kamo dili makakab-ut niini nga himaya.”25
Ang tinuoray nga panginahanglan mao nga kita kinahanglan gayud nga mosunod sa mga balaod sa Dios aron makadawat sa himaya nga Iyang gitanyag sa matinud-anon naglakip sa tanan nga mga ordinansa ug mga pakigsaad sulod sa bag-o ug walay katapusan nga pakigsaad. Sama pananglit, kon ako dili makadawat sa mga ordinansa ug motuman sa pakigsaad sa bunyag, ako pagasilotan, nagpasabut nga ako dili mouswag—ako dili makapanunod sa kahingpitan sa Iyang himaya. Sa samang paagi kon ako dili makadawat sa mga ordinansa sa templo ug motuman sa kauban nga mga pakigsaad o, sa pagkatinuod, kon ako modumili sa pagdawat sa bisan unsa nga mga ordinansa sa ebanghelyo o kon ako modumili sa pagsunod sa bisan hain nga kauban nga mga pakigsaad, ako dili pagahimayaon. Hinoon, ako pagasilotan, nagpasabut nga ang akong pag-uswag pagahunungon. Sa laktud, ako kinahanglan gayud nga modawat sa matag ordinansa sa ebanghelyo ug mosunod sa matag giuban nga pakigsaad kon ang kinabuhing dayon mao ang akong tinguha.
Ang mga kondisyon sa mga pakigsaad nga atong giuyunan isip mga Santos sa Ulahing mga Adlaw nga sundon mahimong grupohon sa upat ka mga kategoriya: (1) sa pagdala diha kanato sa ngalan sa Manluluwas, sa paghinumdom Kaniya kanunay, ug sa pagsunod sa Iyang ehemplo; (2) sa pagsunod sa Iyang mga sugo; (3) andam sa pagserbisyo sa mga anak sa Dios isip kabahin sa Iyang buhat sa kaluwasan, bisan sa personal nga sakripisyo; ug (4) sa pagpahinungod sa atong mga kaugalingon ug sa atong katigayunan ngadto sa buhat sa Ginoo.
Sumala sa balaod sa Dios, ang ebanghelyo (ug ang mga himaya nga gitanyag niini) madawat pinaagi sa piho nga mga ordinansa nga gipahigayon pinaagi sa awtoridad sa priesthood. Pinaagi kini sa mga ordinansa sa priesthood nga ang gahum sa pagkadiosnon makita diha sa atong mga kinabuhi—apan kutob lamang diha nga kita motuman sa giuban nga mga pakigsaad. Ang pakigsaad nagpalihok, o naghatag og kinabuhi ngadto, sa mga ordinansa, sama lamang sa usa ka makina nga nagpaandar sa sakyanan ug nakapahimo niini sa pangbiyahe sa mga nanakay gikan sa usa ka dapit ngadto sa lain. Sa laktud, kutob nga kita mahunahunaon ug matinud-anong motuman sa mga pakigsaad nga kauban sa mga ordinansa nga atong nadawat, kita motubo diha sa atong kahibalo sa Dios ug makasinati og “gahum sa pagka-diosnon”26 pinaagi sa grasya sa Dios tungod sa Pag-ula ni Kristo.27
Ang Dapit sa Kaminyoon diha sa Bag-o ug Walay Katapusan nga Pakigsaad
Sa Doktrina ug mga Pakigsaad 132:4, ang Ginoo misulti nga Siya mopadayag og “usa ka” bag-o ug walay katapusan nga pakigsaad ug midugang, “Kon ikaw dili mosunod niana nga pakigsaad, niana ikaw silotan; kay walay usa nga makasalikway niini nga pakigsaad ug matugutan sa pagsulod ngadto sa akong himaya.” Kini nga mga pulong nagpasabut sa pakigsaad sa mahangturong kaminyoon28 nga gipahigayon pinaagi sa tukmang awtoridad sa priesthood,29 nga usa ka importante ug mahinungdanon nga bahin sa “ang” bag-o ug walay katapusan nga pakigsaad (ang kahingpitan sa gipahiuli nga ebanghelyo ni Jesukristo).30 Ang Ginoo mihatag og gibug-aton sa ka importante kaayo sa pakigsaad sa mahangturong kaminyoon pinaagi sa pagsaysay kanato nga kadtong kinsa mosalikway niini nga pakigsaad dili makadawat og kinabuhing dayon.31
Pipila sa mga tawo, lakip sa pipila ka mga miyembro sa Simbahan, dili husto ang pagsabut sa Doktrina ug mga Pakigsaad 132:4 nga gipakaingon og nagpasabut nga ang dinaghan nga kaminyoon gikinahanglan alang sa kahimayaan, naggiya kanila sa pagtuo nga ang dinaghan nga kaminyoon usa ka unang panginahanglan alang sa kahimayaan diha sa mahangturong kalibutan. Kini, hinoon, walay suporta sa mga pagpadayag. Ingon nga narekord sa Doktrina ug mga Pakigsaad 131 ug 132, ang Ginoo mipaila sa balaod sa mahangturong kaminyoon pinaagi sa tataw nga pagpasabut ngadto sa pag-bugkos sa usa ka lalaki ug sa usa ka babaye (tan-awa sa Doktrina ug mga Pakigsaad 132:4–7, 15–25). Pinaagi sa paghan-ay sa balaod sa mahangturon nga kaminyoon sa kinatibuk-ang kahulugan nga usay bana ug usay asawa nga kaminyoon, gipasabut og maayo sa Ginoo nga ang mga panalangin sa kahimayaan, gihatag ngadto sa matag lalaki ug matag babaye kinsa takus nga mosulod ngadto sa pakigsaad sa mahangturong kaminyoon nga gipahigayon pinaagi sa tukmang awtoridad sa priesthood, dili mag-agad kon kana dinaghan o usay bana ug usay asawa nga kaminyoon.32
Litrato sa Templo sa Rexburg Idaho
Ang Doktrina ug mga Pakigsaad 132:19 miklaro nga ang kinabuhing dayon gisaad ngadto sa usay bana ug usay asawa nga magtiayon kinsa gibugkos pinaagi sa awtoridad sa priesthood ug kinsa motuman sa pakigsaad—nga walay dugang nga kondisyon o gikinahanglan. Bisan kinsa nga lalaki ug babaye kinsa nabugkos niini nga paagi ug kinsa motuman sa pakigsaad pagahimayaon.33 Ang makasaysayanon nga nabatasan gipasubay sa mga doktrina sa mahangturon nga kaminyoon ingon nga gipasabut dinhi.34 Ang ordinansa nga nagbugkos sa mga magtiayon alang sa kahangturan naglakip sa managsamang mga pakigsaad ug mga panalangin alang sa usay bana ug usay asawa nga mga kaminyoon ug alang sa gitugutan nga dinaghang mga kaminyoon nga gipahigayon sa nangaging dugay na nga panahon. Kining sama nga mga pakigsaad ug mga panalangin maanaa human niini nga kinabuhi ngadto sa matinud-anon kinsa walay oportunidad nga mabugkos dinhi sa mortalidad.35
Human mapadayag ang balaod ug pakigsaad sa mahangturong kaminyoon tali sa usa ka lalaki ug sa usa ka babaye, ang Ginoo mitudlo kang Joseph Smith nga ang usa ka lalaki diha sa pagkamatarung makaminyo og labaw sa usa ka asawa sulod sa pakigsaad sa mahangturong kaminyoon kon gitugutan o gisugo sa Ginoo pinaagi sa Iyang takus nga gi-orden nga propeta (kinsa naghupot sa husto nga mga yawe sa priesthood).36 Ang pagtugot ug pagsugo sa paghimo og dinaghan nga kaminyoon, nga gihatag sa Ginoo ngadto ni Abraham ug sa ubang mga propeta sa karaan,37 usab gihatag ngadto kang Propeta Joseph Smith: “Ako mohatag nganha kanimo, akong sulugoon Joseph, usa ka katungdanan, ug ipahiuli ang tanan nga mga butang.”38
Mga tuig milabay, gipahunong sa Ginoo ang Iyang pagtugot ug pagsugo alang sa mga miyembro sa Simbahan nga mosulod ngadto sa gihimo nga dinaghan nga kaminyoon (sa laing pagkasulti, pagpabugkos ngadto sa labaw sa usa ka buhi nga kapikas) sa dihang si Presidente Wilford Woodruff (1807–98) mipagawas og Manifesto sa 1890.39 Kini mitapos sa paghimo og dinaghan nga kaminyoon, nagpasabut nga walay miyembro sa Simbahan nga maminyo o mabugkos og labaw sa usa ka buhi nga kapikas. Hinumduman, ang Manifesto wala magpugong ni bisan kinsang takus nga lalaki kinsa nabugkos ngadto sa usa ka asawa nga karon patay na nga mabugkos ngadto sa lain, nga buhi nga kapikas. Ang nahauna pinasubay sa gipadayag nga doktrina nga ang usay bana ug usay asawa nga kaminyoon mao ang sumbanan sa Ginoo alang sa kaminyoon gawas kon Siya mopahayag ug motugot sa laing bahin pinaagi sa Iyang takus nga gitudlo nga representante, nagpasabut sa Presidente ug propeta sa Simbahan.40
Alang sa Unang Kapangulohan ug agi og tubag sa pangutana “Ang dinaghan o celestial nga kaminyoon importante ba sa usa ka kahingpitan sa himaya diha sa kalibutan nga moabut?” Si Presidente Charles W. Penrose (1832–1925) misulat: “Ang celestial nga kaminyoon mahinungdanon sa usa ka kahingpitan sa himaya sa kalibutan nga moabut, ingon nga gipasabut diha sa pagpadayag kalabut niini; apan wala kini ipahayag nga ang dinaghan nga kaminyoon sa ingon importante.”41
Niadtong 1933 ang Unang Kapangulohan mipahayag: “Ang celestial nga kaminyoon—nga mao, ang kaminyoon alang sa karon ug sa kahangturan—ug ang daghan og asawa o dinaghan nga kaminyoon mga pulong nga dili sama og kahulugan. Ang usay bana ug usay asawa nga kaminyoon alang sa karon ug sa kahangturan, gipahigayon sa atong mga templo pinasubay sa pulong sa Ginoo ug sa mga balaod sa Simbahan, mga Celestial nga kaminyoon.”42
Pinasubay niini nga mga pamahayag si Elder Bruce R. McConkie (1915–85) sa Korum sa Napulog Duha ka mga Apostoles misulat: “Ang dinaghan nga kaminyoon, dili importante sa kaluwasan o sa kahimayaan. Si Nephi ug ang iyang mga katawhan wala tuguti sa gahum nga makabaton og labaw sa usa ka asawa ug gani sila makaangkon sa matag panalangin sa kahangturan nga gitanyag kanunay sa Ginoo ngadto ni bisan kinsa nga tawo. Sa atong panahon, gimubo sa Ginoo pinaagi sa pagpadayag sa tibuok doktrina sa kahimayaan ug gipasikad kini diha sa kaminyoon sa usa ka tawo ngadto sa usa ka babaye. (D&P 132:1–28.) Human niana iyang gidugang ang mga baruganan kalabut sa dinaghan og mga asawa uban sa tataw nga kasabutan nga bisan hain sa mao nga kaminyoon mahimong balido lamang kon gitugutan sa Presidente sa Simbahan. (D&P 132:7, 29–6.)”43
Karon, ingon nga gitudlo sa Ginoo pinaagi sa Iyang mga propeta, Ang Simbahan ni Jesukristo sa mga Santos sa Ulahing mga Adlaw wala na mosulod sa dinaghan nga kaminyoon, ug ang mga indibidwal kinsa misulod niini wala tuguti nga magpamiyembro sa Simbahan o magpabilin nga mga miyembro niini. Ang Simbahan nagpamatuod nga ang usay bana ug usay asawa nga kaminyoon mao ang sumbanan sa Dios alang sa kaminyoon gawas kon Siya nagtugot o nagsugo pinaagi sa Iyang propeta. Ang Simbahan wala magtudlo nga ang pag-apil sa dinaghan nga kaminyoon gikinahanglan alang sa kahimayaan.
Panapos
Adunay daghan nga wala nato mahibaloi kabahin sa kinabuhi human niini dinhi; bisan pa niana, kita nahibalo nga ang pagdawat ug pagsunod sulod sa bag-o ug walay katapusan nga pakigsaad gikinahanglan aron makapanunod sa kinabuhing dayon. Kita usab nahibalo nga tungod niana, “ang sama nga panag-uban nga ania kanato dinhi”—sa mortalidad—“maanaa kanato didto”—sa kinabuhi human dinhi—“lamang kini pagaubanan sa walay katapusan nga himaya.”44
Ang langitnong mga panalangin nga anaa pinaagi sa bag-o ug walay katapusan nga pakigsaad importante sa mahinungdanong katuyoan sa plano sa Amahan ug sa Pagpahiuli sa Simbahan ni Jesukristo niining ulahing mga adlaw. Ang “hingpit nga kahayag sa paglaum”45 kining mahimayaon nga mga pakigsaad nga nagdasig sa mga matinud-anon naghatag og “angkla ngadto sa kalag sa mga katawhan, diin makahimo kanila nga tinuod ug lig-on, kanunay puno sa maayo nga buhat, ingon nga gigiyahan sa paghimaya sa Dios.”46 Alang sa tanan kinsa nagtuman sa mga kondisyon sa bag-o ug walay katapusan nga pakigsaad, ang ganti mao ang hingpit nga kalipay ug kalinaw niini nga kalibutan ug kinabuhing dayon sa sunod.47