Mga Tubag gikan sa mga Lider sa Simbahan
Unsaon sa Pagsabut sa Tinuod nga Kahulugan sa Pasko
Ni Presidente Dieter F. Uchtdorf
Ikaduhang Magtatambag sa Unang Kapangulohan
Gikan sa 2010 nga Debosyonal sa Pasko sa Unang Kapangulohan.
Kon kita mangandam alang sa Pasko pinaagi sa pagpamalandong sa tinuod nga kahulugan niini, kita nangandam nga makasinati ni Kristo ug sa Iyang mensahe. Mosugyot ako og tulo ka mga butang nga mahimo natong tun-an, pamalandungon, ug gamiton niining panahon sa pagpangandam.
Una, maglipay sa pagkatawo sa atong Manluluwas. Atong isaulog ang pagkatawo sa Anak sa Dios, ang Tiglalang, ang atong Mesiyas. Kita nalipay nga ang Hari sa mga hari mianhi sa yuta, natawo sa pasungan, ug nagpuyo og hingpit nga kinabuhi. Sa dihang si Jesus natawo, ang hingpit nga kalipay didto sa langit hilabihan ka dako nga dili kini kapugngan (tan-awa sa Lucas 2:8–14).
Ikaduha, pamalandonga ang Iyang impluwensya sa atong kinabuhi karon. Ang Pasko mao ang panahon alang sa paghinumdom sa Anak sa Dios ug pagbag-o sa atong determinasyon sa pagdala ngari kanato sa Iyang ngalan. Usa kini ka panahon nga timbang-timbangon og balik ang atong mga kinabuhi ug susihon ang atong mga hunahuna, mga pagbati, ug mga binuhatan. Himoa kini nga panahon sa paghinumdom, sa pagpasalamat, ug usa ka panahon sa pagpasaylo. Himoa kini nga panahon sa pagpamalandong sa Pag-ula ni Jesukristo ug sa kahulugan niini alang sa matag usa kanato sa personal nga paagi. Ilabi na nga himoa kini nga panahon sa pagbag-o ug pagpasalig pag-usab sa pagpakabuhi subay sa pulong sa Dios ug sa pagsunod sa Iyang mga sugo. Pinaagi sa pagbuhat niini, kita nagtahud Kaniya labaw pa kay sa atong mahimo uban sa mga suga, mga gasa, o mga party.
Ikatulo, paglantaw nga makanunayon alang sa Iyang pag-anhi. Samtang ang panahon sa Pasko sa kasagaran usa ka panahon alang sa paghinumdom ug pagsaulog sa pagkatawo sa atong Ginoo, alang kanako kini kinahanglan usab nga usa ka panahon sa pagtan-aw sa umaabut. Kita molantaw sa unahan. Mangandam kita alang nianang bulahan nga adlaw nga Siya moanhi pag-usab. Kita magmaalamon sama niadtong mga tawo sa karaang panahon kinsa nagtan-aw sa Iyang pag-anhi.
Mag-ampo ko nga atol niining panahona ug sa kanunay, kita makakita sa kaputli sa istorya sa pagkatawo sa Manluluwas ug mobati og kinasingkasing nga pasalamat alang sa Iyang kinabuhi, mga pagtulun-an, ug makaluwas nga pagsakripisyo alang kanato. Hinaut nga kining pasalamat makahimo kanato sa pagbag-o sa atong determinasyon sa pagsunod Kaniya. Hinaut nga kini usab makadala kanato nga mas maduol sa atong pamilya, sa atong simbahan, ug sa atong isigkatawo. Ug unta kita maglantaw nga makanunayon nianang bulahan nga adlaw sa dihang ang nabanhaw nga Kristo maglakaw pag-usab sa yuta isip atong Ginoo, atong Hari, ug ang atong bulahan nga Manluluwas.