4

Mekem Ol Gol blong Helpem Ol Pikinini blong Yu blong Gat Sakses

Ol Kwestin blong Tokbaot

1. Lukluk ol pikja ia. ?Wanem nao yu luk?

2. ?From wanem nao hem i impoten blong gat ol gol?

3. ?Yu filim olsem wanem taem yu komplitim wan gol we yu bin mekem?

Lanem Samting

Sapos yu wantem stretem wan problem o mekem wan samting, yu nid blong disaed long olsem wanem bae yu mekem. Hemia nao oli singaotem blong mekem wan gol. Blong stap helpem ol pikinini blong yu blong lanem blong mekem ol gol, bambae i helpem olgeta blong kasem sakses.

Yu wetem ol pikinini blong yu, i save mekem wan gol long fofala isi step ia:

1. Faenemaot

2. Mekem Plan

3. Tekem Aksen

4. Tingtingbak

Lukluk eksampol daon ia blong luk olsem wanem ol step ia i save helpem yu wetem ol pikinini blong yu blong mekem ol gol.

1. Faenemaot:

   ?Wanem nao yu nid blong kam antap long hem o blong jenisim?

   Gel blong mi i stap fesem hadtaem long matematik. Hem i bin askem help long mi, be mi mi nogud long matematik.

2. Mekem Plan:

   ?Wanem nao ol step we yu nid blong tekem?

   Bae mi toktok long tija blong hem wetem ol nara papa mo mama abaot ol wei blong helpem gel blong mi wetem matematik.

3. Tekem Aksen:

   ?Yu nidim moa help?

   Mi bin prea from help. Mi filim se mi sapos blong toktok wetem wan memba long wod blong mi we i wan tija. Hem i talem se bambae hem i tijim gel blong mi. Mifala i putum wan taem blong tufala i mit evri wik.

4. Tingtingbak:

   ?Wanem nao yu bin lanem? ?Yu nidim blong mekem wan niu gol o gohed long gol ia?

   Mi nid blong jek evri dei wetem gel blong mi blong luk olsem wanem nao hem i stap progres long matematik asaenmen blong hem mo luklukbak long ol not blong hem.

Tingting mo Prea

Tingting long wanem yu bin lanem. Raetemdaon eni tingting we yu gat o ol aedia we oli kam long Tabu Spirit. ?Wanem nao yu ting se Lod i wantem yu blong mekem? ?Olsem wanem nao yu save soem eksampol long ol pikinini blong yu blong taem yu stap mekem mo komplitim ol gol?

Aktiviti

Tingbaot wan samting we yu wantem mekem blong kam antap moa long hem, o blong jenisim. Yusum tufala fasfala step ia blong mekem wan gol.

Afta we yu mekem plan blong yu, kambak long aktiviti ia mo komplitim tufala nekis step ia:

1. Faenemaot:

   ?Wanem nao yu nidim blong kam antap moa long hem o blong jenisim?

2. Mekem Plan:

   ?Olsem wanem nao bae yu save kam antap moa o mekem jenis ia? ?Wanem ol step we yu nid blong tekem?

3. Tekem Aksen:

   ?Olsem wanem nao fet long Jisas Kraes i helpem yu blong kasem gol blong yu? ?Yu nidim moa help?

4. Tingtingbak:

   ?Wanem nao yu bin lanem? ?Yu ting se yu nid blong mekem wan niu gol o gohed long gol ia?

Toktok wetem Famli Blong Yu

Toktok wetem famli blong yu abaot wanem yu bin lanem. Askem ol memba blong famli blong yu blong serem ol tingting blong olgeta mo lisin long wanwan long olgeta.

• Helpem ol pikinini blong yu blong mekem ol gol. Prea tugeta blong save wanem oli sapos blong mekem.

• Raetem gol blong wanwan pikinini daon ia. Tokbaot olsem wanem bae yu helpem wanwan pikinini blong kasem gol blong hem.