“6: Yusum Taem Wetem Waes,” Helpem Ol Pikinini blong Yu blong Gat Sakses long Skul: Gaedbuk blong Papa mo Mama (2021)
“6: Yusum Taem Wetem Waes,” Helpem Ol Pikinini blong Yu blong Gat Sakses long Skul: Gaedbuk blong Papa mo Mama
6
Yusum Taem Wetem Waes
Ol Kwestin blong Tokbaot
-
Lukluk ol pikja ia. ?Wanem nao yu luk?
-
?Wanem ol samting long laef blong yu we oli impoten moa?
-
?Olsem wanem nao yu save yusum moa taem blong mekem ol samting we oli moa impoten, long yu mo famli blong yu?
Lanem Samting
Taem i wan presen we i kam long Papa long Heven. Yumi mas tingting gud abaot olsem wanem yumi stap yusum taem blong yumi. I gat plante wei blong yusum taem evri dei. Yumi wok, pleiplei, mekem kaekae, prea, mekem ol wok blong haos, stadi, mo mekem plante nara samting. Yumi mas jusum ol bes wei blong yusum taem blong yumi.
Mekem wan plan blong helpem yu blong yusum gud taem blong yu. Tingting abaot wanem yu gat blong mekem long wan dei. ?Wanem ol samting we oli moa impoten? ?Wanem ol samting we oli no impoten tumas? Plan blong mekem ol samting we oli moa impoten faswan. Yusum smol taem nomo, long ol samting we oli no impoten, mo oli no helpem yu mo famli blong yu blong kasem ol gol blong yufala.
Yu mo famli blong yu i save toktok tugeta oltaem abaot wanem i impoten. Yu save mekem wan plan blong helpem wanwan long yufala blong yusum taem blong yufala wetem waes.
Tingting mo Prea
Tingting long wanem yu bin lanem. Raetemdaon eni tingting we yu gat, o, ol aedia we oli kam long Tabu Spirit. ?Wanem nao i moa impoten long laef blong yu? ?Wanem wan wei we yu save yusum moa taem blong mekem ol samting we oli moa impoten long laef blong yu?
Aktiviti
I gat plante wei we yumi save yusum taem blong yumi. Hemia sam samting we yu save mekem long wan dei:
-
Ridim ol skripja
-
Wajem TV
-
Go long maket
-
Mekem koling blong yu long Jos
-
Prea
-
Stap long fon blong yu
-
Klinim haos
-
Plei
-
Helpem ol pikinini blong lanem samting
-
Mekem kaekae
-
Wok
-
Stadi
Yu save mekem tu ol narafala samting evri dei. Tingbaot evri samting we yu stap mekem.
?Wanem ol tu o trifala samting we yu wantem blong yusum moa taem long hem?
?Wanem ol tu o trifala samting we yu wantem blong no yusum tumas taem long hem?
Toktok wetem Famli blong Yu
Toktok wetem famli blong yu abaot wanem we yu lanem. Toktok raon long ol kwestin andanit ia. Askem ol memba blong famli blong yu, blong oli serem ol tingting blong olgeta mo lisin long wanwan long olgeta.
-
?Wanem ol samting we oli moa impoten long famli blong yumi?
-
?Wanem nao yumi save mekem olsem wan famli, blong yusum gud taem blong yumi blong mekem ol samting we oli impoten long yumi?
-
?Olsem wanem nao yumi save helpem wanwan long yumi blong yusum gud taem blong yumi?