1

Edukesen Hem I Impoten

Ol Kwestin blong Tokbaot

1. Lukluk ol pikja ia. ?Wanem nao yu luk?

2. ?Olsem wanem nao ol famli oli stap lan tugeta?

3. ?From wanem edukesen i impoten?

famli we i stap stadi tugeta

bubuwoman wetem ol apupikinini oli yusum tablet blong stadi

Lanem Samting

ol papa mo mama oli stap tijim ol smol pikinini

Edukesen hem i pat blong plan blong God. Insaed long skripja i talem: “Lukaotem ol toktok blong waes tingting insaed long ol buk we oli moa gud; lukaotem blong lanem samting, tru long stadi, mo tu, tru long fet” (Doktrin mo Ol Kavenan 88:118). Taem yumi stap lanem samting mo gro, bae yumi lanem moa abaot plan blong God long yumi.

Jisas Kraes i wan eksampol blong wan man we i save gud blong lanem samting. Ol skripja oli tijim yumi se Jisas “i groap moa long waes blong hem” (Luk 2:52). Papa long Heven bae i blesem yu mo helpem yu blong lanem samting. Bae Hem i blesem ol pikinini blong yu taem oli lanem mo folem eksampol blong Jisas.

Presiden Gordon B Hinckley i tijim se “edukesen hem i ki ia we bae i openem doa blong janis”(Let Virtue Garnish Thy Thoughts Unceasingly,” Liahona, May 2007, 116). Hemia i minim se edukesen i save helpem yu mo ol pikinini blong yu blong lanem ol niu skil. Hem i save helpem yu blong tijim ol narawan mo lukaotem famli blong yu.

Tingting mo Prea

Tingting mo prea abaot wanem ol samting we yu bin lanem. Raetemdaon eni tingting we yu gat, o, ol aedia we i kam tru long Tabu Spirit. ?Wanem nao yu ting se Lod i wantem yu blong mekem?

Aktiviti

Luk ol pikja andanit ia. Tingting mo toktok raon long wanem nao yu luk, we ol man oli stap mekem long wanwan pikja ia. ?Olsem wanem nao yu ting se fasin blong stap lanem samting mo edukesen i helpem ol man long ol pikja ia?

woman i stap wivim ol drae lif

man i stap stadi long kompiuta

woman i stap ridim pepa

woman i stap makem man

man i stap bildim samting

man mo pikinini

woman i stap yusum masin blong mane

Toktok wetem Famli blong Yu

Toktok wetem famli blong yu abaot wanem yu bin lanem. Toktok raon long ol kwestin andanit ia. Askem ol memba long famli blong blong yu, blong oli serem ol tingting blong olgeta mo lisin long wanwan long olgeta.

• ?Blong stap folem eksampol blong Jisas, i helpem yu olsem wanem long skul?

• ?Olsem wanem nao edukesen i save helpem yu long laef blong yu?

• ?Wanem nao yumi save mekem olsem wan famli blong helhelpem wanwan long yufala blong lanem samting mo groap?

yang gel i stap kala wetem famli