Personal nga Kauswagan sa Akong Family Tree
Ang tagsulat nagpuyo sa Manaus, Brazil.
Ang akong igsoong lalaki ug ako mao lang ang mga miyembro sa akong pamilya diha sa Simbahan—mao kana ang akong nahunahunaan sa wala pa magsugod sa akong buhat sa family history.
Kanunay kong maglangay pagbuhat sa akong genealogy. Apan ang akong tinguha sa pagserbisyo og misyon migiya nako sa paghimo og mga tumong aron sa pagtabang sa pagpangandam sa akong kaugalingon nga mahimong mas maayo nga misyonaryo. Uban sa tabang sa dinasig nga bishop, midesisyon ko nga magsugod sa pagtrabaho sa Personal nga Kauswagan. Aron matuman ang piho nga mga tumong ug mga proyekto sa maayong mga buhat, kinahanglan ko nga moapil sa genealogy. Busa mitrabaho ko.
Nasayud ko nga ang Espiritu migiya kanako, tungod kay usa ka Dominggo sa gabii, human sa tulo lamang ka oras sa trabaho, usa ka talagsaong butang ang nahitabo.
Sa dihang ako nang gisugdan, akong nahinumduman nga ang akong apohan sa tuhod nahimong gobernador sa estado sa Amazonas, Brazil. Busa akong gi-type ang iyang ngalan sa usa ka search engine sa Internet, ug sa akong katingala, akong nakita ang usa ka page sa Wikipedia mahitungod sa akong apohan sa tuhod nga lalaki ug apohan sa tuhod nga babaye! Diha-diha dayon akong nailhan diha kanila ang mga talento ug mga gasa nga naa nako, ug misugod na sa pagsaka ang akong emosyon. Apan aduna pay mas daghang kinahanglan madiskobrehan.
Nagtan-aw sa mga link sa page, akong nabantayan ang usa niini miingon og “family tree.” Ako kining gi-click, ug akong nakit-an ang mga sanga sa akong pamilya nga wala gani koy ideya nga anaa diay kini. Apan ang labing nakakuha sa akong atensyon mao ang ngalan sa akong apohan, si Rosalina Meireles, nga klaro kaayo nga nagpuyo sa Utah.
Nahingangha ko. Abi nako og ako ug ang akong igsoong lalaki lang ang mga miyembro sa Simbahan. Aduna pa gayud kahay ubang mga miyembro sa Simbahan sa akong pamilya? Sa dihang akong gi-click ang iyang ngalan, akong nakita ang link sa usa ka page sa Facebook, mao nga gikontak nako siya. Sulod sa duha ka adlaw nakadawat ko og usa ka mensahe gikan kaniya, nga nagpamatuod nga kami paryente ug nga siya usab usa ka miyembro sa Simbahan.
Gibati nako ang dako kaayong pasalamat sa Langitnong Amahan sa pagtugot kanako nga mobati og ingon ka dakong kalipay nga akong gibati nianang higayuna.
Nagpadayon ko sa pagsiksik alang sa akong mga nangamatay na nga mga katigulangan, ug ang Langitnong Amahan mipanalangin kanako og daghang mga ngalan sa pamilya nga akong madala ngadto sa templo. Apan Siya usab nakatabang kanako nga makakaplag sa buhi nga mga sakop sa pamilya kinsa matinud-anon diha sa gipahiuli nga ebanghelyo ni Jesukristo. Ug kining tanan utang kabubut-on nako ngadto sa Personal nga Kauswagan, buhat sa family history, ug sa akong tinguha sa pagserbisyo og misyon.