Ang Bag-o nga Batan-ong Lalaki
Ako lang ang aktibo nga priest sa akong bag-o nga ward. Unsaon man nako sa pagpatambong sa ubang mga priest sa simbahan?
Mga paghulagway pinaagi ni Greg Newbold
Sa dihang ang akong pamilya namalhin human sa pipila ka bulan nga ako nag-18 na, ako anaa na sa usa ka bag-ong ward ug nag-atubang og usa ka hagit. Sulod sa duha ka semana gikan sa akong pagbalhin, hapit tanan nga mga priest nahimo nang mga elder. Gitawag usab ko nga mahimong unang assistant sa korum sa mga priest.
Sa paghatag kanako niini nga calling, ang bishop mipasabut nga daghang mga priest ang naa sa attendance roll, apan hapit walay mitunga. Daghan kaayo ang atong buluhaton sa pag-awhag sa mga tawo aron manambong.
“Dapita lang ang mga tawo sa pag-anhi,” siya miingon.
Usa lamang ka priest ang miadto sa simbahan, usa ka lalaki nga ginganlan og Ryan, kinsa motunga og mga kaduha ra kada buwan. Nakahukom ko nga manuktok sa pultahan sa mga sakop sa among korum nga dili kaayo aktibo ug dapiton sila sa among mga kalihokan. Gikulbaan ko, nahadlok nga masuko sila nako sa pagdapit kanila ngadto sa simbahan. Naghunahuna ko nga wala sila moadto tungod kay dili sila ganahan sa simbahan. Apan nahunahunaan usab nako nga maayo kining nga pagbansay alang sa umaabut nako nga misyon sa pagsulay sa pagdapit, busa akong gibaliwala kana nga kahadlok ug misugod sa pagpanawag sa uban nga mga priest o mihapit sa ilang mga panimalay. Gidapit nako sila ngadto sa fireside, sa mga kalihokan, ngadto sa simbahan.
Ang nakapatingala kanako mao nga ang uban tinuoray nga mitubag ug miabut. Sa katapusan kami aduna nay usa ka grupo nga upat ka mga priest nga regular nang motambong. Dili sa ingon nga dili sila ganahan sa simbahan—naghulat lang sila nga dapiton sa pag-anhi. Nakuyawan lang sila mahitungod sa bag-ong sitwasyon—pagtambong sa simbahan—sama nako sa bag-o pa.
Ang pipila sa mga kalihokan mas malampuson kay sa uban. Ang tanan mitunga alang sa volleyball, apan nanlimbasug ko sa pagdala sa mga tawo aron motambong sa uban nga mga kalihokan.
Ang komperensya sa kabatan-onan nianang tuiga labi gayud ka magantihon samtang nagtan-aw ko sa mga batan-ong lalaki nga mibarug ug mihatag sa ilang pagpamatuod. Akong gibati nga nakahimo ko og kalainan sa ilang kinabuhi.
Ang usa sa mga kalainan nga akong nakita mao nga si Ryan mitambong na sa simbahan matag semana ug nahimong maayo ang among panaghigala.
Nadawat namo ni Ryan ang Melchizedek Priesthood mga unom ka bulan gikan sa akong pagbalhin. Akong gipalabi nga humanon ang misyon una mosulod sa kolehiyo aron makatrabaho ko aron makatigum og kwarta alang sa akong pagmisyon. Si Ryan naestablisar na sa usa ka trabaho, ug siya mihukom nga dili usab moeskwela sa kolehiyo. Human sa trabaho kanunay kaming magkuyog sa paglingaw-lingaw.
Makausa, nagtukaw mi hapit sa tibuok gabii nga naningkamot nga mahuman ang basahon sa Alma isip unang higayon ni Ryan sa pagbasa sa Basahon ni Mormon. Makaluya apan nakapakusgan sa espirituhanong paagi. Nindot usab kaayo nga makita ang mga kausaban nga nahimo ni Ryan sa iyang kinabuhi. Iyang gibiyaan ang naandan nga mga gawi [habit], mihimo og mas maayo, ug miusab sa uban niyang mga higala aron makauban niya ang mga tawo nga pareho niya og mga sumbanan.
Naglantaw ko sa akong pagmisyon sukad pa sa pagsugod nako og adto sa simbahan pila ka tuig na ang milabay. Si Ryan dili sigurado kon siya moadto. Samtang naglingaw-lingaw, among gihisgutan ang akong misyon ug ang akong kadasig sa pagserbisyo. Samtang ako siyang gi-awhag ug mitubag sa mga pangutana sa ebanghelyo, nakabaton ko og dugang nga pagsalig sa akong kaugalingong mga abilidad sa pagserbisyo isip misyonaryo. Igo na ang pangidaron ni Ryan sa pagmisyon apan nanlimbasug siya sa iyang desisyon.
“Dili ko sigurado kon ang akong pagpamatuod igo na ba ang kalig-on, bisan tuod og maayo ang akong gibati mahitungod sa Simbahan nianang panahona,” siya miingon. “Gusto kong moadto, apan lisud gayud nga mobiya sa pamilya.”
Sa katapusan miabut ra gyud ang adlaw nga makasugod na ko sa pag-fill up sa akong mga papeles sa misyon. Sa dihang akong gisultihan si Ryan, nasurprisa ko nga midesider na usab siya sa pagserbisyo. Ang among mga mission call miabut sa samang gabii. Si Ryan mibiya sa pagserbisyo sa Canada sa usa ka bulan sa wala pa magsugod ang akong misyon sa France.
Sa dihang nakapauli na ko human sa duha ka tuig, akong gikontak ang tanan nga mga priest nga akong nakauban. Nakapaguol kini nako nga nakahibalo nga ang uban mihunong sa pagsimba sa wala madugay human sa akong pagbiya, apan nalipay ko nga makita pag-usab si Ryan. Nakaserbisyo siya og madungganon nga misyon, ug sama kang Alma ug sa anak nga mga lalaki ni Mosiah, ako adunay mas labaw nga kalipay nga makita nga siya mao gihapon ang akong igsoon sa Ginoo (tan-awa sa Alma 17:2).