Ang Istorya sa Pagkatawo ni Kristo

Sa dugay na nga panahon, usa ka babaye nga ginganlan og Maria ug usa ka lalaki nga ginganlan og Jose hapit na magminyo. Si Maria ug Jose maayo nga mga tawo kinsa mibuhat sa unsay gusto sa Dios nga ilang buhaton.

Usa ka adlaw dunay anghel nga miduaw kang Maria ug misulti kaniya nga siya makabaton og anak! Ang anghel miingon nga kinahanglan nga iyang panganlan ang bata og Jesus. Ang bata mao ang Anak sa Dios, ang Manluluwas.

Si Maria ug Jose kinahanglang mobiyahe ngadto sa usa ka lungsod nga gitawag og Bethlehem aron sa pagbayad og buhis.

Hilabihan na ka daghan og tawo sa lungsod. Mao nga si Maria ug Jose natulog sa usa ka dapit diin ang mga hayop gibutang. Nianang gabhiuna ang batang si Jesus natawo!

Usa ka bag-ong bitoon nagpakita sa kalangitan.

Ang mga magbalantay sa karnero nag-atiman sa mga karnero sa duol nga umahan. Ang mga anghel miabut ug misulti sa mga magbalantay sa karnero nga ang Manluluwas natawo na. Ang mga magbalantay sa karnero miadto aron sa pagpangita ug pagsimba sa bata nga si Jesus.

Sa layo nga dapit, ang mga Mago nakakita sa bag-o nga bitoon. Sila nasayud nga kini usa ka timailhan nga ang Manluluwas natawo na. Sila misunod sa bitoon hangtud nga ilang nakit-an si Jesus. Sila mihatag Kaniya og mga regalo ug misimba Kaniya.

Human mibiya ang mga Mago, usa ka anghel ang mibisita kang Jose. Ang anghel miingon nga usa ka dautan nga hari ang gustong mopasakit ni Jesus. Ang anghel miingon nga ang ilang pamilya kinahanglang mobalhin ngadto sa Ehipto aron maluwas.

Si Jose, si Maria, ug si Jesus mipuyo sa Ehipto hangtud nga luwas na ang pagbalik ngadto sa Israel. Si Jesus nagdako sa lungsod nga gitawag og Nazaret. Siya nakakat-on nga mahimong matinabangon, mabination, ug masulundon. Siya nakakat-on sa tanang butang nga kinahanglan Niya nga makat-unan aron mahimo natong Manluluwas. Siya kanunay nga misunod sa plano sa Dios alang Kaniya.

Panahon sa Pasko kita magsaulog sa pagkatawo ni Jesukristo. Itudlo ang mga litrato niini nga mga tawo, kinsa kabahin sa istorya sa Pagkatawo ni Kristo.

Kita mahimong sama nila ni Maria ug Jose pinaagi sa pagbuhat sa unsay gusto sa Dios nga atong buhaton.

Kita mahimong sama sa mga magbalantay sa karnero ug mga Mago pinaagi sa pagsunod kang Jesukristo.

Kita mahimong sama sa mga anghel pinaagi sa pagsulti sa uban sa tinuod nga istorya sa Pasko.

Ug kita mahimong sama ni Jesus pinaagi sa pagsunod sa Iyang ehemplo!