Mga Tingog sa mga Santos sa Ulahing mga Adlaw
Wala Ako Nag-inusara
Robert Hoffman, Washington, USA
Paghulagway pinaagi ni Allen Garns
Naglingkod sa usa ka gidali-dali pagkalot nga posisyon sa pagdepensa, mitan-aw ko ibabaw sa mga balas paingon sa amihanan—ngadto sa Iraq. Disyembre 24 kadto atol sa Desert Shield, ug ako ang maggwardya sugod sa tungang gabii.
Ako lamang ang bugtong Santos sa Ulahing mga Adlaw sa akong batalyon, mao nga mas mingaw ang holiday. Diha na mi sa disyerto sa Saudi Arabia sukad sa Agosto, ug karon Pasko na niining gabii nga mabugnaw, gihayagan sa mga bitoon. Ang tibuok kampo natulog na, ug duna koy pipila ka oras uban sa abuhon nga mga balas ug sa akong mga hunahuna.
Naghunahuna ko sa akong asawa ug anak nga lalaki sa Georgia, USA, ug nga dili ko makaapil sa mga kalingawan sa amoa—ang Christmas tree, ang mga regalo, usa ka tinuod nga panihapon sa Pasko. Dayon misugod ko sa pagpamalandong sa istorya sa Pasko.
Naghunahuna ko sa gabii nga natawo si Kristo. Naghunahuna ko kon unsa kadto ka ngitngit ug kon aduna bay bulan nga nagdan-ag sa kayutaan o kon ang kahayag lang ba sa mga bitoon ang anaa. Tungod kay wala pay elektrik nga suga sa Iyang pagkatawo, ang gabii siguradong susama sa gabii nga ako karong nasaksihan. Wala siguroy mga kalingawan—ngitngit, hilom lang nga gabii.
Dayon misantup kanako ang usa ka talagsaong hunahuna. Ang Biblia nagsaysay nga ang mga Mago sa wala madugay miabut gikan sa Silangan, gigiyahan sa usa ka bitoon nga mipakita sa gabii nga kalangitan. Samtang mitan-aw ko ngadto sa ngitngit nga kalangitan, nakaamgo ko nga anaa ko sa silangan sa Bethlehem ug nga ang usa sa mga sentro sa kahibalo nianang panahona mao ang Baghdad. Gikan kaha ang mga Mago sa usa ka dapit nga dili layo sa akong nahimutangan? Unsa nga bitoon ang misanag? Anaa pa ba kini gihapon sa langit? Makakita ba ako niini?
Mihangad ko sa langit nga nahingangha sa mga gilalang sa Dios ug mibati og kainit nga nagagikan sa kinahiladman. Dili importante kon anaa ba ako sa sama nga dapit o kon ang sama nga bitoon anaa sa kalangitan. Ang importante mao nga nasayud ako sama sa mga Mago kabahin sa usa ka masuso nga natawo sa Bethlehem kinsa mao ang Hari sa mga hari.
Wala ako mag-inusara niana nga Pasko; hinoon, ako nahiusa sa tanan nga nagtinguha Kaniya, sila man mga Mago, mga propeta, o gimingaw nga mga sundalo diha sa usa ka lungag sa disyerto. Nianang gabhiona ang akong pagpamatuod sa pagkatawo sa Manluluwas nalig-on, ug sa pagkasunod buntag ang Balaan nga Espiritu anaa gihapon kanako.
Imbis nga magul-anon ang Pasko nianang tuiga, nahimo kining usa sa akong labing bililhong mga Pasko.