Usa ka Saksi sa Manluluwas nga si Jesukristo
Ni Presidente Boyd K. Packer (1924–2015)
Presidente sa Korum sa Napulog Duha ka mga Apostoles
Atol sa iyang 54 ka tuig isip General Authority ug sa iyang 45 ka tuig isip usa ka Apostol, usa ka linain nga saksi “sa ngalan ni Kristo sa tibuok kalibutan” (D&P 107: 23), si Presidente Packer mapainubsanong mipamatuod. Sa wala madugay human sa iyang kamatayon niadtong Hulyo 3, 2015, Si Presidente Packer mihangyo nga ang mosunod nga mga kinutlo nga gikan sa iyang pagpangalagad nga ipakigbahin diha sa Liahona. Diha sa diwas sa panahon sa Pasko, ilang gihatagan og gibug-aton ang iyang pagsaksi sa ug gugma alang sa Maluluwas nga si Jesukristo.
Detalye gikan sa Si Kristo ug ang Bata, ni Carl Heinrich Bloch
Akong Gihigugma ang Ginoo
“Ganahan ko og Pasko. Adunay usa ka diwa sa panahon sa Pasko. Kini mokunsad sa kalibutan—dili lamang sa mga miyembro sa Simbahan apan sa tibuok kalibutan—usa ka pagpamatuod ug usa ka saksi nga si Jesus mao ang Kristo. … Isip usa ka sulugoon sa Ginoo, isip usa sa Napulog Duha, ako nasayud nga si Jesus mao ang Kristo. …
“Akong gihigugma ang Ginoo. Akong gimahal ang Iyang buhat. Akong gimahal Ang Simbahan ni Jesukristo sa mga Santos sa Ulahing mga Adlaw ug mosaksi Kaniya kinsa mao ang atong Agalon ug ang atong Higala.”1
Kaniya Ako usa ka Saksi
“Adunay pipila ka mga butang nga sagrado kaayo nga hisgutan. …
“Kini dili ingon nga usa ka sekreto, apan kini sagrado; dili angayng hisgutan, apan mahimong ihambin ug panalipdan ug tagdon uban sa hilabihan nga pagtahud.
“Nahibaloan nako unsa ang gipasabut sa propeta nga si Alma:
“‘… Kini gihatag ngadto sa kadaghanan aron masayud sa mga misteryo sa Dios; bisan pa niana sila gipahimutang ubos sa mahigpit nga sugo nga sila dili makigbahin gawas sumala niana nga bahin sa iyang pulong diin siya mihatag ngadto sa mga kaliwatan, sumala sa pagpaminaw ug kakugi nga sila mihatag ngadto kaniya.
“‘Ug busa, siya nga mopatig-a sa iyang kasingkasing, ang mao modawat sa gamay nga bahin sa pulong; ug siya nga dili mopatig-a sa iyang kasingkasing, ngadto kaniya ihatag ang dako nga bahin sa pulong, hangtud kini ihatag ngadto kaniya ang kasayuran sa mga misteryo sa Dios hangtud siya masayud kanila sa hingpit’ (Alma 12:9–10). …
“Karon, ako natingala uban kaninyo kon ngano nga ang usa ka ingon nako angayan nga tawagon ngadto sa balaang pagka-apostol. Daghan kaayong mga gikinahanglan nga kulang ako. Adunay daghan kaayo sa akong paningkamot sa pagserbisyo nga kulang. Samtang ako namalandong kabahin niini, dunay usa lang ka butang nga akong mahunahunaan nga maoy hinungdan, ug kana mao, ako nakabaton niana nga pagsaksi.
“Ako mamahayag kaninyo nga si Jesus mao ang Kristo. Ako nasayud nga Siya buhi. Siya natawo sa tunga-tungang kapanahonan. Siya mitudlo sa Iyang ebanghelyo, gitaral, gilansang sa krus. Siya mibangon sa ikatulong adlaw. Siya mao ang unang nabanhaw. Siya adunay hlawas sa unod ug bukog. Niini ako mopamatuod. Kaniya ako usa ka saksi.”2
Siya Midawat sa Silot
DETALYE GIKAN SA DILI ANG AKONG PAGBUOT, MAOY MATUMAN, KONDILI ANG IMO, PINAAGI NI HARRY ANDERSON
“Sa wala pa ang Paglansang ug sa pagkahuman, daghang mga tawo ang andam nga mitugyan sa ilang mga kinabuhi sa dili hinakog nga mga buhat sa pagkabayani. Apan walay usa ang nakasinati unsay nasinati ni Kristo. Diha Kaniya ang gibug-aton sa kalapasan sa tanang mga tawo, sa mga sala sa tanang mga tawo. Ug ang nagbitay sa timbangan mao ang Pag-ula. Pinaagi sa Iyang kinabubut-on nga buhat, ang kalooy ug hustisya nagkatakdo, napadayon ang mahangturong balaod, ug ang pagpataliwala nakab-ot nga kon wala kini walay mortal nga tawo ang matubos.
“Siya pinaagi sa pagpili midala sa silot alang sa tanang mga katawhan, alang sa tanang mga kadautan ug kahugawan; alang sa kabangis, imoralidad, kahiwian, ug kadautan; alang sa pagkaadik; alang sa pagpamatay ug pagsakit ug mga kakuyaw—alang sa tanan nga sukad nahitabo o sa tanan nga mahitabo niini nga yuta. Sa pagpili Siya nag-atubang sa makapahibulong nga gahum sa dautan, kinsa wala sa unod ni ubos sa mortal nga kasakit. Mao kadto ang Getsemani!
“Giunsa paghimo ang Pag-ula wala kita masayud. Walay mortal nga nakakita sa dihang ang dautan mipahawa ug mitago sa kaulaw sa atubangan sa Kahayag nianang putli nga binuhat. Ang tanang pagkadautan dili makapahunong niana nga Kahayag. Kon unsay nahimo nahimo na, ang lukat nabayran na. Ang kamatayon ug impyerno mihunong sa ilang pag-angkon sa tanan nga nakahinulsol. Ang mga tawo sa katapusan nahimong gawasnon. Dayon ang matag kalag nga sukad nagpakabuhi makapili sa paghikap niana nga Kahayag ug matubos.
“Pinaagi niining mahangturong sakripisyo, ‘pinaagi [niini] nga Pag-ula ni Kristo, ang tanang katawhan maluwas, pinaagi sa pagsunod sa mga balaod ug mga ordinansa sa Ebanghelyo’ (Mga Artikulo sa Hugot nga Pagtuo 1:3).”3
Ang Bantugan nga Magtutudlo
“Sa akong mga paningkamot sa pagtudlo sa Iyang ebanghelyo, Siya akong nailhan, si Jesukristo, ang Anak sa Dios, ang Bugtong Anak sa Amahan. Diha sa balaang pagtahud ako mobarug sa Iyang atubangan uban sa hilabihan nga pagtagad alang sa unsay Iyang gitudlo, ug sa hilabihan nga pagtagad kon sa unsang paagi Siya mitudlo. Dili kini maingon nga dili angay alang ni bisan kinsa kanato nga magtinguha sa pagtudlo sama sa Iyang pagtudlo. Dili kini maingon nga dili angay alang ni bisan kinsa kanato nga magtinguha nga mahimong sama Kaniya. Siya dili basta lang usa ka magtutudlo; Siya mao ang bantugan nga magtutudlo.”4
Mga Kamatuoran nga Labing Bililhong Masayran
“Isip mga mortal, kita mahimo, sa tinuoray dili, hingpit nga makasabut giunsa sa Manluluwas pagtuman sa Iyang maulaong sakripisyo. Apan sa karon ang giunsa dili ingon niana kaimportante sa rason sa Iyang pag-antus. Nganong Iya kining gibuhat para ninyo, para nako, para sa tanang katawhan? Iya kining gibuhat tungod sa gugma sa Dios nga Amahan ug sa tanang katawhan. ‘Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala’ (Juan 15:13).
“Sa Getsemani, si Kristo mipalayo gikan sa Iyang mga Apostoles aron mag-ampo. Kon unsay nahitabo wala na sa atong gahum aron masayud! Apan kita nasayud nga Iyang natuman ang Pag-ula. Siya andam sa pagdala nganha sa Iyang kaugalingon ang mga sayop, ang mga sala ug kahasol sa konsensya, ang mga pagduhaduha ug mga kahadlok sa kalibutan. Siya nag-antus para kanato aron kita dili na mag-antus. Daghang mga mortal nag-antus sa pagpakasakit ug namatay sa usa ka masakit, grabe nga kamatayon. Apan ang Iyang paghingutas milabaw pa niining tanan. …
“Ang Iyang pag-antus lahi kay sa tanang mga pag-antus kaniadto o sukad tungod kay Iyang gidala sa Iyang Kaugalingon ang tanang mga silot nga [sukad pa mahimong] ipahamtang sa tawhanong pamilya. Hunahunaa kana! Siya walay utang nga angay bayaran. Siya wala nakahimo og sayop. Bisan pa niana, ang pagkatingob sa tanang kahasol sa konsensya, sa kasubo ug kaguol, sa kasakit ug pagpakaubos, tanang mga pagpakasakit sa hunahuna, emosyon, ug pisikal nga nahibaloan sa tawo—Siya nakasinati niining tanan. Adunay Usa lang gayud diha sa talaan sa tawhanong kasaysayan kinsa hingpit nga walay sala, kwalipikado nga manubag sa mga sala ug kalapasan sa tanang katawhan ug makalahutay sa sakit nga mabati sa pagbayad niini.
“Siya mipresentar sa Iyang kinabuhi ug sa paghatag og kahulugan miingon, ‘Ako mao ang naghatag ngadto kaniya nga motuo hangtud sa katapusan og usa ka dapit diha sa akong tuo nga kamot.’ (Mosiah 26:23). Siya gilansang; Siya namatay. Dili nila makuha ang Iyang kinabuhi gikan Kaniya. Siya miuyon nga mamatay. …
“Kon kamo nadagma o nahisalaag sa usa kahigayon kon kamo mibati nga nabilanggo, karon sa kaaway kamo makapadayon uban sa hugot nga pagtuo ug dili na maglatagaw sa kalibutan. Adunay mga tawo nga andam mogiya kaninyo pabalik sa kalinaw ug kasiguradohan. Gani ang grasya sa Dios, sama sa gisaad diha sa kasulatan moabut ‘human sa tanan nga atong mabuhat’ (2 Nephi 25:23). Ang posibilidad niini, para nako, mao ang kamatuoran ang laging angay nga masayran.
“Mosaad ko nga moabut ang maanindot nga kabuntagon sa kapasayloan. Dayon ‘ang kalinaw sa Dios, nga lapaw sa tanang pagpanabut’ (Mga Taga-Filipos 4:7) moabut pag-usab sa inyong kinabuhi usa kabutang sama sa sidlak sa adlaw, ug kamo ug Siya dili na gayud hinumduman [sa inyong] sala’ (Jeremias 31:34). Unsaon ninyo sa pagkasayud? Inyong masayran! (Tan-awa sa Mosiah 4:1–3.)”5
Ang akong Pagsaksi
“Human sa tanang katuigan nga ako nabuhi ug nagtudlo ug nagserbisyo, human sa minilyon ka milya nga akong nabiyahe sa tibuok kalibutan, nianang tanan nga akong nasinati, adunay usa ka dakong kamatuoran nga akong ipakigbahin. Kini ang akong pagsaksi sa Manluluwas nga si Jesukristo.
“Sila si Joseph Smith ug Sidney Rigdon mirekord sa mosunod human sa usa ka sagradong kasinatian:
“‘Ug karon, human sa daghan nga mga pagpamatuod nga gihatag mahitungod kaniya, kini mao ang pagpamatuod, ang katapusan sa tanan, nga kami naghatag kaniya: Nga siya buhi!
“‘Kay kami nakakita kaniya’ (D&P 76:22–23).
“Ang ilang mga pulong akong mga pulong.”6
“Pagkadako nga pribilehiyo sa tibuok nakong kinabuhi nga makahatag sa akong espesyal nga pagsaksi nga si Jesus mao ang Kristo, ang Anak sa Dios. Ako mopamatuod sa tanang pagpaubos, apan uban sa hingpit nga kasigurohan, nga Siya mao ang Bugtong Anak sa Amahan. Iya kining Simbahan; Siya ang nangulo niini ug nagdumala niining buhat. Siya ang atong Manunubos. Ako nasayud nga Siya buhi, ug ako nakaila Kaniya. Niini ako mopamatuod sa pangalan ni Jesukristo, amen.”7