9

Kam Pat long Edukesen blong Ol Pikinini blong Yu

Ol Kwestin blong Tokbaot

1. Lukluk ol pikja ia. ?Wanem nao yu luk?

2. ?Olsem wanem yu save kam pat blong edukesen blong pikinini blong yu?

3. ?Olsem wanem ol pikinini blong yu oli save askem help long ol tija sapos oli no andastanem samting?

tija i tijim ol pikinini long klas

mama i rid wetem pikinini

Lanem Samting

Yu save toktok wetem ol pikinini blong yu, wok wetem olgeta, pleiplei wetem olgeta, rid wetem olgeta, mo lisin long olgeta. Hemia bae helpem ol pikinini blong yu blong filim lav blong yu. Mo yu save askem abaot wanem oli stap lanem long skul. Askem olgeta abaot wanem samting we isi long olgeta. Askem olgeta abaot wanem samting we i no isi long olgeta. Askem olgeta, olsem wanem oli filim abaot tija blong olgeta. Sapos yu ting se bae yu save helpem ol pikinini blong yu, yu save askem ol tija blong olgeta blong save gat wan janis blong toktok wetem olgeta.

Plante taem ol tija oli laekem taem ol papa mo mama oli toktok wetem olgeta, mo askem olgeta olsem wanem oli save helpem ol pikinini blong olgeta blong oli wok gud long skul.

Bifo yu mit wetem ol tija blong ol pikinini blong yu, raetemdaon ol kwestin we yu wantem askem. Hemia sam samting we yu save mekem:

1. Talem tangkyu long tija blong tijim pikinini blong yu.

2. Askem ol tija olsem wanem ol pikinini blong yu oli stap wok long klas blong olgeta.

3. Askem ol tija olsem wanem yu save helpem ol pikinini blong yu blong wok gud long skul.

4. Askem ol tija sapos i gad sam impoten deit we yu mas save.

Sapos yu no save mit wetem ol tija ia, bae yu save gat janis blong kasem olgeta long ol wei ia.

pikinini i stap raet long blakbod.

• Sendem wan teks mesej.

• Sendem wan imel.

• Toktok long mobael fon.

• Raetem leta

I gat plante man mo woman oli stap helpem ol pikinini blong yu blong lanem samting evri dei. Tingbaot ol nara man mo woman we yu save toktok long olgeta abaot fasin blong lanem samting blong ol pikinini blong yu.

Tingting mo Prea.

Tingtingbak long wanem yu bin lanem. Raetemdaon eni tingting we yu gat, o, ol aedia we oli kam long Tabu Spirit. Olsem wanem taem yu toktok wetem ol nara man mo woman abaot fasin blong lanem samting blong ol pikinini blong yu i save helpem ol pikinini blong yu long skul?

Aktiviti

Raetemdaon tri samting we yu wantem blong askem o tokbaot wetem ol tija blong ol pikinini blong yu o ol nara man mo woman we oli stap helpem ol olgeta blong lanem samting.

Toktok wetem Famli Blong Yu

Toktok wetem famli blong yu abaot wanem yu bin lanem. Toktok raon long ol kwestin we oli stap andanit ia. Askem ol memba blong famli blong serem ol tingting blong olgeta mo lisin long ol narawan.

• ?Huia olgeta pipol, insaed long laef blong yumi, we oli stap helpem yumi blong lanem samting?

• ?Olsem wanem nao ol narawan oli stap helpem wanwan memba blong famli long skul?

bubuwoman i helpem pikinini blong stadi