Ang Puzzle bahin sa Pagpahiuli
Ang tagsulat nagpuyo sa Utah, USA.
Unsa ang ipasabut sa pulong nga Pagpahiuli?
“Kay ako motugyan nganha kanimo sa mga yawe ug gahum sa pagkapari, diin Ako mipahiuli sa tanan nga mga butang” (D&P 132:45).
Sa pagpamauli gikan sa simbahan, si Anna nahinumdom sa gamay nga piraso sa papel nga gihatag kaniya sa iyang magtutudlo. “Ma, tag-ana kon unsa! Mohatag ko og pakigpulong sa Primary inig ka sunod Dominggo.”
“Nindota gud ana,” si Mama miingon. “Bahin sa unsa?”
“Kinahanglan ko nga mag-istorya kabahin sa Pagpahiuli. Apan dili ko sigurado unsa kana.”
“Ang Pagpahiuli nagpasabut nga ang Dios midala og balik, o mipahiuli, sa tanang butang nga gusto Niya nga anaa sa Iyang Simbahan,” miingon si Mama. “Pinaagi ni Propeta Joseph Smith, Siya midala og balik sa mga templo, priesthood, bunyag, ug sa gasa sa Espiritu Santo. Kon wala ang Pagpahiuli, wala unta kitay Simbahan!”
Mitando si Anna. “Sa akong paminaw husto kana. Apan naghunahuna ko nga dili ko makapasabut niini sama sa imong gibuhat.”
“Uy, aduna koy ideya,” miingon si Mama samtang sila miabut sa balay. “Dali uban nako.”
Si Anna misunod ni Mama ngadto sa kwarto sa pamilya. Ilang nasugdan ang usa ka puzzle kagabii, ug ang mga piraso nagkatag pa gihapon diha sa lamesa.
“Hunahunaa ang ebanghelyo nga sama sa usa ka puzzle nga mahuman.” Si mama mipunit og usa ka piraso. “Daghan nga mga piraso sa mga litrato anaa sa yuta sa lain-laing panahon. Apan pagkahuman nga si Jesus ug ang mga Apostoles namatay, daghan nga mga kamatuoran sa ebanghelyo nangawala o nausab. Kadtong mga tipik sa kamatuoran gikinahanglan nga mahibalik.”
“Dayon unsa may nahitabo?” Si Anna miukay sa mga piraso.
“Milabay ang daghang katuigan ang Dios mitawag sa usa ka batan-ong lalaki nga mag-uuma aron sa pagpabalik sa tanang mga piraso ug isumpay kini sama sa panahon nga si Jesus anaa pa sa yuta. Sa imong hunahuna kinsa kaha kadto?”
“Si Joseph Smith!” Miingon si Anna, nga mipahiyum. “Sa akong hunahuna hapit na kini nako masabti.” Siya ug si Mama naghisgut og dugang mahitungod ni Joseph Smith ug sa nagkalain-laing piraso sa ebanghelyo nga gibalik sa Dios pinaagi kaniya.
Sa tibuok semana, si Anna misulat ug nagpraktis sa iyang pakigpulong. Siya nag-ampo ngadto sa Langitnong Amahan nga siya mahimo nga magmaisugon ug mopakigbahin sa iyang mensahe sa Primary.
Pagka-Dominggo, sa dihang panahon na alang sa pakigpulong ni Anna, siya mibarug, miginhawa og lawom, ug gikuptan ang usa ka puzzle diha sa pisara aron ang tanan makakita. Ang tanan nga mga piraso nag-uban diha sa puzzle.
“Sa unang panahon, daghan sa importante nga mga piraso sa ebanghelyo anaa dinhi sa yuta. Sa dihang si Jesus ug ang Iyang mga Apostoles namatay, ang ubang piraso nawala.” Si Anna mikuha sa ubang mga piraso sa puzzle ug mipahimutang niini sa ubos. “Dayon ang Langitnong Amahan ug si Jesus mitawag ni Joseph Smith isip usa ka propeta sa pagpabalik sa nawala nga mga piraso sa ebanghelyo. Gitawag kini og Pagpahiuli.” Mipunit siya og piraso sa puzzle aron ipakita sa Primary. Sa luyo mao ang mga pulong “gahum sa Priesthood.”
Dayon gipakita ni Anna ang nahabilin nga mga piraso. Iyang gibasa ang luyo sa matag piraso sa wala pa niya kini ibutang sa luna niini diha sa puzzle. “Usa ka buhi nga propeta … napulog duha ka mga Apostoles … buhat sa templo alang sa mahangturon nga pamilya … bunyag pinaagi sa pagpaunlod … pagpandong sa mga kamot alang sa gasa sa Espiritu Santo.”
Gigunitan ni Anna ang nahuman nga puzzle. “Karon anaa na kanato ang tanan nga mga piraso sa ebanghelyo. Nagpasabut kana nga kita makakita sa dakong hulagway kon unsaon nato nga mahimong magmalipayon ug magpuyo og usab uban sa Langitnong Amahan sa umaabut nga adlaw. Ako mapasalamaton alang sa Pagpahiuli. Sa pangalan ni Jesukristo, amen.”