“Mihimo ako og Pasalig ngadto sa Dios”
Ang Simbahan naestablisar sa Guayacana, Ecuador, sa dakong bahin tungod ni Virgilio Simarrón, kinsa mihimo og lisud nga desisyon aron magpabiling matinuoron sa iyang pagpamatuod.
Ang mga litrato sa maayong kabubut-on sa tagsulat
Si Virgilio Simarrón Salazar usa ka lider sa iyang lumad nga Chachi nga komunidad sa amihanang Ecuador. Hangtud niining adlawa, ang Chachi nagpadayon sa ilang lahi kaayo nga pamaagi sa kinabuhi ug sa ilang kaugalingong sistema sa hustisya nga adunay usa ka konseho sa komunidad, mga gobernador, ug mga maghuhukom. Kini nga mga tahas sa pagpangulo kasagaran madungganon nga mga posisyon nga gihuptan sa mga pamilya sa daghan na nga henerasyon ug natukod diha sa usa ka lawom nga pundasyon sa pagtahud ug pagtamud sa komunidad. Ang pagtahud sa posisyon usa ka pagsalig nga giamumahan ug gipasa ngadto sa sunod nga henerasyon.
Apan ang mga plano ni Virgilio Simmarón alang sa iyang kinabuhi nausab niadtong 1996, sa dihang ang iyang anak, si Wilson, miuli gikan sa pag-eskwela sa Quinindé nga nagdala og mga kopya sa Basahon ni Mormon ug usa ka lig-on nga pagpamatuod sa iyang bag-ong relihiyon. Puno sa hugot nga pagtuo ug kadasig sa usa ka tawo kinsa nakakaplag sa kamatuoran, si Wilson mipakigbahin sa mensahe sa ebanghelyo ngadto sa iyang pamilya, ug sila nabunyagan sa wala madugay diha sa katubigan sa Suba sa Canandé.
Sa dihang ang mga Simarróns mipakigbahin sa ebanghelyo ngadto sa Chachi nga mga higala ug mga silingan, hinoon, usa ka grabe nga panagsumpaki misugod. Pipila ka mga Chachi mibati nga ang mga gituohan ni Virgilio Simarrón nakapahimo kaniya nga usa ka erehes ug gani nakahunahuna sa pagdagmal kaniya. Ang uban mibati nga, isip usa ka gobernador, siya kinahanglang dili moapil sa usa ka bag-o nga tinuohan nga tingali makabahin sa mga tawo. Uban niini nga kabalaka, gidala siya nila aron pagahusayon sa konseho sa komunidad. Nahimo kining usa sa labing lisud nga mga kasinatian sa kinabuhi ni Virgilio.
Si Wilson misaysay kon unsa ang nahitabo: “Ang konseho, kompleto nga nagkatigum, misulti sa akong amahan, ‘Magpabilin ka nga among gobernador kon imong isalikway ang Simbahan ni Jesukristo; kinahanglan ka nga mobakwi.’ Ang akong amahan miingon, ‘Mihimo ako og pasalig ngadto sa Dios, ug kon ang usa ka tawo naghimo og usa ka pasalig ngadto sa Dios, dili kini mabakwi. Dili ko makabiya sa Simbahan. Kon sa inyong hunahuna ako usa ka gobernador nga nakabahin sa katawhan sa Chachi, nan o akong mga katawhan, pagpili mo karon og tawo nga ikapuli kanako.’ Dayon akong nakita ang talan-awon nga naghilak ang akong amahan. Ang konseho anaa sa hingpit nga kahilom sa sobra sa lima ka minuto—walay bisan usa nga mitingog. Dayon dunay usa ka tawo nga miingon, ‘Nan Gobernador, lakaw.’ Sa hinay-hinay mibarug ang akong amahan, mao nga ang akong mama, ang akong manghud nga babaye, ug ako nanaog ug mibiya sa konseho.”
Human si Brother Simarrón gitangtang sa iyang posisyon, ang lisud nga mga adlaw miabut sa pamilya. Gitamay sa kadaghanan kinsa kanhi mitahud kanila, ang pamilya mitutok sa tinuohan nga ilang gihangup ug misangyaw sa ebanghelyo uban sa dako nga kadasig. Ang ilang presidente sa stake, si Omar Intriago Cesar, mipasabut: “Sila misugod sa pagsangyaw sa ebanghelyo sa kada balay ngadto sa matag pamilya niini nga komunidad. Gisugdan ang Guayacana Branch uban ni Virgilio Simarrón ug iyang anak, si Wilson. Ang Simbahan naestablisar tungod sa iyang hugot nga pagtuo, sa iyang kalig-on, ug sa iyang pagpamatuod.”
Sa pipila lang ka mga tuig, ang mga paningkamot sa pamilya nga Simarrón namunga og dako. Ang Mayo 30, 1999, nahimo nga usa ka adlaw sa pagsaulog sa Guayacana sa dihang ang usa ka dako nga serbisyo sa bunyag gipahigayon. Si Presidente Intriago nahinumdom, “Kami miabut uban ni Roberto Garcia, ang presidente sa misyon, ug miapil niana nga mahimayaon nga adlaw, diin sa baybayon sa Suba sa Canandé, ang duha ka mga misyonaryo mibunyag sa 60 ka mga tawo. Dayon, si Presidente Garcia ug ako mikumpirma sa tanan nga mga nabunyagan isip mga miyembro sa Simbahan. Kadto usa ka pribilehiyo nga dili gayud makalimtan sa akong kinabuhi.”
Bisan tuod nga si Virgilio miundang sa iyang pagka-gobernador aron magpabiling matinud-anon sa iyang pagpamatuod, siya nakapasa og lain nga kabilin ngadto sa sunod nga henerasyon: kanang pagserbisyo sa mga tawo pinaagi sa pag-establisar sa ebanghelyo taliwala kanila. Nakita pa niya si Wilson nga nagserbisyo og full-time nga misyon ug dayon mibalik sa Guayacana aron maminyo sa iyang asawa, si Ruth, ug nakabaton og mga anak. Paglabay sa pipila ka tuig, si Virgilio namatay nga matinud-anon sa Simbahan. Ang iyang asawa, si Maria Juana Apa, nakasaksi pa sa ilang anak nga lalaki nga gitawag, niadtong 2014, sa pag-alagad isip branch president sa Guayacana.
Si Wilson nahibalo gayud sa panulundon nga gusto kanunay nga ihatag sa iyang amahan kaniya. “Ang akong mga katigulangan kanunay nga mga gobernador, mga pangulo sa kasundalohan, lig-ong mga manggugubat,” siya miingon. “Akong gibati nga kining mga kinaiya sa akong mga katigulangan makita gihapon ngari kanako. Apan karon nga ako usa na ka miyembro sa Simbahan, kanang tanan nga kalig-on nakatabang kanako nga mahimong usa ka maayo nga sundalo ni Jesukristo.”
Ibabaw: Usa ka bag-o nga henerasyon sa mga lider, si Ruth ug Wilson Simarrón sa Guayacana Branch (uban sa mga miyembro sa branch nga makita sa wala).