“5: Lanem Samting Tugeta long Hom,” Helpem Ol Pikinini blong Yu blong Gat Sakses long Skul: Gaedbuk blong Papa mo Mama (2021)
“5: Lanem Samting Tugeta long Hom,” Helpem Ol Pikinini blong Yu blong Gat Sakses long Skul: Gaedbuk blong Papa mo Mama
5
Lanem Samting Tugeta long Hom
Ol Kwestin blong Tokbaot
-
Lukluk ol pikja ia. ?Wanem nao yu luk?
-
?Olsem wanem nao ol pikinini oli lan taem oli wok mo pleiplei tugeta?
-
?Wanem nao yu mekem wetem ol pikinini blong yu antap long skul, we i helpem olgeta blong lan?
Lanem Samting
Ol famli oli save mekem ol hom oli kam ol ples we Tabu Spirit i save helpem olgeta blong lanem samting. Oli save tokbaot Jisas Kraes mo traem blong kam moa olsem Hem. Yu save mekem fulap samting blong invaetem Tabu Spirit insaed long hom blong yu mo kipim famli blong yu i strong. Yu save prea mo ridim olgeta skripja olsem wan famli evri dei, laef folem gospel, mo givim seves long ol narawan.
Taem we Tabu Spirit i stap long hom blong yu, bae famli blong yu i tritim wanwan insaed long hom wetem kaen fasin mo lav. Taem ol pikinini blong yu oli filim se oli lavem olgeta, oli filim sapot we oli nidim blong save gat sakses.
Ol samting ia, bae oli help blong hom blong yu i wan ples blong lav mo lanem samting:
-
Gat fasin blong save wet longtaem.
-
Traem blong no kros.
-
Spendem taem tugeta.
-
Gat gudfala taem.
-
Lisin gud.
-
Presem ol pikinini blong yu taem oli stap traem blong lanem samting.
-
Yusum ol toktok we oli kaen.
Tingting mo Prea
Tingting long wanem yu bin lanem. Raetemdaon eni tingting we yu gat, o, ol aedia we oli kam long Tabu Spirit. ?Wanem nao yu ting se Lod i wantem yu blong mekem? ?Wanem ol samting we yu save mekem blong gat, o soem moa lav insaed long hom blong yu?
Aktiviti
Tingbaot ol samting we bae i save helpem hom blong yu blong i fulap wetem lav. Raetemdaon tu o tri aedia blong ol samting we yumi save luk, harem, mo filim sapos hom blong yumi i fulap wetem lav.
?Wanem nao yu luk taem yu lukluk raon long hom blong yu?
-
Eksampol: Pipol oli helpem wanwan long olgeta.
?Wanem nao yu harem ol famli memba blong yu oli stap talem long wanwan long olgeta?
-
Eksampol: Ol kaen toktok.
?Wanem nao ol memba blong famli oli filim taem oli stap long hom?
-
Eksampol: Oli filim se oli lavem olgeta.
Helpem ol pikinini blong yu taem ol samting i kam had long olgeta. Hemia i wan eksampol long olsem wanem yu save soem lav blong yu long gel blong yu we i stap gat wan hadtaem:
Gel blong yu i mekem wan bigfala eksam blong hem. Hem i wok had tumas. Be hem i gat wan mak we i nogud mo hem i harem nogud. Naoia hem i mas tekem eksam ia bakegen long nekis sikis manis. Bae yu mas pem eksam fi ia bakegen.
Hemia i wan had samting. Yu mo gel blong yu, yutufala tugeta i harem nogud. Hemia sam samting we yu save talem long hem blong soem lav blong yu long hem:
-
Mi lavem yu. Mi save se yu wok had tumas from. Mi stap ia oltaem blong yu.
-
Mi harem nogud se yu no karem wan gudfala mak long eksam blong yu. Mi save se yu harem nogud tu. ?Wanem nao mi save mekem blong helpem yu?
Toktok wetem Famli blong Yu
Toktok wetem famli blong yu abaot wanem yu bin lanem. Toktok raon long ol kwestin andanit ia. Askem ol memba blong famli blong oli serem ol tingting blong olgeta mo lisin long wanwan long olgeta.
-
?Wanem nao yumi save mekem olsem wan famli blong gat Tabu Spirit i stap moa long hom?
-
?Olsem wanem nao yumi save soem moa lav mo respek long wanwan long yumi?
-
?Olsem wanem nao lav insaed long hom blong yumi i helpem yumi evriwan blong lan?