“3: Yumi Ol Pikinini blong God,” Helpem Ol Pikinini blong Yu blong Gat Sakses long Skul: Gaedbuk blong Papa mo Mama (2021)
“3: Yumi Ol Pikinini blong God,” Helpem Ol Pikinini blong Yu blong Gat Sakses long Skul: Gaedbuk blong Papa mo Mama
3
Yumi Ol Pikinini blong God
Ol Kwestin blong Tokbaot
-
Lukluk ol pikja ia. ?Wanem nao yu luk?
-
?Wanem nao yu save mekem blong helpem ol pikinini blong yu, blong oli save se oli ol pikinini blong God?
-
Taem oli save se oli ol pikinini blong God, ?olsem wanem nao hemia i helpem olgeta blong gat sakses long skul?
Lanem Samting
Tijim ol pikinini blong yu, se yumi ol pikinini blong God. Yumi evriwan i save kam olsem Hem taem yumi stap lanem samting mo groap. Helpem ol pikinini blong yu blong oli andastanem se, oli save gat sakses long skul from se oli ol pikinini blong God. Ol aedia andanit ia bae i helpem ol pikinini blong yu blong oli gat sakses long skul:
Lukluk Nomo long Skul
Helpem ol pikinini blong yu blong oli go long skul mo stap long skul long taem. Oli mas traem blong go long skul evri dei mo rere from ol impoten eksam.
Traem Bes blong Yu
Tijim ol pikinini blong yu blong traem bes blong olgeta mo no givap taem ol samting oli kam had.
Stap Obei
Tijim ol pikinini blong yu blong obei long ol komanmen, papa mo mama blong olgeta mo ol rul blong skul. Bae oli kasem blesing from se oli stap obei.
Askem Help
Tijim ol pikinini blong yu blong askem help mo stap lanem samting aot long ol narafala man. Prea wetem olgeta taem oli no andastanem olsem wanem blong mekem wan samting.
Toktok Tugeta
Toktok wetem ol pikinini blong yu mo letem olgeta oli save se, oli save kam luk yu taem oli nidim help. Askem olgeta abaot ol samting we i had long olgeta. Wok tugeta blong stretem ol problem.
Biliv long Yuwan
Helpem ol pikinini blong yu, blong oli biliv long olgetawan mo tingting long ol gudfala samting. Taem ol pikinini oli tingting long ol gudfala samting abaot olgetawan, oli filim se oli save gat sakses.
Tingting mo Prea
Tingting long wanem we yu bin lanem. Raetemdaon eni tingting we yu gat o ol aedia we i kam tru long Tabu Spirit. ?Wanem nao yu ting se Lod i wantem yu blong mekem? ?Wanem nao yu save mekem blong helpem ol pikinini blong yu blong oli save gat sakses long skul?
Aktiviti
Yumi ol pikinini blong God mo Hem i lavem yumi. Hem i lavem yu mo famli blong yu. Tingting long ol wei we God i stap lukluk evri memba blong famli blong yu. Long emti spes andanit ia, raetem sam toktok o droem sam pikja blong soem wan o tu gudfala samting abaot wanwan insaed long famli blong yu. Serem olgeta samting ia wetem famli blong yu.
Eksampol
Kofi:
Priscilla i kaen.
Fehi i hapi.
Sione i wan man blong wokhad.
Droem ol pikja blong yu mo raetem ol toktok blong yu long emti spes andanit:
Toktok wetem Famli blong Yu
Toktok wetem famli blong yu abaot wanem yu bin lanem. Toktok raon long ol kwestin andanit ia. Askem ol memba blong famli blong yu, blong oli serem ol tingting blong olgeta mo lisin long wanwan long olgeta.
-
Taem yumi save olsem wanem God i lukluk mo lavem ol pikinini blong Hem, ?olsem wanem nao hemia i helpem yumi long laef blong yumi?
-
Taem yu save se yu wan pikinini blong God, ?olsem wanem nao hemia i helpem yu blong gat sakses long skul?