Mensahe sa Unang Kapangulohan
Paggahin og Panahon para sa Manluluwas
Ni Presidente Thomas S. Monson
Paghulagway sa litrato pinaagi ni David Stoker
Lain na usab nga panahon sa Pasko ang ania kanato ug uban niini ang masanagon nga bag-ong tuig. Ingon og kagahapon lang kita nagsaulog sa pagkatawo sa Manluluwas ug naghimo og mga resolusyon.
Sa atong mga resolusyon alang niining tuiga, kita ba mihukom sa paggahin og panahon sa atong kinabuhi ug luna sa atong mga kasingkasing alang sa Manluluwas? Bisan og malampuson kaayo kita bahin niana nga resolusyon, sigurado ko nga kitang tanan gusto nga makahimo pa og mas maayo. Kini nga panahon sa Pasko mao ang hingpit nga panahon sa pagsusi ug pagbag-o sa atong mga paningkamot.
Sa atong busy nga kinabuhi, uban sa hilabihan pa gayud ka daghang butang nga angay natong atimanon, mahinungdanon nga kita mohimo og mahunahunaon, mapasaligon nga paningkamot sa pagdala ni Kristo diha sa atong kinabuhi ug sa atong mga panimalay. Ug mahinungdanon nga kita, sama sa mga Mago gikan sa Sidlakan, ug nangadto “aron sa pagsimba kaniya.”1
Sa tibuok kasaysayan, ang mensahe nga gikan ni Jesus mao ra gihapon. Ngadto kang Pedro ug Andres sa kabaybayunan sa Galilea, miingon Siya, “Sumunod kamo kanako.”2 Kang Felipe miabut ang tawag, “Sumunod ka kanako.”3 Ngadto sa Levita kinsa naglingkod sa buhisanan miabut ang instruksyon, “Sumunod ka kanako.”4 Ug kaninyo ug kanako, kon kita maminaw lamang, moabut kanang sama nga pagdapit: “Sumunod kamo kanako.”5
Samtang kita mosunod sa Iyang mga tunob karon ug samtang atong sundon ang Iyang ehemplo, kita makabaton og mga oportunidad sa pagpanalangin sa kinabuhi sa uban. Si Jesus nagdapit kanato sa paghatag sa atong mga kaugalingon: “Tan-awa, ang Ginoo nagkinahanglan sa kasingkasing ug usa ka andam nga hunahuna.”6
Aduna bay usa ka tawo nga angay ninyong serbisyuhan niini nga Pasko? Aduna bay tawo nga naghulat sa inyong pagbisita?
Mga tuig na ang milabay mibisita ko atol sa Pasko sa panimalay sa usa ka tigulang nga biyuda. Samtang didto ko, ang doorbell mibagting. Sa may pultahan nagbarug ang usa ka busy kaayo ug inila nga doktor. Siya wala ipatawag; hinoon, siya mibati og pag-aghat nga mobisita sa usa ka nag-inusarang pasyente.
Niining panahona, ang mga kasingkasing sa mga tawo nga dili makagawas nanghinaot ug nangandoy nga mabisitahan atol sa Pasko. Usa ka Pasko samtang nagbisita sa usa ka care center, milingkod ko ug nakig-istorya sa lima ka tigulang nga mga babaye, ang kinatigulangan nag-edad og 101. Siya usa ka buta, apan nakaila siya sa akong tingog.
“Bishop, naulahi ka og gamay niining tuiga!” siya miingon. “Naghunahuna ko nga dili ka na gayud moabut.”
Kami dunay nindot nga panahon nianang higayuna. Usa ka pasyente, hinoon, mapanganduyong naglantaw sa bintana ug balik-balik nga miingon, “Ako nasayud nga ang akong anak nga lalaki moabut aron mobisita nako karon.” Nagduda ko kon moabut ba siya, kay dunaymga panahon sa Pasko kaniadto nga wala gayud siya motawag.
Aduna pay panahon niining tuiga aron makapadangat og tabang, makapabatyag og paghigugma, ug madasigong espiritu—sa laing pagkasulti, aron makasunod sa ehemplo nga gipakita sa atong Manluluwas ug moserbisyo sa gusto Niya unsaon nato sa pagserbisyo. Samtang kita moserbisyo Kaniya, dili mawala kanato ang atong oportunidad, sama sa gibuhat sa karaang mga magbalantay,7 sa paggahin og panahon alang Kaniya sa atong kinabuhi ug luna alang Kaniya sa atong mga kasingkasing.
Masabtan ba nato ang talagsaong saad diha sa mensahe sa anghel nga gihatag ngadto sa mga magbalantay sa karnero didto sa sibsibanan: “Gidad-an ko kamog maayong balita sa dakong kalipay. … Kay alang kaninyo natawo karon … ang Manluluwas, nga mao ang Kristo nga Ginoo”?8
Samtang kita magbinayloay og mga gasa sa Pasko, unta kita makahinumdom, makadayeg, ug makadawat niana nga labing mahinungdanon nga gasa sa tanan nga mga gasa—ang gasa sa atong Manluluwas ug Manunubos, nga kita unta makabaton og kinabuhing dayon.
“Kay unsa ang makuha sa usa ka tawo kon ang gasa itugyan diha kaniya, ug siya wala modawat sa gasa? Tan-awa, siya wala malipay niana nga gihatag ngadto kaniya, ni malipay diha kaniya kinsa mao ang naghatag sa gasa.”9
Unta kita mosunod Kaniya, moalagad Kaniya, motahud Kaniya, ug modawat sa atong mga kinabuhi sa Iyang gasa ngari kanato, nga kita unta mahimong, diha sa mga pulong sa Amahang si Lehi, “giliyokan sa kahangturan sa mga bukton sa iyang gugma.”10