Sila Nakaila ni Joseph
Unsa nga matang sa tawo si Joseph Smith, ang Propeta sa Pagpahiuli? Kita makakat-on og dugang mahitungod kaniya pinaagi sa pagbasa sa unsay gisulti kabahin niya niadtong nakahimamat niya ug kadtong nakaila niya pag-ayo.
Mga Dili Mormon nga Nakahimamat ni Joseph
Mga paghulagway pinaagi ni Brooke Smart
Nakadayeg ang daghang mga dili Mormon nga nakahimamat ni Joseph. Sama pananglit, si Josiah Quincy, migradwar sa Harvard ug sa dili madugay mahimong mayor sa Boston, mibisita kang Joseph Smith sa Nauvoo. Siya miingon nga si Joseph usa ka “talagsaong tawo nga angay ipasabut,” gipakatawo aron mangulo, “adunay kusganong pamayhon … kinsa ingon og natural lang nga sundon.” Siya miingon nga ang umaabut nga mga libro tingali maghisgut ni Joseph Smith nga adunay “kusganong impluwensya sa dangatan sa iyang mga tagilungsod.”1
Bag-ong mga Kinabig Kinsa Nakahimamat Kaniya
Ang mga kinabig kinsa nakahimamat ni Joseph sa unang higayon mipahayag usab og pagdayeg. Lima ka adlaw human miabut sa Nauvoo gikan sa England, si William Clayton misulat sa panimalay: “Kagabii daghan kanamo [ang] nakauban ni Brother Joseph, nalipay kami nga naminaw kaniya nga namulong sa mga butang sa Gingharian, siya usa ka mahigugmaon nga tawo ug mahigalaon sama ni bisan kinsa kanamo. Gimahal namo siya og maayo ug sigurado nga kamo pud.”2
Si Mary Alice Cannon Lambert, kinsa 14 anyos sa dihang siya miabut sa Nauvoo, miingon, “Daghan sa nag-una nga mga kaigsoonan didto aron sa pagsugat sa mga santos nga miabut sa [sakayan]. Kuyog niadtong mga kaigsoonan mao si Propeta Joseph Smith. Nakaila dayon ako kaniya dihang ang akong mga mata napunting kaniya, ug nianang higayona nadawat nako ang akong pagpamatuod nga siya usa ka Propeta sa Dios.”3
Mga Tawo Kinsa Nakaila Kaniya og Maayo
Si John M. Bernhisel, usa sa unang miyembro sa Simbahan, usa ka doktor. Nag-abang siya sa panimalay sa mga Smith sulod sa pipila ka bulan. Siya miingon nga si Joseph Smith adunay “gamhanang kusog sa panghunahuna,” daghang enerhiya, “usa ka halawom nga kahibalo sa kinaiyahan sa tawo,” “makalmahon sa paghukom,” “halapad nga panglantaw,” ug “gugma sa hustisya.” “Mabination siya ug matinabangon, manggihatagon ug manggiloy-on, maayong ikauban ug masadyaon, ug adunay panghunahuna nga mapamalandungon ug manggihunahunaon nga kinaiya. Matinud-anon siya, pranka, walay kahadlok ug independente, ug layo sa [pagpakaaron ingnon] nga makit-an diha sa tanang tawo.”4
Si Howard Coray, usa sa mga klerk ni Joseph, nadasig sa abilidad sa Propeta sa pakighimamat sa tanan nga matang sa mga tawo—mga doktor, abogado, mga pari, ug sa uban—kinsa miabut sa “pagpangutana sa lisud nga mga pangutana.” Siya misulat nga si Joseph “andam nga mobuhat sa bisan unsa nga gikinahanglan kaniya. … Ako tinud-anay nga nalipay, nga makita unsa siya ka komportable, bisan sa atubangan sa labing siyentipiko, ug sa listo [dali, andam] nga paagi nga siya motubag sa ilang mga pangutana.”5
Si Daniel D. McArthur, kinsa sa wala madugay nangulo og usa ka pundok sa mga nagkariton ngadto sa Walog sa Salt Lake, miingon, “Ang akong pagpamatuod mao nga siya usa ka matuod nga Propeta sa buhi nga Dios; ug kon unsa ka daghan ang akong nadunggan nga iyang gipanulti ug nakita sa iyang mga gipanghimo misamot ako nga nakombinser nga siya matuod nga nakakita sa Dios nga Amahan ug sa Iyang Anak nga si Jesukristo.”6
Mga Propeta Kinsa Nakaila Kaniya
Si John Taylor, kinsa nahimong ikatulo nga Presidente sa Simbahan, miingon, “Kon inyong pangutan-on si Joseph unsa nga klase sa … tawo si Adan, sultihan kamo niya diha-diha, sultihan kamo niya sa iyang gidak-on ug panagway ug sa tanan nga mahitungod kaniya. Tingali makapangutana kamo unsa nga klase sa mga tawo sila si Pedro, Santiago ug Juan, ug siya makasulti kaninyo. Ngano man? Tungod kay siya nakakita kanila.”7
Ang pag-umangkon sa Propeta, si Joseph F. Smith, nahimong ikaunom nga Presidente sa Simbahan. Siya misulat nga si Joseph Smith “naghingapin ang iyang pagkadungganan ug pagkaputli sa tawhanong kinaiyahan, diin sa kasagaran mapahayag diha sa inosente nga mga kalingawan—sa pagdula og bola, sa pakiglayog sa iyang mga igsoong lalaki … ug sa paglingaw sa iyang kaugalingon; … puno siya sa kamaya; puno siya sa kalipay, puno siya sa gugma, ug sa tanang klase sa kinaiya nga maghimo sa usa ka tawo nga talagsaon ug maayo, ug sa samang higayon simple ug inosente; … siya adunay gahum, pinaagi sa grasya sa Dios, aron sa pagsabut usab sa mga katuyoan sa Labaw nga Makagagahum. Mao kana ang kinaiya ni Propeta Joseph Smith.”8