Mga Profile sa Young Adult
Pagpuyo isip usa ka Saksi sa Germany
Ang tagsulat nagpuyo sa Germany.
Ang pagbarug alang sa iyang gituohan nakapasayon sa pagpakigbahin niini.
Mga litrato sa maayong kabubut-on sa Esther Graf
30 lang ka minutos sakyon sa tren gikan sa metropolis sa Hannover ug komportabling nataliwad-an sa ektaryang mga umahan nga puno sa kabulakan sa tingpamulak nahimutang ang gamayng siyudad sa Germany nga Stadthagen. Kini mao ang dapit diin ang 19 anyos nga si Esther Graf midako. Mao kini ang dapit diin ang tanan mahimo rang lakawon o bisiklitahon, diin ang mga bakery ug mga tindahan sa ice cream daghan kaayo diha sa kadalanan, ug diin ang mga merkado sa kada adlaw mopuno sa city square.
Ang Stadthagen mao usab ang dapit sa mauswagon nga komunidad sa mga Santos sa Ulahing mga Adlaw.
Bisan og gamay ra nga pagka-siyudad, ang Stadthagen aduna kini dako nga ward—dili sagad sa Germany, diin dili kaabut og lima ka mga miyembro sa kada 10,000 ka mga German. Apan alang kang Esther mao na kini ang hingpit nga lugar aron magkat-on sa pagsunod sa mga baruganan sa ebanghelyo ni Jesukristo ug unsaon sa paggamit niadtong mga baruganan sa pagserbisyo ug pagpanalangin sa uban.
Sa dihang nag-14 anyos na si Esther, nadawat niya ang iyang patriyarkal nga panalangin, nga nakahatag og usa ka importante nga pag-amgo. “Naklaro na kini nako kon unsa gayud ako ka importante ngadto sa Langitnong Amahan,” siya miingon. “Nakat-unan nako kon unsa ka importante kitang tanan ngadto Kaniya.”
Siya midala niana nga kahibalo ug migamit niini sa iyang pakigrelasyon sa uban.
Diha sa iyang calling sa stake young single adult council, sama pananglit, siya ang responsable sa pagsiguro nga ang tanan mobati nga naapil sa pundok. “Nagkat-on ko nga dili mahimong kritikal sa uban apan makig-ilaila hinoon kanila.”
Iya usab kanang hinumduman kon anaa siya sa eskwelahan. “Kanunay kong mapangutan-an kabahin sa akong tinuohan, apan wala ko kini giisip nga dautan sa bisan unsang paagi,” siya miingon. “Sa bisan unsang paagi kini nakahatag nakog kalipay tungod kay niana yano nakong napahinumduman ang akong kaugalingon kon unsa ka dako ang natabang niini kanako ug unsa ka dako ang nahatag niini sa akong kinabuhi. Pinaagi sa ebanghelyo daghan kaayo ang akong nahibaloan.
“Kanunayng adunay mga tawo nga magbugal-bugal sa atong pagtuo ug wala makasabut niini,” siya miingon, “apan kini dili gayud dautan kon kita mobarug alang sa unsay atong gituohan.”
Ang gugma ug pagsalig ni Esther diha sa Dios maoy nakatabang kaniya og maayo sa pagsunod ug sa pagpakigbahin sa ebanghelyo.
“Sa dili ka pa mabalaka,” siya miingon, “salig una sa Dios. Sa higayon nga ako kanang buhaton ug magbaton ako og hugot nga pagtuo, ang tanang butang sayon ra. Kon kita mosalig sa Dios, makapadayon kita sa atong mga kinabuhi uban sa hugot nga pagtuo ug pagsalig sa umaabut. Kon ato kanang buhaton, makapuyo kita isip mga saksi sa Dios.”