Usa ka Leksyon gikan sa Akong Amahan

Ni Elder David A. Bednar

Sa Korum sa Napulog Duha ka mga Apostoles

Ako nakakat-on og talagsaon nga leksyon gikan sa akong amahan mahitungod sa awtoridad sa priesthood ug gahum.

Nagdako ko sa usa ka panimalay uban sa matinud-anon nga inahan ug usa ka talagsaon nga amahan. Ang akong papa dili miyembro sa atong Simbahan apan motambong gihapon sa mga miting sa Simbahan uban sa among pamilya. Mag-coach siya sa among softball team sa ward ug nakatabang sa mga kalihokan sa Scout.

Isip batang lalaki akong gipangutana ang akong papa sa makadaghan matag semana kon kanus-a siya magpabunyag. Ang akong amahan mitubag matag higayon, “David, mopasakop ko sa Simbahan sa higayon nga akong mahibaloan nga mao kini ang hustong butang nga buhaton.”

Usa ka Dominggo gipangutana nako ang akong papa kon kanus-a siya magpabunyag. Mipahiyom lamang siya ug nangutana kanako. “David, ang inyong simbahan nagtudlo nga ang priesthood gikuha gikan sa yuta sa karaang panahon ug gipahiuli pinaagi sa langitnong mga mensahero. Kon ang inyong simbahan tinud-anay nga anaa ang gipahiuli nga priesthood sa Dios, nan ngano man nga daghan kaayo sa mga kalalakin-an sa inyong simbahan nga walay kalainan mahitungod sa pagbuhat sa ilang mga katungdanan sa priesthood kay sa mga kalalakin-an sa akong simbahan?”

Nablangko ang akong hunahuna. Wala koy ikatubag sa akong papa.

Ako nasayud nga ang mga kalalakin-an kinsa naghupot sa priesthood kinahanglan molihok nga lahi kay sa ubang kalalakin-an. Ang mga naghupot sa priesthood kinahanglang dili lamang modawat sa awtoridad sa priesthood apan magmatinud-anon usab ug takus sa paggamit sa gahum sa Dios.

Mihukom ko nga dili gayud ko gusto nga mahimong bati nga ehemplo ngadto sa akong amahan. Gusto lang ko nga magbinuotan. Ang Ginoo nagkinahanglan kanatong tanan nga naghupot sa priesthood nga mahimong madungganon, mahiyason, ug maayo nga mga lalaki sa tanang panahon ug sa tanan nga mga dapit.

Pipila ka mga tuig ang milabay, ang akong amahan nabunyagan na. Ako adunay oportunidad sa pagtugyan diha kaniya sa Aaronic ug Melchizedek Priesthood. Usa sa talagsaon nga mga kasinatian sa akong kinabuhi mao ang makita ang akong papa nga nakadawat sa awtoridad ug gahum sa priesthood.