Mga Tingog sa mga Santos sa Ulahing mga Adlaw
Giunsa Nila Pagkahibalo sa Akong Panginahanglan?
Hannah Eiselin, Arizona, USA
Paghulagway pinaagi ni Stan Fellows
Hapit 20 ka tuig ang milabay akong nadawat ang akong mission call sa pagserbisyo sa Japan. Uban sa hilabihan nga kahinam ug mga kabalaka, nangandam ako sa pagbiya alang sa akong misyon sa Enero. Niining panahona ang akong mga ginikanan nawad-an sa ilang mga trabaho.
Aduna koy pundo alang sa akong misyon sa higayon nga moabut ko, apan ang among pamilya naglisud sa pinansyal. Dili ko sigurado kon asa ko og kwarta alang sa mga unang galastuhan sama sa mga sinina sa misyon, bagahe, ug uban pang mga kinahanglanon. Nagtrabaho ko og part-time nga trabaho apan dili paigo. Labi na kong nabalaka unsaon nako nga makakwarta aron maka-apply dayon og pasaporte aron aduna na ako niini sa panahon nga mobiya na alang sa Japan.
Usa ka hapon, nawad-an na sa paglaum, miadto ko sa akong kwarto ug mihangyo sa Langitnong Amahan. Akong gipakigbahin ang akong tinguha sa pagserbisyo sa Japan ug sa akong pasalamat nga ang akong damgo sa pagserbisyo og misyon hapit na matinuod. Akong gipugngan ang akong mga luha, nagsulti Kaniya nga nagkinahanglan ko og $75 alang sa pasaporte nga wala gayud ako. Sa dihang mibarug ko gikan sa akong pag-ampo, ako nasayud nga ang tanang butang mamaayo ra. Wala ko masayud kon unsaon, apan usa ka hilom nga kalinaw misiguro kanako nga ang Ginoo mosangkap.
Wala madugay nianang adlawa akong giablihan ang among mailbox ug nakakita og Christmas card sa sulod. Ang indibidwal nga mihatud niini naningkamot gayud nga dili mailhan. Walay marka sa koreyo ang card; kini personal gayud nga gihatud.
Sa sulod sa kard adunay gi-type nga, “Congratulations! Ikaw ang makadawat sa pinasulagma nga mga buhat sa Kristohanong kamabination. Maayong Pasko, Hannah. Good luck sa imong misyon.”
Sulod sa kard mao ang $100. Mibarug ko sa akong atubangan nga pultahan ug mihilak. Kinsay nagbuhat niini, ug giunsa nila pagkahibalo sa akong panginahanglan?
Paglabay sa katuigan wala gihapon ko mahibalo kinsa ang naghatud sa kwarta sa akong balay nianang adlawa. Ako naghunahuna niana nga tawo, o mga tawo, sa makadaghan sukad niadto. Gipakita nila kon unsay akong gituohan nga gipasabut ni Elder Joseph B. Wirthlin (1917–2008) sa Korum sa Napulog Duha ka mga Apostoles sa dihang siya miingon: “Ang kalooy sa Kristohanon nga mga higala motandog sa kinahiladman ug makapausab sa atong kinabuhi. … Niini nga Simbahan, ang mga pag-ampo alang sa tabang kanunay nga tubagon sa Ginoo pinaagi sa yano, matag adlaw nga pagserbisyo sa nagpakabana nga mga kaigsoonan. Sa kamaayo sa tinuod nga mga higala, akong nakita ang gipadan-ag nga kalooy sa Ginoo Mismo.”1
Kana nga buhat sa pagkamabination nakapausab kanako, nagtabang kanako nga makabiya sa saktong panahon alang sa akong misyon ug nagdasig kanako sa pagpangita og mga paagi nga mahimong tubag sa mga pag-ampo sa uban.