Ang Akong Milagro sa Pasko

Joan Burton Stott, California, USA

Sa panahon sa tinglarag sa 1968, ang among bishop mihangyo sa akong mga ginikanan kon mosaad ba sila nga motampo og kwarta sa pagtukod sa Templo sa Provo Utah. Ang mga ward dili na mobuhat niana karon, apan komon kana kaniadto. Ang akong papa misaad og US $1,000. Tingali dili na dako kaayo nga kwarta, apan dako na kaayo kadto alang kanamo. Duha ang trabaho sa akong amahan aron makatabang sa pagsuporta sa usa ka anak nga lalaki nga anaa sa kolehiyo, usa ka anak nga lalaki nga nagmisyon, ug lima ka mga anak diha sa balay.

Sa dihang gitapok mi sa akong amahan alang sa family council ug misulti kanamo nga siya misaad nga motampo og $1,000 alang sa templo, nakahinumdom ko nga naghunahuna, “Maayo pa og misaad na lang ka nga motampo og $1 milyon kay dili man gihapon makab-ut kana nga mga kantidad.” Dili ko makatuo nga misaad siya nga motampo og ingon niana kadako, ug aduna na lang kami ubos sa upat ka bulan aron matigum ang kwarta.

Mipili kami og upat ka mga paagi aron makakwarta: dili kami manghatag og regalo niana nga Pasko ug idonar ang kwarta nga amo untang magasto sa mga regalo; ang akong mga igsoong babaye ug ako modonar sa among kinitaan sa pagbantay og bata; ang akong manghud nga lalaki manarbaho og bisan unsa aron makakwarta; ug isip usa ka pamilya moadto kami sa usa ka lokal nga umahan, mamu-pu og mga mansanas matag adlaw sulod sa pipila ka semana, ug idonar ang kinitaan.

Among giputos nga daw gasa ang kahon nga maoy sudlan sa among kwarta, gibutangan og litrato sa templo ug ni Jesukristo, ug gibutang ang kahon sa usa ka gamay nga lamesa. Ang kahinam misaka samtang ang among mga donasyon mitubo. Ang among pagtutok nabalhin gikan sa mga regalo nga among gusto ngadto sa among gasa alang sa Manluluwas. Nakadayeg kaayo ko sa gasa nga Iyang gihatag sa mga anak sa Dios—ang Iyang kinabuhi—nga gusto kong mobalos paghatag ngadto Kaniya.

Ang pagpu-pu og mga mansanas maoy labing lisud ug makatagbaw nga paagi sa pagpangita og kwarta. Makaluya kini, apan kami nalig-on ug nagantihan samtang migahin kami og panahon nga magkauban isip usa ka pamilya. Nagsugod kami nga “nabugkos diha sa pagkahiusa ug diha sa gugma” (Mosiah 18:21).

Samtang nagkaduol ang Pasko, moli-li ko sa kahon sa donasyon, apan kanunay ko nga nasagmuyo. Bisan sa among mga paningkamot, layo pa kaayo mi sa among tumong.

Akong gibati ang kaanindot, hinoon, mahitungod sa among desisyon nga wad-on ang mga regalo. Nasayud ko nga gagmay ra ang among mga sakripisyo, apan ako adunay hugot nga pagtuo nga ang Manluluwas mahimuot.

Usa ka adlaw si papa mipahibalo nga nakab-ut na namo ang among tumong ug nga gidonar na niya ang kwarta. Wala ko masayud kon giunsa namo nga dali ra nga nakatigum sa kulang.

Ang katumanan sa saad ni Papa niana nga Pasko milagroso. Apan alang kanako, ang tinuod nga milagro mao nga pinaagi sa paghatag kay sa pagdawat, mas naduol ko sa Manluluwas. Kana mas maayo pa kay sa bisan unsang regalo sa Pasko nga ako untang nadawat. Paglabay sa pito ka tuig ang gasa nahibalik kanako samtang ako miluhod sa altar sa Templo sa Provo aron ma-sealed sa karon ug hangtud sa kahangturan ngadto sa akong bana.