Mga Kasulatan alang kang Spencer
Ni Elder Marcus B. Nash
sa Seventy
“Nahigugma ko’s kasulatan, Ug sa pagbasa ko, Gibati kong ania ang Espiritu” (Songbook sa mga Bata, 66).
Sa dihang ang akong asawa ug ako naminyo, si Presidente Spencer W. Kimball (1895–1985) miawhag sa mga miyembro sa Simbahan sa pagbasa sa mga kasulatan matag adlaw uban sa ilang mga pamilya. Gusto namong mosunod sa propeta, busa mihukom mi nga mag-uban sa pagbuhat niana isip magtiayon ug dayon uban sa among umaabut nga mga anak.
Mga tuig ang milabay, ang among pamilya mitubo ngadto sa lima ka mga anak, lakip sa among kamanghuran, si Spencer.
Makausa, dihang si Spencer unom ka tuig na ang panuigon, ang akong asawa ug ako milakaw sulod sa pipila ka adlaw ug gibilin ang mga bata sa babysitter. Sa among pagpamauli, mitupad ko og lingkod ni Spencer ug nangutana kaniya kon kumusta man ang tanan samtang didto pa kami sa layo.
Siya miingon nako nga naglisud siya sa pagkatulog. Sa dihang nangutana ko nganong dili maayo ang iyang pagkatulog, iya kining gihunahuna ug miingon nga wala siya kahibalo.
Pagkataud-taud nianang gabhiona ang among pamilya misugod sa among tulumanon matag gabii nga mag-uban sa pagbasa sa Basahon ni Mormon.
Sa kalit lang si Spencer misinggit, “Mao diay!” Nangutana ko kon unsa ang iyang gisulti. “Mao kana nganong dili maayo ang akong pagkatulog sa gabii.”
“Nganong dili man ka makatulog?” Nangutana ko
“Wala kami nagbasa sa mga kasulatan sa gabii samtang wala kamo, ug ganahan ko sa akong bation sa mga kasulatan.”
Si Spencer nakakat-on nga ang pagbasa sa mga kasulatan matag adlaw naghatag kanamo og kahupayan, kalinaw, ug giya sa Espiritu Santo.
Makakat-on kita sa paghigugma sa mga kasulatan kon ato kining basahon sa matag adlaw. Kon atong buhaton, kita magiyahan sa Espiritu Santo ug lig-unon sa atong Langitnong Amahan.